Ŵa Mboni sya Yehofa akusalalichila Ngani Syambone kwa ŵandu wosope ligongo lyakuti akusamnonyela mnope Yehofa soni ŵandu. Jemanjaji akusiŵalalichilasoni ŵandu ŵele pandaŵi jine ŵakanile kwalalichila. (Mateyu 22:37-39) Kumnonyela Mlungu kukusatutendekasya kuti tupikanileje lilamusi lyaŵapeleche Mwanache jwakwe lyakuti ‘tutendele umboni mwakwanila.’ (Masengo 10:42; 1 Yohane 5:3) Kuti tukombole kutenda yeleyi, tukusitwalalichila ŵandu mwakuwilisyawilisya mpela mwaŵatendelaga ŵakulochesya ŵa Mlungu kalako. (Yelemiya 25:4) Ligongo lyakuti tukusanonyela ŵandu wosope, tukusatenda yakomboleka kuti twasalile “ngani syambone . . . . syakwamba ya Uchimwene” syasili syakulupusya umi. Tukusatenda yeleyi atamose kwa ŵandu ŵele pandanda nganasakaga kuti twalalichile.—Mateyu 24:14.

 Ndaŵi syejinji ŵandu ŵele pandanda nganasakaga kwalalichila, patuwujilekosoni akusatanda kupikanila ngani syambone. Yeleyi yikusatendekwa pamagongo gatatu aga:

•   Ŵandu akusasama.

•   Ŵandu ŵane panyumbapo akusaŵa kuti akusaka kupikana utenga wetu.

•   Ŵandu akusachenga. Jemanjaji mpaka ‘amanyilile kuti akusosekwa Mlungu kuti ŵalongoleleje’ ligongo lya yindu yayikutendekwa pachilambopa kapena yakusimana nayo paumi wawo. Yeleyi mpaka yatendekasye kusaka kumanyilila yajikusasala Baibulo. (Mateyu 5:3) Mpela mwayaŵelele ni ndumetume Paulo, ŵandu ŵele pandanda ŵaliji ŵakusisya mnope mpaka achenje mitima jawo.—1 Timoteyo 1:13.

 Atamose yili myoyo, ngatukusitwakanganichisya ŵandu kuti apikanileje utenga wetu. (1 Petulo 3:15) Tukusamanyilila kuti mundu jwalijose akusasosekwa kusagula jika yindu yakusosekwa kuyikulupilila.—Detulonomo 30:19, 20.