1. Ana Daudi jwaŵechete yindu yapi yakulosya kuti Yehofa ali jwakulinandiya?

PANA maumboni gejinji gakulosya kuti Yehofa ali jwakulinandiya. Mwachisyasyo, Daudi jwalembile kuti, “Wawo anjenjele ni chakuchinjilichisya chawo chachikulupusyo, [“soni kulinandiya kwawo kundendekasisye une kuti mbikaniche,” NWT.]” (2 Sam. 22:36; Sal. 18:35) Komboleka kuti Daudi jwaŵechete maloŵega pakukumbuchila ndaŵi jele Samueli ŵayiche kumangwakwe kukumsagula kuti chaŵe mwenye jwa Aisalaeli. Atamose kuti Daudi jwaliji jwamnandi pa ŵanache wosope 8 ŵa Jese, nambope Yehofa ŵamsagwile jwalakwe kuti chajinjile mmalo mwa Mwenye Sauli.—1 Sam. 16:1, 10-13.

2. Ana chitulijiganye chichi munganiji?

² Yaŵaŵechete Daudi pakwamba ya Yehofa mpaka yikamulane ni yaŵalembile jwamasalimo jwine kuti, ‘[Yehofa] akusajinamila pasi ni kulola mwipananga ni chilambo chapasi. Akusamkwesya mundu jwakulaga . . . ni kumtamika pampepe ni ayimwene.’ (Sal. 113:6-8) Munganiji chitulole yampaka tulijiganye pangani ja kulinandiya. Nambo chandanda chitulole kaje yaŵatesile Yehofa pakulosya kuti ali jwakulinandiya. Kaneko chitulole yisyasyo ya ŵandu ŵaŵalosisye kulinandiya, mpela Mwenye Sauli, jwakulochesya Daniele soni Yesu.

3. Ana Yehofa akusatenda yindu chamtuli ni m’weji? Ana yeleyi yikusalosya kuti jwalakwe ali jwamtuli?

³ Yehofa akusalosya kuti ali jwakulinandiya patukulola mwakusatendela yindu ni ŵandu ŵakusamtumichila. Paja jwalakwe ngakusagamba kusangalala ni m’weji ligongo lyakuti tukusamtumichila, nambo akusatuwona kuti tuli achimjakwe. (Sal. 25:14) Yehofa jwapeleche mwanache jwakwe mpela mbopesi pakusaka kutukululuchila yakulemwa yetu. Yeleyi yakombolekasisye kuti  tuŵe paunasi wambone ni jwalakwe soni yalosisye kuti akusatuganichisya mnope.

4. Ana Yehofa ŵatupanganyisye kuti tukomboleje kutenda chichi? Nambi ŵatesile yeleyi ligongo chichi?

⁴ Kwende tulole litala line lyakusalosya Yehofa kuti ali jwakulinandiya. Ligongo lyakuti jwalakwe ni juŵatupanganyisye yikakomboleche kutupanganya kuti tukakola ufulu wakusagula yakutenda. Nambo Yehofa nganasaka kutenda yeleyi, mmalo mwakwe ŵatupanganyisye mwakulandana najo ni kutupa ufulu wakusagula yakutenda. Atamose kuti tuli ŵanache pakulandanya ni jwalakwe, nambope ŵatusagwile kuti tumtumichileje ligongo lyakumnonyela. Soni m’weji ni ŵatukusapindula mnope ligongo lyakumpikanila. (Det. 10:12; Yes. 48:17, 18) Kusala yisyene, tukusayamichila mnope ligongo lya kumtumichila Yehofa jwali jwakulinandiya.

5. Ana Yehofa akusatujiganya chamtuli kuti tuŵe ŵakulinandiya? (Alole chiwulili chapachikuto.)

⁵ Yindu yakusatenda Yehofa kwa m’weji yikusatukamuchisya kuti tuŵe ŵakulinandiya. Yehofa ali jwalunda kumpunda mundu jwalijose. Atamose yili myoyo, jwalakwe akusapikanila nganisyo sya ŵane. Mwachisyasyo, Yehofa ŵakamwile masengo pampepe ni mwanache jwakwe pandaŵi jiŵapanganyaga yindu yosope. (Mis. 8:27-30; Akolo. 1:15, 16) Atamose kuti Yehofa akwete machili gejinji jwalakwe akusiŵapa ŵandu ŵane yakutenda. Mwachisyasyo, jwalakwe ŵamsagwile Yesu kuti aŵe Mwenye. Kupwatika pelepa, ŵasagwilesoni ŵandu ŵakwana 144,000 kuti chalamulile yimpepe ni Yesu. (Luk. 12:32) Yehofa nganagamba kumsagula Yesu kuti aŵe Mwenye, mmalo mwakwe ŵamjiganyisye mwampaka aŵele Mwenye soni jwamkulungwa jwa ŵakutaga mbopesi. (Aheb. 5:8, 9) Yehofa chachajiganyasoni ŵandu ŵachachilamulila yimpepe ni Yesu. Nambo ngaŵa kuti jwalakwe chachigambaga kwalongolela pa chilichose chachachitendaga jemanjaji. Mmalo mwakwe chachakulupilila kuti  chachikamula chenene masengogo.—Chiw. 5:10.

6-7. Ana mpaka tulijiganye chichi kwa Yehofa pangani jakwapa ŵane yakutenda?

⁶ Agambe ganisya, naga Yehofa jwakwete machili gangali malile akusiŵapa yakutenda ŵandu ŵane, kuli wuli m’weji. Naga ali mtwe wa liŵasa kapena jwamkulungwa jwa mumpingo akusosekwa kumsyasya Yehofa pangani jakwapa ŵane yakutenda. Nambo papeleche masengogo, ngakusosekwa kwalondalonda kuti alole mwakutendela, mmalo mwakwe akoleje chikulupi chakuti chigajende chenene. Aŵeje ŵakusachilila kwajiganya ŵane, yampaka yakamuchisye jemanjajo kuti akalikayichilaga. (Yes. 41:10) Ana ŵandu ŵakwete udindo mpaka alijiganyesoni chichi kutyochela kwa Yehofa?

⁷ Baibulo jikusalosya kuti Yehofa akusapikanila yagakusaŵecheta malayika. (1 Ayi. 22:19-22) Yakusatenda Yehofayi, chili chisyasyo chambone kwa achinangolo. Naga yili yakomboleka, achinangolo akusosekwa kwawusyaga ŵanache ŵawo nganisyo mwampaka akamulile masengo ganegakwe. Naga yasasileyo akuyiwona kuti yana lunda, akusosekwa kuyikamulichisya masengo.

8. Ana Yehofa jwalosisye chamtuli kuti ali jwakuwusimana mtima paŵatendaga yindu ni Sala?

⁸ Yehofa akusalosya kuti ali jwakulinandiya ligongo lyakuti akusatenda yindu mwakuwusimana mtima. Mwachisyasyo, naga ŵandu ŵakusamtumichilaga akusaka kupikanichisya panepakwe, akusajanga mwakuwusimana mtima. Pandaŵi jele Yehofa ŵasakaga konanga msinda wa Sodomu ni Gomola, ŵampikanile Abulahamu paŵasalaga nganisyo syakwe. (Gen. 18:22-33) Aganichisye yaŵatesile Yehofa kwa Sala ŵamkwakwe Abulahamu. Sala jwasechile pandaŵi jele Yehofa ŵamsalilaga kuti chachikola mwanache atamose jwaliji ali akalambele. Nambotu Yehofa nganatumbila ni yeleyi. (Gen. 18:10-14) Mmalo mwakwe Yehofa jwatendaga yindu mwakumchimbichisya jwalakwe.

9. Ana achinangolo soni achakulungwa ŵamumpingo mpaka alijiganye chichi kwa Yehofa?

⁹ Achinangolo soni achakulungwa ŵamumpingo mpaka alijiganye yejinji kwa Yehofa. Ana akusatenda wuli naga mwanache jwawo kapena ŵandu ŵane mumpingo ngakukamulana ni yasagwile? Ana akusatenda yindu pakusaka kulosya kuti yasagwile yili yakamuchisya, kapena akusalinga kupikanila nganisyo sya jemanjajo? Naga akusatenda yindu mwakumsyasya Yehofa, yichikamuchisya kuti ŵandu ŵamumpingo soni mwiŵasa mwawo aŵeje ŵakusangalala. Pakwikanaga apano tuyiweni yampaka tutende kuti tumsyasyeje Yehofa pangani ja kulinandiya. Sambano kwende tulole yisyasyo ya m’Baibulo ya ŵandu ŵaŵaliji ŵakulinandiya.

10. Ana Yehofa akusakamulichisya masengo chichi pakusaka kutujiganya?

¹⁰ Yehofa ŵakundile kuti yisyasyo ya ŵandu ŵane yilembedwe m’Baibulo pakusaka kutujiganya m’weji. (Yes. 30:20, 21) Tukusalijiganya yisyasyo ya ŵandu ŵane ŵaŵaliji ŵakulinandiya soni ŵaŵakwete ndamo sine syasikusamsangalasya Mlungu. Tukusalijiganyasoni yisyasyo ya ŵandu ŵane ŵaŵalepele kuŵa ŵakulinandiya.—Sal. 37:37; 1 Akoli. 10:11.

11. Ana tukulijiganya chichi pa yaŵatesile Sauli?

¹¹ Kwende tulole yaŵasimene nayo Mwenye Sauli. Pandanda jwalakwe jwaliji mnyamata jwakulinandiya. Jwalakwe ŵamanyililaga kuti pana yindu yine yanganaŵa akombwele soni pandaŵi jine jwayikene pakukana udindo. (1 Sam. 9:21; 10:20-22) Nambope mkupita kwandaŵi Sauli jwatandite kulipikana. Sauli jwatandite kutenda yeleyi pandaŵi jiŵaliji mwenye. Pandaŵi jine jwalakwe jwalepele kuwusimana mtima paŵamjembecheyaga jwakulochesya  Samueli kuti ayiche. Mmalo mwakuti Sauli amdalile Yehofa kuti ŵakulupusye ŵandu ŵakwe, jwalakwe jwapeleche jika mbopesi atamose nganakola ufulu wakutendela yeleyi. Yehofa yamsakalisye mnope soni nganamkunda kuti apitilisye kuŵa mwenye. (1 Sam. 13:8-14) Mpaka luŵe lunda kulijiganya kanekakwe pa chisyasyochi, soni tusamaleje ni kutenda yindu yangayikutukwaya.

12. Ana Daniele jwalosisye chamtuli ndamo ja kulinandiya?

¹² Sambano kwende tukambilane chisyasyo cha jwakulochesya Daniele. Jwalakwe jwaliji jwakulinandiya kwa umi wakwe wosope soni jwamdalilaga Yehofa kuti amkamuchisyeje. Mwachisyasyo, pandaŵi jele Yehofa ŵamkamuchisye kuti agopolele yaŵasagamile mwenye Nebukadinesala, jwalakwe nganaliputa pamtima. Mmalo mwakwe jwayiweni kuti Yehofa ni jwakusosekwa kupochela ulemu. (Dan. 2:26-28) Ana pelepa tukulijiganya chichi? Naga abale ni alongo akusatuchemelela kuti tukusaŵecheta chenene ngani kumpingo soni yindu yikusatujendela chenene mu utumiki, tukumbuchileje kuti Yehofa ni jwakusosekwa kupochela ulemu wosope. Tukusosekwa tumanyilileje kuti yosopeyi yikusakomboleka ligongo lyakuti Yehofa akusatukamuchisya. (Afil. 4:13) Pelepa, tukusaŵa tuli mkusyasya chisyasyo cha Yesu.

13. Ana pa Yohane 5:19, 30, pakusalosya chamtuli kuti Yesu jwaliji jwakulinandiya?

¹³ Yesu paŵaliji pachilambopa ŵamdalilaga Yehofa atamose kuti jwaliji jwangali ulemwa. (Aŵalanje Yohane 5:19, 30.) Yesu nganalinga kusumula ulamusi wa Atati ŵakwe. Pa Afilipi 2:6 pakusasala kuti “Yesu nganalinga kulitenda kuŵa mpela jwakulandana ni Mlungu.” Jwalakwe jwamanyililaga malile gakwe gakutendela yindu soni jwachimbichisyaga udindo wakwete Atati ŵakwe.

14. Ana Yesu jwatendaga wuli pasalilidwe kutenda yindu yele nganiwuŵa udindo wakwe kuyitenda?

¹⁴ Pandaŵi jine ndumetume Yohane ni Yakobo pampepe ni mama ŵawo ŵapite kwa Yesu kukumŵenda yindu yakuti Yesu nganakola udindo wakuyitenda. Aganichisye yaŵajanjile Yesu. Jwalakwe jwasalile kuti Yehofa ni jwakwete udindo wakusagula ŵandu ŵachachitama kumkono wamlyo kapena wamchiji mu Uchimwene wakwe. (Mat. 20:20-23) Yaŵatesile Yesuyi yalosisye kuti jwamanyililaga malile gakwe soni jwaliji jwakulinandiya. Yesu  nganagambaga kulitendela yindu mkanaŵe kusalilidwa ni Yehofa. (Yoh. 12:49) Ana m’weji mpaka tusyasye chamtuli chisyasyo cha Yesuchi?

15-16. Ana mpaka tukamulichisye chamtuli masengo maloŵe gagali pa 1 Akolinto 4:6?

¹⁵ Naga tukusaka kuŵa ŵakulinandiya mpela Yesu, tukusosekwa kukuya maloŵe gagali pa 1 Akolinto 4:6. Palilembali pakusati, “Mkapelenganya yagakuti malemba.” Mundu jwine patuŵendile kuti tumkamuchisye yineyakwe, ngatukusosekwa gamba kuŵecheta yamumtwe. Mmalo mwakwe mpaka yiŵe chenene kukamulichisya masengo Baibulo kapena kusala yayili m’mabuku getu gane. Kutenda yeleyi kuchilosya kuti pana yindu yine yanganituŵa tukombwele kutenda soni kuti tuli ŵakulinandiya. Mpaka tulosyesoni kuti maloŵe ga Mlungu gali gakamuchisya mnope kupunda lunda lwetu.—Chiw. 15:3, 4.

¹⁶ Kupwatika pakumchimbichisya Yehofa, kulinandiya kukusatukamuchisyasoni m’litala line. Ana kulinandiya mpaka kutukamuchisye chamtuli kuŵa ŵakusangalala soni kuŵa ŵakamulana ni ŵane? Kwende tukambilane yeleyi.

17. Ligongo chichi ŵandu ŵakulinandiya akusaŵa ŵakusangalala mnope?

¹⁷ Ŵandu ŵakulinandiya soni ŵakusamanyilila malile gawo gakutendela yindu akusaŵa ŵakusangalala mnope. Tukuŵecheta yeleyi ligongo lyakuti mundu jwakusamanyilila malile gakwe gakutendela yindu akusayamichila mnope ŵane pamkamuchisye. Aganichisye yayatendekwe Yesu ali ŵaposisye ŵandu 10 ŵaŵalwalaga ulwele wa matana. Pa ŵandu wosopeŵa mundu jumope ni juŵawusile kuja kumyamichila Yesu. Jwalakwe jwamanyililaga kuti pangali mundu jwalijose jwakakombwele kumposya. Yaŵatesile munduju yalosisye kuti jwaliji jwakulinandiya soni jwayamichile chikamuchisyo  chiŵapochele, mwamti ŵamchimbichisye Mlungu.—Luk. 17:11-19.

18. Ana kulinandiya soni kumanyilila malile getu mpaka kutukamuchisye chamtuli kuŵa ŵakamulana ni ŵane? (Aloma 12:10)

¹⁸ Ŵandu ŵakulinandiya akusakamulana ni ŵane soni yikusaŵa yangasawusya kuti akole achimjawo ŵajinji? Tukuŵecheta yeleyi ligongo lyakuti akusamanyilila kuti ŵandu ŵane akwete ndamo syambone soni akusiŵakulupililaga. Ŵandu ŵali ŵakulinandiya soni ŵakusamanyilila malile gawo akusaŵa ŵakusangalala mnope ŵane papochele utumiki wasambano soni akusiŵayamichila.—Aŵalanje Aloma 12:10.

19. Ligongo chichi tukusosekwa kuŵambala ndamo jakunyada?

¹⁹ Mwakulekangana ni ŵandu ŵakulinandiya, ŵandu ŵakunyada ŵangayamichilaga ŵane. Mmalo mwakwe jemanjaji akusasaka kuti ŵane ŵayamichileje. Jemanjaji akusagambaga kulilandanya ni ŵane soni akusalimbikasya mtima wampikisano. Ŵandu ŵali ŵakunyada ngakusiŵajiganya soni kwapa udindo ŵandu ŵane. Mmalo mwakwe akusayiwona kuti masengo mpaka gajende chenene naga akukamula jika. Akusayiwonasoni kuti naga masengogo akwapa ŵane nikuti ngayilondeka. Kunyada kukusamtendekasya mundu kulipikana kuti ali jwakusosekwa mnope kwapunda ŵane soni akusaŵa jwa jelasi ŵane payikwajendela. (Aga. 5:26) Ŵandu ŵakwete ndamo jeleji ŵangakamulana ni achimjawo. Naga tutandite kamtima kakunyada tukusosekwa kumŵenda Yehofa kuti atukamuchisye kuchenga kaganisye ketu kuti kunyadaku kumale.—Alo. 12:2.

20. Ligongo chichi tukusosekwa kuŵa ŵakulinandiya?

²⁰ Tukusayamichila mnope ligongo lyakuti Yehofa ali jwakulinandiya. Yehofa akusalosya kuti ali jwakulinandiya pakutenda yindu ni ŵakutumichila ŵakwe. Myoyo tujigalileje chisyasyo chakwechi. Tukusosekwa kukuya yisyasyo ya m’Baibulo ya ŵandu ŵaŵalosisye kulinandiya paŵamtumichilaga Yehofa. Kwende wosopewe tumchimbichisyeje Yehofa. (Chiw. 4:11) Patukutenda yeleyi tuchiŵa paunasi wambone ni Yehofa ligongo jwalakwe akusiŵanonyela ŵandu ŵakulinandiya.