Sanja ja Mlonda ja January 1, 1918, jatandite ni maloŵe gakuti, “Ana caka ca 1918 ciciyikasye cici?” Ngondo jekulungwa jajendelecelagape ku Europe, nambo yayatendekwaga kundanda kwa cakaci yawonekaga kuti yindu ciŵe cenene kwa Ŵakulijiganya Baibulo soni pacilambo cosope capasi.

Mu January 8, 1918, Pulesidenti jwa ku United States lina lyakwe Woodrow Wilson, pakuŵeceta ku Ciwanja Cakupanganya Malamusi ca ku U.S., (U.S. Congress) jwasasile yiwundo yakwana 14 yaŵayiwonaga kuŵa yakusosekwa mnope kuti paŵe “mkamulano soni mtendele.” Jwalakwe jwapelece nganisyo syakuti papagwe kunandiya yida ya ngondo, soni kutamilikasya “mkamulano wa yilambo” yayikakamucisye yilambo yosope. Yiwundo yakwana 14 yaŵasasile Pulesidentiju, mkupita kwa ndaŵi ŵayikamulicisye masengo pakupanganya ciwanja ca League of Nations nambosoni pakutamilikasya cikalata cakamulana ya mtendele, pakusaka kumasya Ngondo Jandanda ja Pacilambo cosope.

Mwangasamala kandu ya yakusokonasya yayapali m’caka ca munyumaci, * nambope, mwakamulana ni msongano wapacaka wa Watch Tower Bible and Tract Society, Ŵakulijiganya Baibulo ŵayiwonaga kuti pacangakaŵapa caŵe pamtendele.

Pamsonganowu, wawatendekwe pa January 5, 1918, acalume ŵakumanyika ŵaŵatyosisye pa Beteli ŵasakaga kulongolela likuga. Richard H. Barber, jwakulolela jwakwendela mipingo jwakulupicika, jwawugulile msonganowu ni lipopelo. Panyuma pakulola lipoti lyakulosya mwagajendele masengo gakulalicila caka cacipite, pasagulidwe ŵakulongolela. M’bale  Barber ŵamsagwile Joseph Rutherford soni abale ŵane ŵakwana 6. Kaneko acakulungwa ŵa boma ŵaŵaliji kumbali jakusisya ŵasagwile acalume ŵakwana 7, kupwatikapo ŵaŵatyosisye pa Beteli ŵala. Nambo jemanjaji nganapunda ligongo lyakuti ŵandu ŵajinji ŵamsagwile M’bale Rutherford soni abale ŵane ŵakulupicika ŵakwana 6 kuti alongoleleje.

Abale ŵajinji ŵaŵapali pamsonganowu, ŵasasile kuti msonganowu waliji “wakusangalasya mnope kupunda misongano josope jajatendekwaga munyumamu.” Nambo kusangalalaku kwaliji kwa kandaŵi.

Kwa miyesi jejinji, Ŵakulijiganya Baibulo ŵagaŵilaga Buku ja The Finished Mystery. Ŵandu ŵamitima jambone ŵawupocele cenene usyesyene wa m’Baibulo wawaliji m’bukuji.

E.  F. Crist, jwakulolela jwakwendela mipingo jwa ku Canada jwasasile ya liŵasa line kuti, “Liŵasali likusalipeleka ni mtima wosope soni likwawula pasogolo mwausimu.” Liŵasa lyeleli lyaŵalasile buku ja The Finished Mystery ni kuwupocela usyesyene kwa yijuma msanope.

Mundu jwine juŵapocele bukuji, paŵajiŵalasile, ndaŵi jijojo jwasalile acimjakwe yajwaŵalasileyo. Utengawu “wamkwayiye” mnope. Jwalakwe jwatite, “Panajendaga pamsewu watatu, cinecakwe cambutile pekoyo mwamti naganisyaga kuti jaliji njelwa nambo nganijiŵa njelwa. Jaliji buku ja ‘The Finished Mystery.’ Panayice kunyumba najiŵalasile josope. . . . Pelepa nayiweni kuti jwalakwe jwatesile yindu mpela jwakulalicila . . . atamose kuti jwaponyisye bukuji kupitila pa liwindo lyakwe ali atumbile . . . Ŵandu ŵajinji ŵalijiganyisye usyesyene kutyocela m’buku jaŵajiponyisye jwakulalicilaju kupitila paliwindo, kupunda jwakulalicila jwine jwalijose. . .  Sambano  tukwete upile wakumlumba Mlungu. Yeleyi yikombolece ligongo lya jwakulalicila jwakutumbilaju.”

Yajwatesile munduju nganiyiŵa yacilendo. Acakulungwa ŵa boma ŵa ku Canada ŵajilekasisye buku ja The Finished Mystery, pa February 12, 1918, pakuganisya kuti jasalaga yakusisya boma soni jalekasyaga ngondo. Mkanipapite ndaŵi jelewu, acakulungwa ŵa boma ŵa ku United States ŵatesilesoni yakulandana ni yeleyi. Ŵandu ŵakujikamucisya boma, ŵawungunyisye ku Beteli ni maofesi ga ku New York, Pennsylvania, soni ku California. Ŵatesile yeleyi, pakusaka kupata umboni wakwasisya abale ŵakulongolela likuga. Pa March 14, 1918, Dipatimenti Jakulola ya Cilungamo ja ku U.S., (U.S. Department of Justice) jalekasisye buku ja The Finished Mystery pakuganisya kuti bukuji jalekasyaga ngondo soni jalimbikasyaga ya ciwawa.

Pa May 7, 1918, Dipatimenti Jakulola ya Cilungamo jeleji, japatile cikalata cakwajiticisya kuti akakamule abale mpela, Giovanni DeCecca, George Fisher, Alexander Macmillan, Robert Martin, Frederick Robison, Joseph Rutherford, William Van Amburgh, ni Clayton Woodworth. Jemanjaji ŵalambucisyaga kuti ali “ŵakasa malamusi, ŵakusokonasya, ŵangasaka kupikanila malamusi ga boma, ŵangakulupicika soni ŵakukana kwinjila usilikali.” Kulinjikwa kwawo kwatandite pa June 3, 1918, nambo twakayicilaga naga jemanjaji cakasimanikwe ŵakulemwa. Ligongo cici?

Acakulungwa ŵa boma ŵa ku United States, ŵalambucisyaga abaleŵa kuti ŵatendaga yindu yaciwawa soni yakwimucila boma. Jemanjaji ŵayiwonaga kuti kwakamula abaleŵa lyaliji ‘litala lyakumacisya ngani syaunami.’ Pa May 16, 1918, ciwanja cakupanganya malamusi cakanile kupanganya lilamusi lyalikateteye ŵakulalicila, ŵaŵalalicilaga “usyesyene, ni yakulinga yambone.” Pa yakambilana yawo, ngani jandanda jaliji jakwamba kabuku ka The Finished Mystery. Pakwamba ya kabukuka, cikalata ca ŵakupanganya malamusi ŵa ku U.S.catite, “Cimo mwa yindu yakogoya mnope paunami wa jemanjaji cili buku jakujisala kuti ‘The Finished Mystery’ . . . Cakuyicisya ca buku jeleji cili kwatengusya asilikali kuti alece kwalimbikasya ŵandu kuti anjijileje usilikali.”

Pa June 20, 1918, nganya jamagambo japatile kuti abale 8 ŵala ŵaliji ŵakulemwa. Lisiku lyakuyicisya, jwakulamula magambo jwalamwile magamboga. Jwalakwe jwatite,“Unami wa dini wakuwandisya jemanjaji . . . uli wakogoya mnope kupunda gaŵikangana kwa asilikali ŵa ku Germany. . . . Jemanjaji akusosekwa kupocela cilango cakupweteka mnope.” Yili yimasile yijuma yiŵili, abale 8 ŵeleŵa ŵalamwile kuti akatame ku ndende ja Federal Penitentiary ku Atlanta, m’cilambo ca Georgia. Jemanjaji ŵasalile kuti akatame ku ndendeko kutandila yaka 10 mpaka 20.

Mkati mwa yaka yeleyi, Ŵakulijiganya Baibulo ŵatandite kwasisya mnope. Nyambi Jakuwungunya ya Malamusi ja ku United States, (Federal Bureau of Investigation) jawungunyisye mwakusamala mnope ya masengo gakulalicila gaŵatendaga ŵakulijiganya Baibuloŵa. Jemanjaji ŵapatile yejinji yakwamba abaleŵa. Yaŵapatile ŵakuwungunyaŵa, yalosisye kuti abale ŵetu ŵaliji ŵakusacilila kwendelecela kukamula masengo gakulalicila.

 Jwamkulungwa jwa ku positi ofesi ja mumsinda wa Orlando, mu upande wa Florida, jwalembile cikalata cakwawula ku Nyambi Jakuwungunya ya Malamusi ja ku United States. Cikalataci casasile kuti, “Ŵakulijiganya Baibulo akulalicila nyumba ni nyumba m’matawuni soni akutenda yeleyi mnopemnope cilo. . . . Jemanjaji yikuwoneka kuti ali ŵakusimicisya kwendelecela kulalicila atamose asimane ni yakusawusya yamtuli.”

Jwamkulungwa jwa asilikali pampepe ni Dipatimenti Jakulondesya ya Ngondo, (War Department) ŵajilembele nyambi jakuwungunya ya malamusi lipoti lyakusala ya masengo ga m’bale Frederick W.Franz, jwele kaneko jwatumicile mu Likuga Lyakulongolela. Jwamkulungwa jwa asilikaliju jwalembile kuti, “F. W. Franz . . . juŵele mkusumisya mabuku gejinji ga the ‘Finished Mystery’.”

Charles Fekel, juŵatumicilesoni mu Likuga Lyakulongolela, jwasimene ni yakusawusya yejinji. Acakulungwa ŵa boma ŵamtaŵile m’baleju ligongo lyakugaŵila buku ja The Finished Mystery. Acakulungwaŵa ŵalolagasoni yikalata yaŵalembaga m’baleju. Jwalakwe ŵamŵisile mu ndende mumsinda wa Baltimore, mu upande wa Maryland, kwa mwesi umo. Mu ndende muŵaliji m’baleju ŵalembile cimanyilo cakuti “Acimmagongo ŵa ku Austria.” Pajwalalicilaga mwakulimba mtima kwa ŵandu ŵaŵam’wusyaga yiwusyo, jwalakwe jwakumbucile maloŵe gaŵasasile Paulo pa 1 Akolinto 9:16 gagakusati, “Likungu kwa une naga ngangulalicila ngani syambone.” *

Konjecesya pakukamula masengo gawo gakulalicila mwakulimbicila, Ŵakulijiganya Baibuloŵa, mwakusacilila ŵapelegenye yikalata yakuŵenda kuti ŵagopole abale ŵaŵaliji mu ndende mu upande wa Atlanta. Anna K. Gardner jwasasile kuti, “Nganitugamba kutama. Abaleŵa paŵaliji mu ndende, masengo getu gakuyicisya galiji kupata ŵandu ŵakusayina yikalata. Twatendaga yeleyi mlango ni mlango. Papali ŵandu ŵajinji ŵaŵasayinile yikalatayi. Ŵandu ŵatwaŵecetanaga nawo, twasalile kuti abaleŵa ŵaliji Aklistu ŵasyesyene soni nganiciŵa cilungamo kwaŵika ku ndende jemanjaji.”

Mundaŵi jakusawusyaji, misongano jatendekwaga kaŵilikaŵili pakusaka kulimbikasya mkamulano wa abale ni alongo wa pacilambo cosope. Sanja ja Mlonda jasasile kuti, “Mu caka cimo . . . patendekwaga misongano jakupunda 40 . . . Pa misongano jeleji twapikanaga malipoti gakusangalasya. Kalakala misongano josope jatendekwaga kwa miyesi jakuŵalanjika pacaka, nambo apano jikusatendekwa mwesi uliwose pacaka.”

Ŵandu ŵamitima jambone ŵajendelecele kupikanila ngani syambone. Pa msongano wine wawatendekwe mumsinda wa Cleveland, mu upande wa Ohio, ŵandu ŵakwana 1,200 ŵatesile nawo msonganowu soni ŵandu 42 ŵabatiswe. Jumo mwa ŵakubatiswaŵa kaliji kamnyamata kakalosisye “kuyamicila Mlungu soni kulipeleka yayikatendekasisye kuti ŵandu ŵane ŵangalambila Yehofa atende sooni pakukawona kamnyamataka kali mkubatiswa.”

Pacaŵandicilaga caka ca 1918, ŵakulijiganya Baibulo ŵawonekaga mpela ŵangali sogolo jambone. Jwine mwa katundu jwa ku Brooklyn ŵamsumisye soni likulu ŵalisamicisye ku Pittsburgh, Pennsylvania. Abale ŵaŵalongolelaga paŵaliji ku ndende, msongano wine wa pacaka watendekwe mu January 4, 1919. Ana kaneko patendekwe cici?

Abale ŵetu ŵajendelecele kukamula masengo gakulalicila mwakupilila. Jemanjaji ŵakwete cikulupi soni ŵamanyililaga yakuyicisya yakwe mwamti ŵasagwile lilemba lya caka ca 1919 kuti liŵe lya mtwe ŵakuti, “Pangali cida cilicose cakwapanganyila jemanja kuti cawulasye cacicipunda.” (Yes. 54:17, King James Version) Msonganowu wakamucisye jemanjaji kuti aŵe ŵakoseka pa yindu yayaliji yakuti casimane nayo pacangakaŵapa, soni kulimbikasya cikulupi cawo pamasengo gagaliji kusogolo kwawo.