Ngani Jakulijiganya 40
Tukoleje Yakutenda Yejinji Patuli ‘M’masiku Gambesi’ Gasyesyene
“Limbichilani, mŵe ŵakulimbangana, mkamule masengo ga Ambuje mwachitema masiku gosope.”—1 AKOLI. 15:58.
NYIMBO 58 Tuwungunyeje Achimjetu Ŵamtendele
YACHITULIJIGANYE *
1. Ana chichi chachikutusimichisya kuti tuli ‘m’masiku gambesi’?
ANA wawojo ŵapagwile chaka cha 1914 chili chikwanile? Naga yili myoyo, nikuti aŵele ali mkutama kwa umi wawo wosope ‘m’masiku gambesi’ ga yakutendekwa ya mundaŵi ajino. (2 Tim. 3:1) Wosopewe komboleka tuŵele tuli mkupikana yindu yaŵasasile Yesu kuti yichitendekwa masiku agano. Yeleyi yikupwatikapo, ngondo, sala, yifomelesi, yilwele, kutupilatupila kwa yakusakala soni kulagasidwa kwa ŵakutumichila ŵa Yehofa. (Mat. 24:3, 7-9, 12; Luk. 21:10-12) Tuŵele tuli mkwawona ŵandu ali mkutenda yindu m’litala lyaŵalisasile ndumetume Paulo. (Alole libokosi lyakuti “Mwaŵelele Ŵandu Apano.”) Ŵamboni sya Yehofawe tuli ŵakusimichisya kuti tukutama kumbesi kusyesyene kwa “masiku gambesi.”—Mik. 4:1, NW.
2. Ana ni yiwusyo yapi yatukusaka tuli tupatile kwanga kwakwe?
2 Ligongo lyakuti papitile ndaŵi jelewu kutyochela mu 1914, tukumanyilila sano kuti tukutama kumbesi kusyesyene kwa “masiku gambesi.” Pakuti mbesi jiŵandichile mnope, tukusosekwa kumanyilila kwanga kwa yiwusyo yakusosekwa mnope ayi, Ana ni yindu yapi yayichitendekwa chakumbesi kwa “masiku gambesi”? Soni ana Yehofa akusaka kuti tutendeje chichi patukwembecheya yakutendekwayi?
ANA CHICHITENDEKWA CHICHI CHAKUMBESI KWA “MASIKU GAMBESI”?
3. Mwakamulana ni yakulochesya yayili pa 1 Atesalonika 5:1-3, ana ŵandu chachigumilila ya chichi?
3 Aŵalanje 1 Atesalonika 5:1-3. Paulo jwasasile ya ‘ndaŵi jitachiyika Ambuje kapena kuti lisiku lya Yehofa.’ Mpela mwaŵechetele palilembali, pelepa akusala ya ndaŵi jajikutandila pa kwimuchilidwa kwa “Babiloni Jwamkulungwa” jwele jwali mwenye jwa dini syosope syaunami, ni kumalila pa Alamagedo. (Ciw. 16:14, 16; 17:5) Lisiku lyeleli mkanilitande mitundu ja ŵandu jichisala kuti, “Tuli pamtendele ni pambone.” (Mabaibulo gane gakusati, “Bata ni Mtendele.”) Ndaŵi sine maboma gakusakamulichisya masengo maloŵega pakukambilana yampaka atende pakutamilikasya mkamulano pasikati pa yilambo. * Nambope, chimanyisyo chakuti, “tuli pamtendele ni pambone” chajikusasala Baibulo chili chakulekangana ni yeleyi. Ligongo chichi? Payichitendekwaga yeleyi, ŵandu chachiganisyaga kuti maboma gakombwele kuyikasya mtendele pachilambopa. Nambo yisyesyene yakwe yili yakuti, “yisawusyo yekulungwa” yichitanda kaneko nikwikaga ‘chonasiko chakusisimuchisya.’—Mat. 24:21.
Ngatukusosekwa kujigalika ni chimanyisyo chaunami chakuti “tuli pamtendele ni pambone” (Alole ndime 3-6) *
4. (a) Ana ni yindu yapi yangatukumanyilila pakwamba ya chimanyisyo chakuti, “tuli pamtendele ni pambone”? (b) Ana apano tukumanyilila yamtuli pakwamba ya chimanyisyochi?
4 M’weji tukusamanyilila ngani jakwamba maloŵe gakuti “tuli pamtendele ni pambone.” Nambope, pana yindu yine yangatukumanyilila. Ngatukumanyilila chachichitendekasya maboma kuŵecheta maloŵega soni kuti ana chachilengesya yeleyi mwamtuli. Ngatukumanyililasoni kuti chimanyisyochi chachichilengesya kalingwa. Mulimose mwayichiŵela, ngatukusosekwa kukunda kuti chilichose chitutendekasye ganisya kuti maboma mpaka gayikasye mtendele pachilambo chosope. Mmalo mwakwe, chimanyisyo chelechi ni chele Baibulo jiŵele jili mkutusalila kuti tukusosekwa kuchijembecheya. Chelechitu chili chimanyisyo chakulosya kuti “lisiku lya Yehofa” liŵandichile.
5. Ana lilemba lya 1 Atesalonika 5:4-6, likutukamuchisya chamtuli kosechela “lisiku lya Yehofa”?
5 Aŵalanje 1 Atesalonika 5:4-6. Maloŵe ga Pauloga gakutusalila yampaka tutende kuti tuŵe ŵakoseka ya kwika kwa “lisiku lya Yehofa.” Ngatukusosekwa ‘kugona lugono mpela mwakusatendela ŵandu ŵane.” Mmalo mwakwe “tuŵe mesope” soni ŵakoseka. Mwachisyasyo, ngatukusosekwa kujigala nawo mbali mu yakutendekwa yandale. Naga tukulinga kujigala nawo mbali pa yindu yeleyi nikuti chituŵe “kumbali ja chilambo.” (Yoh. 15:19, NW) Tukumanyilila kuti Uchimwene wa Mlungu ni wampaka uyikasye mtendele pachilambo chosope.
6. Ana tukusosekwa kwakamuchisya ŵane kutenda chichi, soni ligongo chichi?
6 Kupwatika pa kuŵa kwetu mesope, tukusosekwa kwakamuchisyasoni ŵane kuti alijiganye yajasasile Baibulo kuti yichitendekwa pachilambopa. Tukusosekwa kumbuchilaga kuti payichitanda yisawusyo yekulungwa, yichiŵa yakusawusya kuti ŵandu atande kumtumichila Yehofa. Lyeleli ni ligongo lyakwe masengo getu gakulalichila gakusosekwa gakamulidwe mwachitema. *
TUKOLEJE YAKUTENDA YEJINJI PAKULALICHILA
Patukulalichila masiku agano, tukusalosya kuti Uchimwene wa Mlungupe ni wampaka uyikasye Tuli pamtendele ni pambone pachilambo chosope (Alole ndime 7-9)
7. Ana Yehofa akusaka kuti tutendeje chichi apano?
7 Kwakandaŵi kamnono kakasigeleka, Yehofa akusaka kuti tutanganidweje ni masengo gakulalichila, “lisiku” lyakwe mkaniliyiche. Tukusosekwa kulolechesya kuti ‘tukukamula masengo ga Ambuje mwachitema masiku gosope.’ (1 Akoli. 15:58) Yesu jwasasile yatukusosekwa kutenda. Pajwasasile yindu yosope yayichitendekwa m’masiku gambesi, jwajonjechesye kuti, “Kuli kwakusosekwa kuti ngani syambone silongole kaje kulalichilidwa kwa ŵandu ŵamitundu josope.” (Mak. 13:4, 8, 10; Mat. 24:14) Jamani agambe ganisya. Ndaŵi syosope patukusajawula mu utumiki, tukusakamuchisyaga nawo kukwanilisya chakulochesya cha m’Baibulo chelechi.
8. Ana tukumanyilila chamtuli kuti masengo gakulalichila gakwawula pasogolo?
8 Ana masengo gakulalichila gapite pasogolo chamtuli? Chaka chilichose masengoga gakwawula pasogolo. Mwachisyasyo, agambe ganichisya mwachikwelele chiŵalanjilo cha ŵakulalichila ya Uchimwene pachilambo chosope m’masiku gambesi gano. Mu 1914, ŵakulalichila ŵaliji 5,155 m’yilambo yakwana 43. Apano ŵakulalichila ali cha m’ma 8,500,000 m’yilambo yakwana 240. Nambope atamose yili myiyi, masengo getu nganigamale. Tukusosekwa kupitilisya kwasalila ŵandu yakuti Uchimwene wa Mlungu ni wampaka umasye yakusawusya yosope ya ŵandu.—Sal. 145:11-13.
9. Ligongo chichi tukusosekwa kupitilisya kulalichila ngani sya Uchimwene?
9 Masengo getu gakulalichila ya Uchimwene nganigaŵa gajimi mpaka Yehofa ali asasile kuti gamasile. Ana kusigele ndaŵi jelewu chamtuli kuti ŵandu ayikane pakummanyilila Yehofa Mlungu soni Yesu Klistu. (Yoh. 17:3) Ngatukumanyilila. Yatukumanyilila yili yakuti, payichitandaga yisawusyo yakogoya, wosope “ŵele Mlungu ŵasagwile kuti tapochele umi wangamala” chachiŵa ali apikanile ngani syambone. (Mase. 13:48) Ana mpaka twakamuchisye camtuli ŵandu ŵeleŵa ndaŵiji mkanijimale?
10. Ana Yehofa akusatukamuchisya chamtuli kuti tukombole kwajiganya ŵandu usyesyene?
10 Kupitila m’likuga lyakwe, Yehofa akutupa yosope yatukusosechela pakwajiganya ŵandu usyesyene. Mwachisyasyo, wiki jilijose tukusajiganyidwa mwampaka tulalichilile kupitila pa msongano wa undumetume ni umi wachiklistu. Msongano welewu, ukusatukamuchisya kumanyilila yampaka tuŵechete paulendo wandanda soni wakuwilisya. Ukusatukamuchisyasoni kumanyilila katendesye ka majiganyo ga Baibulo. Likuga lya Yehofa litupelesoni yindu yine yayikusasimanikwa pa Yida Yakamulichisya Masengo Pakwiganya. Yindu yeleyi yikusatukamuchisya . . .
-
kutanda kambilana ni ŵandu,
-
kulalichila mwakwayika ŵandu pamtima,
-
kwakamuchisya ŵandu kusachilila kulijiganya yejinji,
-
kwiganya usyesyene patukutendesya majiganyo ga Baibulo, soni
-
kwasalila ŵandu kuti ajawuleje pa webusayiti jetu soni kwaŵilanjila ku Nyumba sya Uchimwene.
Nambope, kola yindu yeleyi nganikuŵa kwakwanila. Tukusosekwa tuyikamulichisyeje masengo. * Mwachisyasyo, naga panyuma pakukambilana ni mundu jwakwete lung’wanu mpaka amlechele kapepala kapena magasini, jwalakwe mpaka aŵalanjejepe kwichila mpaka ali asimenesoni kane. Uli udindo wa jwalijose kulipeleka mnope pa masengo gakulalichila ya Uchimwene mwesi uliwose.
11. Ligongo chichi palinganyidwe mbali ja Kulijiganya Baibulo pa Intaneti?
11 Litala line lyele Yehofa akulikamulichisya masengo pakwajiganya ŵandu usyesyene lili kupitila pa Kulijiganya Baibulo pa Intaneti pa jw.org®. Ligongo chichi ŵalinganyisye litalali? Mwesi uliwose, ŵandu ŵajinji akusawungunya pa Intaneti kuti alijiganye Baibulo. Majiganyo ga pa webusayitigo mpaka gakamuchisye ŵandu kuti alijiganye usyesyene wa m’Maloŵe ga Mlungu. Ŵandu ŵane ŵatukusalalichila mpaka atende mbwaji kutanda kulijiganya Baibulo. Naga yili myoyo, mpaka twalosye mbali jeleji pa webusayiti jetu. Mwinesoni mpaka twalosye mbali ja kulijiganya Baibulo pa intaneti m’chiŵecheto chakusachimanyilila. *
12. Ana mundu mpaka alijiganye yamtuli kutyochela pambali ja Kulijiganya Baibulo pa Intaneti?
12 Mbali ja Kulijiganya Baibulo pa Intaneti jikusasala ngani syakwamba, “Baibulo soni Jwakulemba Jwakwe,” “Ŵandu Ŵaŵalembile Baibulo,” soni “Utenga wa m’Baibulo Wakupeleka Chembecheyo.” Mundu pakulijiganya nganisi akusamanyilila:
-
Mwampaka jijile kamkamuchisye mundu Baibulo
-
Mwaŵelele Yehofa, Yesu, soni Malayika
-
Ligongo lyakwe Mlungu ŵapanganyisye ŵandu
-
Ligongo lyakwe pana yipwetesi soni yakusakala
Lijiganyoli likusasalasoni yachachitenda Yehofa . . .
-
pakumasya yipwetesi soni chiwa
-
pakwajimusya ŵawe, soni
-
pakutosya maboma ga ŵandu mwakutamilikasya Uchimwene wa Mlungu.
13. Ana mbali ja Kulijiganya Baibulo pa Intaneti jikusalekangana wuli ni lijiganyo lya Baibulo lyandaŵi syosope?
13 Majiganyo ga pa intanetiga ngagakwinjila mmalo mwa lijiganyo lya Baibulo. Yesu ŵatupele upile wakamula masengo gakupanganya ŵakulijiganya. Tukukulupilila kuti ŵandu ŵalung’wanu mpaka aŵalanje nganisi, kutanda kunonyela yakulijiganya, soni kusachilila kulijiganya yejinji. Kaneko mpaka ajitichisye lijiganyo lya Baibulo. Pambesi pa lijiganyo lililyose, mundujo akusamsalila kuti aŵende mundu jwakuti amjiganyeje Baibulo. Kupitila pa webusayiti jetu, lisiku lililyose ŵandu ŵakwana 230 akusaŵendaga lijiganyo lya Baibulo. Kulijiganya ni mundu jwalijose pajika kweleku kuli kwakamuchisya.
TUPANGANYEJE ŴAKULIJIGANYA
14. Mwakamulana ni yaŵasasile Yesu pa Mateyu 28:19, 20, ana tukusosekwa kulingalinga kutenda chichi, soni ligongo chichi?
14 Aŵalanje Mateyu 28:19, 20, NW. Patukutendesya majiganyo ga Baibulo, tukusosekwa kulingalinga kwajiganya ŵandu kuti “aŵe ŵakulijiganya [ŵa Yesu]. . . , ni kwajiganya kuti asunjeje yindu yosope yaŵalamwile.” Tukusosekwasoni kwakamuchisya ŵandu kupikanichisya kusosekwa kwakumtumichila Yehofa soni kuŵa kumbali ja Uchimwene wakwe. Kuti tukombole kutenda yeleyi tukusosekwa kwalimbikasya ŵandu kuti awuwoneje usyesyene kuŵa wawo mwakamulichisya masengo yakulijiganya. Kupwatika pelepa akusosekwa kulipeleka kwa Yehofa, soni kubatiswa. Mwakutenda yeleyi jemanjajo chachikulupuka palisiku lya Yehofa.—1 Pet. 3:21.
15. Ana ngatukusosekwa kutenda chichi, soni ligongo chichi?
15 Mpela mwatuŵechetele kala, pasigele ndaŵi jamnono kuti chilambo chakusakalachi chijonanjidwe. Paligongoli, ngatukusosekwa kumalila ndaŵi jetu tuli mkwajiganya Baibulo ŵandu ŵangakulosya kuti chachenje kuti amtumichileje Yehofa. (1 Akoli. 9:26) Masengo getu gakusosekwa mwachitema. Pana ŵandu ŵajinji wakusosekwa kupikana ngani syambone syakwamba Uchimwene ndaŵiji mkanijimale.
TUKANEJE CHILICHOSE CHA DINI JAUNAMI
16. Mwakamulana ni Ciwunukuko 18:2, 4, 5, 8, ana tukusosekwa kutenda chichi? (Alole maloŵe gamwiŵanda.)
16 Aŵalanje Ciwunukuko 18:2, 4, 5, 8. Malembaga gakusala yindu yakusajembecheya Yehofa kwa ŵandu ŵakusamlambilaga. Aklistu wosope ŵasyesyene, akusosekwa kusamala ni chilichose chakwayana ni Babulo Jwamkulungwa. Komboleka kuti jwakulijiganya Baibulo jwaliji mu dini jaunami mkanatande kulijiganya usyesyene. Mwinesoni jwaliji ali mkutenda nawo yindu yine yakwayana ni dinijo. Kapena jwapelekaga mbiya pakamuchisya dinijo. Myoyo jwakulijiganya Baibulo mkanaŵe kumjitichisya kuŵa jwakulalichila jwangabatiswa akusosekwa kumasya mkamulano uliwose wawapali ni dini jaunami. Jwalakwe akusosekwa kulemba chikalata chakulilekanganya ni dinijo kapena chiŵanja chilichose chachikusakamulana ni Babulo Jwamkulungwa. *
17. Ana Mklistu ngakusosekwa kukamula masengo gapi, soni ligongo chichi?
17 Mklistu jusyesyene akusosekwa kulolechesya kuti masengo gakusakamula ngagakukwayana ni Babulo Jwamkulungwa. (2 Akoli. 6:14-17) Mwachisyasyo, ngakusosekwa kulembedwa masengo ni dini jaunami. Konjechesya pelepa, Mklistu jwalembedwe masengo ni mundu jwine ngakusosekwa kamula masengo pamalo gakutendela kulambila kwaunami pakusaka kupata mbiya. Soni naga akwete bisinesi jakwejakwepe, ngakusosekwa kukunda kamula masengo gakwayana ni Babulo Jwamkulungwa. Ligongo chichi tukuŵecheta mwangapita mumbali panganiji? Ligongo lyakuti ngatukusaka kujigala nawo mbali atapanandi mu yijiganyo yaunami soni ndamo syakusakala sya dini jaunami, syele Mlungu akusasiwona kuti sili syakunyalaya.—Yes. 52:11. *
18. Ana m’bale jwine jwakamulichisye chamtuli yiwundo ya m’Baibulo pa masengo gakwe?
18 Yaka yipiteyo, jwamkulungwa jwa mumpingo jwine juŵaliji kalipentala, jwaŵendedwe ni mundu jwine juŵawinile masengo gakulinganya chalichi kuti akakamule masengogo. Mundujo jwamanyililaga kuti m’balejo akusaŵecheta kuti nganaŵa akamwile masengo ga pachalichi. Nambo pandaŵiji jwasoŵaga mundu jwakuti akamule masengogo. Atamose kuti yaliji myoyo, m’balejo pakamulichisya masengo yiwundo ya m’Baibulo jwakanile masengogo. Wiki jakuyichisya, nyusipepala jine jalosisye kalipentala ali mkukomelela mtanda pachalichi. Yikaŵe kuti m’bale jula jwakasile yiwundo ya m’Baibulo ni kukunda kamula masengogo, nikuti jwalakwe akawonechele m’nyusipepalajo. Kusala yisyene, yikaŵe kuti m’baleju jwatesile yeleyi, yikajonasile mbili ja Aklistu achimjakwe. Soni Yehofa ngamkanasangalala nayo.
ANA TULIJIGANYISYE YAMTULI?
19-20. (a) Ana tulijiganyisye yamtuli? (b) Ana tuchilijiganya yamtuli?
19 Baibulo jalochesye kuti pachangakaŵapa maboma gachigumila kuti, “tuli pamtendele ni pambone!” Ligongo lya yindu yatujiganyisye Yehofa, tukusamanyilila kuti yilambo nganiyiŵa yikombwele kutamilikasya mtendele usyesyene. Ana tukusosekwa kutenda chichi yeleyi mkaniyitendekwe, soni chonasiko chakusisimuchisya mkanichiyiche? Yehofa akwembecheya kuti m’weji chitukoleje yakutenda yejinji pakulalichila ngani sya Uchimwene soni kupanganya ŵakulijiganya ŵajinji. Pandaŵi jakulandanajo, tukusosekwasoni tuŵambaleje chilichose chakwayana ni dini jaunami. Yeleyi yikupwatikapo kulilekanganya ni dini jaunami soni ngakamula masengo gakwayana ni Babulo Jwamkulungwa.
20 Pana yindu yine yayichitendekwa ‘m’masiku gambesi’ gasyesyene. Panasoni yindu yine yakwembecheya Yehofa kuti tutende. Ana yindu yeleyi yili yapi, soni ana mpaka tukosechele chamtuli yosope yachiyitendekwe pachangakaŵapa? Tuchilola yeleyi mungani jakuyichisya.
NYIMBO 71 Tuli Ŵangondo ŵa Yehofa!
^ ndime 5 Pachangakaŵapa tukwembecheya kugapikana maboma gali mkugumila kuti “tuli pamtendele ni pambone.” Yeleyi yichilosya kuti yisawusyo yekulungwa yisigele panandi kutanda. Ana Yehofa akusaka kuti tutendeje chichi kutandila apano mpaka pandaŵi jelejo? Nganiji chijitukamuchisye kupata kwanga kwakwe.
^ ndime 3 Mwachisyasyo, pa webusayiti ja Bungwe ja United Nations akusaŵecheta kuti “akutamilikasya mtendele pachilambo chosope.”
^ ndime 6 Alole ngani jakuti, “Mlungu Pakupeleka Chilango—Ana Akusiŵakalamusya Ŵandu Mwakwanila?” jajili m’magasini ajino.
^ ndime 10 Kuti amanyilile yampaka atende pakukamulichisya masengo yindu yayikusasimanikwa pa Yida Yakamulichisya Masengo Pakwiganya alole ngani jakuti “Ajiganyeje usyesyene” mu Sanja ja Mlonda ja Okotoba 2018.
^ ndime 11 Pandaŵi ajino mbali ja Kulijiganya Baibulo pa Intaneti jikusimanikwa mu chiŵecheto ca Chisungu ni Chipwitikisi, soni kusogoloku chijisimanikweje mu yiŵecheto yejinji.
^ ndime 16 Tukusosekwa kulolechesya kuti ngatukujigala nawo mbali m’mabungwe mpela gachinyamata kapena kutenda nawo yisangalalo kumalo gane gakwe, mnopemnope yayili yakamulana ni dini jaunami. Mabungwega gali mpela YMCA (Young Men’s Christian Association) nambosoni YWCA (Young Women’s Christian Association). Atamose kuti mabungwe gelaga mpaka gajileje kuti yakusatendaga yangakwayana ni yadini, nambope kusala yisyene, mabungwega gakusalimbikasya nganisyo soni yakulinga yakwayana ni dini jaunami.
^ ndime 17 Naga akusaka kumanyilila yejinji yajikusasala Baibulo pangani ja kamula masengo gakwayana ni dini jaunami, alole “Yiwusyo Yakutyochela kwa Ŵakuŵalanga” mu Sanja ja Mlonda ja Chichewa ja Epulo 15, 1999.
^ ndime 83 KULONDESYA YIWULILI: Ŵandu ŵali pa malo gakusumichisya yakumwa akutenda lung’wanu ni “Ngani” sya pa TV syakwamba chimanyisyo chakuti, “tuli pamtendele ni pambone.” Liŵasa lya Mboni, lyalikupumula pamaloga kutyochela kukulalichila, ngalikujigalika ni yeleyo.
