Elo gapali. Ana gatyocele kwapi? Akaliŵalila kuti Mlungu ŵagapanganyisye malayika ni ufulu wakusagula jika yakutenda. Pali pagambile kupita ndaŵi jamnono Mlungu ali apanganyisye jwamlume ni jwamkongwe jwandanda, Adamu ni Hawa, lilayika line lyakamulicisye masengo ufulu wakwe mwakulemweceka. Lyatendekasisye ŵandu ŵandandaŵa kwimucila Mlungu. (Genesis 3:1-7; Ciunukuko 12:9) Baibulo jangasala lina lya lilayikali soni ukumu walyakwete kwinani mkanilimjimucile Yehofa. Nambo panyuma pakwimucila kwakwe, lyatandite kumanyika ni lina lyakuti Satana mwakamulana ni yajikusasala Baibulo. Linali likusagopolela kuti, “Jwakusisya.” Jwalakwe akusamanyikasoni kuti “Jwakulambusya.”—Matayo 4:8-11.

Nambo cakutesya canasa cili cakuti kwimucilaku kwajendelecele. Mu ndaŵi ja Nowa, malayika gane “galesile malo gawo” m’liŵasa lya Mlungu lyakwinani. Ngatukumanyilila kuti galiji galingwa. Gali gayice pacilambo capasi gacenjile yilu yawo nikuŵa ŵandu. Kaneko gatandite kugonana ni acakongwe. Mlungu pakupanganya malayika nganasakaga kuti gatendeje yeleyi.—Yuda 6; Genesis 6:1-4; 1 Petulo 3:19, 20.

Ana yagatesile malayikaga yakwete yakuyicisya yamtuli? Mlungu paŵajonangaga cilambo capasi ni cigumula, malayikaga, gacenjilesoni yilu yawo ya umundu ni kuwujila kwinani. Nambope gali gayice kwinani, Mlungu ganagakundasoni kuti gawujile ‘pamalo gawo gaŵatamaga pandanda.’ Mlungu ŵagaŵisile malayikaga mu ndende ja cipi mnope (jausimu) jakolanjikwa kuti Tatalasi. Gelega nganigaŵa malo gasyesyene nambo yikugopolela kuti Mlungu ŵagatyocesye ucimbicimbi soni upile wakuti amtumicileje. (Yuda 6; 2 Pet 2:4) Malayika gelega gaŵele yiŵanda. Yagatesileyi, yatendekasisye kuti galongoleledweje ni Satana, “jwakulamulila jwa yiŵanda.” Jwakulambusya jweleju “akusalilandanya jika kuŵa mpela lilayika lya lilanguka.”—Matayo 12:24; 2 Akolinto 11:14.

Baibulo jikusasala kuti Ucimwene wa Mlungu wa Umesiya, wawuli boma jakwinani, ŵawutamilikasisye m’caka ca 1914. * Panyuma pakutamilicika kwa ucimwenewu, Satana ni yiŵanda yakwe ŵaponyisye pacilambo capasi. Kutupa mnope kwa ndamo syakusakala pacilambopa, kukulosya cenene kuti Satana ni yiŵanda yakwe ni ŵakulongolela. Akutenda yeleyi pakusaka kulosya kutumbila kwawo ligongo lyakwatopola kwinani.—Ciunukuko 12:9-12.

Atamose yili m’yoyo, nambope kutupa mnope kwa ndamo syakusakalasi soni yaciwawa, kukulosya kuti ndaŵi jakuti yeleyi yimale jisigele panandi. Pacangakaŵapa, misimu jakusakalaji tacijitaŵa kuti jikasokonasyasoni ŵandu. Kaneko panyuma pakuti Ucimwene wa Mlungu ulamulile kwa yaka 1000, misimuji tacijigopola kwa ndaŵi jamnono kuti jilinje ŵandu kakumalisya. Panyuma pa yeleyi, tacijijonanga kuti jikasimanikwasoni mpaka kalakala.—Matayo 25:41; Ciunukuko 20:1-3, 7-10.