Mu chikalata chakwe chakwawula kwa Aklistu ŵa ku Tesalonika, ndumetume Paulo jwalembile kuti, “Naga pana mundu jwakukana kupikanila maloŵe getu gatulembile m’chikalatachi, mumŵiche chimanyisyo.” (2 Ates. 3:14 maloŵe gamwiŵanda.) Munyumamu, twasalaga kuti ŵakusaŵika chimanyisyo chelechi ali achakulungwa ŵa mumpingo. Yayatendekwaga yaliji yakuti, naga mundu jwine akupitilisya kukasa mfundo sya m’Baibulo, atamose yili mkuti apochele malangiso mwakuwilisyawilisya, achakulungwa ŵa mumpingo ŵaŵechetaga ngani jakumŵika chimanyisyo mundujo. Nganijo jakamuchisyaga kuti abale ni alongo aŵambaleje kutenda najo mundujo yindu yine ni yine.

Nambope, tuyiweni kuti pakusosekwa kuchenga pa kapikane ketu ka mfundo ja palilembali. Mwakamulana ni kapikane ketu kasambano, yikuwoneka kuti pa lilembali Paulo jwagambaga yindu yampaka atende Mklistu jwalijose pa yakutendekwa yineyakwe. Myoyo, ngapakusosekwasoni kuti achakulungwa ŵa mumpingo aŵecheteje ngani ja kuŵika chimanyisyo. Ligongo chichi tuchenjile kapikane ketu ka mfundo ja pa 2 Atesalonika 3:14? Kwende tulole yindu yine yajwaŵechete Paulo pajwapelekaga malangisoga.

Paulo jwayikopochele kuti ŵandu ŵane mumpingomo ‘ŵajendaga mwangalondeka.’ Mwamti jemanjajo ŵakanaga kupikanila malangiso gaŵapochelaga. Paulo mkanaŵe kupeleka malangiso gatukukambilana munganiji, jwaliji ali apeleche malangiso gakuyichisyaga ku mpingowu. Jwatite, “Mundu jwakukana kukamula masengo akalya.” Atamose yaliji myoyo, ŵane ŵakanaga kukamula masengo kuti alikamuchisyeje chitamilecho yili mkuti mpaka akombole kutenda yeleyo. Konjechesya pelepa, jemanjaji ŵatamilagasoni kwinjilila ngani syangaŵandika. Ana Aklistu ŵasosekwaga kutenda uli ni ŵandu mpela ŵeleŵa?—2 Ates. 3:​6, 10-12.

Paulo jwatite, ‘Mwaŵiche chimanyisyo’ jemanjajo. Liloŵe lya Chigiliki lyaŵalikamulichisye masengo pelepa, likusasalagasoni ya kummanyilila chenene mundu soni kuŵa ŵakusamala kuti akakujambuchisya ndamo syakwe syakusakalasyo. Paulo jwapelekaga malangisoga kwa Aklistu wosope ngaŵaga kwa achakulungwa ŵa mumpingope. (2 Ates. 1:1; 3:6) Myoyo, Mklistu jwalijose jwakumanyilila kuti m’bale kapena mlongo jwinejwakwe ngakupikanila malangiso gakutyochela m’Maloŵe ga Mlungu, jwalakwejo mpaka asagule ‘kuleka kusyoŵekana’ najo mundu jwangapikanilajo.

Ana yikugopolela kuti jwalakweju akutendeledwa yindu mpela mundu jwamtyosyedwe mumpingo? Iyayi, ligongo Paulo jwasasilesoni kuti, “Mpitilisye kumkamuchisya mpela mlongo mjenu.” Myoyo, abale ni alongo mpaka apitilisye kutenda yindu ni munduju pandaŵi ja misongano ja mpingo kapena pakulalichila. Nambope, jemanjaji mpaka asagule kuŵambalaga kutenda najo yindu yine mpela yakusangalasya. Ligongo chichi yili myoyo? Mpela mwajwaŵechetele Paulo, akusosekwa kutenda yeleyi “ni chakulinga chakuti [mundujo] atende sooni.” Mwamti kumŵika chimanyisyo mpaka kumkamuchisye Mklistu jwakulepela kupikanila malamusi ga Yehofa kutenda sooni ligongo lya ndamo syakwe syakusakala kaneko ni kuchenga.—2 Ates. 3:​14, 15.

Ana m’weji Aklistu masiku agano mpaka tukamulichisye chamti uli masengo malangisoga? Chandanda, tukusosekwa kusimichisya kaje kuti ndamo sya mundujo sili ‘syangalondeka’ mpela mwajwaŵechetele Paulo. Jwalakwe nganagambaga ya ŵandu ŵakutenda yineyakwe ligongo lyakuti chikumbumtima chawo chikwajitichisya, kapena ŵakutenda yindu ligongo lyakuti jwalijose akwete ufulu wakusagula yakutenda. Nambosoni, jwalakwe nganagambaga ya ŵandu ŵampaka atukuŵasye panandi m’litala line lyakwe. Mmalomwakwe, jwalakwe jwagambaga ya ŵandu ŵakupitilisya kutenda yangalondeka chitamilecho yili mkuti apochele malangiso mwakuwilisyawilisya.

Myoyo, masiku agano naga tuyiweni kuti Mklistu jwinejwakwe akwete msimu wangapikanila a mfundo sya m’malamusi ga Mlungu, mpaka tusagule pajika jetu kuŵambala kutenda najo yindu yine mpela yakusangalasya. Ligongo lyakuti tusagwile jika kutenda yeleyi, ngatukusosekwa kukambilana ngani jeleji ni ŵandu ŵanganaŵa ŵa mwiŵasa mwetu. Konjechesya pelepa, tukusosekwa kupitilisya kutenda najo yindu mundu jweleju pandaŵi ja misongano ja mpingo soni patukulalichila. Naga mundujo achenjile ndamo syakwe syakusakalasyo, mpaka tutandilesoni kutenda najo yindu yosope.