1-2. Mwakamulana ni Salimo 34:8, ana chichi champaka chitukamuchisye kumanyilila kuti Yehofa ali jwambone?

AGAMBE ganisya kuti mundu jwine ŵapele chakulya chele wawojo nganalyeje chitandilile. Mpaka amanyilile yejinji yakwamba chakulyachi naga akuchiwona, kupikana kununjila kwakwe, kumanyilila kateleche kakwe, kapena kwawusya ŵane ŵakusachinonyela chakulyacho. Nambope kuti amanyilile naga mpaka achinonyele chakulyacho akusosekwa kupasya kaje.

² Mpaka tumanyilile kuti Yehofa ali jwambone patukuŵalanga Baibulo, mabuku soni patwapikene ŵane ali mkusala yindu yambone yaŵatendele Yehofa. Mpaka tupikanichisye kuti Yehofa ali jwambone ‘patukulinga’ kulola umbone wakwewo. (Aŵalanje Salimo 34:8.) Kwende tulole mwampaka tutendele yeleyi. Tuwanichisye kuti tukusaka kutenda utumiki wandaŵi syosope. Kuti tukwanilisye chakulingachi tukusosekwa kola umi wangasaka yejinji. Komboleka twaŵalasile maloŵe gaŵasasile Yesu kuti naga tukuŵika Uchimwene wa Mlungu pamalo gandanda, nikuti Yehofa chachitupa yatukusosechela. Nambo mwine nganitugawoneje maloŵega gali mkukwanilichikwa paumi wetu. (Mat. 6:33) Myoyo ligongo lyakuti tukwete chikulupi pa maloŵe ga Yesuga, tukusaŵambala konanga mbiya syejinji. Kupwatika pelepa tukusachenga yindu yine paumi wetu kuti tulipelecheje mnope pa masengo gakulalichila. Patukutenda yeleyi tuchiyiwona kuti Yehofa akusatupa yindu yatukusosechela. Pelepo tukusawuwona umbone wa Yehofa.

3. Mwakamulana ni Salimo 16:1, 2, ana ŵandu ŵapi ŵakusawuwona umbone wa Yehofa?

³ Yehofa ali ‘jwambone kwa wosope’ atamose kwa ŵandu ŵele ngakummanyilila jwalakwe. (Sal. 145:9; Mat. 5:45) Nambope, akusiŵatendela yindu yambone mnope ŵandu ŵakusamnonyela soni  kumtumichila jwalakwe ni mtima wosope. (Aŵalanje Salimo 16:1, 2.) Sambano kwende tukambilane yindu yine yambone yatutendele Yehofa.

4. Ana Yehofa akusalosya chamtuli umbone wakwe kwa ŵandu ŵatandite kuŵa najo paunasi?

⁴ Ndaŵi jilijose jatukukamulichisya masengo yindu yatukulijiganya kutyochela kwa Yehofa tukusalola yayikusati pakutukamuchisya. Patwalijiganyisye ya Mlungu soni kutanda kumnonyela, jwalakwe jwatukamuchisye kumalana ni nganisyo soni yitendo yayatutendekasyaga kuti tukaŵa najo paunasi wambone. (Akolo. 1:21) Patwalipeleche kwa Yehofa soni kubatisidwa, jwalakwe ŵatupele yindu yambone yejinji. Yindu yakwe yili mpela chikumbumtima chambone soni kuŵa najo paunasi wambone.—1 Pet. 3:21.

5. Ana Yehofa akusatukamuchisya chamtuli patukulalichila?

⁵ Tukusawuwonasoni umbone wa Yehofa patukukamula nawo masengo gakulalichila. Ana wawojo ali ŵasooni? Ŵandu ŵajinji ŵakusamtumichila Yehofa ali ŵasooni. Komboleka mkanaŵe jwa Mboni sya Yehofa ŵayiwonaga kuti nganaŵa akombwele kwawula pamlango wa mundu kuti akamlalichile. Nambo apano yeleyi ni yakutenda. Chakusangalasya mnope, Yehofa ŵakamuchisye wawojo kuti asangalaleje pakulalichila. Kupwatika pelepa, ŵakamuchisyesoni kuti aŵeje ŵakuwusimana mtima pasimene ni mundu jwakusisya pandawi jakulalichila. Yehofa akusiŵakamuchisyasoni wawojo kuti akumbuchile lilemba line lyakwe kuti amsalile mundu jwakusaka kumanyilila yejinji. Jwalakwe akusiŵapasoni machili kuti apitilisye kulalichila atamose ŵandu ali ngakupikanila.—Yel. 20:7-9.

6. Ana majiganyo gakusatupa Yehofa gakusalosya chamtuli umbone wakwete jwalakwe?

⁶ Yehofa atulosisyesoni umbone wakwe pakutujiganya mwampaka tulalichilile. (Yoh. 6:45) Pa misongano ja mkati mwa wiki, tukusalijiganya mwampaka tuŵechetele patukwalalichila soni pakwajiganya ŵandu ŵane. Pandanda mpaka yiwoneche yakusawusya patukulinga kamulichisya masengo matala gasambano. Nambo patulinjile kutenda yeleyi, yindu yikusatujendela chenene patukulalichila. Pa misongano ja mpingo soni jekulungwakulungwa akusatulimbikasya kuti tulinjeje matala gakulekanganalekangana gakulalichila ganganitukamulichisyeje masengo. Matala gasambanoga mpaka gawoneche kuti gali gakusawusya. Nambo patukugakamulichisya masengo Yehofa akusatupa upile. Kwende tukambilane yampaka tupate naga tukutenda yiliyose yakomboleka pakumtumichila Yehofa mwangasamala kandu ni mwayiŵelele yindu paumi wetu. Kaneko chitulole yampaka tutende kuti tujonjechesye utumiki wetu.

7. Ana tukusapata upile wamtuli patukulingalinga konjechesya yakutenda pakumtumichila Yehofa?

⁷ Tukusaŵa paunasi wambone mnope ni Yehofa. Aganichisye chisyasyo cha jwamkulungwa jwa mumpingo jwine jwatugambile kumkolanga kuti Samuel, jwakusatumichila yimpepe ni ŵamkwakwe ku Colombia. Jemanjaji ŵasangalalaga paŵatendaga upayiniya ku mpingo kwawo. Nambo ŵasakaga kusamila ku mpingo kukwasosechelaga ŵakulalichila ŵajinji. Kuti yeleyi yikomboleche, ŵasosekwaga kuleka yindu yine yiŵanonyelaga kutenda. Samuel jwatite, “Twakamulichisye masengo lilemba lya Mateyu 6:33, kuti tuleche kusuma yindu yine yayaliji yangasosekwa mnope. Nambo chindu chakusawusya mnope chaliji kuleka nyumba jetu. Nyumbaji jataŵidwe mwatwasachilaga, mwamti nganitujonangaga mbiya pakujisamalila.” Paŵasamile kumpingo wasambanowu, yasimanikwe kuti akukamulichisya masengo mbiya syamnono pakulandanya ni pandanda. M’bale Samuel jwatite, “Tuyiweni yatite Yehofa pakutulongolela soni pakwanga mapopelo getu. Tukuyiwona kuti Yehofa akusangalala ni m’weji, nambosoni uwe tukusangalala ni chinonyelo chakwe kulekangana ni kalakose.”  Ana ali ŵakoseka konjechesya yakutenda pakumtumichila Yehofa m’matala gane? Naga yili myoyo ngakusosekwa kayichila yakuti chachimŵandichila Yehofa soni jwalakwe chachasamalila.—Sal. 18:25.

8. Ana alijiganyisye chichi pa yalyaŵechete liŵasa lyalikolasile mundimeji?

⁸ Tukusasangalala patukutenda utumiki wetu. Apikane yalyasasile liŵasa line lyalikutenda upayiniya m’chilambo chine (Kyrgyzstan). Liŵasali lyatamaga umi wangasaka yejinji kuti akombole kutenda utumiki wuliwose wakwamba kulipeleka kupwatikapo masengo gakutaŵa. Jwamlume jwatite, “Twatendaga utumiki wuliwose mwakulimbichila atamose kuti pambesi pa lisiku twapelega mnope. Twakolaga mtendele wa mumtima, soni twaŵaga ŵakusangalala ligongo twamanyililaga kuti tukukamulichisya masengo machili getu pakumkamuchisya Yehofa. Tuli ŵakusangalalasoni ligongo lyakuti tukwete achimjetu ŵasambano soni tukwete yindu yambone yejinji yanganituŵa tuyiliŵalile.”—Maliko 10:29, 30.

9. Ana mlongo juŵakwete yakusawusya yine jwatesile yamtuli kuti atendeje yejinji pakumtumichila Yehofa? Ana pana yakuyichisya yamtuli?

⁹ Tukusaŵaga ŵakusangalala patukumtumichila Yehofa atamose patukusimana ni yakusawusya. Mwachisyasyo, mlongo jwine jwachikulile soni jwamasije jwakusatama ku West Africa lina lyakwe Mirreh, ali apumwile pa masengo gakwe ga udokotala jwatandite upayiniya. Ligongo lyakuti mlongoju akusalaga kwenda ligongo lya nyamakasi, ngakusakombolaga kulalichila nyumba ni nyumba kwandaŵi jelewu. Nambope akusamalila ndaŵi jakwe jejinji ali mkulalichila pamalo pakusimanikwa ŵandu ŵajinji. Jwalakwe akwete maulendo gakuwilisya soni majiganyo ga Baibulo gejinji. Soni ŵane mwa jemanjaji akusalumbikana nawo kupitila pa foni. Ana chichi chachamkamuchisye mlongoju kuti atendeje yejinji pakumtumichila Yehofa? Jwalakwe jwasasile kuti, “Ngusangalala mnope panguganichisya ya chinonyelo cha Yehofa soni cha Yesu Klistu. Myoyo, ngusamŵenda Yehofa kuti angamuchisye kutenda yampaka ngombole pakumtumichila.”—Mat. 22:36, 37.

10. Mwakamulana ni 1 Petulo 5:10, ana Yehofa akusiŵatendela chichi ŵandu ŵakulingalinga kutenda yejinji pakumtumichila?

¹⁰ Tukusapochela majiganyo gakonjechesya kutyochela kwa Yehofa. Kenny jwakusatenda upayiniya ku Mauritius, jwayiweni kuti maloŵega gali gasyene. Jwalakwe paŵalijiganyisye usyesyene, jwalesile majiganyo ga ku yunifesite. Kaneko jwabatisidwe ni kutanda upayiniya wakutamilichika. Jwalakwe jwasasile kuti, “Ngulinga kutenda yindu mwakamulana ni maloŵe gaŵasasile Yesaya gakuti, ‘Une ndili apano, andume!’” (Yes. 6:8) M’baleju jwakamwile nawo masengo gakutaŵa mmalo gejinji. Nambosoni jwakamuchisye gopolela nawo mabuku gakusala ya m’Baibulo m’chiŵecheto chakwe. Kenny jwatite, “Napochele majiganyo ganasosechelaga kuti ndendeje chenene utumiki wangu.” Nambotu jwalakwe jwalijiganyisye yejinji kupunda kwamba kulijiganya mwampaka akamulile masengogo. Jwalakwe jwatite, “Nalijiganyisyesoni kuti pana yindu yine yanganimba ngombwele kuyitenda. Yeleyi yangamuchisye kuti ndendeje yejinji pangumtumichila Yehofa.” (Aŵalanje 1 Petulo 5:10.) Mpela muyaŵelele ni Kenny, wawojosoni mpaka akombole kuchenga yine ni yine paumi wawo kuti Yehofa ŵajiganye yindu yejinji.

11. Ana alongo ŵa ku South Korea ŵatesile chichi kuti akomboleje kulalichila nawo? Ana yakuyichisya yakwe yaliji yamtuli? (Alole chiwulili cha pachikuto.)

¹¹ Atamose ŵandu ŵaŵele ali mkutumichila kwandaŵi jelewu akusasosekwa majiganyo gasambano kuti atendeje chenene utumiki wawo. Pandaŵi ja mlili wa kolonafayilasi, achakulungwa ŵa mumpingo ku South Korea ŵalembile kuti, “Abale ni alongo ŵane ŵaŵaganisyaga kuti nganaŵa akombwele kulalichila ligongo lya kulwalalwala apano akulalichila kupitila pa fidiyokofelensi. Alongo ŵatatu ŵa yaka ya m’ma 80,  ŵalijiganyisye mwampaka alalichilile kupitila pa kompyuta. Mwamti apano akulalichila nawo lisiku lililyose.” (Sal. 92:14, 15) Ana mpaka ajonjechesye yakutenda pa utumiki wawo kuti alole umbone wa Yehofa? Kwende tukambilane matala gane gampaka gakamuchisye kuti akombole kutenda yeleyi.

12. Ana Yehofa akusasala kuti chachatendela chichi ŵandu ŵakusamdalila jwalakwe?

¹² Amdalileje mnope Yehofa. Jwalakwe akusatusalila kuti chachitutendela yindu yambone yejinji naga tukumdalila mnope soni naga tukutenda yiliyose yampaka tukombole pakumtumichila. (Mal. 3:10) Mlongo jwine jwa ku Colombia lina lyakwe Fabiola, jwayiweni kuti yeleyi yisyene pandaŵi jiŵasimene ni yakusawusya. Mlongoju jwasakaga kutenda upayiniya wakutamilichika ali agambile kubatisidwa kwene. Nambotu jwasosekwaga kukamula masengo kuti akombole kwasamalila ŵamkwakwe soni ŵanache ŵakwe ŵatatu. Pajwalesile kukamula masengo jwapopesile kwa Yehofa kuti amkamuchisye. Jwalakwe jwatite, “Ŵandu akusajembecheya kwandaŵi jelewu kuti atande kupochela mbiya syawo sya peshoni, nambo une napochele mbiya syangu sya peshoni pali pagambile kumala mwesi umo. Yeleyitu yaliji yakusimonjesya mnope.” Pali pagambile kumala miyesi jiŵili mlongoju jwatandite upayiniya. Apano mlongoju akwete yaka ya m’ma 70 soni aŵele ali mkutenda upayiniya kwa yaka yakupunda 20. Jwalakwe akombwele kwakamuchisya achakongwe ŵakwana 8 kuti ayiche pakubatisidwa. Jwalakwe jwatite, “Atamose kuti ndaŵi sine ngusalipikana kuti jwangali machili, nambo Yehofa akusangamuchisya lisiku lililyose  kuti ngwanilisye yayili pa ndandanda jangu jakulalichila.”

13-14. Ana ni yisyasyo yapi yampaka yitukamuchisye kumdalila Yehofa soni kwanilisya yakulinga yetu?

¹³ Kulijiganya kutyochela kwa ŵandu ŵaŵamdalilaga mnope Yehofa. M’baibulo mwana yisyasyo ya ŵandu ŵaŵakamulaga masengo mwakulimbichila pakumtumichila Yehofa. Yisyasyo yejinji, yikusalosya kuti ŵanduwo ŵatandite kutenda mbali jawo Yehofa mkanaŵe kutanda kwapa upile. Mwachisyasyo, Abulahamu jwatyosile kumangwakwe atamose kuti nganamanyililaga kwakwawula, soni Yehofa ŵampele upile. (Aheb. 11:8) Nombe Yakobo jwapochele upile panyuma pakuti alimbene ni lilayika. (Gen. 32:24-30) Aisalaeli ali asigele panandi kwinjila m’Chilambo Chelaguchisye, ŵandu ŵajombweche chenene Lusulo lwa Yolodani panyuma pakuti ŵakutaga mbopesi ŵaŵalongolele ŵatandite kwinjila m’lusulomo.—Yos. 3:14-16.

¹⁴ Yisyasyo ya masiku agano ya abale ni alongo ŵalosisye kumdalila Yehofa mpaka yakamuchisyesoni. Mwachisyasyo, M’bale Payton ni ŵamkwakwe lina lyawo Diana, ŵasangalalaga kuŵalanga ngani syakwamba abale ni alongo ŵatesile yejinji pakumtumichila Yehofa. Nganisi sikusasimanikwa pa kamtwe kakuti “Ŵalipeleche ni Mtima Wosope.” * Payton jwatite, “Patukuŵalanga nganisi, twalipikanaga mpela tukumwona mundu jwakulya chakulya chakunong’a. Patwaganichisyaga yeleyi, ni patwasakaga mnope kulinga kuti tulole umbone wa Yehofa.” Mkanipapite ndaŵi, Payton ni ŵamkwakwe ŵapite kukutumichila kudela kwakusosechela ŵakulalichila ŵajinji. Ana pakwete paŵalasile ngani syelesi? Soni ana pakwete palolelele mafidiyo mpela gakuti, Kulalichila ku Mikuli Jakwanawula—Australia soni Kulalichila ku Mikuli Jakwanawula—Ireland? Mafidiyoga gakusasimanikwa pa jw.org. Mafidiyo gelega mpaka gakamuchisye kulola yampaka atende kuti akombole kutenda yejinji pakumtumichila Yehofa.

15. Ana kukunguluka ni ŵandu ŵakwete ndamo syambone mpaka kutukamuchisye chamtuli?

¹⁵ Akungulucheje ni ŵandu ŵambone. Naga tukukunguluka ni ŵandu ŵane, yikusaŵa yangasawusya kuti tutande kulya yakulya yanganitulyeje. Mwakulandana ni yeleyi, naga tukumalila ndaŵi jejinji tuli mkukunguluka ni ŵandu ŵakusanonyela kumtumichila Yehofa, yichiŵa yangasawusya kutenda yejinji pakumtumichila jwalakwe. Kent ni ŵamkwakwe ŵajitichisye kuti yeleyi yili yisyene. Kent jwasasile kuti, “Achimjetu nambosoni ŵam’liŵasa lyetu ŵatulimbikasyaga kuti tulinjeje kamulichisya masengo matala gasambano pakulalichila. Twayiweni kuti kunguluka ni ŵandu ŵakusaŵika Uchimwene wa Mlungu pamalo gandanda kwatukamuchisye kuti tutande utumiki wasambano.” Apano liŵasali likutenda upayiniya ŵapajika ku Serbia.

16. Mwakamulana ni chisyasyo cha Yesu chachili pa Luka 12:16-21, ligongo chichi tukusosekwa kulipeleka pakumtumichila Yehofa?

¹⁶ Alipelecheje kwa Yehofa. Ngatukusosekwa kuleka yindu yosope yatukusasangalala nayo ni chakulinga chakuti tumsangalasye Yehofa. (Jwak. 5:19, 20) Nambope naga tukuyinonyela mnope yindu yatukusasangalala nayo mpaka kwika pakulepela kutenda yejinji pakumtumichila Yehofa, nikuti tuchilandana ni mundu juŵamkolasile Yesu. Jwalakweju jwasosaga mnope yindu yakuchilu nambo nganayikosyaga ya Mlungu. (Aŵalanje Luka 12:16-21.) M’bale Christian, jwa ku France, jwatite, “Pandanda nganingamulichisyaga masengo machili soni ndaŵi jangu jejinji pakumtumichila Yehofa soni kulikamuchisya liŵasa lyangu.” Kaneko m’baleju ni ŵamkwakwe ŵaganisisye yakuti atande upayiniya. Nambo kuti yeleyi yikomboleche, ŵasosekwaga kuleka masengo gawo. Jemanjaji ŵatandite kukamula masengo gakuswejesya soni ŵalijiganyisye kuti ajikutileje ni mbiya syakwete. Ana  jemanjaji ali ŵakusangalala ligongo lya yaŵasagwile kutendayi? M’baleju jwatite, “Apano ni patukusangalala mnope ni utumiki watukutenda, mnopemnope patukwawona ŵakulijiganya Baibulo ŵetu ali mkulijiganya yakwamba Yehofa.”

17. Ana chichi champaka chitulepekasye kukamulichisya masengo matala gasambano gakulalichilila?

¹⁷ Tukoleje mtima wakusaka kutenda mautumiki gasambano. (Mase. 17:16, 17; 20:20, 21) Mlongo Shirley, jwakusatama ku United States, soni ali mpayiniya, jwachenjile matala gakwe gakulalichilila mundaŵi ja mlili wa kolonafayilasi. Pandanda, jwalakwe ŵayiwonaga kuŵa yakusawusya kulalichila pakamulichisya masengo foni. Nambo paŵalijiganyisye mwampaka atendele yeleyi pandaŵi jiŵayiche jwakulolela dela, mlongoju ŵatandite kulalichila mwakutamilichika pakamulichisya masengo foni. Jwalakwe jwatite, “Pandanda, natendaga woga, nambo apano yikukomboleka nditu kulalichila pafoni. Mwamti ngwalalichila ŵandu ŵajinji mnope kupunda mwayikusaŵela patukulalichila nyumba ni nyumba.”

18. Ana chichi champaka chitukamuchisye kumalana ni yakusawusya patukulinga konjechesya utumiki wetu?

¹⁸ Akoleje yakulinga soni ayikwanilisyeje. Patusimene ni yakusawusya, tukusapopela soni kuganichisya yampaka tutende kuti tumalane ni chakusawusyacho. (Mis. 3:21) Mlongo Sonia, jwakutenda upayiniya ku Europe mu kagulu ka chiŵecheto cha Chiromany, jwatite: “Ngusalembaga pa kapepala yangusaka kutenda ni kukasunga pamalo gakuwonechela. Pa tebulo jangu najambwile misewu jakwinjilila kwakulekangana. Pangusaka kusagula yakutenda, ngusalolaga misewu jiŵiliji ni kuganisyaga msewu wangusosekwa kwinjilila kuti yakulinga yangu yikomboleche.” Sonia akusayiwona mwakuŵajilwa yakusawusya yakusimana nayo. Jwalakwe jwatite, “Chakusawusya chilichose ngusachiwona mpela lipupa lyalichinjile kuti ngapita, kapena mpela mlato wakungamuchisya kuti njomboche. Yikusagamba kujigalila mwanguchiwonela chakusawusyacho soni mwasiŵelele nganisyo syangu.”

19. Ana tukwete chakulinga chamtuli?

¹⁹ Yehofa akusatupa upile m’matala gejinji. Mpaka tulosye kuyamichila upile welewu mwakutenda yiliyose yampaka tukombole pakumlambila jwalakwe. (Aheb. 13:15) Yeleyi yikupwatikapo kutenda yiliyose yampaka tukombole pakumtumichila Yehofa, soni jwalakwe mpaka atupe upile wekulungwa. Lisiku lililyose kwende tusoseje matala gampaka tulochesye ‘kulinga soni kulola kuti Yehofa ali jwambone.’ Mwamti kaneko tuchiŵecheta mpela mwaŵaŵechetele Yesu kuti, “Yakulya yangu ni kupikanila yakusosa ŵele ŵiŵandumile une, ni kumalisya kutenda masengo giŵambele.”—Yoh. 4:34.