Baibulo jikusalondesya kuti ngondo ja Alamagedo jichitendekwa pa chilambo chosope ngaŵaga mu dela jimope basi. Ngondoji jichitendekwa pasikati pa maboma gosope ga ŵandu ni Mlungu.

•   “Mautenga gakutyochela kwa yiŵanda. . . gakusajawula kwa mamwenye ga pachilambo chosope chapasi, kuti ŵasonganganye pampepe ku ngondo ja lisiku lyekulungwa lya Mlungu Jwamachiligosope. . . . Ŵagasongangenye pampepe mamwenyego ku malo gele m’Chihebeli akusati Alamagedo.”—Chiwunukuko 16:14, 16.

 Maloŵe gakuti “Alamagedo” gatyochele ku liloŵe lya Chihebeli lyakuti Har Meghid·dohnʹ, lyalikusagopolela “Litumbi lya Megido.” Megido waliji msinda wakalakala wa ku Israel. Ligongo lya yeleyi, ŵandu ŵane akusakulupilila kuti ngondo ja Alamagedo jichitendekwa ku Israel. Nambope, malo ga ku Megido kapena malo gane gagali ku Middle East gali gamwana mnope. Mwamti “mamwenye ga pachilambo chosope chapasi” yalumo ni magulu gawo ga ngondo, nganigaŵa gakwanile kuti gasongane kweleko.

 Buku ja Chiwunukuko jalembedwe “kupitila mu yiwanichisyo,” kapena kuti ŵakamulichisye masengo maloŵe gakuwanichisya. (Chiwunukuko 1:1) Myoyo, Alamagedo nganigaŵa malo gasyesyene, nambo jili ndaŵi jele mitundu josope ja ŵandu pachilambo chosope jichisongana kuti jijimuchile ulamusi wa Mlungu.—Chiwunukuko 19:11-16, 19-21.