1. Ana Yesu jwasasile yamtuli pakwamba ya kusunga yipanje kwinani?

PA YINDU yosope yambone yaŵatupele Mlungu, pana yindu yine yanganituŵa tukombwele kuyiwona. Kusala yisyene, yindu yakusosekwa mnope yaŵatupele Mlungu yili yangawoneka ni meso. Pa Kulalichila kwa Petumbi, Yesu ŵasasile yindu yakusosekwa mnope kupunda chipanje. Soni jwalakwe ŵajonjechesye kuti, “Mtima wenu tiwuŵeje kwayili yipanje yenuko.” (Mat. 6:19-21) Mtima wetu ukusatulimbikasya kusachilila kupata yindu yatukusayiwona kuŵa yakusosekwa mnope. Tukusasunga ‘yipanje yetu kwinani’ mwakukola lina lyambone pameso pa Mlungu. Yesu jwasasile kuti, yipanje yeleyo nganiyiŵa yijonasiche kapena kwiŵidwa.

2. (a) Mwakamulana ni 2 Akolinto 4:17, 18, ana Paulo jwatulimbikasisye kuti tutendeje chichi? (b) Ana chitukambilane chichi munganiji?

² Ndumetume Paulo jwatulimbikasisye kuti ‘meso getu gaŵeje . . . pa yindu yangawoneka.’ (Aŵalanje 2 Akolinto 4:17, 18.) Yindu yeleyi yikupwatikapo yindu yambone yatuchisangalala nayo m’chilambo chasambano. Munganiji, chitukambilane yindu mcheche yangawoneka yampaka yitukamuchisye masiku agano. Yindu yakwe yili, kuŵa paunasi ni Mlungu, lipopelo, chikamuchisyo cha msimu weswela, nambosoni chikamuchisyo chatukusapata patuli mu utumiki kutyochela kwa Yehofa, Yesu soni malayika. Chitulole yampaka tutende pakulosya kumyamichila Yehofa ligongo lya yindu yeleyi.

3. Ana chindu chakusosekwa mnope changanituŵa tuchiweni ni meso getu chili chichi, soni yeleyi yikusakomboleka chamtuli?

³ Chindu chakusosekwa mnope changanituŵa tuchiweni ni  meso getu chili kuŵa paunasi ni Yehofa Mlungu. (Sal. 25:14) Ana mpaka yikomboleche chamtuli kuti Mlungu jwali jwamswela aŵe paunasi ni ŵandu ŵakulemwa? Yeleyi mpaka yikomboleche kupitila mumbopesi jaŵapeleche Yesu jakutuwombola, ‘jajikusatyosya ulemwa pachilambo chapasi.’ (Yoh. 1:29) Yehofa jwamanyilile kala kuti chakulinga chakwe chakusaka kwakulupusya ŵandu chichikomboleka. Ni ligongo lyakwe Mlungu jwaŵele paujakwe ni ŵandu ŵaŵapali Yesu mkanawe.—Alo. 3:25.

4. Ana ni ŵandu ŵane ŵapi ŵaŵaŵele achimjakwe ŵa Mlungu Chiklistu mkanichitande?

⁴ Aganichisye ya ŵandu ŵaŵaliji achimjakwe ŵa Mlungu Chiklistu mkanichitande? Abulahamu jwaliji mundu jwaŵakwete chikulupi chakulimba. Pali pamasile yaka 1,000 chiwile Abulahamu, Yehofa ŵamkolasile kuti ‘mjakwe.’ (Yes. 41:8) Yeleyi yikulosya kuti atamose mundu ali awile nambope Yehofa akusapitilisya kumwona kuti ali mjakwe. Yehofa akusamwona Abulahamu kuti ali chijumi. (Luk. 20:37, 38) Mundu jwine ali Yobu. Pandaŵi jele malayika gasongangene kwinani, Yehofa jwaŵechete yindu yine yakwamba Yobu. Yehofa jwamkolasile Yobu kuti, “ali jwangalemwa soni jwakulungama.” (Yob. 1:6-8) Yehofa ŵam’wenisoni Daniele kuŵa jwakulupichika ligongo lyakuti jwakombwele kumtumichila jwalakwe kwa yaka chiŵandika 80 m’chilambo chele ŵandu ŵakwe nganamtumchilaga Mlungu. Katatu kose malayika gamsimichisye Daniele juŵaliji jwachikulile kuti ali “mundu jwakunonyelwa mnope” kwa Mlungu. (Dan. 9:23; 10:11, 19) Mpaka tuŵe ŵakusimichisya kuti Yehofa ali jwakusachilila jili jikwanile ndaŵi jachachajimusya achimjakwe wosope wakunonyelwa ŵaŵawile.—Yob. 14:15.

5. Ana tukusasosekwa kutenda chichi kuti tuŵe paunasi wambone ni Yehofa?

⁵ Ana masiku agano pana ŵandu ŵalingwa ŵali paunasi ni Yehofa? Masiku agano ŵandu ŵajinji ali paunasi ni Yehofa. Tukuŵecheta yeleyi ligongo lyakuti masiku agano pana achalume, achakongwe soni ŵanache ŵajinji, ŵakusalosya kuti akusasaka kuŵa achimjakwe ŵa Mlungu. Yehofa “akusakamulana mnope ni mundu jwakulungama.” (Mis. 3:32. NWT) Unasi welewu ukusakomboleka kupitila mu mbopesi jakutuwombola ja Yesu. Kupitila mu mbopesi jeleji, mpaka tuŵe achimjakwe ŵa Yehofa mwakupeleka umi wetu kwa jwalakwe soni mwa kubatisidwa. Patukutenda yeleyi, tukusaŵa tuli mkukamulana ni mamiliyoni gejinji ga ŵandu ŵaŵapeleche umi wawo, soni ŵali Aklistu ŵabatisidwe ŵakusasangalala kuŵa “ŵakamulana mnope” ni Yehofa.

6. Ana mpaka tulosye chamtuli kuyamichila unasi wetu ni Mlungu?

⁶ Ana mpaka tulosye chamtuli kuti tukusayamichila kuŵa paunasi ni Yehofa? Mwakulandana ni Abulahamu soni Yobu, ŵaŵaŵele ŵakulupichika kwa yaka yejinji, m’wejisoni tukusosekwa kupitilisya kuŵa ŵakulupichika mwangasamala kandu ya ulewu wa ndaŵi jatuŵele tuli mkutumichila Yehofa m’chilambo chakusakalachi. Mpela Daniele, tukusosekwa tuwuwoneje unasi wetu ni Mlungu kuŵa wakusosekwa mnope kupunda umi wetu. (Dan. 6:7, 10, 16, 22) Ni chikamuchisyo cha Yehofa, mpaka tukombole kupilila yakusawusya yiliyose yampaka tusimane nayo soni mpaka tupitilisye kuŵape achimjakwe.—Afil. 4:13.

7. (a) Mwakamulana ni Misyungu 15:8, ana Yehofa akusapikana wuli patukupopela? (b) Ana Yehofa akusajanga chamtuli mapopelo getu?

⁷ Chindu chine changawoneka chaŵatupele Mlungu chili lipopelo. Ŵandu ŵali paujakwe akusanonyela kuŵechetana yindu yakuganisya soni mwakupikanila mumtima. Yeleyi ni yayikusatendekwasoni patuli paujakwe ni Yehofa. Yehofa akusaŵecheta ni m’weji kupitila m’Maloŵe gakwe, soni tukusamanyilila nganisyo syakwe soni mwakusapikanila kupitila m’maloŵe gakwego.  Kupitila mwipopelo tukusaŵechetana ni jwalakwe, soni tukusakombola kumsalila mwatukupikanila mumtima. Yehofa akusasangalala kupikana mapopelo getu. (Aŵalanje Misyungu 15:8.) Mpela Mjetu jwambone, Yehofa ngakusagamba kupikanila mapopelo getupe, nambo akusajangagasoni. Ndaŵi sine akusajanga mwachitema. Nambo ndaŵi sine tukusasosekwa kupitilisyape kuŵenda yatukusakayo. Nambope, tukusaŵa ŵakusimichisya kuti pandaŵi jambone, jwalakwe chachijanga mapopelo getu soni m’litala lyambone. Yisyene kuti Mlungu mpaka ajanje mapopelo getu mwakulekangana ni mwatukusachila. Mwachisyasyo, mmalo mwakututochesya yindu yayikutulagasya, Mlungu mpaka agambe kutupa lunda soni machili kuti tukombole “kupimilila kapena kuti kupilila.”—1 Akoli. 10:13.

8. Ana mpaka tulosye chamtuli kuyamichila mtuka wa lipopelo?

⁸ Ana mpaka tulosye chamtuli kuyamichila mtuka wapenani wa lipopelo? Litala limo lili kupikanila yakusatusalila Yehofa kuti ‘tupopeleje mwangalechesya ndaŵi syosope.’ (1 Ates. 5:17) Yehofa ngakusatukanganichisya kuti tupopeleje. Mmalo mwakwe, jwalakwe akusachimbichisya ufulu wetu wakusagula yakutenda soni akusatulimbikasya kuti ‘tupopeleje ndaŵi syosope.’ (Alo. 12:12) Myoyo mpaka tulosye kuyamichila kwetu mwakupopela lisiku lililyose. Nambope, ngatukusosekwa kuliŵalila kumyamichila soni kumlumba Yehofa patukupeleka mapopelo getu.—Sal. 145:2, 3.

9. Ana m’bale jwine akusapikana wuli pakupopela, nambi wawojo akusapikana wuli?

⁹ Patukumtumichila Yehofa kwandaŵi jelewu soni patukulola yakuti pakwanga mapopelo getu, ni patukusamyamichila mnope jwalakwe ligongo lyakutupa upile wakupopela. Aganichisye chisyasyo cha m’bale jwine lina lyakwe Chris jwaŵele ali mkutenda undumetume wandaŵi syosyope kwa yaka 47 yipiteyi. Jwalakwe jwatite, “Ngusasangalala kwimuka kundaŵi mnope ni chakulinga chakuti mbopele kwa Yehofa. Kusala yisyene, yikusaŵa yakusangalasya mnope kupopela kwa Yehofa kundaŵindaŵipe kusa kuli jii. Yeleyi yikusandendekasya kumyamichila Yehofa ligongo lya yindu yambone yakusapeleka kupwatikapo lipopelo. Pangupopela ligulo yikusaŵa  yakusangalasya kwawula kugona ndili ni chikumbumtima chambone.”

10. Ligongo chichi tukusosekwa kuwuwona msimu weswela kuti wuli wakusosekwa?

¹⁰ Chindu chine chakusosekwa mnope changawoneka ni meso chakusatupa Mlungu chili machili ga msimu weswela. Yesu jwatulimbikasisye kuti tukusosekwa kuŵenda msimu weswela. (Luk. 11:9, 13) Yehofa akusakamulichisya masengo msimu wakwe weswela mwakutupa “machili gakupunda gachipagwa.” (2 Akoli. 4:7, NWT; Mase. 1:8) Ni chikamuchisyo cha machili ga msimu weswela wa Mlungu mpaka tupilile yakusawusya yiliyose yampaka tusimane nayo.

11. Ana msimu weswela wa Mlungu mpaka utukamuchisye chamtuli?

¹¹ Msimu weswela mpaka utukamuchisye kuti tumtumichileje chenene Mlungu. Soni mpaka utukamuchisye kuti tukusye umanyilisi ni lunda lwetu. Tukusamanyilila kuti yakuyichisya yambone yayikusapagwa ligongo lya kumtumichila Yehofa yikusayika ligongo lya kuti msimu weswela ukusatukamuchisyaga.

12. Mwakamulana ni Salimo 139:23, 24, ana mpaka tuŵende msimu weswela kuti utukamuchisye kutenda chichi?

¹² Litala line lyampaka tulochesye kuti msimu weswela wa Mlungu wuli wakusosekwa, lili kumŵenda Yehofa kuti atukamuchisye kulola naga tutandite kuganisya soni kusachilila kutenda yakusakala. (Aŵalanje Salimo 139:23, 24.) Patukutenda yeleyi, Yehofa pakamulichisya masengo msimu wakwe chachitukamuchisya kuti tumanyilileje nganisyo syakulemwecheka soni yindu yampaka yitutendekasye kulemwa. Patusikopochele nganisyo syakulemwechekasi, tukusosekwa kumŵenda Yehofa kuti atupe msimu wakwe weswela ni chakulinga chakuti tukombole kumalana nasyo. Kutenda yeleyi, kuchilosya kuti tukusachilila kuŵambala chilichose champaka chimtendekasye Yehofa kuleka kutukamuchisya ni msimu wakwe weswela.—Aef. 4:30.

13. Ana mpaka tulosye chamtuli kumyamichila Yehofa ligongo lya msimu weswela?

¹³ Mpaka tuwuyamichile msimu weswela patukulinga kulola yindu yatukukombola kutenda ligongo lya msimu weswelawu. Yesu mkanajale kwinani, ŵasalile ŵakulijiganya ŵakwe kuti,  “Timchipochela machili, msimu weswela uli wumyichile pa jemanja, pelepo timchindendela umboni . . . mpaka kumbesi kwa chilambo.” (Mase. 1:8) Yeleyi ni yayiŵele yili mkutendekwa masiku agano. Ni chikamuchisyo cha msimu weswela masiku agano kwana ŵakutumichila Yehofa ŵakupunda 8.5 miliyoni, kusyungulila pachilambo chapasi. Soni tukusasangalala ni mkamulano wa pachilambo chosope ligongo msimu wa Yehofa ukusatukamuchisya kuti tukole ndamo syambone mpela chinonyelo, chisangalalo, mtendele, kuwusimana mtima, chanasa, umbone mtima, chikulupi, kufasa soni kulilekasya. (Aga. 5:22, 23) Kusala yisyene, msimu weswelawu wuli wakusosekwa mnope.

14. Ana ŵani ŵakusatukamuchisya patukulalichila?

¹⁴ Tukwetesoni chindu chine changawoneka ni meso chachili “kukamula masengo” ni Yehofa nambosoni likuga lyakwe lya kwinani. (2 Akoli. 6:1, NWT) Tukusatenda yeleyi mwakukamula nawo masengo gakulalichila. Pakuŵecheta ya jwalakwe soni wosope ŵakusakamula nawo masengoga, Paulo jwatite, “Tuli ŵamasengo achimjakwe ŵa Mlungu.” (1 Akoli. 3:9, NWT) Tukusaŵasoni ŵamasengo achimjakwe ŵa Yesu patukukamula nawo masengo gakwawusya pasogolo yindu ya Uchimwene. Yesu ali ŵasalile ŵakumkuya ŵakwe kuti, ‘akajiganye ŵandu ŵamitundu josope,’ ŵasalilesoni kuti, “Unejo ndili ni jemanja kwa masiku gosope.” (Mat. 28:19, 20) Nambi wuli pakwamba ya malayika? Tukusayamichila mnope kuti malayika gakusatulongolela patukulalichila “ngani syambone syangamala . . . kwa ŵandu ŵa pachilambo chapasi.”—Chiw. 14:6.

15. Asale chisyasyo cha m’Baibulo chakulosya kuti Yehofa akusatukamuchisya patukukamula masengo gakulalichila.

¹⁵ Ana chikamuchisyo chatukusapochela kutyochela kwinanichi chikusatukamuchisya kutenda chichi? Patukulalichila utenga wa Uchimwene, mbeju sine sikusagwila m’mitima jambone soni sikusasogola. (Mat. 13:18, 23) Ana ŵani ŵakusakusya mbeju sya usyesyenesi kuti sitande kusogola. Yesu jwasasile kuti pangali mundu jwampaka ayiche kwa jwalakwe akaŵe ‘naga Atati . . . akumlongololela kwa jwalakwe.’ (Yoh. 6:44) Baibulo jikusatusalila chisyasyo cha yakutendekwa yisyesyene ya nganiji. Aganichisye yayatendekwe pandaŵi jele Paulo ŵalalichilaga achakongwe kusa kwa msinda wa Filipi. Alole yajikusasala Baibulo pakwamba ya jwamkongwe jwine jwaŵalalichilidwe lina lyakwe Lidiya. Jikusati, “Ambuje ŵawuwugwile mtima wakwe kuti ayisunje yiŵaŵechetaga Paulo.” (Mase. 16:13-15) Mwakulandana ni Lidiya, ŵandu ŵajinji aŵele ali mkwika kwa Yehofa.

16. Ana ŵani ŵakusosekwa kupochela ulemu yindu payitujendele chenene mu utumiki?

¹⁶ Ana ŵani ŵakusosekwa kupochela ulemu yindu payitujendele chenene mu utumiki? Paulo jwajanjile chiwusyochi paŵalembele chikalata Aklistu ŵa ku Kolinto. Jwalakwe jwatite, “Une napandile mbeju, nipo Apolo ŵasijitilile, nambo juŵayimelesye ni Mlungu. Myoyo jwakupanda kapena jwele jwajitilile nganaŵa kandu, nambo akaŵe Mlungupe jwele jwakusayitendekasya kuti yimele.” (1 Akoli. 3:6, 7) Mwakulandana ni Paulo, tukusosekwa kupeleka ulemu kwa Yehofa yindu payitujendele chenene mu utumiki.

17. Ana mpaka tulosye chamtuli kuyamichila upile “wakukamula masengo” ni Mlungu, Yesu, soni malayika?

¹⁷ Ana mpaka tulosye chamtuli kuyamichila upile “wakukamula masengo” ni Mlungu, Yesu, soni malayika? Mpaka tutende yeleyi mwakukamulichisya masengo mpata wuliwose pakwasalila ŵane ngani syambone. Pana matala gejinji gampaka tutendele yeleyi, mpela kulalichila pamalo gakusimanikwa ŵandu ŵajinji, soni ku nyumba ni nyumba. (Mase. 20:20) Ŵajinji akusasangalalasoni kulalichila mwaupile. Pasimene ni mundu jwachilendo, akusamkomasya mwachinonyelo soni akusatanda kuŵechetana najo.  Naga mundujo akuwoneka kuti ali jwakunguluchika, ndaŵi jijojo akusatanda kumlalichila ngani sya Uchimwene.

18-19. (a) Ana tukusajitilila chamtuli mbeju sya usyesyene? (b) Asale chisyasyo chakulosya yaŵatite Yehofa pakumkamuchisya jwakulijiganya Baibulo jwine.

¹⁸ Mpela “ŵamasengo achimjakwe ŵa Mlungu,” ngatukusosekwa gamba kupandape mbeju sya usyesyene. Mmalo mwakwe tukusosekwasoni kwitilila. Naga mundu akulosya kuti akusaka kumanyilila yejinji, tukusosekwa kutenda maulendo gakuwilisya, kapena kumsalila mundu jwine kuti akasimane ni mundujo ni chakulinga chakuti atandisye lijiganyo lya Baibulo. Lijiganyoli palikwawula pasogolo tukusasangalala kuyiwona yakuti Yehofa pakumkamuchisya mundujo kuchenga kaganisye kakwe.

¹⁹ Aganichisye chisyasyo cha mundu jwine jwa ku South Africa juŵaliji msing’anga lina lyakwe Raphalalani. Jwalakwe jwanonyelaga yindu yaŵalijiganyaga m’Baibulo. Nambo yaliji yakusawusya kwa jwalakwe kuti akamulane ni yajikusasala Baibulo pakwamba ya kuŵechetana ni ŵandu ŵawe. (Det. 18:10-12) Nambope mwapanandipanandi, jwalakwe jwakundile kuti Mlungu achenje kaganisye kakwe. Pandaŵi jakwe, jwalesile using’anga atamose kuti galiji masengo gaŵagadalilaga paumi wakwe. Apano jwalakwe akwete yaka 60, soni jwatite, “Ngwayamichila mnope ŵa Mboni sya Yehofa pakungamuchisya m’matala gakulekanganalekangana soni kuti mbate masengo. Kwakupunda yosope, ngumyamichila mnope Yehofa pakungamuchisya kuchenga umi wangu. Yeleyi yitendekasisye kuti ngomboleje kulalichila mpela jwa Mboni sya Yehofa jwam’batisidwe.”

20. Ana wawojo asimichisye kutenda chichi?

²⁰ Munganiji, tukambilene yindu mcheche yangawoneka ni meso yakusatupa Yehofa. Chindu chekulungwa mnope pa yindu yeleyi chili upile wakuŵa paujakwe wambone mnope ni Yehofa. Yeleyi yikusatukamuchisya kuti tupindulejesoni ni yindu yine yangawoneka ni meso getu. Yindu yeleyi yili mpela kuŵechetana najo kupitila mwipopelo, kupata chikamuchisyo cha msimu weswela, soni kupata chikamuchisyo chakutyochela kwinani patukulalichila. Myoyo tukusosekwa kuyamichila mnope yindu yangawoneka ni meso yatupele Yehofayi. Kupwatika pelepa, ngatukusosekwa kuleka kumyamichila Yehofa ligongo lyakuŵa mjetu jwambone.