Pakusaka kummanyilila chenene mundu jwine, mpaka yiŵe chenene kumanyilila kaje yindu yatesile mundujo soni yakusawusya yakombwele kumalana nayo. Mwakulandana ni yeleyi, naga akusaka kummanyilila chenene Mlungu, akusosekwa kumanyilila yindu yatesile jwalakwejo. Kutenda yeleyi mpaka kwakamuchisye apano soni kola umi wambone msogolo.

Yehofa Mlungu ali Mkupanganya Jwamkulungwa, soni “kutyochela pa yindu yaŵapanganyisye . . . m’weji mpaka tumanyilile mwaŵelele jwalakwejo patukulola yindu yaŵapanganyisyeyo.” (Aloma 1:20) “Ambuje ni ŵiŵapanganyisye chilambo chapasi ni machili gakwe. Jwalakwejo ni juŵapanganyisye yosope ni lunda lwakwe soni [ni kumanyilila kwakwe yindu] jwalakwejo ŵatambasukwile mawunde ga kwinani.” (Yelemiya 10:12) Yakupanganyikwa nombe nayo yikusalosyaga kuti Mlungu akusatunonyelaga.

Aganichisye muŵawupanganyichisye Yehofa umi wetu kuŵa wapajika mwakupanganya ŵandu “m’chiwanichisyo chakwe.” (Genesesi 1:27) Yayikugopolela kuti jwatendekasisye kuti tupakomboleje kulosya sine mwa ndamo syakwe syapenani. Nambosoni jwatupanganyisye m’litala lyakuti tusachilileje kumtumichila, yayikugopolela kupikanichisya mwakusayiwonela yindu soni ndamo syakwe. Patukulingalinga kutenda yeleyi, tukusaŵa ŵakusangalala soni kumanyilila chakulinga cha umi. Konjechesya pelepa, jwalakwe ŵatupele upile wakuŵa najo paunasi.

Patukulola yindu yaŵapanganyisye Mlungu pachilambopa, tukusapikanichisya mwakusatuwonelaga Mlungu. Mwakukamulana ni maloŵe gaŵasasile Paulo, Mlungu “ŵamlosisye jemanja mwaŵelele kupitila mu yindu yambone yaŵatendaga. Ŵampele wula kutyochela kwinani soni ndaŵi jakugowola yindu yejinji ni chakulinga chakuti mkole yakulya yakwanila soni mitima jenu jisangalaleje.” (Masengo 14:17) Yehofa atupele yindu yejinji yatukusasosechela kuti tuŵe ni umi. Atupele yindu yejinji soni yakulekanganalekangana pakusakasoni kuti umi wetu uŵeje wakusangalala. Yindu yeleyi yili yapanandi pakuwanichisya ni yakusaka kututendela.

Yehofa jwapanganyisye chilambo chapasi kuti ŵandu atameje mpaka kalakala. Baibulo jikusati, “chilambo chapasi ŵachipeleche kwa ŵandu” soni jwalakwe “nganachipanganya kuti chiŵe changali kandu, nambo kuti chiŵe malo gakutama ŵandu.” (Salimo 115:16; Yesaya 45:18) Ana ni ŵandu ŵapi ŵatachitama m’chilambomo soni kwandaŵi jelewu uli? “Ŵandu  ŵambone tachipochela chilambo, ni kutama mwelemo kwa yaka yosope.”—Salimo 37:29.

Mwakamulana ni yeleyi, Yehofa jwapanganyisye ŵandu ŵandanda ŵali Adamu ni Hawa. Jemanjaji ŵaŵisile pachilambo chapasi cha paladaiso kuti ‘alimeje ni kuchisamalila.’ (Genesesi 2:8, 15) Mlungu jwapele jemanjaji masengo gakusangalasya gakuti atende. Jwatite, “Mŵelekane soni mtupe. Mgumbalane pachilambo chosope soni mchigomeche.” (Genesesi 1:28) Myoyo, Adamu ni Hawa ŵajembecheyaga kutama ni umi wangamala pachilambo chapasi. Yakutesya chanasa yili yakuti jemanjaji ŵajasile upile wakuŵa m’gulu ja “ŵandu ŵambone ŵatachipochela chilambo.” Nambope, mpela mwachituyiwonele munganiji, yaŵatesile Adamu ni Hawa nganiyichenga chakulinga cha Yehofa kwa ŵandu soni chilambo chapasichi. Chandanda, kwende tulole chindu chine chatesile Mlungu.

Baibulo jikusakolanjikwasoni kuti Maloŵe ga Mlungu. Ana Yehofa ŵatupele Baibulo ligongo chichi? Kuti tulijiganyeje yakwamba jwalakwe. (Misyungu 2:1-5) Ngaŵa kuti Baibulo mpaka jijanje yiwusyo yosope yampaka mundu akole yakwamba Mlungu soni pangali buku jilijose jampaka jitende yeleyi. (Jwakulalichila 3:11) Nambope chilichose chajikusasala Baibulo chikusatukamuchisya kummanyilila chenene Mlungu. Tukusamanyilila chenene mwaŵelele jwalakwe pakulola mwakusatendela yindu ni ŵandu. Tukusalijiganya ya ŵandu ŵakusiŵanonyela jwalakwe soni ŵakusaŵengana nawo. (Salimo 15:1-5) Tukusalijiganyasoni mwakusakuwonela Mlungu kulambila, ndamo syambone soni yindu yakuchilu. Baibulo jikusasala chenene ya umundu wa Yehofa soni yindu yaŵatesile Mwanagwe, jwali Yesu Klistu.—Yohane 14:9.

Ligongo line lyaŵatupelele Baibulo, lili kutukamuchisya kumanyilila mwampaka tuŵele ni umi wambone soni wakusangalala. Yehofa akusatusalila mwampaka tuŵele ni liŵasa lyakusangalala, kuŵa ŵakwikutila soni yampaka tutende kuti tumalane ni kulagasika nganisyo. Mpela mwatuyiwonele mungani sipite sila, Baibulo jikusajanga yiwusyo yakusosekwa mnope yakwayana ni umi mpela yakuti, Ligongo chichi pachilambopa pana yakusawusya yejinji? Ana kusogoloku chikutendekwe yamti uli? Jikusasalasoni yatesile Mlungu pakusaka kusimichisya kuti chakulinga chakwe cha pandanda chikwanilichikwe msogolo.

Pana yindu yinesoni yayikulosya kuti Baibulo jili buku ja pajika jwakutyochela kwa Mlungu. Baibuloji jalembedwe yaka yakupunda 1,600 ni achalume ŵakwana 40. Atamose yili myoyo, yaŵalembile ŵanduŵa yili yakamulana ligongo Mkulemba jusyesyene ali Mlungu. (2 Timoteo 3:16) Mwakulekangana ni mabuku gane gakala, Baibulo jisunjidwe chenenepe kwa yaka yejinji mpela mwajikusalochesya mipukutu jine jakala ja m’Baibulo. Baibulo jiŵele mkusimanikwape atamose kuti ŵandu alinjilile kulekasya kujigopolela, kujiŵalanga soni kwagaŵila ŵane. Nambope, masiku agano, Baibulo ajigopolele soni kwagaŵila ŵandu ŵajinji. Kusimanikwape kwa Baibulo kukusimichisya kuti “maloŵe ga Mlungu jwetu tigachiŵa chitamile mpaka kalakala.”—Yesaya 40:8.

Chindu chine chapajika chili, yatesile Mlungu pakusaka kusimichisya kuti chakulinga chakwe pa m’weji chitendekwe. Mpela mwatuŵechetele kala, chakulinga cha Mlungu chili chakuti ŵandu atameje pachilambo chapasi mpaka kalakala. Nambo Adamu ŵajasile upile wakutama ni umi kwangamala ligongo lyangampikanila Mlungu, soni yeleyi yakwayiye ŵanache ŵakwe. “Ulemwa wajinjile m’chilambo kupitila mwa mundu jumo soni chiwa chayiche kupitila mu ulemwawo, myoyo chiwa chawandile kwa ŵandu wosope ligongo wosope ŵaliji ŵakulemwa.” (Aloma 5:12) Ligongo lyakuti Adamu nganampikanila Mlungu, yawoneche mpela kuti chakulinga cha Mlungu chilepeleche. Ana Mlungu jwatesile yamti uli panganiji?

Yaŵatesile Yehofa yaliji yakamulana ni ndamo syakwe. Jwalakwe mwachilungamo jwapeleche chilango chakuŵajilwa kwa Adamu ni Hawa, soni mwachinonyelo jwapanganyisye dongosolo jakwakamuchisya ŵanache ŵa Adamu. Ligongo lya lunda lwakwe, Yehofa ŵapatile litala lyakumachisya nganiji, soni mwangachelewa jwalisasile litalali. (Genesesi 3:15) Litala lyagopochela ku ulemwa ni chiwa lichipelechedwa kupitila mwa Yesu Klistu, Mwanache jwa Mlungu. Ana yeleyi yikugopolela chichi?

 Pakusaka kwawombola ŵandu ku ulemwa wa Adamu, Yehofa ŵamtumisye Yesu pachilambo chapasi kukwajiganya ŵandu yakwamba litala lya ku umi soni “kupeleka umi wakwe kuti awombole ŵandu ŵajinji.” a (Mateyu 20:28; Yohane 14:6) Yesu ŵaliji jwakuŵajilwa kupeleka umi wakwe ligongo jwalakwe jwaliji jwamlama mpela muŵaŵelele Adamu pandanda. Nambo mwakulekangana ni Adamu, Yesu jwapitilisye kumpikanila Mlungu mpaka chiwa chakwe. Pakuŵa kuti jwalakwe nganasosekwaga kuwa, Yehofa ŵamjimwisye ku chiwa soni jwawujile kwinani. Sambano Yesu jwakombwele kutenda yaŵalepele Adamu, yayili kwapa ŵandu ŵakupikanila upile wakola chembecheyo chakutama ni umi wangamala. “Pakuŵa kupitila mu ungapikanila wa mundu jumo wosope ŵaŵele ŵakulemwa, myoyosoni kupitila mu kupikanila kwa mundu jumo ŵandu wosope chachiŵa ŵakulungama.” (Aloma 5:19) Kupitila mu mbopesi ja Yesu, Mlungu chachikwanilisya chakulinga chakwe chakuti ŵandu atameje ni umi kwangamala.

Tukusalijiganya yejinji kutyochela pa yaŵatite Yehofa pakumalana ni yakusawusya yayayiche ligongo lya ungapikanila wa Adamu. Tukuyiwona kuti pangali champaka chimlepelekasye jwalakwe kumalisya yindu yaŵayitandite kala, soni maloŵe gakwe gosope ‘gachijenda chenene.’ (Yesaya 55:11) Tukumanyililasoni kuti Yehofa akusatunonyela mnope ŵanduwe. “Mlungu ŵatulosisye chinonyelo mwakutumisya Mwanagwe jumopejo pachilambo kuti tupate umi kupitila mwa jwalakwejo. Chinonyelo chelechi ngachikugopolela kuti m’weji twamnonyele Mlungu, nambo jwalakwejo ni juŵatunonyele ni kutumisya Mwanagwe mpela mbopesi jajapelechedwe kuti tuŵesoni pamtendele ni Mlungujo.”—1 Yohane 4:9, 10.

Mlungu “nganatujima Mwanache jwakwe nambo ŵampeleche kuti atuwile wosopewe.” Myoyo tuli ŵakusimichisya kuti jwalakwe “chachitupasoni yindu yine yosope mwakoloŵa makono.” (Aloma 8:32) Ana Mlungu atusalile kuti chachitutendela yamti uli? Tukwalimbikasya kuti aŵalanje ngani jakuyichisya.