Pakusaka kummanyilila mundu jwine jwakwe chandanda akusamwusya kuti, “Lina lyawo ŵani?” Ali amwusisye Mlungu chiwusyo chelechi, ana jwalakwe mpaka ajanje wuli?

‘Une ndili Yehofa, lina lyangu ni lyelelyo.’—Yesaya 42:8.

Mlungu akusaliwona lina lyakweli kuti lili lyakusosekwa. Pangali mundu juŵampele Mlungu linali, jwalakwe jwalipele jika. Yehofa jwasasile kuti, “Lyeleli ni lina lyangu mpaka kalakala soni mwelemu ni muchachingumbuchililaga ŵandu wosope ŵa mibado josope jakwika msogolo.” (Ekisodo 3:15) M’Baibulo, lina lya Mlungu likusimanikwa malo gejinji kupunda mena ga uchimbichimbi mpela Jwamachiligose, Atati, Ambuje kapena Mlungu. Nambosoni likusasimanikwa ndaŵi ni katema kupunda mena gane gosope mpela Abulahamu, Mose, Daudi kapena Yesu. Konjechesya pelepa, Mlungu akusaka kuti lina lyakwe limanyiche. Baibulo jikusasala kuti, “Amanyilile kuti ŵalakwe jika ŵele lina lyawo lili [Yehofa], ali Ŵakwinani Mnope ni ŵakulamulila pachilambo chapasi.”—Salimo 83:18.

Linali lili lyakusosekwa kwa Yesu. Mu lipopelo lyalikusakolanjidwa kuti Lipopelo lya Atati Ŵetu kapena Lipopelo lya Ambuje, Yesu ŵajiganyisye ŵakumkuya ŵakwe kupopela kwa Mlungu mwakuŵecheta kuti, “Lina lyawo lichimbichikwe.” (Mateyu 6:9) Yesu msyenejo jwapopesile kwa Mlungu kuti, “Atati, alichimbichisye lina lyawo.” (Yohane 12:28) Yesu ŵalosisye kuti kulichimbichisya lina lya Mlungu kuli kwakusosekwa mnope, ni ligongo lyakwe jwalakwe ŵapopesile kuti, “Une namanyisye jemanjaji lina lyawo soni chimbitilisye kwamanyisya.”—Yohane 17:26.

Linali lili lyakusosekwa kwa ŵandu ŵakummanyilila Mlungu. Ŵandu ŵa Mlungu munyumamu, ŵamanyililaga kuti chikulupusyo soni chiteteyo chawo chakamulanaga ni lina lisyesyene lya Mlungu. ‘Lina lya Yehofa lili mpela sanja jakulimbangana mnope, mundu jwakulungama akusatilila kweleko ni kulupuka.’ (Misyungu 18:10) ‘Jwalijose jutachilumba lina lya Yehofa, tachikulupuka.’ (Yoweli 2:32) Baibulo jikusalosya  kuti lina lya Mlungu lichalekanganya ŵandu ŵakusamtumichila Mlungu ni ŵangakusamtumichila. ‘Mitundu josope ja ŵandu jikusalambila ni kumpikanila Mlungu jwawo nambo uwe tuchilambila ni kumpikanila Yehofa Mlungu jwetu mpaka kalakala.’—Mika 4:5; Masengo 15:14.

Lina lya Mlungu likusammanyikasya mwapajika jwalakwe. Ŵalijiganye ŵajinji akusasala kuti lina lyakuti Yehofa likusagopolela kuti, “Akusatendekasya.” Yehofa ŵatukamuchisye kumanyilila ngopolelo ja lina lyakwe, paŵalisalaga msyene kwa Mose kuti, “Chinjiŵa Chilichose Changusaka Kuŵa.” (Ekisodo 3:14) Lina lya Mlungu likusatusalila yindu yejinji kupunda kwamba kutumanyisya kuti jwalakwe ali Mkupanganya jwa yindu yosope. Linali likusalosya chenene kuti jwalakwe mpaka alitendekasye msyene soni yakupanganyikwa yakwe kuŵa chilichose pakusaka kukwanilisya chakulinga chakwe. Mena gauchimbichimbi gakusasala ya udindo wa Mlungu, ulamusi soni machili gakwe, nambo lina lya Mlungu, lyakuti Yehofa, ni lyalikusajimila mwaŵelele jwalakwe soni chilichose chakusaka kuŵa.

Linali likusalosya kuti Mlungu akusasamala ya m’weji. Ngopolelo ja lina lya Mlungu jikusalosyasoni kuti jwalakwe chachipitilisya kuyinonyela yakupanganyikwa yakwe, kupwatikapo m’weji. Konjechesya pelepa, Mlungu alimanyikasisye lina lyakwe pakusaka kuti ŵandu ammanyilile. Jwalakwe ŵalimanyikasisye linali kalakala ŵandu mkanaŵe kuganichisya ya linalyo. Kusala yisyene, Mlungu ngakusasaka kuti tumwoneje mpela chinechakwe changamanyika chenene kapena mpela mlungu jwakupanganyidwa, nambo akusasaka kuti tumwoneje kuŵa mpela Mundu jusyesyene jwampaka tuŵe najo paunasi.—Salimo 73:28.

Kamulichisya masengo lina lya Mlungu kukusalosya kuti tukusaka kuŵa najo paunasi. Tuwanichisye kuti akumsalila mjawo kuti ŵakolanjeje lina lyawo pakwaŵilanga. Ana mpaka apikane wuli naga mjawojo ndaŵi syosope akukana kukamulichisya masengo linalyo? Mkupita kwa ndaŵi mpaka atande kayichila naga mundujo ali mjawo jusyesyene. Yeleyi yili yakulandanasoni ni Mlungu. Yehofa ŵasalile ŵandu lina lyakwe soni kwalimbikasya kuti alikamuchisyeje masengo. Patukutenda yeleyi, tukusalosya kuti tukusaka kuŵa najo paunasi. Jwalakwe akusiŵamanyilila ‘ŵakusaganichisya ya lina lyakwe.’—Malaki 3:16, NWT.

Chindu chandanda chakusosekwa mnope kuti tummanyilile Mlungu chili kulijiganya ya lina lya lyakwe. Nambo ngatukusosekwa kwamba kulechela papopo. Tukusosekwa kumanyilila yejinji yakwamba Mlungujo soni ndamo syakwe. Tukusasosekwasoni kumanyilila yindu yakusayinonyela jwalakwe.