MUNDU jwakulagasika nganisyo akusaŵa mpela atwichile katundu jwawusito mumtima mwakwe. (Mis. 12:25) Ana pakwete palagasiche nganisyo ni kuyiwonaga kuti nganaŵa akombwele kupilila? Naga yili myoyo nganaŵa jika. Komboleka ŵane mwa m’weji tukusitwasamalila ŵakulwala, kapena jwachinasi jwetu jwajasiche. Mwinesoni tukulaga ni ngosi syachilengedwe kapena yakusawusya yine. Nambo ana chichi champaka chitukamuchisye kuti tukombole kulimbana ni kulagasika nganisyoku? *

Chisyasyo cha Mwenye Daudi mpaka chitukamuchisye kumanyilila yampaka tutende kuti tukombole kulimbana ni kulagasika nganisyo. Jwalakwe jwasimanaga ni yakusawusya yejinji pa umi wakwe, mwamti ndaŵi sine umi wakwe waŵaga pangosi. (1 Sam. 17:34, 35; 18:10, 11) Ana chichi chachamkamuchisye Daudi kuti akombole kulimbana ni kulagasika nganisyo? Ana mpaka tukuye chamtuli chisyasyo chakwechi?

Pandaŵi jine, Daudi jwasimene ni yakusawusya yejinji ndaŵi jimo. Agambe ganisya yaŵasimene nayo Daudi pajwasakaga kuwulajidwa ni Mwenye Sauli. Daudi ni achalume ŵaŵaliji nawo paŵatyochelaga kungondo, ŵasimene kuti achimmagongo ŵawo ajiŵile katundu jwawo, nyumba syawo sili sijochedwe ni moto, nambosoni achiŵamkwawo ni ŵanache ŵawo ali ajigalidwe ku ukapolo. Ana Daudi jwatesile chichi? Baibulo jikusati, “Daudi ni ŵandu ŵakwe ŵatandite kulila nipo nganaleka kose mpaka machili gakulila gamasile.” Nambosoni Daudi jwalagasiche mnope nganisyo ligongo lyakuti achalume ŵaŵaliji nawowo “ŵaŵechetaga yakumponya maganga.” (1 Sam. 30:1-6) Apatu Daudi jwasimene ni yakusawusya yitatu yekulungwakulungwa ndaŵi jimpepe. Liŵasa lyakwe lyaliji pangosi, jwajokopaga kuti achalume ŵaŵaliji nawo chamwulaje, nombe Mwenye Sauli jwaliji chiŵela kumsosasosa jwalakwe. Kusala yisyene, Daudi jwalagasiche mnope nganisyo.

Ana kaneko Daudi jwatesile chichi? Mwachitema jwalakwe jwakundile kuti, ‘AMBUJE Mlungu jwakwe amlimbisye mtima.’ Ana yeleyi yakomboleche chamtuli? Tukumanyilila kuti Daudi jwakwete chisyoŵe chakupopela kwa Yehofa kuti amkamuchisyeje soni jwaganichisyaga yaŵatite Yehofa pakumkamuchisya munyumamo. (1 Sam. 17:37; Sal. 18:2, 6) Daudi jwamanyilile kuti akusosekwa kumwusya Yehofa yakusosekwa kutenda, mwamti ni yajwatesile. Yehofa ali amsalile Daudi yakuti atende, jwalakwe jwayitesile mwachitema. Yakuyichisya yakwe yaliji yakuti Daudi pampepe ni ŵandu ŵakwe ŵakombwele kulupusya katundu jwawo pampepe ni maŵasa gawo. (1 Sam. 30:7-9, 18, 19) Ana ayiweni yindu yitatu yajwatesile Daudi? Jwalakwe jwapopesile kwa Yehofa kuti amkamuchisye. Kupwatika pelepa jwaganichisye yaŵatesile Yehofa munyumamo pakumkamuchisya nambosoni jwatesile yindu mwakamulana ni malangiso giŵampele Yehofa. Ana mpaka tumsyasye chamtuli Daudi? Kwende tulole matala gatatu gampaka tutendele yeleyi.

1. Apopeleje. Patukulagasika nganisyo mpaka tupopele kwa Yehofa kumŵenda lunda soni kuti atukamuchisye. Yeleyi mpaka yitukamuchisye kuti tukadandawulaga mnope ni yindu yayikutulagasya. Ndaŵi sine mpaka tupopele lipopelo lyakata lyamumtima mwakamulana ni mwayiŵelele yindu pandaŵijo. Patukuŵenda chikamuchisyo kwa Yehofa yikusalosya kuti tukusamdalila. Yeleyi ni yaŵatesile Mwenye Daudi juŵalembile kuti, “AMBUJE ali ŵakusunga, ni ŵakunjinjilichisya ŵangu, ali ŵakungulupusya, Mlungu jwangu, ni lwala lwangu kungusatilila  une.” (Sal. 18:2) Ana lipopelo likusakamuchisya? Mlongo jwine jwakusatenda upayiniya lina lyakwe Kahlia jwatite, “Pamalisisye kupopela, ngusapata mtendele. Lipopelo likusangamuchisya kuti nganisyeje mpela Yehofa soni kumdalila mnope jwalakwe.” Kusala yisyene, lipopelo jili mbaso jaŵatupele Yehofa kuti jitukamuchisyeje kulimbana ni kulagasika nganisyo.

2. Aganichisyeje. Pakuganichisya yayatendechele munyumamu, ana pana yakusawusya yaŵasimene nayo yaŵakombwele kuyipilila ligongo lyakuti Yehofa jwakamuchisye? Patukuganichisya yatite Yehofa pakutukamuchisya m’weji soni atumiki ŵakwe, yikusatulimbikasya soni yikusatukamuchisya kuti tumdalileje mnope. (Sal. 18:17-19) Jwamkulungwa jwa mumpingo jwine lina lyakwe Joshua jwatite, “Ngusalemba mapopelo gangu gosope gagajanjidwe. Yeleyi yingamuchisye kuti ngumbuchileje ndaŵi janamŵendile Yehofa yindu yine yakwe soni ni kungamuchisya.” Kusala yisyene, patukuganichisya yaŵele Yehofa ali mkututendela munyumamu yikusatukamuchisya kupata machili kuti tukombole kulimbana ni kulagasika nganisyo.

3. Ayitendeje. Mkanitusagule yakutenda pa chindu chine chakwe, tukusosekwa kuwungunya m’Maloŵe ga Mlungu kuti tupate malangiso gakamuchisya. (Sal. 19:7, 11) Ŵajinji ayiweni kuti pakuwungunya mfundo syakulondesya lilemba line lyakwe, yikusiyakamuchisya kuti alipikanichisye chenene lilembalyo soni yampaka ajile pakulikamulichisya masengo pa umi wawo. Jwamkulungwa jwa mumpingo jwine lina lyakwe Jarrod jwatite, “Kuwungunya kukusangamuchisya kuti nalipikanichisye chenene lilemba soni kupikanichisya yakusalila Yehofa. Yeleyi yikusangamuchisya kuti mbikanichisye yanguŵalangayo soni kutenda mwakamulana ni yambalasileyo.” Patukuwungunya malangiso ga Yehofa kutyochela m’Maloŵe gakwe, soni kutenda mwakamulana ni malangisogo, yichiŵa yangasawusya kuti tupate mtendele wamumtima patukulagasika nganisyo.

Daudi jwamanyililaga kuti Yehofa ni jwampaka amkamuchisye kuti akombole kulimbana ni kulagasika nganisyo. Jwalakwe jwayamichilaga chikamuchisyo chaŵampaga Yehofa mwamti jwaŵechete kuti, Mlungu “akumba machili gakulipundila likuga lya ŵa ngondo. Jwalakwejo ali Mlungu jwakusamba une machili.” (Sal. 18:29, 32) Ndaŵi sine yakusawusya yampaka tusimane nayo mpaka yiwonecheje mpela lipupa. Nambo ni chikamuchisyo cha Yehofa mpaka tukombole kupilila yakusawusya yakuwoneka mpela lipupayi. Kusala yisyene, patukupopela kwa Yehofa kuti atukamuchisye, soni ganichisya yosope yaŵele ali mkututendela nambosoni kutenda mwakamulana ni malangiso gakwe, tuchiŵa ŵakusimichisya kuti jwalakwe chachitupa machili soni lunda kuti tukombole kulimbana ni kulagasika nganisyo.