“Sambanotu jemanja mŵeje mesope, pakuti ngamkumanyilila lisiku kapena ndaŵi jakwe.”—MATEYU 25:13.

“Sambano mkalamuche, mŵeje mesope, ligongo ngamkumanyilila kuti ndaŵijo tijichikwanila chakachi.”—MALIKO 13:33.

Pangali jwakumanyilila ndaŵi kapena lisiku lyakumala kwa chilambo. Nambo Yehofape ni jwakumanyilila “lisiku kapena ndaŵi jakwe.” (Mateyu 24:36) Ana yeleyi yikugopolela kuti nganituŵa tumanyilile lisikuli palikuŵandichila? Iyayi. Yesu ŵasalile ŵakulijiganya ŵakwe kuti chachiyiwona yimanyilo yakulosya kuti mbesi jiŵandichile.

Yakutendekwa yaŵasasile Yesu yaliji yakuti yichilosya kuti “mbesi ja chilambo chapasi” jiŵandichile. Jwalakwe jwatite, “Mitundu ja ŵandu jakulekanganalekangana tijichimenyana ngondo, soni uchimwene tiwuchijimuchilana ni uchimwene ujakwe. Tikuchiŵa kwana sala ni yisichinya ku malo gakulekanganalekangana.” (Mateyu 24:3, 7) Jwasasilesoni kuti tikuchiŵa “yilwele” soni milili. (Luka 21:11) Ana yaŵasasile Yesuyi yikutendekwa?

Masiku agano ŵandu akulaga ni ngondo, sala, yisichinya kapena kuti yifomelesi soni yilwele. Mwachisyasyo, mu 2004 chifomelesi chamachili chachatendekwe ku Indian Ocean chawuleje ŵandu ŵakwana 225,000. Kwa yaka yitatu, ulwele wa kolona uwuleje ŵandu ŵakupunda 6.9 miliyoni pa chilambo chosope. Yesu jwasasile kuti yakutendekwa mpela yeleyi yichilosya kuti mbesi jiŵandichile.

Baibulo jikusasala yayichitendekwa ‘m’masiku gakumalisya’ mbesi mkanijiyiche. (2 Petulo 3:3, 4) Lilemba lya 2 Timoteo 3:1-5, likusatusalila kuti m’masiku gakumalisya ŵandu chachitendaga ndamo syakusakala. (Alole libokosi lyakuti “ Yayichitendekwa Mbesi Mkanijiyiche.”) Ana masiku agano ngatukwawona ŵandu kuti ali ŵakulinonyela, ŵawumbombo, ŵakogoya soni ŵangali chinonyelo? Awusoni uli umboni wakulosya kuti tukutama kumbesi kusyesyene kwa chilambochi.

Ana masiku gambesi chigajigale ndaŵi jelewu uli? Baibulo jikusasala kuti chigajigale “ndaŵi panandipe.” Kaneko Mlungu chachapyajila “ŵandu ŵele ŵajonasile chilambo chapasi.”—Chiwunukuko 11:15-18; 12:12.

Mlungu jwaŵisile kala ndaŵi soni lisiku lyachachijonanga chilambo chakusakalachi. (Mateyu 24:36) Nambo ngani jambone jili jakuti Mlungu ngakusaka kuti “ŵane ajonanjidwe.” (2 Petulo 3:9) Jwalakwe ŵapele ŵandu mpata wakulijiganya malamusi gakwe ni kugakuya. Atesile yeleyi ligongo lyakuti akusaka ŵandu wosope chakulupuche ni kuja kwinjila m’chilambo chambone.

Mlungu akwajiganya ŵandu pachilambo chosope chapasi ni chakulinga chakuti chatame m’chilambo chasambano. Yesu jwasasile kuti ngani syambone syakwamba Uchimwene wa Mlungu “tisichilalichidwa pa chilambo chosope chapasi.” (Mateyu 24:14) Ŵa Mboni sya Yehofa pa chilambo chosope ŵamalile maawala mabiliyoni gejinji ali mkulalichila soni kwajiganya ŵandu Baibulo. Yesu ŵasasile kuti mbesi mkanijiyiche ngani syambone syakwamba Uchimwene wa Mlungu tisichilalichidwa pa chilambo chosope.

Maboma ga ŵandu gasigele panandi kumala. Nambo ngani jambone jipali. Yili yakomboleka kuti chakulupuche ni kutama m’chilambo chasambano. Ngani jakuyichisya chijilondesye yampaka atende kuti chatame m’chilambochi.