1, 2. Ana ndumetume Paulo ŵalosisye catuli kuti ŵayamicilaga umbone mtima wa Mlungu?

Ndumetume Paulo ŵasasile kuti, ‘Umbone mtima [wa Mlungu] uŵalosisye kwa une nganiwuŵa wangali mate.’ (Aŵalanje 1 Akolinto 15:9, 10.) Paulo ŵamanyililaga cenene kuti ŵaliji jwangaŵajilwa kupocela canasa ca Mlungu ligongo lyakuti pandanda ŵalagasyaga Aklistu.

² Cakumbesi kwa umi wakwe, Paulo ŵamlembele jwamasengo mjakwe Timoteyo kuti, “Ngum’yamicila Klistu Yesu Ambuje ŵetu juŵambele macili, ligongo ŵambweni kuŵa jwakulupicika, m’yoyo ŵambele undumetume.” (1 Tim. 1:12-14) Ana undumetume welewu waliji watuli? Paulo ŵasalile acakulungwa ŵa mumpingo wa ku Efeso kuti, “Ngangusawuwona umi wangu kuŵa wakusosekwa mnope. Nambo cangusaka ni cakuti malisye mpikisano wangu soni undumetume unapocele kwa Ambuje Yesu, wakuti ndendele umboni mwakwanila ya  ngani syambone syakwamba ya umbone mtima wa Mlungu.”—Mase. 20:24.

3. Ana Paulo ŵapocele undumetume wapajika watuli? (Alole ciwulili cacili kundanda kwa nganiji.)

³ Ana “ngani syambone” syapi syele Paulo ŵalalicilaga syasyalosyaga umbone mtima wa Yehofa? Jwalakwe ŵasalile Aklistu ŵa ku Efeso kuti, ‘Jemanja mwapikene ya masengo gakulolela gaŵambele Mlungu mwa umbone mtima wakwe pa une kuti namkamucisye jemanja.’ (Aef. 3:1, 2) Paulo ŵakwete masengo gakulalicila ngani syambone kwa ŵandu ŵanganaŵa Ayuda, ni cakulinga cakuti nombenawo cakole upile wakulamulila yalumo ni Klistu mu Ucimwene wa Umesiya. (Aŵalanje Aefeso 3:5-8.) Mwakulipeleka paundumetume wakwe, Paulo ŵapelece cisyasyo cambone kwa Aklistu ŵa moŵa agano. Yeleyi yikusalosya kuti umbone mtima ŵa Mlungu kwa jwalakwe nganiwuŵa “wangali mate.”

4, 5. Ligongo cici mpaka tusale kuti “ngani syambone syakwamba ya Ucimwene wa Mlungu” ni ngani syambone syakwamba ya “umbone mtima wa Mlungu” yili yakulandana?

⁴ Mbesi pajikuŵandicila, ŵakutumicila ŵa Yehofa akwete masengo gakulalicila “ngani syambone syakwamba ya Ucimwene wa Mlungu . . . pacilambo cosope capasi, kuti ŵandu ŵamitundu josope asipikane.” (Mat. 24:14) Utenga watukusalalicila ulisoni ngani syambone syakwamba ya “umbone mtima wa Mlungu” ligongo majali gatukwembeceya kupocela pasi pa Ucimwene gacikomboleka ligongo lya umbone mtima wa Yehofa waŵatulosisye kupitila mwa Yesu Klistu. (Aef. 1:3) Ana m’wejo pajika, tukusakuya cisyasyo ca Paulo pakuyamicila umbone mtima wa Yehofa mwakulipeleka pa masengo gakulalicila?—Aŵalanje Aloma 1:14-16.

⁵ Mu ngani jipite jila, twalijiganyisye mwatukusapindulila ni umbone mtima wa Yehofa m’matala gakulekanganalekangana atamose kuti tuli ŵaulemwa. M’wejisoni tukusosekwa kwakamucisya ŵandu kuti amanyilile mwele Yehofa akusatulocesya cinonyelo cakwe, soni mwampaka jwalijose pajika apindule ni cinonyelo cakweco. Ana pana mbali sine syapi sya umbone mtima wa Mlungu syatukusosekwa kwakamucisya ŵane kusimanyilila?

6, 7. Patukwasalila ŵane ya ciwombolo, ana tukusaŵa tuli mkuwandisya catuli ngani syambone syakwamba ya umbone mtima wa Mlungu?

⁶ M’cilambo cakusakalaci, ulemwa uli posepose. Nambo ŵajinji ŵangalijimba magambo patesile cakulemwa, mwati akusaganisya kuti ciwombolo cili cangali masengo. Pandaŵi jakulandanajo, ŵandu ŵajinji ayiweni kuti ndamo syawo ngasikwatendekasya kuŵa ŵakusangalala. Soni ŵandu ŵajinji ngakusamanyilila kuti ulemwa wuli cici, ukusatukwaya catuli, soni yampaka tutende kuti tukulupuce ku ukapolo wa ulemwa. Jemanjaji akusamanyilila cenene yakwamba ulemwa palijiganyisye yejinji ni Ŵamboni sya Yehofa. Nambo ŵandu ŵamitima jambone akusasangalala kulijiganya kuti Yehofa, ligongo lya cinonyelo cakwe soni umbone mtima wakwe, ŵamtumisye Mwanagwe pacilambo capasi kukutuwombola ku ulemwa ni ciwa.—1 Yoh. 4:9, 10.

⁷ Pakusala ya Mwanace jwakunonyelwa jwa Yehofa, Paulo ŵalembile kuti, “Kupitila mwa jwalakwe [Yesu] tugopoledwe ni ciwombolo kupitila m’miyasi jakwe, tukululucidwe yakulemwa yetu mwakamulana ni umbone mtima [wa Yehofa.]” (Aef. 1:7) Mbopesi jaciwombolo ja Klistu jikusalosya cinonyelo ca Mlungu kwa m’weji soni umbone mtima wakwe wekulungwa. Yili yakutamika mtima pasi kulijiganya  kuti naga tukukulupilila mbopesi ja Yesu, yakulemwa yetu yicikululucidwa soni tucikola cikumbumtima ceswela. (Ahe. 9:14) Jelejitu jili ngani jambone mnope jampaka twasalile ŵane.

8. Ligongo cici ŵandu ŵakulemwa ŵasosekwaga kamulana ni Mlungu?

⁸ M’weji tukwete ukumu wekulungwa wakwakamucisya ŵandu kuti aŵe paunasi wambone ni Mkupanganya jwawo. Ŵandu mkanatande kulupilila mbopesi ja Yesu ŵaliji acimmagongo ŵa Mlungu. Ndumetume Yohane ŵalembile kuti, ‘Jwalijose jwakulupilila mwa Mwanace akwete umi wangamala. Jwalijose jwangampikanila Mwanace ngasakola umi, nambo ukali wa Mlungu uciŵa pa jwalakwe.’ (Yoh. 3:36) Yili yakusangalasya kuti mbopesi ja Yesu jatendekasisye kuti ŵandu akamulanesoni ni Mlungu. Paulo jwasasile kuti, ‘Kala jemanja mwaliji ŵakutalikangana ni Mlungu, soni mwaliji acimmagongo ŵakwe ligongo nganisyo syenu syaliji pa masengo genu gakusakala. Nambo sambano, kupitila mu ciwa ca mwanagwe, Mlungu ŵamkamulenye ni jwalakwe msyene.’—Akolo. 1:21, 22.

9, 10. (a) Ana Klistu ŵapelece undumetume watuli kwa acalongo acimjakwe ŵasagulwe? (b) Ana ‘ŵangondolo sine’ akwakamucisya catuli ŵasagulweŵa?

⁹ Klistu ŵapele acalongo acimjakwe ŵasagulwe ŵali pa cilambo capasi ‘undumetume wakamulanya.’ Pakusala ya undumetumewu, Paulo ŵalembele Aklistu ŵasagulwe ŵa m’yaka 100 yandanda kuti, ‘Yindu yosope yili yakutyocela kwa Mlungu, juŵatukamulenye ni jwalakwe msyene kupitila mwa Klistu ni kutupa undumetume wakamulanya. Undumetumewo uli wakuti, Mlungu kupitila mwa Klistu ŵacikamulenye cilambo ni jwalakwejo, mwati nganaŵalanjila yakulemwa yawo, soni atupele utenga wa kamulanya wakuti tuwujenesye. M’yoyo, tuli ŵakwimila Klistu, mpela kuti Mlungu akwacondelela ŵandu kupitila mwa m’weji. Mpela ŵakwimila Klistu, tukwaŵenda kuti, “Akamulanesoni ni Mlungu.”’—2 Akoli. 5:18-20.

¹⁰ ‘Ŵangondolo sine’ akusawuwona kuŵa upile kwakamucisya ŵasagulwe mu undumetume welewu. (Yoh. 10:16) Mpela ŵakuwandisya utenga wa Klistu, ŵangondolo sineŵa akukamula masengo gekulungwa gakwajiganya ŵandu usyesyene wa m’Baibulo soni kwakamucisya kuti aŵe paunasi ni Yehofa. Jeleji jili mbali jekulungwa ja masengo gakutendela umboni mwakwanila ngani syambone syakwamba ya umbone mtima wa Mlungu.

11, 12. Ligongo cici jili ngani jambone kwajiganya ŵandu kuti mpaka apopeleje kwa Yehofa?

¹¹ Ŵandu ŵajinji akusapopela ligongo yikusiyakamucisya kuti atamilikasye nganisyo pasi. Nambo jemanjaji ngakusakulupilila kuti Mlungu akusapikana mapopelo gawo. Jemanjaji akusosekwa kumanyilila kuti Yehofa ali ‘Jwakupikana lipopelo.’ Jwamalumbo Daudi ŵalembile kuti, “Ŵalakwe Ŵakupikana lipopelo, ŵandu ŵamitundu josope caciyika kwa ŵalakwe. Yakulemwa yangu yindupile, nambo ŵalakwe akusatukululucila yakulemwa yetu.”—Sal. 65:2, 3.

¹² Yesu ŵasalile ŵakumkuya ŵakwe kuti, “Naga mkuŵenda cilicose mu lina lyangu, cinjimtendela.” (Yoh. 14:14) Yeleyi yikugopolela kuti mpaka tupopele pa “cilicose” cacikukamulana ni lisosa lya Yehofa. Yohane ŵasasile kuti, ‘Tukwete cikulupi cakuti cilicose catukusam’ŵenda mwakamulana ni lisosa lyakwe, akusatupikana.’ (1 Yoh. 5:14) Yili yakusangalasya kwajiganya ŵane kuti lipopelo ngalikusagamba kutukamucisya kutamilikasya nganisyo pasi, nambo lilisoni litala lyambone lyakutukamucisya  kwika ku ‘citengu ca umbone mtima’ wa Yehofa. (Ahe. 4:16) Tukusosekwa kwajiganya ŵandu kuti apopeleje m’litala lyakuŵajilwa, kwa mundu jwakuŵajilwa, soni pa yindu yakuŵajilwa. Patukutenda yeleyi tucakamucisya kuti aŵe paunasi ni Yehofa soni kuti apateje citondoyo kwa jwalakwe pasimene ni yakusawusya.—Sal. 4:1; 145:18.

13, 14. (a) Ana ŵasagulwe cacikola upile watuli msogolo? (b) Ana ŵasagulwe cacakamucisya catuli ŵandu?

¹³ Yehofa cacijendelecela kulosya umbone mtima wakwe m’cilambo casambano. Pakusala ya upile wekulungwa wakwete ŵa 144,000, ŵaŵasagwile kuti cakalamulile ni Klistu mu Ucimwene wakwinani, Paulo ŵalembile kuti, ‘Mlungu jwali jwa canasa, ligongo lya cinonyelo cakwe cekulungwa caŵatunonyele naco, ŵatutesile kuŵa ŵaumi pampepe ni Klistu Yesu, atamose kuti twaliji ŵawe mu yakulemwa yetu, nambo mwakulupwice ligongo lya umbone mtima wakwe. Ŵatukwesisye soni kututamika pampepe m’malo gakwinani mwakamulana ni Klistu Yesu. Ŵatesile yeleyi kuti mu ndaŵi jajikwisajo catulosye cipanje cakwe capajika ca umbone mtima wakwe wekulungwa mwakamulana ni Klistu Yesu.’—Aef. 2:4-7.

¹⁴ Yili yakusawusya kuganicisya ya yindu yakusangalasya yele Yehofa cacatendela Aklistu ŵasagulwe pacacilamulilaga ni Klistu kwinani. (Luk. 22:28-30; Afi. 3:20, 21; 1 Yoh. 3:2) Yehofa ‘cacilosya cipanje cakwe capajika ca umbone mtima wakwe’ mnopemnope kwa Aklistu ŵasagulweŵa. Jemanjaji caciŵa ‘Yelusalemu Jwasambano,’ jucaciŵa ŵamkwakwe Klistu. (Ciu. 3:12; 17:14; 21:2, 9, 10) Aklistu ŵasagulweŵa pampepe ni Yesu cacikamula masengo “gakuposya mitundu ja ŵandu.” Jemanjaji cacakamucisya ŵandu kuti agopoce ku ulemwa ni ciwa ni kuŵa ŵamlama.—Aŵalanje Ciunukuko 22:1, 2, 17.

15, 16. Ana Yehofa cacilosya catuli umbone mtima wakwe kwa ‘ŵangondolo sine’?

¹⁵ Pa Aefeso 2:7, tukusaŵalanga kuti Mlungu cacilosya umbone mtima wakwe ‘mundaŵi jajikwisajo.’ Pandaŵi jelejo, jwalijose pacilambo capasi caciciwona ‘cipanje capajika ca umbone mtima wakwe.’ (Luk 18:29, 30) Litala lyekulungwa lyele Yehofa cacilocesya umbone mtima wakwe liciŵa kwimusya ŵandu “ku Malembe.” (Yobu 14:13-15; Yoh. 5:28, 29) Acalume ni acakongwe ŵakulupicika ŵaŵawile kalakala Yesu mkanapelece mbopesi jakwe, soni ‘ŵangondolo sine’ ŵakuwa ali ŵakulupicika m’masiku gambesi gano, wosope cacajimusya kuti cajendelecele kutumicila Yehofa.

¹⁶ Ŵandu ŵajinji ŵaŵawile ali ngakummanyilila Mlungu cacijimukasoni ku ŵawe. Jemanjaji cacipocela upile wakuti aŵe ku mbali ja ulamusi wa Yehofa. Yohane ŵalembile kuti, ‘Naweni ŵawe, ŵacakulungwa ni ŵacanandi ali ajimi pameso pa citengu ca Ucimwene, soni mipukutu jawugulidwe. Nambo pawugulidwe mpukutu wine, waliji mpukutu wa umi. Ŵawewo ŵalamwile pakujigalila yaŵalembile mumpukutuwo mwakamulana ni yitendo yawo. Nyasa japelece ŵawe ŵaŵaliji mwelemo, Nombe naco ciwa ni malembe yapelece ŵawe ŵaŵaliji mwelemo, soni ŵalamwile jwalijose mwakamulana ni yitendo yawo.” (Ciu. 20:12, 13) Ŵandu ŵacacijimukaŵa cacisosekwa kulijiganya malamusi ga Yehofa soni mwampaka agakamulicisyeje masengo. Konjecesya pelepa, cacisosekwasoni kuya malamusi gasambano gakusimanikwa ‘m’mipukutu’ gagacisalaga yakusaka Yehofa kuti ŵandu atendeje m’cilambo casambano. Yehofa cacilosyasoni umbone mtima wakwe kupitila m’malamusi gasambanoga.

17. Ana tukusosekwa kumbucilaga cici patukukamula masengo gakulalicila?

¹⁷ Mbesi pajikuŵandicila, tukusosekwa kulalicila mwamtawu ngani syambone syakwamba ya Ucimwene kupundana ni kala kose. (Maliko 13:10) Yili yangakayikasya kuti ngani syambone syatukusalalicila sikusalosya umbone mtima wa Yehofa. Patukukamula masengo gakulalicila, tukumbucileje kuti cakulinga cetu cekulungwa cili kum’lumba Yehofa. Tukusosekwa kwasalila ŵandu kuti majali gosope gatucisangalala nago m’cilambo casambano gacikomboleka ligongo lya umbone mtima wa Yehofa.

18, 19. Ana tukusacimbicisya catuli umbone mtima wa Yehofa?

¹⁸ Patukwalalicila ŵane, tukusosekwa kwasalilaga kuti mu Ucimwene wa Klistu, ŵandu cacipocela majali gosope gakwika ligongo lya mbopesi ja ciwombolo, soni caciwujilaga panandipanandi ku umlama. Baibulo jikusasala kuti, “Yakupanganyikwa yicigopoka ku ukapolo wakuwola ni kola ukoto waucimbicimbi wa ŵanace ŵa Mlungu.” (Alo. 8:21) Yeleyi yicikomboleka kupitila mu umbone mtima wa Yehofa.

¹⁹ Tukwete upile wakwasalila ŵandu yindu yakusangalasya yaŵatulagucisye Mlungu yayikusimanikwa pa lilemba lya Ciunukuko 21:4, 5. Lilembali likusati, “[Mlungu] cacipukuta misosi josope m’meso mwawo, nipo ciwa ngasicipagwasoni. Ngasipapagwasoni kulila, kuwuwula kapena kupikana kupweteka. Yindu yakala yiciŵa yili yimasile.” Soni Yehofa, jwatemi pacitengu ca Ucimwene ŵatite, “Mlole! ngupanganya yindu yosope kuŵa yasambano.” Jwalakwe ŵasasilesoni kuti, “Mlembe, pakuŵa maloŵega gali gakulupicika soni gakuwona.” Patukulalicila mwamtawu ngani syambonesi kwa ŵane, tukusaŵa tuli mkucimbicisya umbone mtima wa Yehofa.