1-2. Ana chitukambilane chichi munganiji?

ANA akusapikana wuli mumtima naga chindu chakuchisaka mnope ngachikwika pandaŵi jakwe? Ana akusadandawula? Pa Misyungu 13:12, pakusasala mwangapita mumbali kuti, “Chindu chakuchijembecheya pati chilepeleche, chikusapwetesya mtima.” Nambo ana mpaka apikane wuli naga pali pana magongo gakupikanika gagatendekasisye kuti chinducho chikayika pandaŵi jakwe? Mwangakayichila mpaka ajembecheyejepe mwakuwusimana mtima.

² Munganiji chitukambilane yindu yine yajikusasala Baibulo yampaka yitukamuchisye kuti ‘tujembecheyeje mwakuwusimana mtima.’ (Mik. 7:7) Kaneko chitulole mbali siŵili syatukusasosekwa kwembecheya mwakuwusimana mtima kuti Yehofa atendepo kandu. Pakumalisya chitulole yindu yambone yachachipata ŵandu ŵakusamjembecheya Yehofa mwakuwusimana mtima.

3. Ana mfundo ja pa Misyungu 13:11, jikusatujiganya yamtuli?

³ Chisyasyo chambone chachikusalosya kusosekwa kwa kuwusimana mtima, chikusasimanikwa pa Misyungu 13:11. Pelepa pakusati, “Chipanje chakuchipata mwachitemachitema nombenachosoni chikusamala mwachitemachitemape, nambo chakuchipata mwapanandipanandi chikusaŵa chili mkutupilatupilape.” Ana ajiweni mfundo jakwe pelepa? Luli lunda kutendaga yindu mwakuwusimana mtima. Ngawutukaga miyasi iyayi.

4. Ana tukulijiganya chichi pa Misyungu 4:18?

⁴ Pa Misyungu 4:18 pakusati, “Litala lya ŵandu ŵakulungama lili mpela kumasikusiku kwele kukusaŵa kuli mkulanguchilalanguchila mpaka palikukwela lyuŵa pamtwe.” Maloŵe gelega gakusasala ya mwakusatendela yindu Yehofa pakwasalila ŵandu ya chakulinga  chakwe mwapanandipanandi. Nambope lilembali mpaka likamulesoni masengo pa yakusatenda Mklistu jwalijose kuti aŵe paunasi wambone ni Yehofa. Kutenda yeleyi kwangasaka kuwutuka miyasi, nambo pakusasosekwa ndaŵi jakwanila. Naga tukulijiganya ndaŵi syosope soni kamulichisya masengo yatulijiganyisye m’Maloŵe ga Mlungu nambosoni m’gulu ja Yehofaji, tuchikola ndamo mpela siŵakwete Klistu. Kupwatika pelepa, tuchimmanyilila chenene Mlungu. Kwende tulole chisyasyo chiŵapeleche Yesu panganiji.

5. Ana Yesu jwapeleche chisyasyo chamtuli chakwamba kukula mwapanandipanandi?

⁵ Yesu jwawanichisye ngani syambone syatukusalalichila ni kambeju kamwana kakakusakula panandipanandi m’mitima ja ŵandu ŵambone. Jwalakwe jwatite, ‘Mbeju siŵamisile sila sikusamela niposoni sikusakula, nambo msyene [jwakupandajo] akakumanyilila mwayikutendechela yosopeyi. Litaka ni likusasogosya mbejusyo lisyenepe, ukusatanda mmela kaneko swaji, panyuma pakwe songolo sikusakomala mu swaji mula.’ (Maliko 4:27, 28) Pelepa Yesu jwagopolelaga kuti mpela mwayikusaŵela ni mbeju jajikusakula mwapanandipanandi, nombe mundu jwakulijiganya Maloŵe ga Mlungu akusajawula pasogolo mwapanandipanandi. Mwachisyasyo, jwakulijiganya Baibulo pakutenda yakomboleka kuti aŵe paunasi wambone ni Yehofa tukusatanda kumwona ali mkuchenga yejinji paumi wakwe. (Aef. 4:22-24) Nambo tukusosekwa kumbuchila kuti Yehofa ni jwakusatendekasya kuti kambeju kamwana ka ngani syambone kala kakule mwa munduju.—1 Akoli. 3:7.

6-7. Ana tukulijiganya chichi pa yaŵatite Yehofa pakupanganya chilambochi?

⁶ Masengo galigose gakusatenda Yehofa akusagatendaga mwakuwusimana mtima. Akusatenda yeleyi ni chakulinga chakuti lina lyakwe lichimbichikwe soni kuti ŵane yajendele chenene. Mwachisyasyo, aganichisye yaŵatesile Yehofa pakulinganya yindu mwadongosolo kuti chilambochi chiŵe malo gambone gakutama ŵandu.

⁷ Baibulo pajikusala yaŵatite Yehofa pakuchipanganya chilambo chapasichi, jikusasalaga kuti ŵapimile chenene ni “lukonji” lwakupimila, kuŵika “njalamila syakwe” soni “liganga lya pa ndumba.” (Yob. 38:5, 6) Yehofa jwayikene  pakupata ndaŵi jakulola yindu yosope yiŵayipanganyisye. (Gen. 1:10, 12) Ana akuganisya kuti malayika gapikanaga wuli paŵayiwonaga yindu yaŵapanganyaga Yehofa mwapanandipanandi yili mkuwoneka chenene? Kusala yisyene malayikaga gasangalele mnope. Tukuŵecheta yeleyi ligongo lyakuti pandaŵi jine malayikaga gajimbile “mwalukondwa.” (Yob. 38:7) Ana tukulijiganya chichi pelepa? Yisyene kuti yapite yaka yejinji Yehofa ali mkupanganya yindu. Nambope Yehofa piŵamalisisye ni kulola yindu yiŵapanganyisyeyi, jwayiweni kuti yaliji “yambone mnope.”—Gen. 1:31.

8. Ana sambano chitukambilane chichi?

⁸ Yisyasyo yatukambileneyi yitukamuchisye kuyiwona kuti m’Maloŵe ga Mlungu mwana mfundo syasikusasala kusosekwa kwakutenda yindu mwakuwusimana mtima. Sambano kwende tukambilane yindu yiŵili yatukusasosekwa kumjembecheya Yehofa mwakuwusimana mtima.

9. Ana ndaŵi japi jatukusasosekwa kumjembecheya Yehofa?

⁹ Tukusasosekwa kwembecheya kuti mapopelo getu gajanjidwe. Patumŵendile Yehofa kuti atukamuchisye kumalana ni chakusawusya chine chakwe, ndaŵi sine mpaka tuyiwoneje kuti jwalakwe akucheleŵa kwanga mapopelo getu. Ligongo chichi Yehofa jwangajanga gane mwamapopelo getu ndaŵi jijojo?

10. Ligongo chichi tukusasosekwa kuwusimana mtima patumŵendile Mlungu yine yakwe?

¹⁰ Yehofa akusapikanila mapopelo getu. (Sal. 65:2) Jwalakwe akusagawona mapopelo getu gakutyochela pasi pa mtima kuti uli umboni wakulosya kuti tukwete chikulupi. (Aheb. 11:6) Jwalakwe akusasangalala mnope pakutuwona tuli mkutenda yindu mwakamulana ni mapopelo getu, soni patukutenda yakusasaka jwalakwe. (1 Yoh. 3:22) Myoyo tukusosekwa kutenda yindu mwakuwusimana mtima, nambosoni kutenda yampaka tukombole kuti tumalane ni yakusawusya yatukusimana nayo. Yaŵaŵechete Yesu pandaŵi jine, yikusalosya kuti gane mwamapopelo getu nganigaŵa gajanjidwe ndaŵi jijojo. Jwalakwe jwatite, “M’ŵende nipo Mlungu tachimpa yimkusaka. Msosesose nipo timsimane, poposyani nipo Mlungu tachimwugulila litanga, pakuti mundu jwakuŵenda ni jwakusapochela, jwele jwakusosasosa ni jwakusasimana, nipo jwakupoposya ni jwele jwakusawugulilidwa.” (Mat. 7:7, 8) Patukupikanila malangisoga ni ‘kupopelaga mwangalechesya,’ mpaka tukole chikulupi chakuti Atati ŵetu ŵakwinani akusatupikanila soni kuti chajanje mapopelo getugo.—Akolo. 4:2.

11. Ana lilemba lya Ahebeli 4:16, mpaka litukamuchisye chamtuli naga mapopelo getu gakuwoneka kuti gakucheleŵa kwanjidwa?

¹¹ Atamose kuti ndaŵi sine mpaka yiwoneche kuti Yehofa akucheleŵa kwanga mapopelo getu, nambope jwalakwe akusaŵa jwakoseka kwanga mapopelogo pandaŵi jakwe. (Aŵalanje Ahebeli 4:16.) Yeleyi yikusatutendekasya kuti tukamjimbaga magambo Yehofa naga yindu yine yakwe ngayikutendekwa mwachitema mpela mwatukusachila m’wejo. Mwachisyasyo, kwa yaka yejinji ŵandu aŵele ali mkuŵenda kuti Uchimwene wa Mlungu ujonanje chilambo chakusakalachi. Nombe Yesu jwayikene pakusala kuti tupopeleje kuti yeleyi yitendekwe. (Mat. 6:10) Nambotu mpaka uŵe ungali lunda naga mundu jwine akukunda kuti chikulupi chakwe pa Mlungu chinandipe ligongo lyakuti chilambochi ngachikujonanjidwa pandaŵi jakusaka ŵandu. (Hab. 2:3; Mat. 24:44) Chatukusosekwa kutenda m’weji chili kwambaga kwembecheya kwa Yehofa soni kupopelaga kwa jwalakwe mwachikulupi. Chilambochi chichijonanjidwa pandaŵi jakwe, pakuti Yehofa jwasagwile “lisiku” ni “ndaŵi jakwe” kuti chiyitendekwe yeleyi. Sonitu lyele lisikulyo lichiŵa lyambone kwa ŵandu wosope.—Mat. 24:36; 2 Pet. 3:15.

12. Ana ni ndaŵi japi jele kuwusimana mtima kwetu mpaka kulinjidwe?

¹² Tukusasosekwa kuwusimana mtima patukwembecheya  kuti chilungamo chitendekwe. M’chilambomu ŵandu ŵangatendelaga yambone ŵandu ŵakulekangana nawo mtundu, chiŵecheto soni kwakutyochela. Ŵane akusiŵatendela achimjawo yindu yangali chilungamo ligongo lyakuti ali ŵalemale kapena akwete yakusawusya yine. Ŵa Mboni sya Yehofa ŵajinji akusatendeledwa yindu yangali chilungamo ligongo lya yindu yakusakulupilila. Ŵane patutendele yangali chilungamo tukumbuchileje maloŵe ga Yesu. Paja jwalakwe jwatite, “Jwalijose jutachipilila mpaka pambesi, ni jutachikulupuka.” (Mat. 24:13) Ana mpaka atende uli naga apikene kuti pana mundu jwine mumpingo jwatesile ulemwa wekulungwa? Naga achakulungwa ŵamumpingo ajimanyi nganijo, ana chachijileka m’myala mwa jemanjajo soni kwembecheya mwakuwusimana mtima kuti ajisamalile nganijo mwakamulana ni mwakusasachila Mlungu? Ana achakulungwa akusasosekwa kutenda chichi kuti akombole kutenda yeleyi?

13. Ana pakusasosekwa chichi kuti achakulungwa ŵamumpingo asamalile ngani mwakusasachila Yehofa?

¹³ Achakulungwa ŵa mumpingo pajimanyi ngani jakwamba mundu jwatesile chakulemwa chekulungwa, akusaŵenda “lunda lwakutyochela kwinani.” Akusatenda yeleyi kuti Yehofa ŵakamuchisye kujisamalila chenene nganijo. (Yak. 3:17) Chakulinga chawo chikusaŵa kumkamuchisya jwakulemwajo kuti awuje ku “litala lyakwe lya ulemwa.” (Yak. 5:19, 20) Akusatendasoni yampaka akombole pakusaka kuwuchenjela mpingo, nambosoni pakwalimbikasya ŵaleŵeledwewo. (2 Akoli. 1:3, 4) Achakulungwaŵa pakusamalila ngani jakwamba mundu jwatesile chakulemwa chekulungwa, chandanda akusasosekwa kujimanyilila ngani josopejo. Ndaŵi sine yeleyi mpaka yijigale ndaŵi jelewu. Kaneko panyuma pakujipopelela nganijo, jemanjaji akusapeleka malangiso gakutyochela m’Malemba soni akusapeleka chamuko chakuŵajilwa. (Yel. 30:11) Atamose kuti achakulungwaŵa papikene ngani akusasosekwa kujisamalila mwachitema, jemanjaji ŵangasamalila nganijo mkanaŵe kujipikanichisya. Naga ngani jisamalilidwe chenene, mpingo wosope ukusapindula mnope. Nambope atamose nganijo jili jisamalilidwe chenene m’litala lyeleli, ndaŵi sine mundu jwanganaleŵajo mpaka yimpwetechejepe mnope. Naga wawojosoni yikwatendechela yeleyi, ana chichi champaka atende kuti yikapwetekaga mnope?

14. Ana ni chisyasyo chapi cha m’Baibulo champaka chakamuchisye kuŵa ŵakupilila naga Mklistu mjawo ŵatendele yindu yangali chilungamo?

¹⁴ Ana pakwete patendeledwe yindu yangali chilungamo ni mundu jwine jwakwe, atamose ni Mklistu mjawo? Mpaka tupate yisyasyo yambone  m’Maloŵe ga Mlungu yampaka yitukamuchisye kwembecheya kuti Yehofa asamalile nganijo. Mwachisyasyo, atamose kuti Yosefe jwatendeledwe yindu yangali chilungamo ni ŵachibale ŵakwe, jwalakwe nganakunda kuti yaŵatesile jemanjaji yimtumbilikasye mnope. Mmalo mwakwe, Yosefe jwaŵisile nganisyo syakwe syosope pakumtumichila Yehofa, jwele mkupita kwandaŵi ŵampele upile wejinji ligongo lya kupilila kwakwe mwakuwusimana mtima. (Gen. 39:21) Kwa yaka yejinji Yosefe jwakumbuchilagape yangali chilungamo yayamtendechele soni jwayiwonaga yindu yambone yaŵampele Yehofa. (Gen. 45:5) Mwakulandana ni Yosefe, m’wejisoni yikusatulimbikasya mnope patuli paunasi wambone ni Yehofa, soni patulesile chilichose m’myala mwakwe kuti chilungamo chiwoneche.—Sal. 7:17; 73:28.

15. Ana chichi chichamkamuchisye mlongo jwine kupilila yindu yangali chilungamo yayamtendechele?

¹⁵ Yisyene kuti yindu yangali chilungamo yine yampaka tusimane nayo mpaka yilekangane ni yaŵasimene nayo Yosefe. Nambo yeleyi naga yitutendechele mpaka yitupweteche mnope. Naga tutindene nganisyo ni mundu jwalijose atamose jwangakusamtumichila Yehofa, yikusaŵa yakamuchisya mnope kamulichisya masengo yajikusasala Baibulo. (Afil. 2:3, 4) Aganichisye yakutendekwa ayi. Mlongo jwine yamsakalisye mnope paŵapikene kuti mjakwe jwakumasengo aŵecheteje kwa ŵandu ŵane yaunami yakwamba jwalakwe. Mmalo mwakutenda yindu mwachitema kuti chilungamo chiwoneche, jwalakwe jwaganichisye chisyasyo cha Yesu. Pajatu Yesu nganiŵawuchisyaga ŵandu ŵamtendele yachipongwe. (1 Pet. 2:21, 23) Ligongo lyakuganichisya yeleyi, mlongo jula ŵasagwile kwamba kujileka ngani jila. Panyuma pakwe, mlongo jula ŵapikene kuti mjakwe jwakumasengo jula ŵalwalaga soni jwalagasikaga mnope nganisyo. Mlongo jula jwamanyilile chichamtendekasisye mjakwe jula kumŵechetela yindu yaunami. Pambesi pakwe jwalakwe ŵaŵele jwakusangalala mnope ligongo lyakupilila yindu yachipongwe yayamtendechele.

16. Ana chichi champaka chalimbikasye naga akulimbana ni yangali chilungamo? (1 Petulo 3:12)

¹⁶ Naga wawojo akupilila yangali chilungamo yayatendechele, akumbuchileje kuti Yehofa akusaŵa chiŵandika ni ŵandu “ŵa mtima wekasiche.” (Sal. 34:18) Jwalakwe akusiŵanonyela mnope wawojo ligongo lya kuwusimana mtima soni ligongo lya kumtulila yakudandawula yawo yosope. (Sal. 55:22) Yehofa ali jwakulamula jwa chilambo chosope. Pangali chilichose champaka  chitendekwe jwalakwe ngachimanyilila. (Aŵalanje 1 Petulo 3:12.) Naga akulimbana ni chakusawusya changanaŵa akombwele kumalana nacho akumbuchileje kuti mpaka yiŵe chenene kwembecheya kwa Yehofa kuti ŵakamuchisye.

17. Mwakamulana ni Yesaya 30:18, ana Yehofa atusimichisye chichi?

¹⁷ Pachangakaŵapa Yehofa chatupe yindu yejinji yambone kupitila mu Uchimwene wakwe. Pa Yesaya 30:18 pakusati, ‘AMBUJE akusosa nditu kuti amsalalile mtima. Ali chile kuti amtendele chanasa, ligongo AMBUJE ali Mlungu jwa chilungamo. Wosope ŵakusamkulupilila jwalakwe akwete upile.’ Ŵandu wosope ŵakusamjembecheya Yehofa chachipata yindu yambone mnope apano soni m’chilambo chasambano.

18. Ana ni yindu yambone yapi yatukwembecheya kusogoloku?

¹⁸ Ŵakutumichila ŵa Mlungu pachachijinjila m’chilambo chasambano, ngasasimanasoni ni yindu yiliyose yakulagasya nganisyo yakusasimana nayo masiku agano. Yindu yangali chilungamo yichimala, nambosoni ŵandu ngasapikana kupweteka. (Chiw. 21:4) Ngasitusosekwa kudandawula ni chilichose, ligongo yosope yatuchisaka yichisimanikwaga. (Sal. 72:16; Yes. 54:13) Kusala yisyene, yichiŵa yakusangalasya mnope kuyiwona yosope yaŵasasile Yehofa yili mkutendekwa.

19. Ana Yehofa akutukosechelesya chichi mwapanandipananandi?

¹⁹ Apano Yehofa akutujiganya mwatuchitamilaga ni umi mu ulamusi wakwe. Jwalakwe akutenda yeleyi mwakutukamuchisya kuti tulimbaneje ni ndamo syetu syakusakala soni kuti tukole ndamo syambone. Ngatukusosekwa kwasa mtima kapena kuwujila munyuma. Yindu yambone yisigele panandi kwika. Myoyo, patukuganichisya ya sogolo jambone jatukwete, kwende wosopewe tupitilisye kumjembecheya Yehofa mwakuwusimana mtima pakumalisya masengo gakwe.