Mu lipoti lya bungwe ja United Nation lyalyakopweche pa Epulo 4, 2022, lyalondesisye yaŵakambilene achakulungwakulungwa ŵa yilambo yakwayana ni kuchenga kwa nyengo. Mlembi jwamkulungwa jwa bungweji, Che António Guterres, ŵatite: “Ŵandu akutenda yindu yejinji yele chiyitendekasye kuti tulajeje mnope ligongo lyakusokonechela kwa nyengo. Mwamti pachangakaŵapa misinda jekulungwakulungwa chijilajeje ni kusewuchila kwa mesi. Konjechesya pelepa ŵandu chalajejesoni ni mtukuta, mbungo syamachili soni syakogoya, kusoŵa kwa mesi, kumala kwa mitundu jine ja yakumela soni yinyama. Mwamti nganiji nganijiŵa adisi. Ŵasayansi akulosya kuti yeleyi chiyitendekwe naga maboma ngagatendapo kandu pakakamulichisye masengo kayindu ya m’chilengedwe.”

 Nyusipepala jine (The New York Times) ja pa Juni 15, 2022 jasasile kuti, “Ŵasayansi akwakalamusya ŵandu kuti, yaka yayikwikayi, konasika kwa yindu ligongo lyakuchenga kwa nyengo chikukwaye chiŵandika malo gakwana 423 gakusunjila yindu yachilengedwe ku United States. Yeleyi chiyitendekwe mnopemnope ligongo lyakuti kumaloga kukutenda mtukuta mnope. Yakusawusya yampaka yitendekweyi, yikuwoneka yakulandana ni yatukusaŵalanga m’Baibulo. Yakusawusya yakwe yili: moto ni kusewuchila kwa mesi, kugumbala mnope kwa mesi m’nyasa syekulungwakulungwa nambosoni mtukuta.”

 Nambo ana konasika kwa yindu ya chilengedweku mpaka kumale? Nambi ŵani ŵampaka akumasye? Apikane yajikusasalaga Baibulo.

 Mwamti Baibulo jikusasala kuti Mlungu ‘chachajonanga wosope ŵakuchijonanga chilambo chapasi.’ (Chiwunukuko 11:18) Lilembali likutujiganya yindu yitatu ayi:

1.  1. Yitendo ya ŵandu yichijonanga mnope chilambochi.

2.  2. Konasika kwa chilambochi kuchikola mbesi jakwe.

3.  3. Mlungu ni jwachachimasya konasika kwa yindu ya chilengedwe ngaŵaga ŵandu.

 Baibulo jikusati “chilambo chapasi [“chichiŵapo, NWT”] mpaka kalakala.” (Jwakulalichila 1:4) Yayikulosya kuti ŵandu chachitamagapo ndaŵi syosope.

•   “Ŵandu ŵambone tachipochela chilambo, ni tachitama mwelemo kwa yaka yosope.”—Salimo 37:29.

 Mlungu chachilinganya chilambochi kuti chiŵesoni chambone.

•   “Chipululu ni chilambo changali mesi yichisangalala, chilambo chejumu chichisengwa ni kusipuka maluŵa.”—Yesaya 35:1.