ŴANDU

Yajikusasala Baibulo: Mlungu “nganachipanganya [chilambo] kuti chiŵe changali kandu, nambo kuti chiŵe malo gakutama ŵandu.”—YESAYA 45:18.

CHILAMBO CHAPASI

Yajikusasala Baibulo: “Mpago ukusamala, wine soni ukusayika, nambo chilambo chapasi changachenga mpaka kalakala.”—JWAKULALICHILA 1:4.

ANA YELEYI YIKUGOPOLELA CHICHI?: Mwakamulana ni yajikusasala Baibulo, chilambo chapasichi ngasichijonanjidwa. Sonitu ŵandu chachipitilisya kutamamo. Ana Baibulo pajikusala yakumala kwa chilambo jikusagopolela chichi?

AGANICHISYE AYI: Baibulo jikusalandanya yakumala kwa chilambochi ni yindu yayatendekwe mu ndaŵi ja Nowa. Pandaŵijo chilambo chapasi ‘chagumbele ni yitendo yakusakala.’ (Genesesi 6:13) Nambope Nowa jwaliji jwakulungama. Myoyo Mlungu ŵamkulupwisye Nowa ni liŵasa lyakwe, pele ŵandu wosope ŵakusakala ŵajonanjidwe ni chigumula. Pakusala ya yindu yayatendekweyi, Baibulo jikusati, “Ni mesi gagogo chilambo chapasi chajonanjidwe ni mesi gatutumule.” (2 Petulo 3:6) Kweleku kwaliji kumala kwa chilambo pandaŵijo. Nambo ana ni yindu yapi yayajonanjidwe? Ŵandu ŵakusakala ŵaŵatamaga pachilambochi ni ŵaŵajonanjidwe nambo chilambo chapasichi nganichijonanjidwa. Myoyo Baibulo pajikusala yakumala kwa chilambo, ngajikusagopolela chilambo chapasi chatukutamachi. Nambo jikusagopolela konanjidwa kwa ŵandu ŵakusakala yimpepe ni yakusakala yosope yayikutendekwa pa chilambochi.

YINDU YAKUSAKALA

Yajikusasala Baibulo: “Mwangakaŵilisya ŵangalumbana ngasawoneka pa chilambo, jemanja timchasosa nambo ngisimwawona. Nambo ŵakulitulusya tachipochela chilambo kuti chiŵe chawo, ni tachiŵa pa mtendele ŵakupundanganya.”—SALIMO 37:10, 11.

ANA YELEYI YIKUGOPOLELA CHICHI? Chigumula cha mundaŵi ja Nowa nganichimasya yakusakala yosope. Panyuma pa chigumulachi, ŵandu ŵakusakala ŵatandilesoni kwalagasya achimjawo. Nambope pachangakaŵapa Mlungu chamasye yakusakala yosope. Buku ja Masalimo jikusati, “Ŵangalumbana ngasawoneka pa chilambo.” Mlungu chachikamulichisya masengo Uchimwene wakwe pakumasya yakusakala yosope. Uchimwenewu uchilamulila uli kwinani soni uchalamulilaga ŵandu ŵakulungama.

AGANICHISYE AYI: Ana ŵakulamulila ŵa pachilambo chapasi, chachikunda kuti Mlungu ŵalamulileje? Baibulo jikusasala kuti jemanjaji ngasakunda. Ŵakulamulilaŵa chachijimuchila Uchimwene wa Mlungu. (Salimo 2:2) Ana yakuyichisya yakwe yichiŵa yamtuli? Uchimwene wa Mlungu uchimasya maboma gosope ga ŵandu “nipo Uchimwene welewo pewo uchiŵapo mpaka kalakala.” (Danieli 2:44) Nambo ligongo chichi Mlungu chachimasya maulamusi gosope ga ŵandu?

Yajikusasala Baibulo: “Mundu ngaŵa mkukomboleka kulilongolela jikape.”—YELEMIYA 10:23.

ANA YELEYI YIKUGOPOLELA CHICHI?: Mlungu nganiŵapanganya ŵandu kuti alilamulileje achimsyene. Yakusatenda ŵandu pakwalamulila achimjawo soni pakumasya yakusawusya yikusaŵa yangakamuchisya.

AGANICHISYE AYI: Buku jine (Britannica Academic) jasasile kuti maboma gakulepela kumasya “usawuchi, sala, yilwele, ngosi syachilengedwe, ngondo soni yindu yachiwawa.” Bukuji japitilisye kusala kuti, “Ŵandu ŵane . . . akusakulupilila kuti pachilambopa naga pali pana boma jimo mpaka jikombole kumasya yakusawusya yosope.” Nambope, atamose maboma gosope ga ŵandu gali gakamulene nikuŵa boma jimo, nganaŵa akombwele kumasya yakusawusya yosope. Yili myoyo ligongo jemanjaji ali ŵangali umlama. Uchimwene wa Mlungu ni wawukwete machili gakumasya yakusawusya yosope pachilambopa.

Myoyo mwakamulana ni yajikusasala Baibulo, ngani jakumala kwa chilambo jili jakusangalasya. Sonitu ŵandu ŵambone ngakusosekwa kogopa. Yili myoyo, ligongo Mlungu chachityosya yakusakala yosope ni kwikasya chilambo chasambano.

Ana yeleyi yichitendekwa chakachi? Ngani jakuyichisya chijijanje chiwusyochi.