1-2. Ana lilayika lyasalile chichi achakongwe ŵaŵayiche pa lilembe lya Yesu, soni Yesu ŵasalile yamtuli jemanjajo?

KWALIJI kundaŵi pa Nisani 16, mu 33 C.E. Palisikuli, achakongwe ŵaŵaliji ŵachanasa mnope soni ŵaŵamnonyelaga Mlungu ŵapite kumalembe. Paliji pali pamasile masiku gaŵili chaŵichile Ambuje Yesu Klistu m’malembemo. Paŵayiche kumalembeko kuti akapakasye mtembo wa Yesu yakununjila soni mawuta gambone, jemanjaji ŵasimonjile kusimana kuti m’malembomo mwaliji mwangali mtembo wa Yesu. Kaneko lilayika lyasalile achakongwewo kuti Yesu ajimwiche kuŵawe, soni lyatite, “Alongolele kwawula ku Galileya, timkamwonele kweleko.”—Mat. 28:1-7; Luk. 23:56; 24:10.

² Achakongwewo paŵatyosile kumalembeko, Yesu jwawonechele kwa jemanjajo ni ŵasalile kuti, “Mjawule mkasalile achalongo achimjangu kuti akajawule ku Galileya. Takambonele kweleko.” (Mat. 28:10) Ligongo lyakuti jwalinganyisye msonganowu ali agambile kwimuka kwene, nikuti jwalakwe jwakwete maloŵe gakusosekwa mnope gakuti akasalile ŵakumkuya ŵakwe.

3-4. Ligongo chichi mpaka tujile kuti lilamusi lyaŵapeleche Yesu pa Mateyo 28:19, 20 nganalipeleka kwa ŵandumetumepe? (Alole chiwulili cha pachikuto.)

³ Aŵalanje Mateyu 28:16-20. Pamsongano waŵalinganyisye Yesuwu, jwalakwe jwasasile ya masengo gakusosekwa mnope gakuti agakamule pandaŵijo. Masengogo gali gakulandana ni gatukusakamula masiku agano. Yesu jwatite, “Myoyo, ajawule akajiganye ŵandu ŵa mitundu josope kuti aŵe ŵakulijiganya ŵangu, . . . ni kwajiganya kuti asunjeje yindu yosope yanalamwile.”

⁴ Yesu akusasaka kuti ŵakumkuya ŵakwe wosope alalichileje. Jwalakwe nganapeleka lilamusili kwa ŵandumetume ŵakwepe 11 ŵakulupichika ŵala. Ana tukumanyilila chamtuli yeleyi? Ana  Yesu paŵapelekaga lilamusi lyakupanganya ŵakulijiganya pa litumbi lya Galileya papali ŵandumetumepe? Akumbuchile kuti lilayika lila lyasalile achakongwe ŵala kuti, “Timkamwonele [ku Galileya].” Myoyo pamsonganowo papalisoni achakongwe ŵakulupichika ŵala. Nambo ngaŵa kuti ŵaliji ŵawowope. Ndumetume Paulo jwasasile kuti Yesu “jwawonechele kwa ŵakwakuya ŵakwe ŵakupunda 500.” (1 Akoli. 15:6) Ana Yesu jwawonechele kwa jemanjaji kwapi?

5. Ana tukulijiganya chichi pa 1 Akolinto 15:6?

⁵ Tukwete magongo gambone gakulupilila kuti pa 1 Akolinto 15:6, Paulo jwaganisyaga ya msongano wawatendekwe ku Galileya wawukusimanikwa m’buku ja Mateyu chaputala 28. Ligongo chichi tukuŵecheta myoyo? Ligongo lyandanda lili lyakuti, ŵakumkuya ŵajinji ŵa Yesu ŵaliji ŵa ku Galileya. Myoyo yaliji yangasawusya kusimana ni ŵandu ŵajinji pa litumbi lya ku Galileya kulekangana ni kutendela msonganowo kunyumba ja mundu ku Yelusalemu. Ligongo lyaŵili lili lyakuti, Yesu jwaliji ali awonegene kala ni ŵandumetume ŵakwe 11 kunyumba ja mundu ku Yelusalemu. Yikaŵe kuti Yesu jwasakaga kwasalila ŵandumetume ŵakwepe kuti akapanganye ŵakulijiganya, nikuti akatesile yeleyo ku Yelusalemu. Ngamkaniŵasalila jemanjaji soni achakongwe ni ŵandu ŵane kuti akasimane ku Galileya.—Luk. 24:33, 36.

6. Ana pa Mateyu 28:20 pakulosya chamtuli kuti lilamusi lyakupanganya ŵakulijiganya lyasalagasoni ya masiku agano, soni ana ŵandu akupikanila chamtuli lilamusili?

⁶ Alolesoni ligongo line lyatatu lyakusosekwa mnope. Lilamusi lya Yesu lyakuti ŵakumkuya ŵakwe akajiganye ŵandu nganiligamba kukamula masengo kwa Aklistu ŵa m’yaka 100 yandanda. Ana tukumanyilila chamtuli yeleyi? Yesu paŵasalilaga ŵakumkuya ŵakwe ya lilamusili jwamalisisye ni maloŵe gakuti, “Unejo ndili ni jemanja masiku gosope, mpaka mbesi ja chilambo chapasi chino.” (Mat. 28:20) Mpela mwaŵaŵechetele Yesu, masiku agano ŵandu ŵajinji akukamula masengo gakwajiganya ŵandu. Agambe ganichisya ayi. Chaka chilichose ŵandu chiŵandika 300,000 akusabatiswa ni kuŵa Ŵamboni sya Yehofa soni ŵakumkuya ŵa Yesu Klistu.

7. Ana chitukambilane yatuli, soni ligongo chichi?

⁷ Ŵandu ŵajinji ŵakusalijiganya Baibulo akusajawula pasogolo mpaka kubatiswa. Nambope ŵandu ŵane ŵakusalijiganya Baibulo akusatenda woga kuti aŵe ŵakumkuya ŵa Yesu. Jemanjaji akusasangalala ni yakusalijiganya nambo ŵangajawula pasogolo kuti abatiswe. Naga akusatendesya lijiganyo lya Baibulo, ngatukukayichila kuti akusasaka kumkamuchisya jwakulijiganya jwawo kuti akamulichisyeje masengo yindu yakusalijiganya. Nambosoni akusamkamuchisya kuti aŵe jwakumkuya jwa Klistu. Nganiji chijitukamuchisye kumanyilila yampaka tutende kuti twayicheje pamtima ŵakulijiganya ŵetu. Chitulolesoni yampaka tutende pakwakamuchisya kuti amnonyeleje Yehofa. Ligongo chichi tukusosekwa kukambilana nganiji? Ligongo ndaŵi sine mpaka tusosekwe kusagula kupitilisya kapena kuleka kutendesya lijiganyolyo.

8. Ligongo chichi ndaŵi sine mpaka yiŵe yakusawusya kwakamuchisya ŵakulijiganya ŵetu kumnonyela Yehofa?

⁸ Yehofa akusasaka kuti ŵandu amtumichileje ligongo lyakuti akusamnonyela. Myoyo chakulinga chetu chiŵeje kwakamuchisya ŵakulijiganyawo kupikanichisya kuti Yehofa akusiŵasamalilaga, soni kuti akusiŵanonyela mnope. Tukusasaka kwakamuchisya jemanjajo kuyiwona kuti Yehofa ali “Atati ŵa ŵanache ŵamasije ni ŵakwachenjela achakongwe ŵamasije.” (Sal. 68:5) Naga ŵakulijiganya ŵawo akusayamichila yakusatenda Mlungu pakwanonyela, chachikwayidwa mnope mmitima jawo soni kumnonyela kwawo Mlungu kuchikula mnope. Ŵakulijiganya Baibulo ŵane akusayiwona kuŵa yakusawusya kumwona Yehofa mpela Mtati jwachinonyelo. Yeleyi mpaka yitendekwe ligongo lyakuti atati ŵawo ŵakwaŵeleka nganiŵanonyelaga soni kwaganichisya. (2 Tim. 3:1, 3)  Myoyo pakutendesya lijiganyo, akusosekwa kugombelechesya ndamo sya Yehofa syakusangalasya mnope. Ŵakamuchisyeje kupikanichisya kuti Mlungu jwetu jwakusatunonyela akusasaka kuti chapate umi wangamala. Ŵasalilejesoni kuti jwalakwejo ali jwakoseka kwakamuchisya kuti akwanilisye chakulingachi. Ana tukusosekwasoni kutenda chichi?

9-10. Ana ni mabuku gapi gatukusosekwa kukamulichisya masengo patukutendesya majiganyo ga Baibulo, soni ligongo chichi?

⁹ Akamulichisyeje masengo mabuku mpela “Ana Baibulo Jikusatujiganya Yatuli?” Soni “Yampaka Atende Kuti Mlungu Ŵanonyeleje.” Mabukuga galembedwe ni chakulinga chakuti gatukamuchisyeje kuti twayicheje pamtima ŵakulijiganya ŵetu. Mwachisyasyo, mtwe 1 wa buku jakuti Jikusatujiganya Yatuli mwana kwanga kwa yiwusyo ayi, Ana Mlungu Akusasamala ya M’weji Kapena Ali Jwangalwe?, Ana Mlungu Akusapikana Wuli Pakwawona Ŵandu Ali Mkulaga?, Ana Mpaka Yikomboleche Kuti Yehofa Aŵe Mjawo? Nambi wuli pakwamba ya buku jakuti Mlungu Ŵanonyeleje? Bukuji jikusamkamuchisya jwakulijiganya Baibulo kupikanichisya kuti kamulichisya masengo yiwundo ya m’Baibulo paumi wakwe  kuchimtendekasya kuŵa paunasi ŵambone ni Yehofa. Atamose kuti aŵele ali mkukamulichisya masengo mabukuga pakwajiganya ŵane, akusosekwa kosechela chenene mtwe uliwose soni ganichisya yakusosechela ya mundujo.

¹⁰ Ana mpaka atende wuli naga jwakulijiganya akusaka kumanyilila ngani jajikusimanikwa m’buku janganijiŵa pambali ja Yida yetu Yakamulichisya Masengo Pakwiganya? Mwine mpaka amlimbikasye kuti akaŵalanje pajika buku mwajikusimanikwa nganijo. Yeleyi mpaka yakamuchisye kuti apitilisye kulijiganya mabuku gatukusakamulichisya masengo pakutendesya majiganyo ga Baibulo.

11. Ana ni ndaŵi japi jatukusosekwa kutanda soni kumalisya ni lipopelo patukutendesya lijiganyo lya Baibulo, soni mpaka tujitande chamtuli nganiji?

¹¹ Atandeje lijiganyolyo ni lipopelo. Kusala yisyene, yikusaŵa chenene kutanda soni kumalisya ni lipopelo patugambile kutanda kwene lijiganyo lyakutamilichika. Tukusosekwa kumkamuchisya jwakulijiganya Baibulo kumanyilila kuti mpaka tupikanichisye Maloŵe ga Mlungu ni chikamuchisyo cha msimu wa Mlungu. Ŵakutendesya majiganyo ga Baibulo ŵane akusajitandisya ngani jalipopelo mwakuŵalanga lilemba lya Yakobo 1:5, lyalikusati, ‘Naga jwine mwajemanja jwangali lunda amŵende Mlungu.’ Kaneko jwakutendesya lijiganyolyo akusamwusya jwakulijiganyajo kuti, “Ana mpaka tumŵende Mlungu chamtuli lunda?” Mwangakayichila jwakulijiganyajo chachijitichisya kuti tukusosekwa kupopela kwa Mlungu.

12. Ana mpaka tukamulichisye masengo chamtuli Salimo 139:2-4, pakumkamuchisya jwakulijiganya kuti asaleje ya mumtima mwakwe kwa Yehofa mwipopelo?

¹² Amjiganyeje jwakulijiganya jwawo mwampaka apopelele. Amsalileje kuti Yehofa akusasaka kupikanila mapopelo gakwe gakutyochela pasi pamtima. Amsalileje kuti patukupopela kwa Yehofa pajika mpaka tumsalile mwatukupikanila soni mpaka tusale yindu yanganituŵa tuyisasile kwa mundu jwalijose. Akumbuchilejesoni kuti Yehofa akusamanyilila yayili mumtima mwetu. (Aŵalanje Salimo 139:2-4.) Mpaka tumlimbikasyesoni jwakulijiganya jwetu kuti amŵendeje Mlungu kuti amkamuchisye kuchenga kaganisye soni ndamo syakusakala. Mwachisyasyo, tuwanichisye kuti mundu jwine jwatuŵele tuli mkumjiganya kwandaŵi jelewu akusanonyela kutenda nawo yisangalalo yele Aklistu ŵangasosekwa kutenda. Jwalakwe akusamanyilila kuti kutenda yeleyo kuli kulemwa, nambo akusasangalala kutenda nawo yindu yine yakwayana ni yisangalaloyo. Akusosekwa kumlimbikasya kuti amsalile Yehofa mwakupikanila mumtima soni kuŵenda kuti amkamuchisye kunonyelaga yindu yakusanonyela Mlungu.—Sal. 97:10.

13. (a) Ligongo chichi ngatukusosekwa kuchelewa kumŵilanjila jwakulijiganya jwetu kumisongano? (b) Ana mpaka tutende yamtuli kuti jwakulijiganya jwetu chaŵe jwagopoka pachachiyika ku Nyumba ja Uchimwene?

¹³ Amŵilanjileje mwachitema jwakulijiganya Baibulo kumisongano ja mpingo. Yindu yampaka apikane soni kuyiwona jwakulijiganya Baibulo pamisongano ja mpingo mpaka yimyiche pamtima soni kumkamuchisya kwawula pasogolo. Amlosye fidiyo jakuti, Ana ku Nyumba ja Uchimwene Kukusatendekwa Yatuli? soni amsalileje kuti chachiŵa yimpepe. Naga yakomboleka aŵeje ŵakoseka kumkamuchisya pangani ja kajende. Mpaka yiŵe chenene kwawula ni ŵakulalichila ŵakulekanganalekangana ku lijiganyo lyawo. Kutenda yeleyi, kuchimkamuchisya jwakulijiganya jwawo kwamanyilila chenene ŵane mumpingo, soni chachiŵa jwagopoka pachachiyika kumisonganoko.

14. Ana chichi champaka chimkamuchisye jwakulijiganya jwetu kwawula pasogolo mwausimu?

¹⁴ Chakulinga chetu chili kumkamuchisya jwakulijiganya Baibulo kwawula pasogolo mwausimu. (Aef. 4:13) Mundu pajitichisye kuti tumjiganyeje Baibulo, mpaka asangalale kumanyilila kuti lijiganyolyo lichimkamuchisya. Nambo kumnonyela kwakwe Yehofa pakukukula, jwalakwe chachitanda kuganichisya yampaka atende  pakwakamuchisya ŵane, kupwatikapo abale ni alongo. (Mat. 22:37-39) Ndaŵi jambone pajikwanile, akusosekwa kumsalila jwakulijiganyajo kuti uli udindo wetu kupeleka mbiya syakamuchisya pamasengo ga Uchimwene.

15. Ana mpaka tumkamuchisye chamtuli jwakulijiganya Baibulo kumalana ni yakusawusya yasimene nayo?

¹⁵ Amjiganyeje jwakulijiganya Baibulo yampaka atende pasimene ni yakusawusya. Mwachisyasyo, tuwanichisye kuti jwakulijiganya Baibulo jwawo jwangabatiswa, akwasalila kuti atandene ni mundu jwine. Ngakusosekwa kumsalila jwali jwakulemwa panganijo, mmalo mwakwe amsalile yakusosekwa kutenda mwakamulana ni yajikusasala Baibulo. Komboleka jwalakwe mpaka agambe kumkululuchila mjakwejo, naga nganaŵa akombwele kutenda yeleyi, mpaka amjawulile mwachinonyelo ni chakulinga chakuti, ‘amkamuchisye mjakwejo.’ (Awanichisye ni Mateyu 18:15.) Amkamuchisye jwakulijiganyajo kosechela yachakaŵechete. Amlosye mwampaka akamulichisye masengo pologalamu ja JW Library^®, Kabuku Kakamuchisya Kuwungunya Ngani ka Mboni sya Yehofa, soni jw.org^® kuti amanyilile yiwundo yine yampaka yimkamuchisye kumalana ni nganijo. Naga akulijiganya yampaka atende kuti amalane ni yakusawusya mkanaŵe kubatiswa, pachachibatiswa chachiŵa jwakamulana mnope ni ŵane mumpingo.

16. Ligongo chichi kuli kwakusosekwa kwajigalilaga ŵakulalichila achimjetu ku lijiganyo lyetu?

¹⁶ Ajawuleje ni ŵakulalichila ŵane ku lijiganyo lyawo kupwatikapo jwakulolela mkuli payiche mumpingo mwawo. Ligongo chichi tukusosekwa kutenda yeleyi? Kupwatika pa magongo gatugambile kusala kwene gala, ŵakulalichila ŵane mpaka apeleche chikamuchisyo chele wawojo nganaŵa akombwele kupeleka. Mwachisyasyo, tuwanichisye kuti jwakulijiganya jwawo alinjilile kuti aleche kukwemba sona nambo alepele kwandaŵi syejinji. Mpaka amjigale jwakulalichila juŵakombwele kumalana ni ndamoji nambo panyuma pakulaga kwandaŵi jelewu. Jwakulalichila mjawojo mpaka asale yiwundo yampaka yimkamuchisye jwakulijiganyajo. Naga akuyiwona kuti nganaŵa akombwele kutendesya lijiganyolyo pali pana jwakulalichila jwakusamanyilila yejinji, mpaka amŵende kuti jwalakwejo atendesye lijiganyolyo. Pakutenda yeleyi chachilijiganya yindu yine kwa jemanjajo. Akumbuchileje kuti chakulinga chetu chili kumkamuchisya jwakulijiganyajo kukula mwausimu.

17-18. Ana akusosekwa kuganichisya chichi pakulola naga akusosekwa kuleka lijiganyo kapena iyayi?

¹⁷ Naga jwakulijiganya Baibulo ngakwawula pasogolo, ndaŵi sine akusasosekwa kuliwusya kuti, ‘Ana ndeche kutendesya lijiganyoli?’ Mkanasagule yakutenda panganiji, akusosekwa kuganichisya yampaka akombole kutenda mundujo. Yikusajigala ndaŵi kuti ŵandu ŵane ajawule pasogolo kulekangana ni ŵane. Akusosekwa kuliwusya kuti, ‘Ana jwakulijiganyaju akwawula pasogolo mwakamulana ni mwayiŵelele yindu paumi wakwe?’ ‘Ana jwalakwe atandite “kusunga” kapena kuti kukamulichisya masengo yindu yakusalijiganya?’ (Mat. 28:20, NW) Mpaka yimjigalile ndaŵi jwakulijiganya kuti aŵe jwakumkuya jwa Yesu. Nambo yikusaŵa kuti akuchenga yindu yine paumi wakwe.

 ¹⁸ Nambi ana mpaka tutende wuli naga tulijiganyisye ni mundu kwandaŵi jelewu nambo ngakulosya kuyamichila yakulijiganyayo? Aganichisye chakutendekwa achi, Tuwanichisye kuti jwakulijiganya Baibulo amalisisye kulijiganya buku ja Jikusatujignya Yatuli, mwinesoni atandite buku jakuti Mlungu Ŵanonyeleje, nambo nganayicheje pamisongano ja mpingo kapena pa Chikumbuchilo. Nambosoni jwangasimanikwa palijiganyolyo pamagongo gangapikanika. Payakutendekwa mpela yeleyi, mpaka asosekwe kuŵechetana najo mwakuwona mtima. *

19. Ana mpaka tuŵechetane chamtuli ni mundu jwakulosya kuti ngakukuwona kusosekwa kwa kulijiganya Baibulo, soni ana tuganichisyeje yindu yapi?

¹⁹ Komboleka kutanda mwakumwusya kuti, ‘Ana akuganisya kuti mpaka paŵe chakusawusya chamtuli naga ali aŵele jwa Mboni sya Yehofa?’ Mwine jwakulijiganyajo mpaka ajanje kuti, ‘Pangali chakusawusya chilichose ni kulijiganya Baibulo, nambo ngangusaka kuŵa Jwamboni sya Yehofa.’ Naga mundujo akuganisya myoyo panyuma pakulijiganya najo kwa ndaŵi jelewu, mpaka yiŵe chenene kwimika lijiganyolyo. Mwinesoni jwakulijiganya jwawo mpaka ŵasalile kwandaŵi jandanda chachikumlepelekasya kwawula pasogolo. Mwachisyasyo, jwalakwe mpaka alipikaneje kuti nganaŵa akombwele kulalichila nyumba ni nyumba. Myoyo kumanyilila mwakupikanila, mpaka yakamuchisye wawojo kulola yampaka atende pakumkamuchisya.

20. Ana pa Masengo 13:48 mpaka patukamuchisye chamtuli kusagula ŵandu ŵatukusosekwa kupitilisya kwajiganya Baibulo?

²⁰ Yili yakutesya chanasa kuti ŵakulijiganya Baibulo ŵane, ali mpela Aisalaeli ŵa mundaŵi ja Esekieli. Yehofa ŵamsalile Esekieli kuti, “Kwa jemanjajo nganimŵa kandu kose, mli mundu wamba basi jwagamba kwimba nyimbo syachinonyelano ni jwakwimba chenene chida chakwimbila. Akusagapikana maloŵe genu gosope nambo ngagatendela masengo.” (Esek. 33:32) Yikusaŵa yakusawusya kumsalila mundu kuti tukuleka kumjiganya Baibulo. Nambope, “ndaŵi jajisigele jinandipe.” (1 Akoli. 7:29, NW) Mmalo mwakumalila ndaŵi jetu tuli mkulijiganya ni mundu jwangakwawula pasogolo, tukusosekwa kupata mundu jwine jwampaka alosye kuti ‘akuŵajilwa umi wangamala.’—Aŵalanje Masengo 13:48, NW.

21. Ana lilemba lya chaka cha 2020 lili lyamtuli, soni ligongo chichi lili lyakamuchisya?

²¹ Lilemba lya chaka cha 2020 chilitukamuchisye kongolela masengo getu gakupanganya ŵakulijiganya. Likwetesoni gane mwa maloŵe gaŵaŵechete Yesu pamsongano wakusosekwa mnope wawatendechele pa litumbi lya Galileya. Maloŵe gakwe gakuti, ‘Myoyo, ajawule akajiganye ŵandu kuti aŵe . . . ŵakulijiganya ŵangu ni kwabatisyaga.’​—Mat. 28:19, NW.