1-2. Ana chitukambilane chichi munganiji?

NDAŴI sine tukusalipikana kuti umi wetu uli wangatamilisya soni kuti masiku getu ‘gagumbele ni yisawusyo.’ (Yob. 14:1) Myoyo yili yakupikanika kuti yeleyi yikusatutengusya soni kutujasikasya mtima. Mwelemu ni mwaŵalipikanilaga ŵakutumichila ŵane ŵa Mlungu ŵakala. Mwamti ŵane ŵayikaga pakumbila kuwa. (1 Ayi. 19:2-4; Yob. 3:1-3, 11; 7:15, 16) Nambope Yehofa ndaŵi syejinji ŵalimbikasyaga jemanjaji soni kwapa machili. Yaŵasimene nayo ŵanduŵa yalembedwe ni chakulinga chakuti yitulimbikasyeje soni kutukamuchisya.—Alo. 15:4.

² Munganiji chitukambilane ya ŵakutumichila ŵane ŵa Yehofa ŵaŵakombwele kupilila yindu yakutengusya. Chitukambilane ya Yosefe juŵaliji mwanache jwa Yakobo, Naomi ni Lute ŵaŵaliji achakongwe ŵamasije, Mlefi juŵalembile Salimo 73, soni ndumetume Petulo. Ana Yehofa ŵalimbikasisye chamtuli jemanjaji? Ana m’weji mpaka tulijiganye chichi pa yindu yaŵasimene nayo ŵanduŵa? Kwanga kwa yiwusyoyi chikutukamuchisye kumanyilila kuti Yehofa “akusaŵa chiŵandika ni ŵandu ŵa mtima wekasisye,” soni kuti ‘akusiŵakulupusya ŵandu ŵajasile mtima.’—Sal. 34:18.

3-4. Ana Yosefe jwasimene ni yindu yapi pajwaliji mnyamata?

³ Yosefe jwaliji ali akwete yaka 17 pandaŵi jele Yehofa ŵamtendekasisye kuti asagamile yakutendekwa yiŵili. Yaŵasagamile Yosefe yalosisye kuti lisiku line chachikola udindo wekulungwa soni wakusosekwa mnope. (Gen. 37:5-10) Pali papite kandaŵi panandi, Yosefe jwasimene ni yindu yakogoya. Ŵachibale ŵakwe ŵamtendele yachipongwe mwamti ŵamsumisye. Kaneko jwalakwe jwaŵele kapolo kwa nduna jine ja ku Iguputo lina lyakwe Potifala.  (Gen. 37:21-28) Mwa kandaŵi kamnono umi wa Yosefe wachenjile mnope. Jwalakwe jwalekangene ni babagwe ŵaŵamnonyelaga mnope, kaneko jwaŵele kapolo ku Iguputo kunyumba ja mundu juŵalambilaga milungu jaunami.—Gen. 39:1.

⁴ Kaneko Yosefe jwasimenesoni ni yindu yine yakogoya mnope. Ŵamkwakwe Potifala ŵamlambuchisye Yosefe kuti jwasakaga kwakamulila. Mmalo mwakuti Potifala awungunye ya nganiji, jwalakwe ŵamŵisile Yosefe kundende kwaŵamtaŵile ni maunyolo. (Gen. 39:14-20; Sal. 105:17, 18) Ana akuganisya kuti Yosefe jwapikanaga uli pandaŵi jaŵamlambuchisye kuti jwasakaga kwakamulila ŵamkwakwe Potifala? Aganichisyesoni yaŵaŵechetaga ŵandu pakwamba ya Yehofa pandaŵi jaŵapikene ngani jakumlambuchisya Yosefeji. Kusala yisyene yindu yeleyi yamtengwisye mnope Yosefe.

5. Ana Yosefe jwatendaga chichi kuti amalane ni yakutengusya?

⁵ Pandaŵi jele Yosefe jwaliji kapolo soni mkayidi, pangali chakatesile kuti achenje yindu paumi wakwe. Ana chichi chachamkamuchisye kuti ayiwoneje yindu mwakuŵajilwa? Mmalo mwakutamila kuganichisya ya yindu yanganaŵa akombwele kutenda, jwalakwe jwalipelekaga mnope pa masengo gaŵampaga kuti akamuleje. Yosefe jwalolechesyaga kuti akutenda yindu yakumsangalasya Yehofa. Yeleyi yatendekasisye kuti Yehofa ampeje upile pa yindu yosope yaŵatendaga.—Gen. 39:21-23.

6. Ana komboleka kuti yaŵasagamile Yosefe yamlimbikasisye chamtuli?

⁶ Kombolekasoni kuti Yosefe jwapataga machili paŵaganichisyaga yindu yaŵasagamile pandaŵi jaŵaliji mwanache. Yeleyi yamkamuchisye kumanyilila kuti chachawonasoni ŵachibale ŵakwe soni kuti yakusawusya yaŵasimanaga nayo yichimala. Yeleyitu ni yayatendekwe panyuma pakwe. Yosefe ali akwete yaka chiŵandika 37, yaŵasagamile yila yatandite kukwanilichikwa m’litala lyakuti jwalakwejo nganajembecheyaga.—Gen. 37:7, 9, 10; 42:6, 9.

7. Ana lilemba lya 1 Petulo 5:10, likulosya kuti chichi champaka chitukamuchisye kupilila yakulingwa?

 ⁷ Yatukulijiganya. Yaŵasimene nayo Yosefe yikutukumbusya kuti ŵandu mpaka atutendele yindu yangali chilungamo. Atamose ŵakulupilila achimjetu mpaka atutendelesoni yeleyi. Nambo naga tukumwona Yehofa kuti ali Lwala lwetu, kapena Mkulupusyo jwetu, ngasitujasa mtima ni kuleka kumtumichila jwalakwe. (Sal. 62:6, 7; aŵalanje 1 Petulo 5:10.) Akumbuchileje kuti Yehofa ŵamlosisye sagamisi Yosefe pandaŵi jaŵaliji ni yaka 17. Yeleyi yikulosya kuti Yehofa akusiŵakulupilila ŵakutumichila ŵakwe ŵachinyamata. Masiku agano ŵachinyamata ŵajinji akusatenda yindu mpela Yosefe. Jemanjaji akusamkulupilila mnope Yehofa. Ŵachinyamata ŵane aŵele ali mkuŵichidwa mundende ligongo lyakusaka kuŵa ŵakulupichika kwa Yehofa.—Sal. 110:3.

8. Ana Naomi ni Lute ŵasimene ni yindu yamtuli?

⁸ Naomi yimpepe ni liŵasa lyakwe ŵatyosile ku Yuda ligongo lya sala. Liŵasali lyasamile ku Mowabu. Ali kweleko, Elimeleki ŵaŵaliji ŵamkwakwe Naomi ŵawile. Yeleyi yatendekasisye kuti Naomi asigale ni ŵanache ŵakwe ŵaŵili. Pali papitile ndaŵi ŵanacheŵa ŵalombele achakongwe ŵachimowabu, ŵaŵaliji Lute ni Olipa. Pali pamasile yaka chiŵandika 10 ŵanache ŵa Naomi ŵala ŵawilesoni. Jemanjaji ŵawile mkanakole ŵanache. (Lut. 1:1-5) Kusala yisyene achakongwe ŵatatuŵa chakamwile mnope chanasa ligongo lya chiwachi. Nambopetu, yikaliji yakomboleka kuti Lute ni Olipa apate ulombela. Nambo ana ŵani ŵakamsamalilaga Naomi jwele pandaŵiji ŵaliji ali achekulwipe? Naomi yamtengwisye mnope yaŵasimene nayoyi mwamti jwayikene pakuŵecheta kuti, “Akangolanga une kuti Naomi, nambo angolanjeje kuti Mala, pakuti Mlungu jwamachiligose awutesile umi wangu kuti usimane ni yipwetesi.” Naomi jwaganisisye yakuwujila ku Betelehemu, m’chilambo cha Yuda. Paulendowu, Lute ŵalongene nawo.—Lut. 1:7, 18-20.

9. Ana lilemba lya Lute 1:16, 17, 22, likulosya kuti Lute jwamlimbikasisye chamtuli Naomi?

⁹ Naomi jwakombwele kumalana ni yakusawusya yosopeyi ligongo ŵandu ŵane ŵamnonyelaga. Mwachisyasyo, Lute jwalosisye kuti akusamnonyela Naomi mwakuŵa najo ndaŵi syosope. (Aŵalanje Lute 1:16, 17, 22.) Pandaŵi jaŵaliji ku Betelehemu, Lute jwakamulaga masengo mwakulipeleka kuti apate yakulya ya jwalakwejo yimpepe ni Naomi. Yeleyi yatendekasisye kuti Lute akole mbili jambone.—Lut. 3:11; 4:15.

10. Ana Yehofa jwalosisye chamtuli kuti akusiŵaganichisya ŵandu ŵakulaga mpela Naomi soni Lute?

¹⁰ Yehofa ŵapele Ayisalayeli lilamusi lilyalosyaga kuti jwalakwe akusiŵaganichisya ŵandu ŵakulaga mpela Naomi soni Lute. Jwalakwe ŵasalile Ayisalayeli kuti pakugowola akagowolaga mumbali mwa migunda jawo ni chakulinga chakuti ŵandu ŵakulaga awululeje. (Lef. 19:9, 10) Myoyo Naomi ni Lute nganasosekwaga kuti akaŵendeje yakulya.

11-12. Ana Bowasi ŵatendekasisye chamtuli Naomi ni Lute kuŵa ŵakusangalala?

¹¹ Lute jwawululaga mumgunda wa mundu jwine jwakusichila lina lyakwe Bowasi. Bowasi yamkwayiye mnope pakulola yindu yambone yaŵatendaga Lute kwa Naomi soni chinonyelo chaŵamlosyaga jwalakwe. Pali papitile ndaŵi Bowasi jwalombene ni Lute soni jwalakwe jwasumile malo gagaliji ga liŵasa lya Elimeleki ŵamkwakwe Naomi, gele panyuma pakwe gaŵele ga ŵanache ŵa Lute. (Lut. 4:9-13) Liŵasali lyaŵeleche mwanache jwaŵampele lina lyakuti Obedi, jwaŵaŵele angangagwe ŵa Mwenye Daudi.—Lut. 4:17.

¹² Mwangakayichila, Naomi jwasangalele mnope soni jwamyamichile Yehofa ligongo lya kupagwa kwa Obedi. Nambopetu panasoni yindu yine yambone mnope yachachisangalala  nayo Naomi ni Lute. Jemanjaji pachachijimuka chachimanyilila kuti Obedi jwaliji mu msela wa achinangolo ŵa Mesiya, Yesu Klistu.

13. Ana mpaka tulijiganye chichi kutyochela pa yindu yaŵasimene nayo Naomi ni Lute?

¹³ Yatukulijiganya. Patukusimana ni yakusawusya mpaka tutenguche soni kwasa mtima. Soni ndaŵi sine mpaka tutande kuganisya kuti yakusawusyayo nganiyiŵa yimasile. Nambope, pandaŵi mpela jeleji tukusosekwa twadalileje mnope Atati ŵetu ŵakwinani soni ŵakulupilila achimjetu. Yili yisyene kuti Yehofa ndaŵi sine nganaŵa atyosisye yakusawusyayo. Mwachisyasyo, jwalakwe nganiŵajimusya ŵamkwakwe Naomi soni ŵanache ŵakwe. Nambope Yehofa chachitukamuchisya kuti tupilile yakusawusyayo. Jwalakwe mpaka atende yeleyi kupitila mwa abale ni alongo ŵetu.—Mis. 17:17.

14. Ligongo chichi Mlefi jwine jwatandite kwasa mtima?

¹⁴ Mundu juŵalembile Salimo 73, jwaliji Mlefi. Jwalakwe jwakwete upile ŵakutumichila pa Nyumba ja Yehofa. Nambope ndaŵi jine jwasimine ni yindu yayikatendekasisye kuti atenguche ni kwasa mtima. Mlefiju jwatandite kwatendela jelasi ŵandu ŵakulikwesya soni ŵakutenda yakusakala. Jwalakwe ŵatendaga jelasi ligongo lyakuti yindu yajendelaga chenene ŵanduŵa kulekangana ni jwalakwejo. (Sal. 73:2-9, 11-14) Jemanjaji ŵawonekaga kuti akwete yosope, mpela chipanje, soni umi wambone. Mlefiju paŵayiŵeni yeleyi jwatandite kwasa mtima mwamti jwatite, “Une sunjile mtima wangu wawusyela, naŵile m’myala kulosya kuti nganindemwa kose, nambo pangali chingupata kose.” Kusala yisyene, yeleyi yikamtendekasisye Mlefiju kuleka kumtumichila Yehofa.

15. Ana lilemba lya Salimo 73:16-19, 22-25, likulosya kuti Mlefi jwine jwakombwele chamtuli kumalana ni yakutengusya?

¹⁵ Aŵalanje Salimo 73:16-19, 22-25. Kaneko Mlefiju jwajinjile “m’Nyumba ja AMBUJE.” Pajwaliji kweleko yimpepe ni ŵakulambila achimjakwe, mtima ŵakwe ŵatemi mmalo mwamti jwatandite kuganisya chenene soni jwapopesile kwa Yehofa. Kaneko jwalakwe jwatandite kuyiwona yindu mwakuŵajilwa soni jwamanyilile kuti yindu yaŵayisakagayo yikajonasile unasi ŵakwe ni Yehofa. Jwalakwe jwamanyilesoni kuti ŵakusakala “ali pamalo gakutelesya” soni kuti  mundaŵi “jamnono tachijonasika.” Kuti akombole kumalana ni yindu yakutengusyayi, Mlefiju jwasosekwe kuti atande kuyiwona yindu mpela mwakusayiwonela Yehofa. Pajwatesile yeleyi, jwatandite kuŵa jwakusangalala soni jwalesile kudandawula. Jwalakwe jwayikene pakuŵecheta kuti, “Pachilambo chapasi pano pangali jwine jungumsaka akaŵe ŵalakwe [Yehofa] Mlungu.”

16. Ana tukulijiganya chichi kutyochela kwa Mlefi jwine?

¹⁶ Yatukulijiganya. Tukatendelaga jelasi ŵandu ŵakusakala ŵakusawoneka kuti yindu yikwajendela chenene. Tumanyilileje kuti kusangalala kwa jemanjaji kuli kwangatamilisya. (Jwak. 8:12, 13) Naga tukutanda kwakumbila mpaka yitutendekasye kuti tukasangalalaga soni mpaka tujonanje unasi ŵetu ni Yehofa. Naga akuwona kuti akwete kamtima kakumbila yindu ya ŵandu ŵakusakala, akusosekwa kutenda yindu mpela mwaŵatendele Mlefi jula. Akuyeje malamusi gambone gakusatupa Yehofa soni asyoŵekaneje ni ŵandu ŵakusamtumichila jwalakwejo. Naga akusamnonyela Yehofa kupunda chindu chilichose, chachiŵa ŵakusangalala mnope, soni chachipitilisya kwenda pa litala lyakwawula ku “umi usyesyene.”—1 Tim. 6:19.

17. Ana ni yindu yapi yayamtendekasisye Petulo kutenguka mnope?

¹⁷ Ndumetume Petulo jwaliji mundu jwakulimba mtima, nambo ndaŵi sine jwatendaga yindu mkanaganisye chenene soni jwanonyelaga kusala nganisyo syakwe mwachitema. Yeleyi yatendekasyaga kuti aŵecheteje soni kutenda yindu yele panyuma pakwe ŵalijimbaga nayo magambo. Mwachisyasyo, Yesu ali ŵasalile ŵakulijiganya ŵakwe kuti chachilagasidwa ni kuwulajidwa, Petulo ŵamjamwiche jwalakwe, mwamti jwaŵechete kuti, “Pepani Ambuje, yikaŵa myoyo. Mlungu ngasakunda yeleyi.” (Mat. 16:21-23) Myoyo Yesu ŵamjamwiche Petulo. Pandaŵi jele ŵandu ŵayiche kukumkamula Yesu, Petulo jwatesile yindu mwakupupuluma mnope. Jwalakwe jwamkatile liwiwi kapolo jwa jwamkulungwa jwa ŵakutaga mbopesi. (Yoh. 18:10, 11) Pandaŵiji, Yesu ŵamjamwichesoni Petulo. Konjechesya pelepa, Petulo jwalilapililaga kuti ŵandumetume ŵane  komboleka tachimtila Yesu, nambo jwalakwe ngasatenda yeleyo. (Mat. 26:33) Nambotu Petulo nganatenda yindu yaŵasasileyi. Jwalakwe jwatandite kwajogopa ŵandu mwamti ŵamkanile Yesu kakwana katatu. Ligongo lya yeleyi Petulo jwatengwiche mnope mwamti ‘ŵakopweche pasa ni ŵalisile mnope.’ (Mat. 26:69-75) Petulo jwatandite kukayichila naga Yesu mpaka amkululuchile.

18. Ana Yesu ŵamkamuchisye chamtuli Petulo kuti akajasa mtima?

¹⁸ Nambopetu, Petulo nganakunda kuti yindu yeleyi yimtengusye mnope. Atamose kuti ŵatengwiche, nambope jwalakwe jwapitilisye kumtumichila Yehofa yimpepe ni ŵandumetume ŵane. (Yoh. 21:1-3; Mase. 1:15, 16) Ana chili chichi chachamkamuchisye? Pandaŵi jine, Yesu ŵamŵendile Mlungu kuti chikulupi cha Petulo chikamala. Yehofa jwajanjile lipopelo lyaŵapeleche Yesuli. Sonitu Yesu ŵamsalile Petulo kuti ajawule akalimbikasye Aklistu achimjakwe. Yesu ali ajimwiche, ŵawonechele kwa Petulo kuti amlimbikasye. (Luk. 22:32; 24:33, 34; 1 Akoli. 15:5) Lisiku line ŵandumetumeŵa ali alepele kuwulaga somba chilo chosope, Yesu jwawonechelesoni kwa jemanjaji. Pandaŵiji jwalakwe ŵamsalile Petulo kuti asale naga akusamnonyela yisyesyene Yesujo. Yesu ŵaliji ali amkululuchile mjakwe jwapamtimaju mwamti ŵampelesoni masengo gane.—Yoh. 21:15-17.

19. Ana lilemba lya Salimo 103:13, 14, likulosya kuti Yehofa akusayiwona mwamtuli yakulemwa yetu?

¹⁹ Yatukulijiganya. Yaŵatesile Yesu kwa Petulo yikulosya kuti jwalakwe akusiŵatendela ŵane chanasa. Mwelemutu ni mwaŵelelesoni Atati ŵakwe. Myoyo naga tulemwisye, tukalijimbaga mnope magambo ni kuliwonaga kuti Yehofa nganaŵa atukululuchile. Tukumbuchileje kuti Satana ni jwakusasaka kuti tulipikaneje chamti myiyi. Mmalo mwakwe tuganichisyeje yakusati Yehofa pakutunonyela m’weji. Jwalakwe akusamanyilila yakulepela yetu soni akusatukululuchila. M’wejisoni tukusosekwa kumsyasya Yehofa naga ŵane atumwechesye.—Aŵalanje Salimo 103:13, 14.

20. Ana mungani jakuyichisya tuchilijiganya chichi?

²⁰ Yaŵasimene nayo Yosefe, Naomi ni Lute, Mlefi soni Petulo yikutukamuchisya kumanyilila kuti Yehofa, “akusaŵa chiŵandika ni ŵandu ŵa mtima wekasiche.” (Sal. 34:18) Jwalakwe mpaka akunde kuti tusimane ni yakusawusya soni yindu yampaka yitutengusye. Nambope, Yehofa mpaka atukamuchisye kuti tupilile yakusawusyayi. Patukombwele kupilila, chikulupi chetu chikusalimba mnope. (1 Pet. 1:6, 7) Mungani jakuyichisya, tuchilijiganya yakusatenda Yehofa pakwakamuchisya ŵakutumichila ŵakwe ŵatengwiche ligongo lya yakulepela yawo kapena ligongo lya yakusawusya ya paumi.