1. Ana Yehofa apeleche chichi kwa ŵakutumichila ŵakwe?

YEHOFA apeleche yakutenda kwa mundu jwalijose jwakusamtumichila mwakulupichika. Atamose kuti wosope tukwete yakutenda yakulekangana, nambope tuli ŵakusosekwa soni tukusasosechela chikamuchisyo chakutyochela kwa achimjetu. Ndumetume Paulo akutukamuchisya kupikanichisya yeleyi.

2. Mwakamulana ni Aefeso 4:16, ligongo chichi tukusosekwa kwawona ŵane mumpingo kuti ali ŵakusosekwa?

² Maloŵe gaŵasasile Paulo gagali pa lilemba lyalikulongolela nganiji, gakulosya kuti pangali jwakutumichila jwa Mlungu jwalijose jwampaka amsalile Mklistu jakwe kuti, “Nganingola namwe masengo.” (1 Akoli. 12:21) Naga tukusaka kuti mumpingo muŵeje mtendele, tukusosekwa twawoneje ŵane kuti ali ŵakusosekwa mnope soni tukamuleje yimpepe masengo ni jemanjaji. (Aŵalanje Aefeso 4:16.) Patukamula masengo mwakamulana yikusakamuchisya kuti abale ni alongo anonyelaneje soni mpingo ukusaŵa wakulimba.

3. Ana chitukambilane chichi munganiji?

³ Ana mpaka tulosye chamtuli kuti tukusitwachimbichisya Aklistu achimjetu mu mpingo? Munganiji, chitukambilane yampaka atende achakulungwa ŵa mumpingo pakulosya kuti akusachimbichisyana. Kaneko chitukambilane yatukusosekwa kutenda wosopewe pakulosya kuti tukusitwachimbichisya abale ni alongo ŵanganalombela. Pakumalisya chitulole yampaka tutende pakulosya kuti tukusitwanonyela soni kwachimbichisya abale ni alongo ŵakulijiganya chiŵecheto chetu.

4. Ana pa Aloma 12:10 pana maloŵe gamtuli gakusosekwa kugakuya achakulungwa ŵa mumpingo?

⁴ Achakulungwa ŵa mumpingo akusaŵichidwa ni msimu weswela. Nambope jemanjaji akwete mituka jakulekanganalekangana. (1 Akoli. 12:17, 18) Komboleka kuti ŵane mwa achakulungwaŵa agambile kuŵichidwa kwene pa udindo, mwamti ngakumanyilila yindu yejinji. Achakulungwa ŵa mumpingo ŵane akusalepela kutenda yejinji ligongo lya uchekulu soni kulwalalwala. Myoyo jwamkulungwa jwa mumpingo jwalijose ngakusosekwa kumsalilaga jwamkulungwa mjakwe kuti, “Nganingola namwe masengo.” M’malo mwakwe jwamkulungwa jwa mumpingo jwalijose akusosekwa kukuya maloŵe gaŵasasile Paulo pa Aloma 12:10.—Aŵalanje.

5. Ana achakulungwa ŵa mumpingo mpaka alosye chamtuli kuti akusachimbichisyana? Ligongo chichi kutenda yeleyi kuli kwakamuchisya mnope?

⁵ Achakulungwa ŵa mumpingo akusalosya kuti akusachimbichisyana mwakuŵambala kwakata maloŵe achimjawo pakuŵecheta. Yeleyi yili yakamuchisya, mnopemnope pandaŵi jele achakulungwa asimene kuti akambilane yindu yakusosekwa mumpingo. Sanja ja Mlonda ja Okotoba 1, 1988, jasasile kuti, “Achakulungwa ŵa mumpingo akusosekwa kumanyilila kuti, Yesu mpaka akamulichisye masengo msimu weswela pakumlongolela jwamkulungwa jwa mumpingo jwalijose kuti asale yiwundo yakusimanikwa m’Malemba yampaka yakamuchisye kuti asagule yindu mwalunda. (Mase. 15: 6-15) Msimu weswela ukusiwakamuchisya achakulungwa ŵa mumpingo wosope ngaŵaga jwamkulungwa jumope.”

6. Ana chichi champaka chakamuchisye achakulungwa ŵa mumpingo kuti akamulaneje mnope? Ana yeleyi mpaka yikamuchisye uli mpingo wosope?

⁶ Jwamkulungwa jwa mumpingo jwakusiŵachimbichisya achimjakwe, jwangasaka kuti ndaŵi syosope atandeje kuŵecheta achakulungwa ŵa mumpingo pakukambilana yine yakwe. Jwalakwe akusaŵambala kuŵechetaŵecheta mnope nambosoni jwangakanganichisya achakulungwa ŵa mumpingo achimjakwe kuti ajendele nganisyo syakwe, mmalo mwakwe akusapeleka nganisyo syakwe mwakulinandiya. Jwalakwe akusapikanila chenene ŵane pakuŵecheta soni akusaŵa jwakusachilila kusala yiwundo ya m’Malemba  soni yindu yasasile kapolo “jwakulupichika ni jwalunda.” (Mat. 24:45-47) Naga achakulungwa ŵa mumpingo akukambilana yindu mwakuchimbichisyana soni mwakunonyelana, msimu weswela wa Yehofa ukusiŵalongolelaga. Yeleyi yikusakamuchisya kuti asagule yindu yampaka yikamuchisye mpingo wosope.—Yak. 3:17, 18.

7. Ana Yesu ŵawonaga wuli ŵandu ŵangalombela?

⁷ Mu mpingo ŵa Chiklistu mukusasimanikwa abale ni alongo ŵalombele soni ŵanganalombela. Ana tukusosekwa twawoneje chamtuli abale ni alongo ŵanganalombelaŵa? Tukusosekwa twawoneje jemanjaji mpela mwaŵawonelaga Yesu. Jwalakwe paŵaliji pachilambo chapasi nganalombela. Yesu jwaŵikaga nganisyo syakwe syosope pa utumiki wakwe. Jwalakwe nganasala kuti Mklistu jwalijose akusosekwa kulombela kapena ngalombela. Mmalo mwakwe jwasasile kuti pana Aklistu ŵane ŵakusasagula kuti akalombela. (Mat. 19:11, 12, 12) Yesu ŵachimbichisyaga ŵandu ŵangalombela. Jwalakwe nganiŵawonaga ŵandu ŵangalombela kuti ali ŵangasosekwa, kapena kuti akusoŵechela chine chakwe.

8. Mwakamulana ni 1 Akolinto 7:7-9, ana Paulo jwalimbikasisye Aklistu kuti akusosekwa kuganichisya ya chichi?

⁸ Mwakulandana ni Yesu nombe ndumetume Paulo jwatesile utumiki wakwe ali jwangalombela. Paulo nganasala kuti kulombela kuli kulemwa. Jwalakwe jwamanyililaga kuti uli ufulu wa mundu kusagula kulombela kapena ngalombela. Nambope Paulo jwalimbikasisye Aklistu kuti naga mpaka akombole mpaka yiŵe chenene kuti amtumichileje Yehofa ali ŵangalombela. (Aŵalanje 1 Akolinto 7:7-9.) Nambope Paulo nganiŵawonaga Aklistu ŵangalombela kuti ali ŵangasosekwa. Mwachisyasyo, Paulo ŵamsagwile Timoteo juŵaliji jwangalombela nikumpa udindo wakusosekwa mnope mu gulu ja Yehofa. * (Afil. 2:19-22) Kusala yisyene, mpaka kuŵe kulemwa kuganisya kuti m’bale akuŵajilwa kutenda yindu yine yakwe ligongo lyakuti ali jwamlombele kapena jwangalombela.—1 Akoli. 7:32-35, 38.

9. Ana twawoneje chamtuli ŵandu ŵali paulombela soni ŵangalombela?

⁹ Yesu ni Paulo nganasala kuti Aklistu akusosekwa kulombela kapena kuŵa ŵangalombela. Sambano, ana twawoneje chamtuli ŵandu ŵali paulombela soni ŵangalombela? Sanja ja Mlonda ja Okotoba 1 2012, jasasile kuti, “Kulombela kapena ngalombela uli mtuka wakutyochela kwa Mlungu . . . Yehofa jwangasaka kuti ŵandu ŵangalombela atendeje sooni kapena kudandawula ni  yeleyi.” Myoyo m’wejisoni tukusosekwa twachimbichisyeje abale ni alongo mumpingo mwetu ŵali ŵangalombela.

10. Ana tuchiŵambala kutenda chichi naga tukusitwachimbichisya abale ni alongo ŵali ŵangalombela?

¹⁰ Ana mpaka tulosye chamtuli kuti tukusitwachimbichisya soni kwapikanichisya abale ni alongo ŵali ŵangalombela? Tukusosekwa tukumbuchileje kuti Aklistu ŵane ŵasagwile kuti aŵe ŵangalombela. Aklistu ŵane akusasaka ali alombele nambo jemanjaji ŵangapataga mundu jwambone jwakuti alombane najo. Nambosoni pana ŵane ŵele mjawo jwa mu ulombela jwajasiche. Mwakamulana ni yeleyi, ana mpaka luŵe lunda kuti abale ni alongo ŵawusyeje ŵandu ŵanganaŵa paulombela ligongo lyakwe ali ŵangalombela, kapena kwasalila kuti mpaka ŵapatile mundu jwampaka alombane najo? Yisyene kuti abale ni alongo ŵane ŵali ŵangalombela mpaka asache chikamuchisyochi. Nambi wuli naga jemanjaji nganatuŵenda kuti twapatile mundu jwakuti alombane najo ni m’weji tukutenda yeleyo, ana jemanjaji mpaka apikane wuli? (1 Ates. 4:11; 1 Tim. 5:13) Kwende tukambilane yindu yiŵili yaŵaŵechete abale ni alongo ŵane ŵakulupichika ŵali ŵangalombela.

11-12. Ana ŵandu ŵangalombela akusadandawula ni yindu yapi?

¹¹ Jwakulolela dela jwine jwali jwangalombela jwasasile kuti kuŵa jwangalombela kukwete maumbone gejinji. Nambope jwasasilesoni kuti yikusaŵa yangalimbikasya naga abale ni alongo ŵachisyasyo chambone akukuwusya kuti, “Ligongo chichi nganaŵe kulombela mpaka apano?” M’bale jwine jwali jwangalombela jwakusatumichila pa ofesi ja nyambi jwasasile kuti, “Ndaŵi sine abale ni alongo akusiŵatendela chanasa abale ni alongo ŵali ŵangalombela. Yeleyi yikusiyatendekasya abale ni alongo ŵali ŵangalombela kudandawula m’malo mwakusangalala ni mtukawu.

¹² Mlongo jwine jwangalombela jwakusatumichila pa Beteli jwasasile kuti, “Abale ni alongo ŵane akusaganisya kuti mundu jwali jwangalombela nikuti akusosasosa mundu jwambone jwakuti alombane najo. Jemanjaji akusaganisyasoni kuti ŵandu ŵangalombela akusakamulichisya masengo malo gakunguluchila ga pa intaneti pakusaka kupata mundu jwakuti alombane najo. Pandaŵi jine naliji pawulendo wakuja kukukamula masengo gane gakwe m’dela jine. Nambo nakopochele kweleko chilo, mlongo jwaŵambochele jwasasile kuti mumpingo mwawo mwana abale ŵaŵili ŵampaka tuŵajilane kulombana. Jwalakwe jwasalile kuti ngaŵa kuti akumbatila mundu jwakuti lombane najo. Nambo patwagambile kwinjila m’Nyumba ja Uchimwene, jwalakwe jwanjawisye paŵaliji abale ŵaŵiliwo ni chakulinga chakuti ngawonegane nawo. Yeleyi yaliji yakutesya sooni mnope kwa uneji nambosoni abalewo.”

13. Ana ni yisyasyo yapi yayamlimbikasisye mlongo jwine?

¹³ Mlongo jwinesoni jwangalombela jwakusatumichila pa Beteli jwasasile kuti, “Ngumanyilila kuti pana apayiniya ŵane ŵali ŵangalombela. Jemanjaji ali yisyasyo yambone soni akwete yakulinga, akusiŵakamuchisya ŵandu ŵane soni akusasangalala mwamti akusawukamuchisya mpingo. Jemanjaji ŵangadandawulaga ligongo lyakuti ali ŵangalombela soni nganakola maŵasa. Mmalo mwakwe akusaŵa ŵakusangalala mnope. Soni ngakusaliwona kuti ali ŵakusosekwa mnope kwapunda ŵandu ŵali mu ulombela.” Kusala yisyene, yikusaŵa yakusangalasya kuŵa mumpingo wele abale ni alongo akusachimbichisyana mnope. Ligongo ukusamanyilila kuti abaleŵa akusakunonyela, akusakukumbuchila nambosoni ngakusakuwona kuti wuli jwapenani mnope kwapunda jemanjajo.

14. Ana mpaka tulosye chamtuli kuti tukusitwachimbichisya ŵandu ŵangalombela?

¹⁴ Abale ni alongo ŵangalombela mpaka asangalaleje mnope naga tukusitwachimbichisya soni kwawona mwakuŵajilwa mmalo mwakwatendela chanasa. Mpaka yiŵe chenene kwayamichila ligongo lya kulupichika kwawo. Kutenda  yeleyi kuchakamuchisya jemanjajo kuti akalipikanaga mpela tukwasalila kuti, “Nganingola namwe masengo.” (1 Akoli. 12:21) Mmalo mwakwe jemanjaji chachiyiwona kuti tukusitwachimbichisya soni kwawona kuti ali ŵakusosekwa mnope mumpingo.

15. Ana abale ni alongo ŵane atesile yamtuli kuti akombole kutenda yejinji pakumtumichila Yehofa?

¹⁵ Abale ni alongo ŵajinji asagwile kulijiganya chiŵecheto chine kuti atendeje yejinji pakumtumichila Mlungu. Kuti akombole kutenda yeleyi, akusasosekwa kuchenga yindu yejinji paumi wawo. Jemanjaji akusasama mumpingo wawukusakamulichisya masengo chiŵecheto chaŵapagwile, ni akusajawula kukutumichila kudela jajikusosechela ŵakulalichila ŵajinji kwele akusakamulichisya masengo chiŵecheto chine. (Mase. 16:9) Abaleŵa akusasagula jika kutenda yeleyi kuti atende yejinji pakumtumichila Yehofa. Atamose kuti yikusiyajigalila yaka yejinji kuti achikombole chiŵecheto chinecho, nambope ndamo syawo syambone, soni kulimbichila kwawo pa masengo gakulalichila yikusakamuchisya mnope mumpingo. Kusala yisyene tukusitwayamichila mnope abale ni alongo ŵakulipelekaŵa.

16. Ana achakulungwa ŵa mumpingo akusalola yindu yapi pakumjitichisya m’bale kuti aŵe pa udindo?

¹⁶ Achakulungwa ŵa mumpingo ngakusosekwa kulepela kumjitichisya m’bale kuti atumichile mpela jwamkulungwa jwa mumpingo kapena mtumiki jwakamuchisya ligongo lyakuti ngakukombola chiŵecheto cha mumpingomo. Achakulungwaŵa akusamjitichisya m’bale kuti aŵe pa udindo ligongo lyakuti akukwanilisya yagakusasala Malemba. Jemanjaji ŵangamjitichisya mundu ligongo lyakuti akusakombola chiŵecheto chine chakwe.—1 Tim. 3:1-10, 12, 13; Tit. 1:5-9.

17. Ana abale ni alongo ŵane akusaliwusya yiwusyo yapi pasamile m’chilambo chine?

¹⁷ Abale ni alongo ŵane akusasamila m’chilambo chine ligongo lya yakusawusya yakusasimana nayo m’chilambo chawo kapena kuti akapate masengo. Naga yeleyi yili yitendekwe, ŵanache ŵawo akusalijiganya sukulu m’chiŵecheto cha m’chilambo chalicho. Nombe achinangolowo kuti apate masengo m’chilambocho akusasosekwa kulijiganya chiŵecheto. Nambi wuli naga kumaloko kwana mpingo kapena kagulu kakakusatenda misongano m’chiŵecheto chaŵapagwile jemanjajo? Ana jemanjaji akusosekwa kusongana mumpingo wapi? Ana akusosekwa akasonganeje mumpingo wawukusakamulichisya masengo chiŵecheto cha kumaloko, kapena mpingo wawukusakamulichisya masengo chiŵecheto chakumangwawo?

18. Mwakamulana ni Agalatiya 6:5, ana mpaka tuchimbichisye chamtuli yindu yasagwile jwamlume jwali mtwe wa liŵasa?

¹⁸ Jwamlume jwali mtwe wa liŵasa ni jwakwete udindo wakusagula mpingo wakuti liŵasa lyakwe likasonganeje. Ligongo lyakuti jikusaŵa ngani jele mundu jwalijose mpaka alisagulile  jika, jwamlume jwali mtwe wa liŵasa akusosekwa kuganichisya yindu yampaka yikamuchisye liŵasa lyosope. (Aŵalanje Agalatiya 6:5.) Jwalijose akusosekwa kuchimbichisya yasagwile jwamlumejo. Chinga asagwile kuti chakasonganeje mumpingo wapi, tukusosekwa kwapochela ni magasa gaŵili.—Alo. 15:7.

19. Ana mitwe ja maŵasa jikusosekwa kuganichisya mnope ya chichi?

¹⁹ Kombolekasoni kuti maŵasa gane gakusasongana m’mipingo jajikusakamulichisya masengo chiŵecheto chaŵapagwile. Nambo mwine ŵanache ŵawo ngakumanyilila chenene chiŵechetocho. Naga mpingowo uli mudela jele ŵandu ŵakwe akusakamulichisya masengo chiŵecheto cha m’chilambocho, yeleyi mpaka yitendekasye kuti ŵanachewo akapindulaga mnope pali pamisongano. Yeleyi mpaka yitendekwe ligongo lyakuti ŵanachewo akusalijiganya m’sukulu jajikusakamulichisya masengo chiŵecheto cha m’chilambocho ngaŵaga chiŵecheto cha achinangolo ŵawo. Naga yili yitendekwe yeleyi, mitwe ja maŵasa jikusosekwa kuŵenda lunda kwa Yehofa kuti jisagule yindu yampaka yakamuchisye ŵanache ŵawowo. Jemanjaji mpaka atende yeleyi chinga mwakwakamuchisya ŵanachewo kuti apikanichisyeje chenene chiŵecheto cha achinangolo ŵawowo, kapena gamba kusamila kumpingo wa chiŵecheto chakusapikana chenene ŵanachewo. Chinga jwamlume jwali mtwe wa liŵasa asagwile yamtuli, abale ni alongo akusosekwa kuchimbichisya yeleyo.

20. Ana mpaka tutende wuli kuti twachimbichisyeje abale ni alongo ŵakulijiganya chiŵecheto chine?

²⁰ Yatukambileneyi yikulosya kuti m’mipingo jejinji chimusimanikweje abale ni alongo ŵakulijiganya chiŵecheto chine. Mpaka yiŵe yakusawusya kwa jemanjaji kuti asale yakuganisya. Nambope naga tukukola chidwi ni mwakusatendela yindu jemanjaji, mpaka tuyiwone kuti akusamnonyela mnope Yehofa soni kuti ali ŵakusachilila mnope kuti amtumichileje. Patukuyiwona yeleyi mwajemanjaji, tuchitanda kwanonyela nambosoni kwachimbichisya mnope. Yeleyi yichitukamuchisya kuti tuŵambale kwasalila jemanjaji maloŵe gakuti, “jwangali namwe masengo” ligongo lyakuti ŵangakombola chiŵecheto chetu.

21-22. Ana wosopewe tukwete upile wapi?

²¹ Yehofa atupele wosopewe upile wakola yakutenda mumpingo. Chinga tuli m’bale kapena mlongo, jwamlombele kapena jwangalombela, jwachikulile kapena jwachinyamata, chinga tukusakombola chiŵecheto chine chakwe kapena tukusalajilila, wosopewe tuli ŵakusosekwa mnope kwa Yehofa soni kwa ŵandu wosope.—Alo. 12:4, 5; Akolo. 3:10, 11.

²² Myoyo, kwende tukamulichisyeje masengo yindu yatulijiganyisye mu chisyasyo cha Paulo chakwamba yiŵalo ya chilu cha mundu. Yeleyi mpaka yitukamuchisye kuti tuloleje yampaka tutende kuti twalimbikasyeje abale ni alongo ŵetu. Yichitukamuchisyasoni kuti tuyamichileje yakusatenda ŵane mumpingo.