1. Ana mpaka tuliwusyeje yiwusyo yapi patukuganichisya yindu yosope yaŵapanganyisye Yehofa?

PATUKUGANICHISYA yindu yaŵapanganyisye Yehofa mpaka tulipikane mpela muŵapikanile jwamasalimo Daudi juŵapopesile kuti, “Pingukuwona kwinani masengo ga magasa gawo, mwesi ni ndondwa siŵasiŵisile kweleko, ngusaliwusya kuti, ‘Ana mundu ali nduni kuti ŵalakwe akumkumbuchila, ni mwanache jwamundu ali nduni kuti ŵalakwe amsamalileje?’” (Sal. 8:3, 4) Mpela muyaŵelele ni Daudi, m’wejisoni patukuganichisya yindu yekulungwakulungwa yaŵapanganyisye Mlungu mpaka tuliwusyeje kuti, ‘Ana ligongo chichi Yehofa akusatuganichisyaga m’weji?’ Munganiji chitulole kuti Yehofa nganagambaga kwasamalila Adamu ni Hawa, nambo ŵakundile kuti aŵe m’liŵasa lyakwe.

2. Ana Yehofa jwasakaga kuti Adamu ni Hawa atende uli?

² Adamu ni Hawa ŵaliji ŵanache ŵandanda ŵapachilambo chapasi soni Yehofa ŵaliji Atati ŵawo ŵachinonyelo. Yehofa ŵalipele liŵasali yakutenda. Jwalakwe jwasalile jemanjaji kuti, “Mŵelekane, mtupe, mgumbale mchilambo chapasi, mchilamulile.” (Gen. 1:28) Yehofa jwasakaga kuti jemanjaji akoleje ŵanache soni kuti asamalileje chilambo chapasi. Yikaŵe kuti Adamu ni Hawa ŵampikanile Mlungu soni kutenda yindu mwakamulana ni chakulinga chakwe, nikuti jemanjaji yimpepe ni ŵanache ŵawo akaŵele m’liŵasa lya Mlungu mpaka kalakala.

3. Ligongo chichi Adamu ni Hawa ŵaliji ŵakusosekwa mnope m’liŵasa lya Yehofa?

³ Adamu ni Hawa ŵaliji ŵakusosekwa mnope m’liŵasa lya Yehofa. Pa Salimo 8:5, Daudi jwasasile yaŵatite Yehofa pakumpanganya mundu. Jwalakwe jwatite, “Pakuŵa ŵalakwe ŵampanganyisye mwakumnondiya, ni akum’wecha chisindi cha lumbili ni uchimbichimbi.” Yili yisyene kuti Mlungu nganiŵapa ŵandu machili soni  lunda mwakulandana ni malayika. (Sal. 103:20) Nambotu ŵandu akwakolanga kuti agambile kuŵa “ŵamwana” pakulandanya ni mwagaŵelele malayika. Yeleyitu yili yakusimonjesya. Yehofa ŵapanganyisye achinangolo ŵetu ŵandanda nikwapa umi wambone mnope.

4. Ana Adamu ni Hawa ŵasimene ni yamtuli ligongo lya ngampikanila Yehofa? Ana chitukambilane chichi munganiji?

 ⁴ Chakutesya chanasa chili chakuti Adamu ni Hawa ŵajasile upile wakutama m’liŵasa lya Yehofa. Mpela mwatuchiyiwonela mungani jakuyichisya, yeleyi yatendekasisye kuti ŵanache ŵa Adamu asimane ni yakusawusya. Nambo chakulinga cha Yehofa nganichichenga. Jwalakwe jwasakaga kuti ŵandu ŵakupikanila aŵe ŵanache ŵakwe mpaka kalakala. Chandanda, kwende tukambilane matala galosisye Yehofa kuti akusatuwona kuŵa ŵakusosekwa. Kaneko chitukambilane yampaka tutende apano, yakulosya kuti tukusaka kuŵa m’liŵasa lya Mlungu. Pakumalisya chitukambilane yindu yachachisangalala nayo ŵanache ŵa Yehofa pachilambopa mpaka kalakala.

5. Ana mpaka tumyamichile chamtuli Mlungu ligongo lya kutupanganya m’chiwanichisyo chakwe?

⁵ Yehofa ŵalosisye kuti tuli ŵakusosekwa mwakutupanganya m’chiwanichisyo chakwe. (Gen. 1:26, 27) Ligongo lyakuti Mlungu ŵatupanganyisye m’chiwanichisyo chakwe, yili yakomboleka kukola ndamo syapenani mnope mpela chinonyelo, chanasa, kukulupichika soni chilungamo. (Sal. 86:15; 145:17) Patukulingalinga kukola ndamo syelesi tukusamsangalasya Yehofa soni tukusamyamichila jwalakwe. (1 Pet. 1:14-16) Patukutenda yindu yakumsangalasya Yehofa tukusaŵa ŵakusangalala mnope. Nambosoni ligongo lyakuti Yehofa ŵatupanganyisye m’chiwanichisyo chakwe, tukusakombola kutenda yakusasaka jwalakwe kuti ŵandu ŵa m’liŵasa lyakwe atendeje.

6. Ana Yehofa jwalosisye chamtuli kwachimbichisya ŵandu paŵapanganyisye chilambo chapasi?

⁶ Yehofa ŵatupanganyichisye malo gambone gakuti tutameje. Jwalakwe mkanaŵe kumpanganya mundu jwandanda, ŵapanganyisye kaje chilambo chakuti atamejemo. (Yob. 38:4-6; Yel. 10:12) Ligongo lyakuti Yehofa ali jwachinonyelo soni jwakoloŵa magasa, jwalakwe jwapanganyisye yindu yejinji yambone yakutukamuchisya kuti tuŵeje ŵakusangalala. (Sal. 104:14, 15, 24) Yehofa jwaganichisyaga yindu yaŵapanganyisye mwamti “ŵayiweni kuti yaliji yambone.” (Gen. 1:10, 12, 31) Jwalakwe jwachimbichisye ŵandu mwakwapa “ulamusi” pa yindu yosope yiŵapanganyisye pa chilambo chapasi. (Sal. 8:6) Mlungu akusasaka kuti ŵandu chasangalaleje mpaka kalakala pakukamula masengo gakusamalila yindu yiŵayipanganyisye jwalakwe. Ana wawojo akusamyamichila Yehofa pa yaŵasasileyi?

7. Ana pa Yoswa 24:15, pakulosya chamtuli kuti mundu akwete ufulu wakusagula yakutenda?

⁷ Yehofa ŵatupele ufulu wakusagula yakutenda. Mpaka tusagule yatukusaka kutenda ni umi wetu. (Aŵalanje Yoswa 24:15.) Mlungu jwachinonyelo akusasangalala patukusagula kumtumichila jwalakwe. (Sal. 84:11; Mis. 27:11) Mpaka tukamulichisye masengo ufulu wetuwu mwakuŵajilwa patukusagula kutenda yindu yambone. Kwende tukambilane chisyasyo chaŵalosisye Yesu panganiji.

8. Ana Yesu jwakamulichisye masengo ufulu wakwe wakusagula m’litala line lyapi?

⁸ Mpaka tukombole kuŵika yakusaka ya ŵane pamalo gandanda naga tukukuya chisyasyo cha Yesu. Pandaŵi jine Yesu ni ŵandumetume ŵakwe ali apesile, ŵapite pamalo gane kuti akapumule. Nambo yeleyi nganiyikomboleka, ligongo gulu ja ŵandu jakuyisye. Jemanjaji ŵasakaga kuti Yesu ŵajiganye. Nambotu Yesu nganatumbila ni yeleyi. Mmalo mwakwe jwatendele chanasa ŵanduwo. Mwamti jwalakwe “ŵatandite kwajiganya yindu yejinji.” (Maliko 6:30-34) Patukumsyasya Yesu mwakamulichisya masengo  ndaŵi soni machili getu pakwakamuchisya ŵane tukusachimbichisya Atati ŵetu ŵakwinani. (Mat. 5:14-16) Tukusalosyasoni kwa Yehofa kuti tukusaka kuŵa m’liŵasa lyakwe.

9. Ana achinangolo akusosekwa kukumbuchila chichi?

⁹ Yehofa ŵapele ŵandu upile wakuŵeleka ŵanache. Ŵapelesoni udindo wakuti ŵajiganyeje ŵanachewo kumnonyela Yehofa soni kumtumichila jwalakwe. Naga wawojo ali nangolo, ana akusayamichila upile welewu? Atamose kuti Yehofa ŵagapele malayika malo gapenani, nambo jwalakwe nganagapa upile wakuti gaŵelecheje ŵanache. Kuganichisya yeleyi mpaka kwakamuchisye ŵandu ŵakwete ŵanache kuyamichila udindo wawo. Mlungu ŵalosisye kwadalila achinangolo mwakwapa udindo wapajika kuti ŵaleleje ŵanache ŵawo “ni kwajamukaga niposoni kwajiganya mwa Klistu.” (Aef. 6:4; Det. 6:5-7; Sal. 127:3) Gulu ja Yehofa jikopwesye yindu yejinji yakusala ya m’Baibulo yakwakamuchisya achinangolo. Yindu yakwe yili mpela mabuku, nyimbo, mafidiyo soni yindu yine ya pa intaneti. Kusala yisyene, Yehofa soni Yesu akusiŵanonyelaga ŵanache. (Luk. 18:15-17) Naga achinangolo akumdalila Yehofa soni kutenda yampaka akombole pakwasamalila ŵanache ŵawo, Yehofa akusaŵaga jwakusangalala. Mwamti achinangoloŵa akusaŵa kuti akwakamuchisya ŵanacheŵa kuti aŵe m’liŵasa lya Yehofa mpaka kalakala.

10-11. Ana Yehofa chachitutendela chichi ligongo lya mbopesi jakutuwombola?

¹⁰ Yehofa jwapeleche Mwanache jwakwe pakusaka kutukamuchisya kuti tuŵe m’liŵasa lyakwe. Mpela mwatuyiwonele  mundime 4, Adamu ni Hawa ŵajasile upile wakutama m’liŵasa lya Yehofa, soni ŵatendekasisye kuti ŵanache ŵakwe akakola upile wakutama m’liŵasali. (Alo. 5:12) Adamu ni Hawa ŵalepele kumpikanila Mlungu mwamelepe, mwamti Mlungu ŵatyosisye jemanjaji m’liŵasa lyakwe. Nambi uli pakwamba ya ŵanache ŵawo? Yehofa jwatesile yindu yakuti ŵanache ŵakupikanila akolesoni upile wakuŵa m’liŵasa lyakwe. Jwatesile yeleyi kupitila mumbopesi jiŵapeleche Mwanache jwakwe, Yesu Klistu. (Yoh. 3:16; Alo. 5:19) Ligongo lya mbopesi jaŵapeleche Yesuji yikamuchisye kuti ŵandu ŵakulupichika ŵakwana 144,000, asagulidwe ni kuŵa ŵanache ŵa Mlungu.—Alo. 8:15-17; Chiw. 14:1.

¹¹ Konjechesya pelepa, ŵandu mamiliyoni gejinji ŵali ŵakulupichika akumpikanila Yehofa mwakutenda chakulinga chakwe. Jemanjaji akwete chembecheyo chakutama m’liŵasa lya Mlungu mpaka kalakala, panyuma pakulinjidwa kakumalisya, chakumbesi kwa ulamusi wa yaka 1000. (Sal. 25:14; Alo. 8:20, 21) Ligongo lyakuti ŵanduŵa akwete chembecheyo chelechi akusamkolangaga Yehofa jwali mkupanganya jwawo kuti “Atati.” (Mat. 6:9) Nombe ŵandu ŵaŵawile pachachijimuka chachikola upile wakulijiganya yindu yakusasaka Yehofa kuti jemanjajo atendeje. Ŵandu ŵachachipikanila soni kukuya yachachilijiganyaga, mwangakayichila nombenawo chachiŵa m’liŵasa lya Mlungu.

12. Ana chitukambilane kwanga kwa chiwusyo chapi?

¹² Mpela mwatuyiwonele kala, Yehofa atesile yindu yejinji yakulosya kwachimbichisya ŵandu. Jwalakwe asagwile Aklistu ŵane kuti aŵe ŵanache ŵakwe soni apeleche chembecheyo kwa Aklistu ŵali mu “likuga lya ŵandu ŵangaŵalanjika,” kuti chaŵe ŵanache ŵakwe m’chilambo chasambano. (Chiw. 7:9) Ana mpaka tutende chichi pakusaka kumlosya Yehofa kuti tukusaka kuŵa m’liŵasa lyakwe mpaka kalakala?

13. Ana mpaka tutende uli kuti tuŵe m’liŵasa lya Mlungu? (Maliko 12:30)

¹³ Alosyeje kuti akusamnonyela Yehofa mwakumtumichila jwalakwe ni mtima wosope. (Aŵalanje Maliko 12:30.) Pa yindu yosope yatupele Yehofa, chindu chakusosekwa mnope chili upile wakumlambila jwalakwe. Tukusalosya  kumnonyela Yehofa ‘mwakugapikanila malamusi gakwe.’ (1 Yoh. 5:3) Yehofa ŵatulamwile kupitila mwa Yesu kuti twajiganyeje soni kwakamuchisya ŵandu kuti abatisidwe. (Mat. 28:19) Jwalakwe ŵatulamwilesoni kuti tunonyelaneje. (Yoh. 13:35) Yehofa chachitenda yakuti ŵandu wosope ŵakusampikanila aŵe m’liŵasa lya ŵakutumichila ŵakwe ŵapachilambo chapasi.—Sal. 15:1, 2.

14. Ana mpaka tulosye chamtuli kuti tukusanonyela ŵane? (Mateyu 9:36-38; Aloma 12:10)

¹⁴ Twanonyeleje ŵane. Chinonyelo jili ndamo jekulungwa jakwete Yehofa. (1 Yoh. 4:8) Yehofa ni juŵatandite kutunonyela m’weji atamose patwaliji mkanituŵe kummanyilila. (1 Yoh. 4:9, 10) Tukusamsyasya jwalakwe patukwanonyela ŵandu ŵane. (Aef. 5:1) Litala limo lyatukusatendela yeleyi lili kwakamuchisya kuti alijiganye yakwamba Yehofa ndaŵi mkanijimale. (Aŵalanje Mateyu 9:36-38.) Patukutenda yeleyi tukusakamuchisya jemanjaji kuti akole chembecheyo chakuŵa m’liŵasa lya Mlungu. Panyuma pakuti mundu abatisidwe, tukusosekwa kupitilisya kumnonyela soni kumchimbichisya. (1 Yoh. 4:20, 21) Ana mpaka tutende chamtuli yeleyi? Litala limo lyampaka tutendele yeleyi lili kutenda yindu yakumlosya kuti tukusamkulupilila mundujo. Mwachisyasyo, patukulepela kumanyilila chachimtendekasisye kutenda yakulemwecheka yineyakwe, nganituŵa tuganisisye kuti atesile yeleyo ligongo lya kulinonyela. Mmalo mwakwe tuchimchimbichisya mlongo mjetujo mwakumwona kuti ali jwakutupunda.—Aŵalanje Aloma 12:10; Afil. 2:3.

15. Ana ni ŵandu ŵapi ŵatukusosekwa kwatendela chanasa?

¹⁵ Twatendeleje chanasa ŵandu wosope. Naga tukusaka kutama m’liŵasa lya Yehofa mpaka kalakala, tukusosekwa kukamulichisya masengo Maloŵe ga Mlungu paumi wetu. Mwachisyasyo, Yesu jwasasile kuti twatendeleje chanasa ŵandu wosope kupwatikapo achimmagongo ŵetu. (Luk. 6:32-36) Nambope ndaŵi sine mpaka tuyiwone yeleyi kuŵa yakusawusya. Naga yili myoyo tukusosekwa kulijiganya kuti tuganisyeje soni kutenda yindu mpela mwaŵatendelaga Yesu. Patukulingalinga kumsyasya Yehofa soni Yesu, tukusalosya kwa Atati ŵetu ŵakwinani kuti tukusaka kuŵa m’liŵasa lyakwe mpaka kalakala.

16. Ana mpaka tutende uli kuti liŵasa lya Yehofa lipitilisye kola mbili jambone?

¹⁶ Achenjeleje mbili ja liŵasa lya Yehofa. Mu liŵasa lisyesyene, yayikusatendekwa yili yakuti, kamwanache kakalume kakusajigalila yakutenda ya achakulugwe. Naga achakulugweŵa akukamulichisya masengo mfundo sya m’Baibulo paumi wawo, yikusakamuchisya kuti mpwawojo akole chisyasyo chambone chakuti achikuyeje. Nambo naga akutenda yakusakala, nombe mpwawojo akusatanda kutenda yakusakala. Mwelemu ni mwayiŵelelesoni yindu m’liŵasa lya Yehofa. Mklistu jwine juŵaliji jwakulupichika patandite kujigalika ni yakuŵecheta ya ŵampatuko, kapena kukuya ndamo sine syakusakala, nombe Aklistu ŵane akusatanda kujigalika. Ŵakusatendaga yeleyi akusajonanga mbili jambone ja liŵasa lya ŵandu ŵakusamtumichila Yehofa. (1 Ates. 4:3-8) Twaŵambaleje ŵandu ŵakusatenda yakusakala, soni tukakunda chindu chilichose konanga unasi wetu ni Atati ŵetu ŵakwinani.

17. Ana tukusosekwa kuŵambala kaganisye kapi? Ligongo chichi tukusosekwa kutenda yeleyi?

¹⁷ Amdalileje Yehofa mmalo mwakudalila yindu yakuchilu. Yehofa jwasasile kuti chachitusamalila mwakutupa yakulya, yakuwala soni malo gakutama, naga tukusosasosa Uchimwene wakwe chandanda soni kupikanila malamusi gakwe gakulungama. (Sal. 55:22; Mat. 6:33) Kumanyilila yeleyi, kukusatukamuchisya kuŵambala kuganisya kuti yindu yakuchilu yayili m’chilambochi mpaka yitutendekasye kuŵa ŵakusangalala yisyesyene soni kuŵa pamtendele. Tukusamanyilila kuti chindu champaka chitukamuchisye kukola mtendele wamumtima chili kutenda yakusasaka Yehofa. (Afil. 4:6, 7) Atamose yili kuti  mpaka tukombole kusuma yindu yejinji, nambope tuganisyeje kaje naga tukwete machili soni ndaŵi jakusamalila yinduyo. Ana yeleyi nganiyiŵa yatendekasisye kuti aganichisyeje mnope ya chipanje chawo? Tukusosekwa kukumbuchila kuti Yehofa akusajembecheya kuti tutendeje yejinji m’liŵasa lyakwe. Yeleyi yikugopolela kuti tukakunda yiliyose kutusokonasya. Ngatukusosekwa kutenda mpela muŵatendele mundu juŵalepele kumkuya Yesu ligongo lyakunonyela mnope chipanje. Jwalakwe jwajasile upile wakumtumichila Yehofa soni kuŵa jumo jwa ŵanache ŵakwe.—Maliko 10:17-22.

18. Ana ni yindu yambone yapi yachachisangalala nayo mpaka kalakala ŵandu ŵakumpikanila Mlungu?

¹⁸ Ŵandu ŵakupikanila chachikola upile wekulungwa mnope wa kumnonyela Yehofa soni kupitilisya kumtumichila jwalakwe mpaka kalakala. Kupwatika pelepa, ŵandu ŵachachiŵa pachilambo chapasi chachikolasoni masengo gakuchisamalila chilambochi kuti ŵandu atamejemo. Pachangakaŵapa Uchimwene wa Mlungu chiwulinganyesoni chilambochi kuti chiwonecheje mpela muchaŵelele pandanda. Yesu chachimasya yakusawusya yosope yayipali ligongo lyakuti Adamu ni Hawa ŵasagwile kutyoka m’liŵasa lya Mlungu. Yehofa chachajimusya ŵandu ŵajinji ŵaŵawile nikwapa umi wangamala soni wangali chakusawusya chilichose kuti atameje m’paladaiso pachilambo chapasi. (Luk. 23:42, 43) Ŵandu ŵakusamtumichila Yehofa pa chachiŵa ŵamlama jemanjaji chachikola “chisindi cha lumbili ni uchimbichimbi,” mpela muŵaŵechetele Daudi.—Sal. 8:5.

19. Ana tukusosekwa tuganichisyeje ya chichi?

¹⁹ Naga wawojo ali ŵa mu “likuga lya ŵandu ŵangaŵalanjika,” nikutisoni akwete chembecheyo chambone. Mlungu akusiŵanonyela wawojo soni jwalakwe akusaka kuti aŵe m’liŵasa lyakwe. Myoyo, atendeje yiliyose yampaka akombole kuti amsangalasyeje jwalakwe. Lisiku lililyose aganichisyeje mnope yindu yasasile Yehofa kuti chachitenda. Awuwoneje kuŵa upile wekulungwa kwatumichila Atati ŵetu ŵakwinani ŵali ŵachinonyelo. Nambosoni ayamichileje chembecheyo chakwete chakwatumichila Atati ŵetuŵa mpaka kalakala.