1, 2. (a) Ana ni masengo gapi gagaliji gakusosekwa mnope paumi wa Yesu, soni ligongo cici? (b) Ana tukusosekwa kutenda cici kuti yindu yitujendele cenene mpela “ŵamasengo acimjakwe ŵa Mlungu”?

YESU KLISTU jwaliji kalipentala soni jwakulalicila. (Mak. 6:3; Alo. 15:8) Jwalakwe Jwagamanyililaga cenene masengo gosopega. Mpela kalipentala, jwalijiganyisye mwampaka akamulicisye masengo yida yakwe kuti apanganye cindu cambone kutyocela ku matabwa. Nambosoni mpela jwakwiganya ngani syambone, jwalakwe jwakamulicisyaga masengo Malemba mwalunda pakumkamucisya mundu jwalijose kuti apikanicisye usyesyene wa m’Maloŵe ga Mlungu. (Mat. 7:28; Luk. 24:32, 45) Ali akwete yaka 30, Yesu jwalesile ukalipentala ula ligongo jwamanyilile kuti masengo gakusosekwa mnope galiji kulalicila. Jwalakwe jwasasile kuti, ligongo lyajwayicile pacilambo capasi lyaliji kukulalicila ngani syambone sya Ucimwene wa Mlungu. (Mat. 20:28; Luk. 3:23; 4:43) Paumi wa Yesu, undumetume ni wawaliji cindu candanda, mwamti jwasakaga kuti ŵandu ŵanesoni akamule nawo masengogo.—Mat. 9:35-38.

² Ŵajinji mwa m’weji nganituŵa akalipentala, nambo wosope tuli ŵakulalicila ŵatukusajiganya ŵane ngani syambone. Masengo gelega gali gakusosekwa mnope ligongo atamose Yehofa akukamula nawo masengoga. M’weji tuli “ŵamasengo acimjakwe ŵa Mlungu.” (1 Akoli. 3:9; 2 Akoli. 6:4) Tukukamulana ni yajwaŵecete jwamalumbo kuti, “Maloŵe gawo gosope gali usyesyene.” (Sal. 119:159, 160) Ni ligongo lyakwe tukusosekwa kulolecesya kuti ‘tukwiganya ni kulondesya cenene maloŵe ga usyesyene.’  (Aŵalanje 2 Timoteo 2:15.) M’yoyo, tukusalingalinga kukusya lunda lwetu lwakwiganya pa kakamulicisye masengo ka Baibulo, cida cetu cekulungwa catukusakamulicisya masengo pakwajiganya ŵane yakwamba Yehofa, Yesu soni Ucimwene. Pakusaka kutukamucisya kuti tutendeje cenene undumetume wetu, likuga lya Yehofa lipanganyisye yindu yakamucisya yatukusosecela kuyimanyilila cenene. Yindu yeleyi yikusimanikwa mu Yida Yakamulicisya Masengo Pakwiganya.

3. Ligongo lyakuti tusigele ni kandaŵi kamnono kakuti tulalicile, ana cakulinga cetu ciŵeje cici, soni ana lilemba lya Masengo 13:48 likutukamucisya camtuli kuti tutende yeleyi?

³ Mwine mpaka asimonje kuti ligongo cici tukusala kuti yili Yida Yakamulicisya Masengo Pakwiganya ngaŵa Yida Yakamulicisya Masengo Pakulalicila. Ligongo lyakuti “kulalicila” kukusagopolela kuwandisya utenga. Nambo “kwiganya” kukusagopolela kutagulila utenga kuti mundu apikanicisye cenene yakupikanayo soni kuti atendepo kandu pa yalijiganyisyeyo. Ligongo lyakuti tusigele ni kandaŵi kamnono kakuti tulalicile, cakulinga cetu cikusosekwa ciŵeje kutandisya majiganyo ga Baibulo soni kwajiganya ŵandu usyesyene. Yeleyi yikugopolela kuti tukusosekwa kusosasosa mwamtawu ŵandu wosope ŵali “ŵakuŵajilwa umi wangamala” soni kwakamucisya kuti aŵe ŵakulupilila.​—Aŵalanje Masengo 13:44-48.

4. Ana mpaka twamanyilile camtuli ŵali “ŵakuŵajilwa umi wangamala,” soni ana mpaka twapate camtuli?

⁴ Ana mpaka twamanyilile camtuli ŵali “ŵakuŵajilwa umi wangamala”? Mpela muyaŵelele m’yaka 100 yandanda, litala limo lyampaka twamanyilile jemanjaji lili kulalicila. M’yoyo, tukusosekwa kutenda yaŵasasile Yesu yakuti, “Naga ajinjile mumsinda kapena m’musi wuliwose, awungunyeje ŵandu ŵakuŵajilwa.” (Mat. 10:11) Tukajembeceyaga ŵandu ŵangakulupicika, ŵakulikwesya, kapena ŵangali lung’wanu ni yindu yausimu, kuti mpaka apikanile utenga wetu. Nambo tusoseje ŵandu ŵali ŵakulupicika, ŵakulinandiya soni ŵajakwete sala ja usyesyene. Kuwungunya kweleku mpaka tukulandanye ni yaŵatendaga Yesu mpela kalipentala, pakuwungunya matabwa gambone gakupanganyicisya matanga, makongwa soni yindu yine. Jwalakwe, papatile matabwa gambone, jwajigalaga yida yakwe ni kupanganya cindu pakamulicisya masengo lunda lwakwe. Tukusosekwa kutenda mpela yeleyi patukulingalinga kupanganya ŵakulijiganya kutyocela kwa ŵandu ŵakwete mtima wambone.—Mat. 28:19, 20.

5. Ana tukusosekwa kumanyilila yamtuli pakwamba ya yida yetu yatukwete? Apelece cisyasyo. (Alole yiwulili yayili kundanda kwa nganiji.)

⁵ Mpela mwayikusaŵela ni yida yakamulicisya masengo yiliyose, cida cilicose cikwete masengo gakwe. Agambe ganicisya ya yida ya ukalipentala yaŵakamulicisyaga masengo Yesu. * Jwalakwe jwasosekwaga cida cakupimila matabwa, cakulembela litabwa, cakatila, cakupowolela, cakupalila matabwa, cakugolocesya, soni cakomela kuti litabwalyo lilumbikane ni lijakwe. Mwakulandana ni yeleyi, cida cetu cilicose mu Yida Yakamulicisya Masengo Pakwiganya, cikwete masengo gakwe. M’yoyo, kwende sambano tulole Yida Yakamulicisya Masengo Pakwiganya yatukwete soni mwampaka tuyikamulicisye masengo.

6, 7. (a) Ana mpaka tukamulicisyeje masengo camtuli makadi? (b) Ana tumapepala twakwaŵilanjila ŵandu ku misongano ja mpingo tukusakamula masengo gaci?

⁶ Makadi. Makadiga gakusaŵa gamwana nambo gali yida yakutukamucisya kulimanyikasya kwa ŵandu soni kwalongolela ku webusayiti jetu. Pa webusayitipa mpaka alijiganye yejinji yakwamba m’weji, atamosesoni kuŵenda lijiganyo lya Baibulo. Ŵandu ŵakupunda 400, 000 aŵendile lijiganyo lya Baibulo kupitila pa webusayitiji soni ŵane ŵajinji akusaŵenda lisiku lililyose. Mpaka asunje makadi gamnono kuti akamulicisyeje masengo pakuŵecetana ni ŵandu ŵasimene nawo pandaŵi jakutenda yindu ya lisiku lililyose.

⁷ Tumapepala twakwaŵilanjila ŵandu. Tumapepala twakwaŵilanjila ŵandu kumisongano ja mpingo tukwete lisosa lyakwe. Tupepalatu tukusasala kuti, “Tukwaŵenda Kuti Alijiganye Baibulo ni Mboni  sya Yehofa.” Kaneko tupepalatu tukusasala mwampaka atendele yeleyi “pamisongano ja mpingo jetu” kapena “ni jwamboni sya Yehofa.” Tumapepelatu ngatukusagamba kutumanyikasyape m’weji, nambo tukusitwalimbikasya ŵane “ŵakusamanyilila yakusosecela yawo yausimu” kuti tulijiganyeje nawo Baibulo. (Mat. 5:3) Yisyene, ŵandu wosope ali ŵagopoka kwika kumisongano jetu ja mpingo cinga cakunde lijiganyo lya Baibulo kapena iyayi. Nambo naga ali ayice kumisongano, cacilijiganya yejinji yakwamba Baibulo.

8. Ligongo cici yili yakusosekwa kuti twaŵilanjileje ŵandu kumisongano ja mpingo atamose kamope? Apelece cisyasyo.

⁸ Mpaka yiŵe yakamucisya naga tukwendelecela kwaŵilanjila ŵandu kumisongano jetu ja mpingo atamose kamope. Ligongo cici? Jemanjaji cacikuwona kulekangana pasikati pa yakusajiganya Ŵamboni sya Yehofa ni dini syaunami. (Yes. 65:13) Ray ni ŵamkwakwe, Linda, ŵa ku United States ŵayikopocele yeleyi yaka yipiteyo. Jemanjaji ŵayiweni kuti akusosekwa kutanda kwawula ku calici. Ŵakulupililaga Mlungu soni ŵalipikanaga kuti akusosecela yindu yausimu. M’yoyo, ŵatandite kwawula m’macalici gakulekanganalekangana gagaliji mumsinda mwawo. M’macalicimu mwapali ŵandu ŵalijiganye ya Baibulo. Liŵasali lyaganisisye kuti mkanatande kuŵa jumo jwa calici cinecakwe, akusosekwa kuyiwona yindu yiŵili m’calicimo. Candanda, ŵasosekwaga kuti alijiganye kanekakwe m’calicimo. Caŵili, ŵandu ŵa m’calicimo ŵasosekwaga kuwala mpela ŵandu ŵa Mlungu. Kwa yaka yejinji, ŵaliji ali apite m’calici cilicose mumsindamo, nambo ŵawujaga makono gali kundungu. Pangali caŵalijiganyisye, soni ŵandu ŵam’macalicigo kawale kawo kaliji kangalicimbicisya. Panyuma pakopoka mu calici cakumalisya pa macalici gaŵasakaga kwawula, Linda jwapite kumasengo kwakwe soni Ray jwapite kunyumba. Nambo Ray ali mkwawula kunyumba jwasepucile ku Nyumba ja Ucimwene. Kaneko jwaganisisye kuti, ‘Uli njawule ngalole mwakutendela?’ Yaŵayiweni mwelemo yaliji yakuti nganayiwoneje. Jwalijose m’Nyumba ja Ucimwenejo jwaliji jwakungulucika soni ŵawete mwakulicimbicisya. Ray jwatemi mpando wakusogolo mwamti jwasangalele ni yajwalijiganyisye. Yeleyi yili mpela yajwaŵecete ndumetume Paulo yakwamba mundu jwakusayika pamisongano ja Ciklistu kandanda ni kuŵeceta kuti, “Yisyene Mlungu ali pasikati penu.” (1 Akoli. 14:23-25) Ray jwatandite kutenda nawo misongano josope ja Lyamlungu. Kaneko jwatanditesoni kusimanikwa pamisongano ja mkati mwa cijuma. Nombe Linda jwatandite kusimanikwa nawo pamisongano. Kaneko ali akwete yaka ya m’ma 70 wosope ŵatandite lijiganyo lya Baibulo, pambesi pakwe ŵabatiswe.

9, 10. (a) Ligongo cici tumapepala tuli twangasawusya kukamulicisya masengo? (b) Alondesye yampaka tujile pakamulicisya masengo kapepala kakuti Ana Ucimwene wa Mlungu Uli Cici?

⁹ Tumapepala. Tukwete mitundu jakulekanganalekangana jakwana 8 ja tumapepala twatukusakamucisya kutanda kukambilana ni mundu mwangasawusya. Tumapepalatu twatandite kopoka mu 2013, mwamti pakwikanaga apano tukopwesye tumapepala twakwana 5 biliyoni. Umbone wa tumapepalatu uli wakuti, patugambile kumanyilila kakamulicisye masengo ka kapepala kamo, nikuti tosopeto mpaka tukombole kugaŵila ligongo ŵatulembile mwakulandana. Ana mpaka akamulicisye masengo camtuli tumapepelatu kuti atande kukambilana ni mundu?

¹⁰ Mwine akusaka kukamulicisya masengo kapepala kamtwe wakuti Ana Ucimwene wa Mlungu Uli Cici? Candanda amlosye mundujo ciwusyo cacili kusogolo kwa kapepalaka pakum’wusya kuti, “Ana wawojo pakwete paliwusisye kuti ana Ucimwene wa Mlungu Uli Cici? Ana mpaka ajile kuti uli . . . ?” Kaneko am’wusye kuti asagule kwanga kumo pa kwanga kwakuli pakapepalako. Panyuma pakuti ajanjile, m’malo mwakuŵeceta kuti ajanjile cenene kapena alepele, awunukule mkati mwa kapepalako palembile kuti “Yajikusasala Baibulo” kaneko aŵalanje malemba gagali pelepo, Daniele 2:44 soni Yesaya 9:6. Naga yili yakomboleka, ajendelecele kukambilana. Pambesi pakwe, ajawule kusyeto kwa kapepalaka, ni  alole palembile kuti “Yakusosekwa Kuyiganicisya.” Kaneko awusye ciwusyo cakuti “Ana umi uciŵa watuli mu ulamusi wa Ucimwene wa Mlungu?” Kutenda yeleyi, kucakamucisya kuti cakole pakutandila kukambilana paulendo wakuyicisya. Pacaciwoneganasoni kaŵili, mpaka asale mtwe 7 wawuli m’kabuku ka Ngani Syambone Kutyocela kwa Mlungu! kakali kamo mwa yida yetu yakutandicisya majiganyo ga Baibulo.

11. Ana magasini getu akusagalinganya ni cakulinga camtuli, nambi tukusosekwa kumanyilila cici pakwamba ya magasiniga?

¹¹ Magasini. Sanja ja Mlonda soni Ajimuce! gali magasini gagakugopoleledwa soni kugawandisya pacilambo cosope. Ligongo lyakuti magasiniga gakusajawula pacilambo cosope, mtwe wa pandanda pa magasini jilijose akusawulinganya kuti ŵandu kulikose akoleje nawo lung’wanu. Tukusosekwa kukamulicisya masengo yida yeleyi pakusaka kukusya lung’wanu lwa ŵandu pangani syasikwalagasya ŵandu masiku agano. Nambope, candanda tukusosekwa kumanyilila magasini jilijose soni mtundu wa ŵandu ŵaŵalembele.

12. (a) Ana magasini ja Ajimuce! akusiŵalembela ŵani soni cakulinga cakwe cikusaŵa cici? (b) Ana wawojo apatile umbone wamtuli ligongo lyakamulicisya masengo cida celeci?

¹² Ajimuce! Magasiniga akusagalinganya kuti gakamucisye ŵandu ŵakusamanyilila panandi kapena ŵangamanyilila kwene yakwamba Baibulo. Jemanjaji komboleka kuti ngakumanyilila cilicose cakwamba yijiganyo ya Ciklistu, mwine ŵangajikulupilila dini, kapena ngakusamanyilila kuti Baibulo mpaka jakamucisye paumi wawo. Cakulinga cekulungwa ca Ajimuce! cili kwasimicisya ŵakuŵalanga kuti Mlungu apali. (Alo. 1:20; Aheb. 11:6) Cakulinga cine cili cakuti kwakamucisya ŵakuŵalanga kola cikulupi cakuti Baibulo ‘gali maloŵe ga Mlungu.’ (1 Ates. 2:13) Mitwe jitatu ja ngani sya pandanda sya magasini ga caka ca 2018 jili jakuti, “Litala Lya Umi Wakusangalala Mpaka Tulipate Camtuli?” “Yindu 12 Yakamucisya Maŵasa Kuŵa Gakusangalala” soni “Yampaka Yakamucisye Ŵawililwe.”

13. (a) Ana magasini ga Sanja ja Mlonda jagaŵila akusiŵalembela ŵani? (b) Ana wawojo apatile umbone wamtuli ligongo lyakamulicisya masengo cida celeci?

¹³ Sanja ja Mlonda. Magasini jagaŵila jeleji jikusasala yajikusajiganya Baibulo kwa ŵandu ŵakusamcimbicisya Mlungu soni Maloŵe gakwe. Atamose kuti mwine mpaka amanyilile yine ni yine yakwamba Baibulo, nambope ngakusapikanicisya mwakulondola yijiganyo yakwe. (Alo. 10:2; 1 Tim. 2:3, 4) Mitwe jitatu ja ngani sya pandanda sya magasini ga caka ca 2018 jikwanga yiwusyo yakuti “Ana Baibulo Jili Jakamucisya Masiku Agano?” “Ana Kusogoloku Cikutendekwe Yamtuli? soni “Ana Mlungu Akusasamala ya Wawojo?”

14. (a) Ana mafidiyo mcece gagali m’likuga lya yida yakamulicisya masengo pakwiganya gakwete cakulinga camtuli?(b) Ana wawojo apatile umbone wamtuli ligongo lyakamulicisya masengo mafidiyo gelega?

¹⁴ Mafidiyo. Mundaŵi ja Yesu, acikalipentala nganakamulicisyaga masengo yida ya magesi. Nambo masiku agano, jemanjaji akukamulicisya masengo yida yamacili yakwendela magesi, mpela sowo, cakupowolela, cakupalila matabwa, cakomela misomali soni yindu yine. Kupwatika pa mabuku, tukwetesoni mafidiyo gatukusalosya ŵandu. Mcece mwa mafidiyo gelega gali m’likuga lya yida yetu yakamulicisya masengo pakwiganya mpela, Ligongo Cici Tukusosekwa Kulijiganya Baibulo?, Ana pa Lijiganyo lya Baibulo Pakusatendekwa Yatuli?, Ana ku Nyumba ja Ucimwene Kukusatendekwa Yatuli? Soni jakuti Mboni sya Yehofa—Ana M’weji Tuli Ŵani? Mafidiyo gagakwete maminisi gangapunda gaŵili gakusaŵa cenene kugakamulicisya masengo paulendo ŵandanda. Nambo mafidiyo gagakwete maminisi gejinji mpaka tugakamulicisye masengo pa maulendo gakuwilisya soni kwa ŵandu ŵakwete ndaŵi jejinji. Mafidiyoga mpaka galimbikasye ŵandu kuti atande kulijiganya Baibulo soni kusimanikwa pamisongano jetu.

15. Asale yisyasyo yakulosya kuti kwalosya ŵandu jimo mwa mafidiyo getu m’ciŵeceto cawo mpaka kwakamucisye.

¹⁵ Mlongo jwine jwasimene ni jwamkongwe jwine juŵatyocele ku Micronesia jwele ciŵeceto cakwe caliji  Ciyapese. Mlongoju ŵamlosisye jwamkongweju fidiyo jakuti Ligongo Cici Tukusosekwa Kulijiganya Baibulo? m’ciŵeceto cakwe. Paŵatandite kulosya fidiyojo, jwamkongwe jula jwatite, “Aci cili ciŵeceto cangu. Ngangukulupilila, ligongo yakuti pakukolanga maloŵega yikulosya kuti ali jwakumangwetu. Jwalakwe akuŵeceta ciŵeceto cangusaŵeceta.” Ali amalisisye kulolela fidiyojo, jwamkongwejo jwatite cakaŵalanje soni kulolela cilicose cacili m’ciŵeceto cakwe pa jw.org. (Awanicisye ni Masengo 2:8, 11.) Kwende tulolesoni cisyasyo cine. Mlongo jwine jwa ku United States jwamtumicisye fidiyo jijiji mwanace jwamlume jwa acimwenegwe jwakutama m’cilambo cine. Fidiyoji jaliji ja m’ciŵeceto cakwe. Jwajilolelele kaneko jwamtumicisye mlongo jula imelo. Mu imelojo ŵatite, “Mbali jakwamba ya macili gakusakala kuti ni gagakulamulila cilamboci ni jajingwayiye mnope. Mwamti apano mbendile lijiganyo lya Baibulo.” Jwalakweju akusatama m’cilambo cele masengo getu ŵagalekasisye.

16. Asale lisosa lya tumabuku atu: (a) Apikanileje Mlungu kuti Atame ni Umi Wangamala. (b) Ngani Syambone Kutyocela Kwa Mlungu! (c) Ana Ŵani Ŵakutenda Lisosa Lya Yehofa Lelo Jino?

¹⁶ Tumabuku. Ana mpaka amjiganye camtuli mundu jwangakusakombola kuŵalanga cenene kapena pangali tumabuku twa m’ciŵeceto cakwe? Tukwete cida cimo. Cida cakwe cili kabuku kakuti Apikanileje Mlungu kuti Atame ni Umi Wangamala. * Nambo cida cakamucisya kutandisya majiganyo cili kabuku kakuti Ngani Syambone Kutyocela Kwa Mlungu! Mpaka amlosye mundu mitwe 14 jajili kunyuma kwa kabukuka ni kumsalila kuti asagule mtwe umo wawumsangalesye mnope. Kaneko atande lijiganyo pakamulicisya masengo mtwe wasagwilewo. Ana pakwete pakamulicisye masengo litala lyeleli pa maulendo gawo gakuwilisya? Kabuku katatu kakali m’likuga lya yida yetu kali kakuti Ana Ŵani Ŵakutenda Lisosa Lya Yehofa Lelo Jino? Kabukuka ŵakalinganyisye kuti kakamucisyeje ŵakulijiganya Baibulo kuti alimanyilile likuga. Kuti amanyilile kakamulicisye masengo ka kabukuka pa lijiganyo lya Baibulo lililyose, alole kabuku ka Yakutendekwa Pamsongano wa Undumetume ni Umi Waciklistu ka March 2017.

17. (a) Ana buku jakulijiganyila jilijose jikwete cakulinga camtuli? (b) Ana mundu pabatiswe akusosekwa kutenda cici soni ligongo cici?

¹⁷ Mabuku. Panyuma pakutanda lijiganyo pakamulicisya masengo kabuku ka Ngani Syambone Kutyocela Kwa Mlungu, pandaŵi jilijose mpaka ajinjile najo mu buku jakuti Ana Baibulo Jikusatujiganya Yatuli? Pamalisisye buku jeleji soni naga jwakulijiganyajo akwawula pasogolo mwausimu, akusosekwa kwendelecela lijiganyolyo pakamulicisya masengo buku jakuti Yampaka Atende Kuti Mlungu Ŵanonyeleje. Buku jeleji jicimkamucisya jwakulijiganyajo kumanyilila yampaka atende kuti akamulicisyeje masengo yiwundo ya m’Baibulo paumi wakwe. Akumbucileje kuti, ŵacasambano, atamose panyuma pakubatiswa, akusosekwa kwendelecela kulijiganya mpaka ali amalisisye mabuku gosopega. Yeleyi yicimkamucisya kuti alimbisye cikulupi cakwe.—Aŵalanje Akolose 2:6, 7.

18. (a) Ana lilemba lya 1 Timoteo 4:16 likutulimbikasya kutenda cici mpela ŵakwiganya usyesyene, soni ana pakusaŵa yakuyicisya yamtuli? (b) Patukulingalinga kamulicisya masengo Yida Yakamulicisya Masengo Pakwiganya, ana cakulinga cetu ciŵeje cici?

¹⁸ Mpela Ŵamboni sya Yehofa, tukwete ukumu wakwajiganya ŵandu “utenga wa usyesyene wa ngani syambone” wampaka walongolele ku umi wangamala. (Akolo. 1:5; aŵalanje 1 Timoteo 4:16.) Kuti tukombole kutenda yeleyi, tukwete Yida Yakamulicisya Masengo Pakwiganya. Yida yeleyi yikwete cilicose campaka tucisace. (Alole libokosi lyakuti “Yida Yakamulicisya Masengo Pakwiganya.”) Kwende tukamulicisyeje masengo yida yeleyi mwalunda mwampaka tukombolele. Jwakulalicila jwalijose mpaka asagule jika yida yatukwete kuti atande kukambilana ni mundu jwalung’wanu soni ndaŵi jampaka atendele yeleyi. Nambo cakulinga cetu ngaŵa kwamba kugaŵanya yakugaŵila yetu kapena kwalecela ŵandu ŵanganakola lung’wanu ni utenga wetu. Cakulinga cetu cili kupanganya ŵakulijiganya kutyocela kwa ŵandu ŵali ŵakulupicika, ŵakulinandiya, soni ŵajakwete sala jausimu. Ŵeleŵa ni ŵali “ŵakuŵajilwa umi wangamala.”—Mase. 13:48; Mat. 28:19, 20.