Lyamsanu, pa Febuluwale 24, 2023, lili lisiku lyakusawusya lyele ŵandu akukumbuchila kuti pamasile chaka chitandile ngondo ja ku Ukraine. Mwakamulana ni malipoti gane, asilikali chiŵandika 300,000 ŵa ku Ukraine soni ku Russia awulajidwe soni ŵane awulele. Soni yikuwoneka kuti ŵandu ŵane ŵakwana 30,000 awulajidwe pangondoji. Nambope, komboleka kuti yiŵalajiloyi mpaka yipunde pelepa.

 Yakutesya chanasa, yili yakuti ngayikumanyika naga ngondoji chijimale.

•   Pa Febuluwale 19, 2023, wailesi jine ja National Public Radio jasasile kuti, “Chaka chikumala sano asilikali ŵa Russia chijinjilile m’chilambo cha Ukraine kuputa ngondo. Nambo pangali yayikulosya kuti ngondoji mpaka jimale pamkaŵapa. Mwamti asilikali ŵa mbali syosope siŵili, asimichisye kuti apunde pangondoji. Soni yili yakayikasya naga mbali siŵilisi mpaka sitame pasi ni kambilana ya mtendele.”

 Ŵandu ŵajinji akulaga nganisyo ligongo lya yakuyichisya yayipali ligongo lya ngondoji soni ngondo sine. Yeleyi yitendekasisye kuti ŵandu ŵangalemwa pachilambo chosope alajeje mnope. Nambo ana Baibulo Jikusapeleka Chembecheyo Chamtuli? Soni ana ngondo sichimala?

 Baibulo jikusasala ya ngondo jajichikulupusya ŵandu ngaŵaga kwajonanga. Ngondoji jikusakolanjikwa kuti Alamagedo, soni akusajisala kuti jili “ngondo ja lisiku lyekulungwa lya Mlungu Jwamachiligosope.” (Chiwunukuko 16:14, 16) Mlungu chachikamulichisya ngondoji pakumasya maulamusi ga ŵandu, gagatendekasisye kuti paŵe ngondo syakonanga. Kuti amanyilile mwayichitendechela kuti Alamagedo jiyikasye mtendele wangamala, aŵalanje ngani syakuyichisyasi:

•   “Ana Ngondo ja Alimagedo ni Chichi?”

•   “Tukatendaga Woga ni Alamagedo!”