1. Ana kwimba kukusatukamucisya kutenda cici?

MUNDU jwine jwakulemba nyimbo jwatite, “Patupikene maloŵe, tukusagaganicisya. Nambo maloŵe ga mu nyimbo gakusatuyika mumtima.” Pa nyimbo syosope, nyimbo syakola maloŵe gakumlumba Yehofa soni syakulosya cinonyelo cetu kwa Atati ŵetu ŵakwinani, ni syasili syambone mnope. Ni ligongo lyakwe kwimba kuli mbali jakusosekwa mnope pa kulambila kusyesyene, cinga tukwimba jika kapena ni abale ni alongo ku mpingo.

2, 3. (a) Ana ŵane akusakuwona wuli kwimba mwagopoka pa misongano? (b) Ana citutagulilane yiwusyo yapi?

² Ana akusajimba mwagopoka pampepe ni mpingo kapena akusatenda sooni? Acalume ŵane akusatenda sooni kwimba pekuga. Yeleyi mpaka yatengusye wosope mu mpingo, mnopemnope naga abale ŵa maukumu ni ŵakuyitandisya yangajimbayo kapena naga akutenda yine ŵandu ali mkwimba.—Sal. 30:12.

³ Naga tukusakuwona kwimba kuŵa mbali ja kulambila kwetu, tuciŵambala kwendajenda ndaŵi ja nyimbo kapenasoni ngasitukunda kuti tukasimanikwa pa mbaliji. M’yoyo, jwalijose akusosekwa kuliwusya kuti, ‘Ana ngusakuwona kwimba nyimbo pa misongano kuti kuli kwakusosekwa? Ana mpaka limbane camtuli  ni cilicose cakundepelekasya kwimba? Soni ana mpaka ndende wuli kuti njimbeje mwakusangalala?’

4, 5. Ana mu ndaŵi ja Ayisalayeli ŵalinganyisye yamtuli pa ngani ja kwimba pa nyumba ja Mlungu?

⁴ Kutandila kalakala ŵakulambila Yehofa ŵakulupicika aŵele ali mkukamulicisya masengo nyimbo pakumlumba Yehofa. Yili yakutesya lung’wanu kuti Ayisalayeli paŵamtumicilaga Yehofa mwakulupicika, kwimba kwaliji mbali jakusosekwa pakulambila kwawo. Mwambone, Mwenye Daudi paŵakosecelaga kutaŵa nyumba jakulambilila, ŵasagwile Alefi ŵakwana 4,000 ŵakwimba nyimbo syakumlumba Yehofa. Mwa ŵandu ŵeleŵa, papali ŵandu 288 ŵaŵaliji ‘ŵamlijiganye cenene pakumjimbila Yehofa.’—1 Mbiri 23:5; 25:7.

⁵ Nyimbo syaliji syakusosekwasoni pa ndaŵi jakuwugulila nyumba ja Mlungu. Ngani jakwe jikusati, “Kaneko ŵakwimba yitolilo ni ŵakwimba ni pakamwa ŵatandite kwimba mwakamulana, mwamti yapikanikaga mpela maloŵe gamo gakumlumba soni kum’yamicila Yehofa. Paŵatandite kwimba yitolilo, micekece, ni yakwimbila yine pakumlumba Yehofa, . . . lumbili lwa Yehofa lwagumbele m’nyumba ja Mlungu jwakuwona.” Celecitu caliji cakutendekwa cakulimbikasya kwabasi!—2 Mbiri 5:13, 14; 7:6.

6. Asale dongosolo jakwimba jajapali pakutaŵasoni lutenje lwa msinda wa Yelusalemu mundaŵi ja Nehemiya.

⁶ Nehemiya paŵalongolelaga Ayisalayeli kutaŵasoni lutenje lwa msinda wa Yelusalemu, ŵasagwile Alefi ŵakwimba pakamulicisya masengo yida yakwimbila. Paŵawugulilaga lutenjelu, ŵajimbile nyimbo syakulosya kusangalala. Pandaŵiji, papali “makuga gaŵili gekulungwa gakwimba nyimbo syakum’yamicila Mlungu.” Makuga gaŵiliga gacingangene pa lutenjelyo, ciŵandika nyumba ja Mlungu ni kutanda kwimba, mwamti nyimbosyo syapikanikaga kwakutalika. (Neh. 12:27, 28, 31, 38, 40, 43) Pelepatu ngatukukayicila kuti Yehofa jwasangalele kwapikana ŵakutumicila ŵakwe ali mkwimba mwamacili nyimbo syakumlumba.

7. Ana Yesu jwalosisye wuli kuti kwimba nyimbo pakulambila kuli kwakusosekwa?

⁷ Ciklistu pacatandite, kwimba kwajendelecele kuŵa kwakusosekwa pa kulambila kusyesyene. Pa cilo cakumalisya ca umi wa Yesu pa cilambo capasi, ŵajimbile nyimbo ni ŵakumkuya ŵakwe pambesi pakutandisya cindimba ca Cakulya Caligulo ca Ambuje.—Aŵalanje Matayo 26:30.

8. Ana Aklistu ŵa mu yaka 100 yandanda ŵatupele cisyasyo camtuli pangani jakwimba pakulambila?

⁸ Aklistu ŵa mu yaka 100 yandanda ŵajimbagasoni pampepe nyimbo syakumlumba Mlungu. Tukumanyilila kuti ndaŵi syejinji ŵasonganaga m’nyumba sya ŵandu, nambo ngaŵa kuti ŵalepelaga kumjimbila Yehofa mwamacili ligongo lya yeleyi. Mwakusalilidwa ni msimu, ndumetume Paulo jwalimbikasisye Aklistu acimjakwe kuti, “Ajendelecele kamusyangana ni kulimbikasyana ni masalimo, nyimbo syakumlumba Mlungu, nyimbo syausimu syakwimbidwa mwakuyamicila, soni amjimbileje Yehofa m’mitima jawo.” (Akolo. 3:16) Nyimbo sya m’buku jetu ja nyimbo sili yisyene “nyimbo syausimu” syatukusosekwa kwimba mwakuyamicila. Nyimbosi sili mbali ja cakulya causimu cakutyocela kwa “kapolo jwakulupicika ni jwalunda.”—Mat. 24:45.

9. (a) Ana ŵane akusalepela kwimba mwakusangalala pa misongano ja mpingo ni jekulungwakulungwa ligongo cici? (b) Ana mpaka tutende wuli kuti tujimbeje cenene pakumlumba Yehofa, soni ana ŵani ŵakusosekwa kulongolela? (Alole ciwulili cacili kundanda kwa nganiji.)

⁹ Nambi wuli naga pana yine yakwalepelekasya kwimba? Komboleka kuti ŵamwiŵasa mwawo kapena mu ndamilo jawo ŵanganonyela kwimba. Mwinesoni akusapikanila nyimbo pa wayilesi, ni pakulandanya maloŵe gawo ni ga ŵakwimba ŵakumanyikawo komboleka kutenguka. Nambo yeleyi yikatulepelekasya kwimba nyimbo syakumlumba Yehofa ligongo kwimbaku kuli ukumu wa jwalijose. M’yoyo, atendeje ayi: ajikwesyeje panandi buku jawo ja nyimbo, akakotimisya mtwe wawo, kaneko ajimbeje mwakulosya kuti yakwimbayo yikwakwaya mumtima! (Ezara 3:11; aŵalanje Salimo 147:1.) Masiku agano, m’Nyumba sya Ucimwene syejinji mwana ma TV, gakulosya maloŵe ga nyimbo. Yeleyi yikusakamucisya ŵandu kwimba mwamacili ligongo ŵangakotimisya mitwe jawo pakwimba. Yili yakusangalasyasoni kumanyilila kuti mu Sukulu ja Undumetume wa Ucimwene jakusatenda acakulungwa ŵa mumpingo mwanasoni lijiganyo lya kwimba nyimbo sya Ucimwene. Cakulinga ca lijiganyoli cili kwakamucisya acakulungwa ŵa mumpingo kuti alongoleleje pakwimba nyimbo.

10. Ana tukusosekwa kumbucila cici naga woga ukutulepelekasya kwimba mwakwesya maloŵe?

¹⁰ Cindu cine cacikusalepelekasya ŵane kwimba cili woga. Ŵane akusajogopa kuti capikaniceje jika kapena kogopa kuti maloŵe gawo ngagasangalasya ŵane. Nambo tukumbucileje kuti “wosopewe tukusakuŵala ndaŵi syejinji” pakuŵeceta. (Yak. 3:2) Atamose yili m’yoyo, ngatukusaleka kuŵeceta pakogopa kukuŵala. M’yoyosoni, ngatukusaka kuleka kwimba nyimbo syakumlumba Yehofa ligongo lyakuti nganitukola maloŵe gambone gakwimbila.

11, 12. Ana tutendeje wuli kuti tujimbeje cenene?

 ¹¹ Ndaŵi sine mpaka tujogopeje kwimba ligongo lyakuti ngatukumanyilila cenene kajimbe kakwe. Nambope, pana matala gakutukamucisya kumasya yeleyi ni kwimbaga cenenepe.

¹² Kuti ajimbe mwamacili akusosekwa kuwuta lipuje lyakwanila. Pakwimba akusosekwa kwesya maloŵe mpela mwakusaŵecetela kapenasoni kupunda pelepa. (Alole yine yakamucisya mu buku ja Pindulani ndi Sukulu ya Utumiki wa Mulungu, pa peji 181 mpaka 184, pasi pa kamtwe kakuti, “Kapumidwe Koyenera.”) Sonitu, ndaŵi sine Malemba gakusiŵasalila ŵakulambila ŵa Yehofa kuti “agumile mwakusangalala” pakwimba nyimbo syakumlumba Mlungu.—Sal. 33:1-3.

13. Asale yampaka tutende kuti tujimbeje mwamacili.

¹³ Pakulambila kwa peŵasa kapena pajika alinje kutenda ayi: Asagule nyimbo jimo jakumtima kwawo kutyocela m’buku ja nyimbo. Agaŵalanje maloŵe ga munyimbojo mwakwesya maloŵe, soni mwamacili. Kaneko, awute lipuje kamo ni kulinga kolanga maloŵe ga mumsela umo mwamacili. Ni alinje kwimba msela uwowo ni kagumile kakoko. (Yes. 24:14) Pambesi pakwe, caciyiwona kuti akwimba mwamacili, mwamti nikuti yili cenene pelepo. Akatenda sooni ni yeleyi!

14. (a) Ana kuwugula mnope pakamwa kukusakamucisya wuli pakwimba? (Alole libokosi lyakuti “ Yampaka Atende Kuti Ajimbeje Cenene.”) (b) Ana ni matala gapi gakusagawona kuŵa gakamucisya mnope pakumasya yakusawusya yine pakwimba?

¹⁴ Cindu cinesoni cakamucisya kuti ajimbeje mwakwesya maloŵe cenene, cili kuwugula mnope pakamwa. M’yoyo, pakwimba awuguleje pakamwa kupunda mwakusaŵecetela. Nambi wuli naga akwete maloŵe gamwana, kapena gakusona mnope, ana mpaka atende wuli? Alole yampaka yakamucisye pambali syelesi m’buku ja Pindulani ndi Sukulu ya Utumiki wa Mulungu, papeji 184, m’kabokosi kakuti “Kuthana ndi Mavuto Ena.”

15. (a) Ana pamsongano wapacaka wa Mboni sya Yehofa wa 2016 papelecedwe cimanyisyo camtuli? (b) Ligongo cici pakopwece buku ja nyimbo jasambano?

¹⁵ Pamsongano wapacaka wa Mboni sya Yehofa wa 2016, M’bale Stephen Lett jwa mu Likuga Lyakulongolela jwasasile ya kopoka kwa buku ja nyimbo jasambano ja mtwe wakuti, Amjimbile Yehofa Mwakusangalala. Abale ni alongo ŵasangalele mnope ni ngani jeleji, mwamti pacangakaŵapa citutande kujikamulicisya masengo pamisongano jetu jampingo. M’bale Lett jwasasile kuti ligongo limo lyakopocesya nyimbo jasambanoji lili lyakuti jikamulane ni Baibulo ja Cisungu jelinganyesoni. M’yoyo, mu nyimbo jasambanoji ŵaŵisile maloŵe gakamulana ni Baibuloji. Nambosoni, mujonjecesyedwe nyimbo sine syakusala ya masengo gakulalicila soni syakuyamicila mbopesi ja ciwombolo. Konjecesya pelepa, ligongo lyakuti kwimba kuli mbali jakusosekwa ja kulambila kwetu, Likuga Lyakulongolela lisacileje kukoposya buku ja nyimbo jakuwoneka mwakulandana ni Baibulo.

16, 17. Pakupanganya nyimbo jasambano, ana ŵacenjile yindu yapi?

¹⁶ Pakusaka kuti nyimbo sya m’buku ja Amjimbile Yehofa Mwakusangalala sikasawusyaga kusipata, nyimbosi siŵicidwe mwakamulana ni mitwe jakwe. Mwambone, nyimbo 12 syandanda sili pasi pa mtwe wakuti Yehofa, nyimbo 8 syakuyicisya sili pa mtwe wakuti Yesu soni ciwombolo, kwineko kwanasoni mitwe jakwe. Pakuŵa nyimbosi asigaŵile m’mitwe, yeleyi yili yakamucisya mnopemnope pakusagula nyimbo syakwimba pangani sya wosope.

¹⁷ Pakusaka kuti jwalijose ajimbeje ni mtima wosope, maloŵe gane ŵagacenjile kuti gatuyiceje pa mtima soni gane gele ŵandu ngakugakamulicisya masengo ŵagatyosisye. Ŵacenjilesoni mitwe ja nyimbo sine. Mwambone, nyimbo jine jakwete mtwe wakuti “M’wuteteyeje Mtima Wenu,” nambo apano mtwe wakwe ukuti “Tukusawuteteya Mtima Wetu.” Kucengaku kwaliji kwakuŵajilwa ligongo kumisongano ja mpingo kapena jekulungwa kukusayika ŵacasambano, ŵanace, soni alongo ŵele pakwimba nyimboji yaŵaga mpela akwasalila ŵane yakutenda mumpingo. M’yoyo, mtwewu ŵawucenjile.

18. Ligongo cici tukusosekwa kusimanyilila cenene nyimbo sya m’buku jetu jasambanoji? (Alolesoni maloŵe ga mwiŵanda.)

¹⁸ Nyimbo syejinji m’buku jasambanoji sili mpela mapopelo. Patukwimba nyimbo mpela syelesi, tulosyeje mwatukupikanila mumtima. Nyimbo sine sili syakamucisya kuti “tulimbikasyane pa cinonyelo soni masengo gambone.” (Ahe. 10:24) M’yoyo, tukusosekwa kumanyilila cenene kajimbe ka nyimbosi, nambosoni maloŵe gakwe. Alijiganyeje nyimbosi kumangwawo, yeleyi yicakamucisya kuti ajimbeje ni mtima wosope soni mwamacili. *

19. Ana wosope mumpingo mpaka amlumbe Yehofa m’litala lyapi?

¹⁹ Akumbucileje kuti kwimba kuli mbali jakusosekwa pakulambila kwetu. Lili litala lyamacili lyakumlosya Yehofa kuti tukum’yamicila soni kuti tukusamnonyela. (Aŵalanje Yesaya 12:5.) Naga wawojo akwimba mwakusangalala, mpaka yalimbikasye ŵanesoni kwimba mwamacili. Cinga ŵanace, acakulungwa, soni ŵacasambano, wosope mpaka amlumbe Yehofa pakwimba nyimbo. Ajimbeje mwamacili pakupikanila maloŵe gakusalilidwa gakuti, “Amjimbile Yehofa!” M’yoyo, kwende tujimbeje mwakusangalala!—Sal. 96:1.