1. Ana tukulijiganya chichi kutyochela pa Jwakulalichila 3:1, 7?

ŴANE mwa m’weji tukusanonyela kuŵecheta mnope. Nambo ŵane ŵanganonyela yakuŵecheta. Mpela mwalikuŵechetela lilemba lyalikulongolela nganiji, yikulosya kuti pana ndaŵi jakuŵecheta soni ndaŵi jakutama jii. (Aŵalanje Jwakulalichila 3:1, 7.) Nambope ndaŵi sine mpaka tusache kuti abale ni alongo ŵetu ŵane aŵecheteje yejinji, soni pane mpaka tusache kuti akaŵecheta yejinji.

2. Ana ŵani ŵakwete udindo wakutusalila ndaŵi jambone jampaka tuŵechete soni mwampaka tuŵechetele?

² Kuŵecheta uli mtuka wakutyochela kwa Yehofa. (Eks. 4:10, 11; Chiw. 4:11) Kupitila m’Maloŵe gakwe, jwalakwe atukamuchisye kumanyilila chenene mwampaka tukamulichisye masengo mtukawu mwakuŵajilwa. Munganiji chitulole yisyasyo ya m’Baibulo yampaka yitukamuchisye kumanyilila ndaŵi jampaka tuŵechete soni jampaka tutame jii. Chitulolesoni mwakusapikanila Yehofa pa yindu yatukusaŵecheta kwa ŵane. Chandanda kwende tulole ndaŵi jampaka tuŵechete.

3. Mwakamulana ni Aloma 10:14, ana ni ndaŵi japi jatukusosekwa kuŵecheta?

³ Ndaŵi syosope tuŵeje ŵakoseka kuŵecheta yakwamba Yehofa soni Uchimwene wakwe. (Mat. 24:14; aŵalanje Aloma 10:14.) Patukutenda yeleyi, nikuti tuchimsyasya Yesu. Ligongo lyekulungwa lyaŵayichile Yesu pachilambo chapasi lyaliji kukwasalila ŵandu yakwamba Atati ŵakwe. (Yoh. 18:37) Nambo tukusosekwa kukumbuchila kuti kaŵechete ketu kali kakusosekwa mnope. Myoyo, patukuŵecheta ni ŵane yakwamba Yehofa, tukusosekwa tuŵecheteje “mwakuwusimana mtima ni mwa uchimbichimbi.” Nambosoni tukusosekwa kuchimbichisya yakusakulupilila ŵane soni nganisyo syawo. (1 Pet. 3:15) Kutenda yeleyi kuchikamuchisya kuti mmalo mwagamba kuŵecheta, twajiganyeje ŵandu mwakwayika pamtima.

4. Mwakamulana ni Misyungu 9:9, ana yatukusaŵecheta mpaka yakamuchisye chamtuli ŵane?

⁴ Achakulungwa ŵamumpingo akusosekwa kuŵecheta payiweni  kuti m’bale kapena mlongo akusosekwa kumjongolela. Akusosekwa kusagula ndaŵi jambone jakuti aŵechete pakusaka kuŵambala kumtesya sooni mundujo. Akusosekwa kutenda yeleyi pamalo pakuti pangali ŵandu. Achakulungwa akusosekwa kulingalinga kuŵecheta mwakumchimbichisya mundujo. Nambo yeleyi ngayikwalepelekasya kambilana ni ŵandu Malemba gampaka gakamuchisye kusagula yindu mwalunda. (Aŵalanje Misyungu 9:9.) Ligongo chichi yili yakusosekwa mnope kulimba mtima kuti tuŵechete papakusosechela kuŵecheta? Kwende tulole yisyasyo yiŵili yakulekangana. Chisyasyo chandanda chikusala ya mundu juŵasosekwaga kwajamuka ŵanache ŵakwe. Chisyasyo chaŵili chikusala ya jwamkongwe jwaŵasosekwe kuti amsalile mundu juŵaliji jwakuti chachiŵa mwenye kuti achenje nganisyo syakwe.

5. Ana ni ndaŵi japi jele Eli ŵalepele kuŵecheta pa ndaŵi jaŵasosechelaga kuŵecheta?

⁵ Jwamkulungwa jwa Ŵambopesi lina lyakwe Eli jwakwete ŵanache ŵaŵili ŵaŵanonyelaga mnope. Nambo ŵanacheŵa nganamchimbichisyaga Yehofa. Jemanjaji ŵaliji ŵambopesi ŵakutumichila panyumba ja Mlungu. Nambope nganawukamulichisyaga masengo chenene udindowu mwamti nganachimbisyaga mbopesi syakwawula kwa Yehofa soni ŵatendaga chikululu mwangali sooni. (1 Sam. 2:12-17, 22) Mwakamulana ni Chilamusi cha Mose, ŵanache ŵa Eli ŵasosekwaga kuwulajidwa ligongo lya yaŵatendagayi. Nambope Eli ŵaŵichilaga kunyuma ŵanacheŵa ni kwakundaga kuti atumichilejepe panyumba ja Mlungu. (Det. 21:18-21) Ana Yehofa ŵayiweni mwamtuli yaŵatendaga Eli pangani jeleji? Yehofa ŵamwusisye Eli kuti, “Ligongo chichi m’mwejo Eli mkwachimbichisya ŵanache ŵenu ŵa achalumewo kupunda une.” Kaneko Yehofa ŵaganisisye yagamba kwawulaga ŵanache ŵaŵili ŵakusakalaŵa.—1 Sam. 2:29, 34.

6. Ana tukulijiganya chichi pa yaŵatesile Eli?

⁶ Ana tukulijiganya chichi kutyochela kwa Eli? Naga tuyiweni kuti mjetu kapena jwachibale akasile malamusi ga Mlungu, tukusosekwa kuŵecheta mwakumkumbusya yakusasaka Yehofa. Soni tukusosekwa kulolechesya kuti apochele chikamuchisyo chakusosechela kutyochela kwa achakulungwa ŵamumpingo. (Yak. 5:14) Ngatukusosekwa kuŵa mpela Eli, mwakwachimbichisya achimjetu kapena ŵachibale kupunda yatukusati kumchimbichisya Yehofa. Pakusasosekwa kulimba mtima kuti tumkamuchisye mundu jwine, nambo kutenda yeleyi kukusakola yakuyichisya yambone. Alole kulekangana kwakupali pasikati pa chisyasyo cha Eli ni yaŵatesile jwamkongwe jwine lina lyakwe Abigelo.

7. Ligongo chichi Abigelo ŵasakaga kuŵechetana ni Daudi?

 ⁷ Abigelo jwalombedwe ni Nabala juŵaliji jwakusichila soni jwakwete migunda. Pandaŵi jine Daudi pampepe ni ŵandu ŵaŵajendaga najo ŵamtilaga Mwenye Sauli. Kaneko ŵasimene ni ŵamasengo ŵa Nabala ŵaŵakamusyanganaga nawo kulolela ngondolo sya Nabala kuti sikajiŵidwa. Nambo Nabala nganayamichila yaŵatendaga jemanjaji. Daudi paŵatumile achalume ŵaŵajendaga nawo kuti akaŵende yakulya soni mesi kwa Nabala, jwalakwe jwatumbile ni kwakalipila ŵanduwo. (1 Sam. 25:5-8, 10-12, 14) Paligongo lyeleli, Daudi jwaganisisye yakuja kumwulaga jwamlume jwalijose jwa m’nyumba mwa Nabala. (1 Sam. 25:13, 22) Ana yeleyi akayiŵambele chamtuli? Abigelo ŵayiweni kuti jili ndaŵi jambone jakuti aŵechete, soni mwakulimba mtima ŵapite kukusimana ni gulu ja ŵandu 400 pakusaka kuti aŵechetane ni Daudi. Ŵanduŵa ŵawonekaga kuti jakwete sala soni ŵatumbile mnope.

8. Ana tukulijiganya chichi pa yaŵatesile Abigelo?

⁸ Abigelo paŵasimene ni Daudi ŵaŵechetene najo mwakulimba mtima, mwaulemu soni mwakumtendekasya jwalakwe kutendapo kandu. Atamose kuti Abigelo nganaleŵa chilichose, nambope jwalakwe ŵampepesye Daudi. Jwalakwe jwasasile kuti jwamanyililaga kuti Daudi jwaliji mundu jwambone soni kuti chasagule yindu mwalunda. Kupwatika pelepa Abigelo ŵamdalilaga Yehofa kuti chamkamuchisye. (1 Sam. 25:24, 26, 28, 33, 34) Mwakulandana ni Abigelo tukusosekwa kuŵecheta mwakulimba mtima patuyiweni kuti mundu jwine akutenda yindu yampaka yimtendekasye kutenda yakusakala. (Sal. 141:5) Tukusosekwa kuŵechetana najo mwaulemu, nambo mwakulimba mtima. Naga tukumkamuchisya mwachinonyelo mundu jwakusosechela chikamuchisyo, tukusalosya kuti tuli mjakwe jusyesyene.—Mis. 27:17.

9-10. Ana achakulungwa ŵamumpingo akusosekwa kumbuchila chichi pakwakamuchisya ŵane?

⁹ Achakulungwa akusosekwa kulimba mtima  pakusaka kumkamuchisya mundu jwakutenda yakusakala. (Aga. 6:1) Mwakulinandiya achakulungwa ŵamumpingoŵa akusamanyilila kuti lisiku line nombe nawo chachisosekwa chikamuchisyo ligongo lyakuti ali ŵangali umlama. Nambo yeleyi yikalepelekasyaga achakulungwaŵa kwakamuchisya ŵandu ŵakusosechela chamuko. (2 Tim. 4:2; Tit. 1:9) Pakumkamuchisya mundu akusalinjilila kukamulichisya masengo mtuka wakuŵecheta pakumjiganya mundujo mwalunda soni mwakuwusimana mtima. Chinonyelo chikusichalimbikasya achakulungwaŵa kumkamuchisya mundu. (Mis. 13:24) Chakulinga chawo chekulungwa chikusaŵa kumchimbichisya Yehofa mwakulimbikasya ndamo syakwe nambosoni kukamuchisya kuti mpingo ukasimana ni yakusawusya.—Mase. 20:28.

¹⁰ Pakwikanaga apano, mpaka tujile kuti tujiweni ndaŵi jampaka tusosekwe kuŵecheta. Nambope pana ndaŵi jine jampaka tusosekwe ngaŵecheta chilichose. Ana pandaŵi syelesi mpaka tusimane ni yakusawusya yamtuli?

11. Ana Yakobo jwakamulichisye masengo chisyasyo chapi, soni ligongo chichi chili chakuŵajilwa?

¹¹ Yikusaŵaga yakusawusya kuti tukalamulileje kaŵechete ketu. Jwakulemba Baibulo Yakobo jwakamulichisye masengo chisyasyo chambone pakusala ya chakusawusyachi. Jwalakwe jwatite, “Naga pana jwine jwangalemwa pakuŵecheta, ni kuti jwalakwejo aŵele jwakulungama, soni kuti jwele komboleka kuchilamulila chilu chakwe chosope.” (Yak. 3:2, 3) Kuchilamulila chilu chosopeku akukulandanya ni yingwe yakusataŵa kumtwe nambosoni kukamwa kwa hachi. Mundu jwakwesile hachi pagambile kuwuta yingweyi, akusakombola kujilamulila kapena kujisalila kuti jijime. Jwakwesile hachijo naga ngakukamula mwakulimbangana yingweyi ni kuti mpaka jimwutusye mnope, yampaka yitendekasye kuti jiwulale kapena kumwulasya jwakwesilejo. Mwakulandana ni yeleyi, naga tukulepela kulamulila kaŵechete  ketu mpaka paŵe yakusawusya yejinji. Kwende tulole yakutendekwa yampaka tusosekwe kusamala ni kaŵechete ketu.

12. Ana ni ndaŵi japi jatukusosekwa kusamala ni kaŵechete ketu?

¹² Ana wawojo akusatenda wuli pamanyilile kuti m’bale kapena mlongo jwine akwete ngani jangakusosekwa kwasalila ŵane? Mwachisyasyo, ana akusatenda wuli pasimene ni mundu jwakutyochela m’chilambo chele masengo getu galekasidwe? Ana akusamwusyaga kuti ŵasalile mwagakwendela masengo getu m’chilambo chakwecho? Mwangakayichila mpaka awusyeje yeleyi ni yakulinga yambone. Tukusatenda yeleyi ligongo lyakuti tukusanonyela abale soni tukusasachilila kumanyilila mwayikwendela yindu paumi wawo. Nambosoni tukusasaka kuti twakolanjeje m’mapopelo getu. Nambope jeleji nganijiŵa ndaŵi jakusosekwa kuŵecheta. Naga tukumkanganichisya mundu kuti asale yindu yayili yachimsisi, yikusalosya kuti ngatukumnonyela mjetujo nambosoni abale ni alongo ŵakudalila kuti jwalakwe ngaŵasalila ŵane nganijo. Kusala yisyene, pangali jwampaka asache kuti abale ni alongo ŵakutama m’yilambo yele boma jalekasisye masengo getu asimaneje ni yakusawusya. Mwakulandana ni yeleyi, pangali m’bale kapena mlongo jwakutyochela m’yilambo yeleyi jwakusosekwa kusala kwa jwalijose mwakusatendela yindu yakwayana ni kulambila.

13. Mwakamulana ni Misyungu 11:13, ana achakulungwa akusosekwa kutenda chichi, soni ligongo chichi?

¹³ Achakulungwa ŵa mumpingo akusosekwa kamulichisya masengo maloŵe gagali pa Misyungu 11:13 pangani ja kusunga chimsisi. (Aŵalanje.) Yeleyi mpaka yiŵe yakusawusya naga jwamkulungwa jwamumpingojo ali jwamlombele. Liŵasa likusalimba naga ŵalombanewo akuŵechetana tungani twachimsisi twamwiŵasya mwawo, kusalilana mwakupikanila mumtima soni yindu yayikwalagasya nganisyo. Nambope jwamkulungwa jwamumpingo ngakusosekwa kwasalila ŵamkwakwe “ngani syachimsisi” syakwamba mundu jwine mumpingo. Naga akutenda yeleyi, mpaka atendekasye kuti ŵandu akamdalilaga soni mpaka asakasye mbili jakwe. Ŵandu ŵakwete maudindo ngakusosekwa kuŵa “ŵakuŵecheta paŵili.” (1 Tim. 3:8, NWT) Yeleyi yikugopolela kuti nganaŵa aŵechete ngani sya ŵane kapena kwalambusya ŵane. Naga jwamkulungwa jwamumpingo akusiŵanonyela ŵamkwakwe ni kuti nganaŵa ŵasalile ngani syangakusosekwa kusimanyilila.

14. Ana ŵamkwakwe ŵa jwamkulungwa jwamumpingo mpaka ŵakamuchisye chamtuli ŵamkwakwe kuti akole mbili jambone?

¹⁴ Jwamkongwe mpaka akamuchisye kuti mbili ja ŵamkwakwe jikasakala mwakuŵambala kwakanganichisya ŵalumewo kuti asale yindu yayili yachimsisi. Ŵakongwe pakukuya yeleyi, ngayikusaŵa kuti agamba kumkamuchisya jwamlumeju, nambo yikusapeleka ulemu kwa achimsyene ngani syachimsisisyo. Chakusosekwa mnope ni chakuti akusamtendekasya Yehofa kuŵa jwakusangalala ligongo lyakuti akulimbikasya mtendele mumpingo.—Alo. 14:19.

15. Ana Yehofa ŵapikene wuli ni achimjakwe ŵatatu ŵa Yobu, soni ligongo chichi?

¹⁵ Mpaka tulijiganye yejinji m’buku ja Yobu pakwamba ya ndaŵi jatukusosekwa kuŵecheta soni mwampaka tuŵechetele. Yobu paŵasimene ni yakusawusya, achalume mcheche ŵayiche kukumlimbikasya soni kukumkamuchisya. Achalumeŵa ŵatemi kwakandaŵi ali ngakuŵecheta chilichose. Achalume ŵatatu mwa achalume mcheche ŵala ŵaliji Elifasi, Bilidadi soni Sofali. Nambo yaŵaŵechete jemanjaji yalosisye kuti ndaŵi jiŵagambile kutama jila nganaganisyaga yakumkamuchisya Yobu. Mmalo mwakwe, jemanjaji ŵaganichisyaga yampaka atende pakulosya kuti Yobu jwalemwisye chinechakwe. Jemanjaji ŵaŵechete yindu yine yakuwona, nambo yindu yejinji yaŵaŵechete yakwamba Yobu soni Yehofa ŵayiŵechete mwangali chinonyelo nambosoni yaliji yaunami. Ŵamjimbile magambo Yobu kuti jwaliji jwakulemwa.  (Yob. 32:1-3) Ana Yehofa ŵatesile chichi? Jwalakwe nganasangalala ni yaŵatesile achalumewo. Yehofa jwakolasile jemanjajo kuti ali ŵakuloŵela soni ŵasalile kuti amŵende Yobu kuti ŵapopelele.—Yob. 42:7-9.

16. Ana tukulijiganya chichi pa yindu yakusakala yaŵatesile Elifasi, Bilidadi soni Sofali?

¹⁶ Tukulijiganya yindu yejinji pa yindu yakusakala yaŵatesile Elifasi, Bilidadi soni Sofali. Chandanda, ngatukusosekwa kwajelusya abale ŵetu. (Mat. 7:1-5) Mmalo mwakwe tukusosekwa twapikanileje mwakusamala pakuŵecheta. Kutenda yeleyi kuchitukamuchisya kupikanichisya mwayiŵelele yindu paumi wawo. (1 Pet. 3:8) Chaŵili, patukuŵecheta tulolechesyeje kuti maloŵe getu gali gambone soni yatukuŵechetayo yili yisyene. (Aef. 4:25) Chatatu, Yehofa akusatenda lung’wanu ni yatukusaŵechetega ni ŵane.

17. Ana tukulijiganya chichi pa yaŵatesile Elihu?

¹⁷ Mundu jwamcheche juŵayiche kwa Yobu ŵaliji Elihu, mlongo mjakwe Abulahamu. Jwalakwe ŵagambaga kupikanila mwakusamala yosope yaŵaŵechatanaga Yobu ni achalume ŵatatu ŵala. Tukuŵecheta myoyo ligongo lyakuti jwapeleche malangiso gambone gagamkamuchisye Yobu kuchenga kaganisye kakwe. (Yob. 33:1, 6, 17) Chakulinga chekulungwa cha Elihu chaliji kumsangalasya Yehofa ngaŵa kulisangalasya jika kapena ŵane. (Yob. 32:21, 22; 37:23, 24) Kutyochela mu chisyasyo cha Elihu tukulijiganya kuti pana ndaŵi jampaka tutame jii nigambaga kupikanila. (Yak. 1:19) Tukulijiganyasoni kuti patukupeleka malangiso chakulinga chetu chekulungwa chiŵeje kupeleka ulemu kwa Yehofa ngaŵaga kwa m’wejo.

18. Ana mpaka tulosye chamtuli kuti tukusayamichila mtuka wa kuŵecheta?

¹⁸ Mpaka tulosye kuti tukusawuwona mtuka wakuŵecheta kuŵa wapenani naga tukukuya yajikusasala Baibulo pangani ja ndaŵi jampaka tuŵechete soni mwampaka tuŵechetele. Mwenye jwalunda Solomoni mwakusalilidwa jwalembile kuti, “Maloŵe gampepe gakuŵechetedwa mwakwenela, gali mpela yakusalalichisya ya golide mchiselo cha silifa.” (Mis. 25:11) Patukupikanila mwakusamala yakuŵecheta ŵane soni kuganichisya kaje mkanituŵechete, maloŵe getu gachiŵa mpela yakusalalichisya ya golide, yayikusaŵa yakusalala mnope. Myoyo, chinga tukusanonyela yakuŵechetawecheta kapena iyayi, yakuŵecheta yetu yichalimbikasya ŵandu ŵane, soni Yehofa chachituyamichila. (Mis. 23:15; Aef. 4:29) Lyeleli lili litala lyambone lyampaka tulosye kuti tukusayamichila mtuka waŵatupele Mlungu wakuŵechetawu.