Pa Disemba 15, 2020, Komiti ja UN jakulola ya ufulu wa ŵandu japeleche chigamulo chakwanonyela ŵa Mboni sya Yehofa ŵa ku Azerbaijan. Magamboga galiji gapasikati pa Rahima Huseynova ni chilambo cha Azerbaijan. Nambosoni Saladdin Mammadov, Rashad Niftaliyev soni Sadagat Abbasova ni chilambo cha Azerbaijan. Pamagambo gosopega, Komitiji japeleche chigamulo chakuti, chilambo cha Azerbaijan chakasile ufulu wa abale ni alongo. Mwamti ŵasasile kuti alinganyesoni malamusi gawo ni chakulinga chakuti yeleyi yikasatendekwasoni msogolomu.

Magambo gapasikati pa Rahima Huseynova ni chilambo cha Azerbaijan gatandite pa Disemba 2014. Ŵapolisi ŵamŵisile Mlongo Rahima Huseynova m’nyumba ja ukayidi ligongo lyakuti ŵalalichilaga ŵandu ŵane yakwamba yindu yakusakulupilila. Kaneko luŵala lwa magambolu lwalamwile kuti mlongoju apeleche mbiya syakwana 1,500 Manats sya ku Azerbaijan (mbiya syelesi sili syakulandana ni madola gakwana 882 ga kwa America.) Ŵatesile yeleyi ligongo lyakuti pandaŵijo, dini ja Mboni sya Yehofa ŵaliji mkanaŵe kujijitichisya ku Baku. * Mlongo Rahima Huseynova paŵatesile apilo magambo gakwe ku Baku, luŵalalu lwasasile kuti ngaluchenga yilwalwamwileyo. Kaneko Mlongo Huseynova jwaganisisye yakuti magamboga agajawusye ku luŵala lwekulungwa lwa yilambo yine.

Magamboga gali gayiche ku Komiti ja UN jakulola ya ufulu ŵandu, komitiji jalamwile kuti chilambo cha Azerbaijan chakasile lilamusi nambala 18(1) lyele yilambo yakamulene kuti yikuyeje pangani sya ufulu wa ŵandu. Konjechesya pelepa jalamwile kuti chilambo cha Azerbaijan chimpe mbiya mlongoju. Pakulamula magamboga, komitiji jasasile yindu yine yayaliji yakusangalalasya. Jatite, “chilambo cha Azerbaijan chikusosekwa kulinganyasoni malamusi gawo soni kuchenga yitendo yawo mwakamulana ni lilamusi nambala 18 lya ICCPR, kuti yeleyi yikasatendekwasoni msogolo.”

Magambo gapasikati pa Saladdin Mammadov, Rashad Niftaliyev soni Sadagat Abbasova ni chilambo cha Azerbaijan galiji gakwayana ni gulu ja abale ni alongo ŵa ku Ganja ŵaŵasongene panyumba ja M’bale Saladdin Mammadov ni chakulinga chakuti alijiganyeje Baibulo. Pa Okotoba 2014, ŵapolisi ŵayiche pamalo gaŵasongene abale ŵala ni kwasumula ma Baibulo ni yindu yine. M’bale Mammadov, Rashad Niftaliyev, soni Mlongo Sadagat Abbasova ŵataŵile ni kwajigalila kupolisi kuŵatemi kwa maawala gakupunda 6. Panyuma pamasiku gaŵili ŵajawisye ku luŵala lwa magambo lwa Nizami mu msinda wa Ganja kuti akapikanile magambo gawo. Luŵalalu lwalamwile kuti abaleŵa, ŵalemwisye ligongo lyakuti nganalembesya mpela kagulu ka dini mu msinda wa Ganja. Lwalamwilesoni kuti m’bale jwalijose apeleche mbiya syakwana 2,000 Manats sya ku Azerbaijan (mbiya syelesi sili syakulandana ni madola gakwana 1,176 ga kwa America.) Abale ni mlongo ŵajawisye nganiji ku luŵala lwa apilo ku Ganja. Nambo chakutesya chanasa chaliji chakuti luŵala lwa apilo lwakamulene ni chagamulo chandanda. Kaneko abaleŵa ŵatesilesoni apilo magamboga ku Komiti UN jakulola ya ufulu wa ŵandu.

Komitiji japatile yakuti chilambo cha Azerbaijan chakasile malamusi gakulekanganalekangana gaŵakamulene pa msongano wakulola ya ufulu wa ŵandu. Mwamti jalamwile kuti ŵa Mboni ŵatatuŵa, akusosekwa kwapa mbiya. Komiti ja apilo jasasile kuti, “Luŵala lwa magambo lwa kwa Azerbaijan nganilisala mwakupikanika chenene kusosekwa kwakuti abaleŵa akalembesye kagulu kawo ku boma mkanatande kusongana.” Yeleyi yikulosya kuti abale ni alongo ŵetu ku Azerbaijan, mpaka asonganeje pampepe kuti amlambileje Mlungu mwamti ngakusosekwa kulembesyaga ku boma.

Mwakulandana ni chigamulo chaŵapeleche pa magambo ga Rahima Huseynova, komitiji jasasile kuti chilambo cha Azerbaijan chikusosekwa kulinganyasoni “malamusi gawo soni kuchenga yitendo yawo” mwakamulana ni malamusi gaŵakamulene pa Msongano Wakulola ya Ufulu wa Ŵandu wa ICCPR.

Tukumyamichila mnope Yehofa ligongo lyakuti yindu ku Azerbaijan yitandite kwenda chenene. Yikuwoneka kuti yaka ya pachangakaŵapa, ŵa boma nganasokonasya ufulu wakulambila wa abale ŵetu. Tukukulupilila kuti yigamulo yiŵili yeleyi, chikamuchisye kuti masengo getu gakulalichila gaŵe gakwitichika mchilambo cha Azerbaijan.—Afilipi 1:7.