NGANI JA PANDANDA | ANA LIPOPELO LILI LYAKUSOSEKWA?
Ana Pana Jwalijose Jwakusatupikanila Patukupopela?
Ŵandu ŵane akusaganisya kuti kupopela kuli kwamba kwasa ndaŵi, ligongo lyakuti pangali jwakusapikanila. Ŵane alinjilelinjile kupopela nambo akusayiwona kuti pangali jwakusiŵajanga. Mundu jwine jwangakulupilila kuti kwana Mlungu ŵasasile yakusaganisya pakwamba ya Mlungu ni kaneko ŵapopesile kuti, “Agambe kusongonela panandipe.” Nambo jwalakwe ŵatite Mlungu “nganaŵeceta cilicose.”
Nambope, Baibulo jikusatusimicisya kuti pana Mlungu soni kuti jwalakwe akusapikanila mapopelo. Baibulo jasalile ŵandu kalakalako kuti, “Mwangakayicila, jwalakwe [Mlungu] cacimtendela canasa pacacipikana kulila kwenu. Pacacigamba kupikana kulila kwenuko, cacimjanga.” (Yesaya 30:19) Lilemba lya Miyambo 15:8 likusasalasoni kuti, “Lipopelo lya mundu jwagoloka mtima likusamsangalasya jwalakwe.”
Yesu ŵapopesile kwa Atati ŵakwe, ‘soni Ŵalakwe ŵampikanile.’
Baibulo jikusasalasoni ya ŵandu ŵele Mlungu ŵapikanile mapopelo gawo. Lilemba lya Ahebeli 5:7 likusasala kuti Yesu ŵapelece “mapopelo gakuŵenda . . . kwa Jwele jwakupakombola kumkulupusya ku ciwa.” Yisyasyo yine ya ŵandu ŵele Mlungu ŵapikanile mapopelo gawo mpaka ayipate pa Danieli 9:21; ni 2 Mbiri 7:1.
Nambi ligongo cici ŵane akusalola kuti pangali jwakusajanga mapopelo gawo? Baibulo jikusatusalila kuti tukusosekwa kupopela kwa Mlungupe, Yehofa, * ngaŵaga kwa milungu jine kapena kwa acinangolo ŵaŵawile. Mlungu akusasakasoni kuti “tupopeleje mwakamulana ni lisosa lyakwe.” Naga tukutenda yeleyi, Jwalakwe akutusimicisya kuti “akusatupikanila.” (1 Yohane 5:14) Myoyo, kuti mapopelo getu agapikanileje tukusosekwa kummanyilila cenene Mlungu soni kutenda yakusasaka.
Ŵandu ŵajinji akusakulupilila kuti lipopelo nganiligamba kuŵa cisyoŵe ca dini, nambo Mlungu akusapikanila soni kwanga mapopelo. Isaac jwa ku Kenya ŵatite, “Napopesile kwa Mlungu kuti angamucisye kujipikanicisya cenene Baibulo. Ndili ngambile kumalisya kupopela, mundu jwine ŵakopocele ni kumbenda kuti anjiganyeje Baibulo.” Jwamkongwe jwine jwa ku Philippines ŵasakaga kuleka kwemba sona. Ali alepele kuleka cisyoŵeci, ŵamkwakwe ŵamsalile kuti, “Uli ngagamba kupopela kwa Mlungu kuti amkamucisye?” Jwalakwe ŵakuyisye yaŵamsalile ŵamkwakwewo, mwati ŵaŵecete kuti, “Nasimonjile mnope kuyiwona kuti Mlungu ŵangamucisye. Panandipanandi nalesile cisyoŵe cakwemba sona.”
Yehofa ali jwakoseka kwakamucisya wawojo, naga mapopelo gawo gali gakamulana ni lisosa lyakwe.
^ ndime 6 Baibulo jikusasala kuti lina lya Mlungu lili Yehofa.
