Pa Nofemba 17, 2020, luŵala lwa magambo lwaluli mu Chigawo cha Kamchatka lwakanile kuchenga yalwalamwile luŵala lwandanda pa magambo ga M’bale Konstantin Bazhenov ni ŵamkwakwe ŵali Snezhana soni Mlongo Vera Zolotova. Yeleyi yikulosya kuti jemanjaji chakatame mu ukayidi kwa yaka yiŵili. Nambo ngaŵa kuti chajawule ku ukayidiku pandaŵi ajino. Jemanjaji akupitilisya kuŵa ŵakulimba mtima soni ŵakusangalala.

Luŵala lwandanda luli lupikanile magambo ga M’bale Bazhenov pa Sepetemba 25, 2020, M’baleju jwaŵechete mwakulimba mtima kwa jwakulamula magambo kuti ngakutenda woga kumlamula kuti ali jwakulemwa. Jwalakwe jwaŵechetesoni kuti yakumtendelayi yikukwanilisya maloŵe gagali pa Yohane 15:20, pele Yesu jwaŵechete kuti ŵakumkuya ŵakwe chachilagasidwaga.

M’bale Bazhenov ŵalusalile luŵala lwa magambo kuti Yesu pa Mateyu 28:19, 20, ŵasalile ŵakumkuya ŵakwe kuti alalichileje. Kaneko M’baleju jwawusisye jemanjaji kuti, “Ana ŵani akwete machili gakulekasya yaŵalamwile Yesuyi?” Jwalakwe jwapitilisye kuti, “Nganimba ngundile kuti ngambe kutama jii. . . . Chimbitilisyepe kwasalila ŵane ngani syambone syakutyochela m’Baibulo.”