Iyayi. Ŵa Mboni sya Yehofa ngatukusakana kupochela katemela. Tukusajiwona nganiji kuŵa chakusagula cha Mklistu jwalijose pajika. Mwamti ŵa Mboni sya Yehofa ŵajinji asagwile kupochela katemela.

 Tukusawungunya chikamuchisyo cha mtela soni tukusapikanila yakusasala ŵa chipatala pangani ja mwampaka tunandiyile kuwandisya yilwele. Tukwayamichila mnope ŵachipatala ligongo lya masengo gakukamula mu ndaŵi jakusawusyaji.

 Ŵa Mboni sya Yehofa akusatenda yindu mwakamulana ni achakulungwakulungwa ŵa chipatala. Mwachisyasyo mlili wa COVID-19 uli utandite, ŵa Mboni sya Yehofa, ŵatandite kupeleka malangiso pa webusayiti jawo mu yiŵecheto yejinji. Malangiso gakwe gali gakwakamuchisya ŵandu kuti apikanileje yakusala achakulungwakulungwa ŵa chipatala. Yeleyi yikupwatikapo kusosekwa kwakutama mwakutalikangana, kukuyaga malangiso pangani jakusongana ŵandu ŵajinji malo gamo, kutama kwajika naga mundu asimanikwe ni ulwele wa kolona kapena yimanyilo ya ulwelewu, kunaŵa myala, kuwala masiki soni kukuya matala gane gakupeleka ŵachipatala.—Aloma 13:1, 2.

 Kwa yaka yejinji, mabuku ga ŵa Mboni sya Yehofa gaŵele gali mkugombelechesya mfundo syakuyichisyasi:

•   Pangani ja chikamuchisyo cha mtela, mundu akusalisagulila jika.—Agalatiya 6:5.

   “[Magasiniji] ngajikwitichisya mtundu wine wa mtela kapena chikamuchisyo cha opaleshoni mwakusisyana ni chikamuchisyo chine. Soni ngajikusala yampaka mundu atende panganiji. Chakulinga chakwe chili kusala yisyesyene soni kumkunda jwakuŵalanga kuti asagule jika panganiji.”—Ajimuche!, Febuluwale 8, 1987.

   “Pangani jakuti wawojo kapena mwanache jwawo akusosekwa kupochela katemela chili chisagula chawo.”Ajimuche!, Ogasiti 22, 1965.

•   Tukusapochela chikamuchisyo cha mtela ligongo lyakuti tukusawuwona umi kuŵa wakusosekwa mnope.—Masengo 17:28.

   “Ŵa Mboni sya Yehofa, akusajawula kwa ŵandu ŵakusamanyilila ya chipatala kuti akapochele chikamuchisyo chakwayana ni mtela. Jemanjaji akusawunonyela umi soni akusatenda yiliyose yampaka akombole kuti atame ni umi kwa ndaŵi jelewu.”—Sanja ja Mlonda, Julayi 1, 1975.

   “Ŵa Mboni sya Yehofa akusaŵa ŵakoseka kupochela mtela soni chikamuchisyo chine cha ŵachipatala. Jemanjaji akusasaka kuti akole chilu chambone soni akole umi kwa ndaŵi jelewu. Mpela muyaŵelele ni Mklistu jwa yaka yandanda Luka, ŵa Mboni sya Yehofa ŵane ali madokotala. . . . Ŵa Mboni sya Yehofa akusayamichila masengo gakusakamula ŵandu ŵakusapeleka chikamuchisyo cha chipatala. Jemanjaji akusayamichilasoni naga ŵachipatalaŵa ŵakamuchisye pakwaposya ulwele wawo.”—Sanja ja Mlonda, Febuluwale 1, 2011.