Baibulo jikusatusalila kuti ŵandu cacijonanjikwa patijiciyika mbesi. Jikusati, “Pakuti yisawusyo yakogoya mnope tiyiciwoneka gele masikugo, yanganiwonecejesoni citandilile cipanganyicisye Mlungu cilambo capasi mpaka sambano jino . . . Gele masikugo, Ambuje akaŵe kuti nganagapungula, ngamkanapagwa mundu jwalijose jwakakulupwice.” (Matayo 24:21, 22) Nambo Mlungu ŵasasile kuti ŵandu ŵajinji cacikulupuka. Jwalakwe ŵatite, ‘Cilambo capasi cikumala . . . , nambo jwakutenda yakusaka Mlungu, cacitama kwa ndaŵi syosope.’—1 Yohane 2:17.

Ana tukusosekwa kutenda yatuli kuti ‘citutame mpaka kalakala’ pandaŵi jele mbesi tijiciyika? Ana tukusosekwa kuliwunjicila yindu kapena kutenda yindu yakulimbisya yilu pakosocela? Iyayi, ligongo Baibulo jikusatusalila mwamacili kuti tukusosekwa kutenda yindu yakulengana ni yeleyi. Jikusati, ‘Yosope yene tiyicijonasika mwalitala lyelyeli, ana jemanja mkusosekwa kuŵa ŵandu ŵatuli? Umi wenu uŵeje weswela ni kulipeleka kwa Mlungu. Mjembeceleje lisiku lyele Mlungu litacajamuka ŵandu wosope.’ (2 Petulo 3:10-12) Nganiji jikusalosya kuti “yosope yene” yayicijonasika yikupwatikapo ŵakulamula wosope ŵapacilambo cakatangaleci nambosoni wosope ŵali kumbali ja ŵakulamulaŵa. Yeleyi yikulosya kuti kuliwunjicila ndundu ngaŵa mkutukamucisya kulupuka conasiko celeci.

Kusala yisyene, kuti citukulupuce tukusosekwa kuŵa ŵakulipeleka kwa Yehofa Mlungu soni kulijiganya ndamo syambone ni kutendaga yakumsangalasya jwalakwe. (Zefaniya 2:3) Ngatukusosekwa kuya yakutenda ŵandu ŵajinji, nambo tukusosekwa kuyikosyaga yimanyisyo yayikutendekwa yakulosya kuti tuli m’masiku gambesi soni tukwembeceya ‘lisiku lyele Mlungu tacijamuka ŵandu wosope.’ Ŵa Mboni sya Yehofa mpaka ŵakamucisye kumanyilila yampaka atendeje kuti wawojosoni cakulupuce pa lisiku lya mbesi.