NGANI JAPANDANDA
Ana Mlungu Akusajiwona Mwatuli Ngondo?
Ana mpaka ajanje catuli ciwusyo celeci? Ŵajinji akusaganisya kuti Mlungu akusajiticisya ngondo. Akusaganisya m’yoyo ligongo lyakuti jwalakwe ŵalamwile ŵakutumicila ŵakwe ŵakala kuti aputeje ngondo soni Baibulo jikusasala yeleyo. Nambo ŵandu ŵane akusamanyilila kuti Mwanace jwa Mlungu, Yesu, ŵajiganyisye ŵakumkuya ŵakwe kuti ŵanonyeleje acimmagongo ŵawo. (Matayo 5:43, 44) M’yoyo, akusaganisya kuti Mlungu ŵacenjile nganisyo syakwe pangani ja ngondo mwati moŵa agano ngakusajijiticisyasoni.
Wawojo akuganisya wuli? Ana Mlungu akusajiticisya ngondo moŵa agano? Naga yili m’yoyo ni akusaŵa ku mbali jaceni? Kwanga kwa yiwusyo yeleyi mpaka kukwaye mwakusajiwonela wawojo ngondo. Mwambone, tuwanicisye kuti Mlungu akusajiticisya ngondo soni ali kumbali jawo, mpaka asangalale mnope ali akwete cikulupi cakuti mbali jawojo cijipunde ngondojo. Nambi mpaka apikane wuli ali ayimanyi kuti Mlungu ali kumbali jinejo? Mwangakayicila mpaka aganicisyesoni ya mbali jakusosekwa kuŵa.
Nambope pana cindu cine catukusosekwa kucimanyilila. Kumanyilila mwakusajiwonela Mlungu ngondo mpaka kukwayesoni mwatukusam’wonela jwalakwejo. Naga wawojo ali jumo mwa ŵandu ŵajinji ŵaŵalasile ligongo lyangondo mpaka asace kumanyilila kwanga kwa yiwusyo ayi: Ana Mlungu akusalimbikasya ŵandu kuputana ngondo soni kwatendekasya ŵandu kuti alajeje ligongo lyangondo? Kapena, ana jwalakwe jwangayikosya ata panandi yayikusatendecela ŵandu ŵakulaga ni ngondo mpela mwakusakulupilila ŵane?
Yajikusasala Baibulo pangani jeleji yili yakulekangana mnope ni yakusakulupilila ŵanduyi. Kusala yisyene, Mlungu nganacenga. Mwaŵajiwonelaga ngondo kalakala ni mwakusajiwonelasoni moŵa agano. Kwende sambano tulole yajikusasala Baibulo pakwamba ya mwaŵajiwonelaga Mlungu ngondo kalakala soni mu yaka 100 yandanda Yesu ali pacilambo capasi. Kulola yeleyi cikutukamucisye kumanyilila mwakusajiwonela Mlungu ngondo moŵa agano soni naga jicijendelecela mpaka kalakala.
