Pa Febuluwale 2, 2021, * luŵala lwa magambo lwa mu tawuni ja Birobidzhan luchipeleka chigamulo pa magambo ga M’bale Artur Lokhvitskiy. M’baleju chakatame mu ukayidi kwa yaka mcheche.

Artur Lokhvitskiy

• Chaka chakupagwa: 1986 (Belgorodskoye, Jewish Autonomous Region)

• Mbili jakwe: Babagwe ŵawile Artur ali akwete yaka 7. Jwalakwe jwalijiganyisye masengo ga ya magesi mnopemnope yakwana ni moto. Ŵandu ŵampaga mboto ligongo jwakamulaga masengo mwakulimbichila

  M’bale Artur pajwaliji mwanache, mamagwe ŵamjiganyisye kuti amnonyeleje Yehofa. Jwalakwe jwabatisidwe mu 1998 ni kuŵa Jwamboni sya Yehofa. Pandaŵiji jwakwete yaka 11. Mu 2018, jwalombele ŵakongwe, lina lwakwe Anna. Jemanjaji ŵajawulaga kukusangalala ku malo kwakusangalalila

Mu Meyi 2018, pali pagambile kumala miyesi jitatu chilombanile Artur ni Anna, achakulungwakulungwa ŵa boma ŵayiche ku nyumba ja liŵasali kukuwungunya. Kuwungunyaku ŵakupele lina lyakuti “Lisiku Lyakulamula.” Asilikali wa boma 150 ŵawungunyisye nyumba 9 sya Ŵamboni sya Yehofa. Nombe nyumba ja mamagwe Artur ŵajiwungunyisyesoni. Pa Julayi 31, 2019, ŵapolisi ŵa (FSB) ŵa mu tawuni ja Birobidzhan ŵamsalile m’bale Artur kuti ali jwakulemwa ligongo jwakamulaga masengo gakogoya mnope. Nombe nawo Anna ni Irina, ŵasalilesoni kuti ali ŵakulemwa.

Liŵasa lya Artur likulaga kuti lipate mbiya ligongo ŵalume ni ŵakongwe, wosope ali pa magambo. Achakulungwakulungwa ŵa boma awugele matala gosope gampaka Artur ajigale mbiya syakwe ku banki. Kupwatika pelepa, abwana ŵakwe ŵamsalile kuti chamtyosye masengo.

Kuwungunya magambo ga liŵasali kukutendekwa kaŵilikaŵili. Yeleyi yikutendekasya kuti umi wa liŵasali uŵe wakusawusya. Artur akulondesya kuti, “Katende ka yindu pa umi wetu kachenjile mnope. Kukosechela yakutendekwa ya wiki jelejo (atamose yakutendekwa ya lisiku lililyosye) kukuŵa kwakusawusya. Ŵapolisi akusatuŵilanga kuti tujawule ku polisi ndaŵi jilijose jajanonyele jemanjajo. Yeleyi yitendekasisye kuti tugambeje kuchenga mapulani getu ga lisiku lililyosye.”

Artur ni Anna akuyamichila yakutenda ŵakutumichila achimjawo pakwakamuchisya. Artur akulondesya kuti, “Abale ni alongo akutulimbikasya kwabasi soni akutukamuchisya kuti tuwusimane mtima ni kumŵandichila Yehofa. . . . Tuli ŵakusangalala mnope kola abale ni alongo soni kola upile wakulichenjela lina lya Yehofa pandaŵi jeleji. Yisyene, Yehofa jwangaleka ŵakutumichila ŵakwe.”

M’bale Lokhvitskiys apatile machili soni akombwele kulimba mtima ligongo lya lipopelo soni kulijiganya Baibulo. Nambope kutenda yeleyi kuli kwakusawusya. Panyuma pa “Lisiku Lyakulamula” lila, Artur akukumbuchila mwayaŵelele yindu pandaŵijo. Jwakwe akuti, “Nganitukola Baibulo kapena buku jilijose.” Pandanda, yeleyi yamtengwisye Artur. Jwaganisyaga yachatende jwalakwe ni liŵasa lyakwe kuti lipitilisye kulijiganya Baibulo. Nambo kaneko jwakumbuchile mfundo jine jakwe. Mfundo jakwe jaliji jakuti, “Asilikali ŵa boma ŵala [FSB] nganasumula upile wa lipopelo. Kutandila pelepo, twatandite kupopela. Yisyene, lipopelo ni lyalyatukamuchisye mnope.”

Yehofa jwajanjile lipopelo lyawo mwakwapa chakulya chausimu chaŵasosechelaga kuti atandilesoni kutenda yindu yausimu. Artur akusala kuti, “Twatesile yampaka tukombole kuti tutendeje lilemba lya lisiku, tukosecheleje misongano, soni tuŵalanjeje Baibulo. Yeleyi yitukamuchisye kuti tuŵe ŵakamulana soni tum’weni Mlungu ali mkutukamuchisya paumi wetu kuti tukawujila panyuma.”

Chindu chine chachakamuchisye kuli kuganichisya yindu yachachitenda Mlungu kusogolo. Artur akuŵecheta kuti, “Twatandite kuganichisya ya chembecheyo cha kusogolo. Twaliwanichisyaga tuli m’chilambo chasambano.” Jwalakwe akonjechesyasoni kuti, “Tukusaka kuti chitukamule nawo masengo gakuswejesya chilambo soni masengo gakutaŵa. Yeleyi yikusalimbikasya chikulupi chetu.”

Pakwembecheya kuti lisiku lyelelyo liyiche, ndaŵi syosope Artur ni Anna akusaganichisyaga yalikusasala lilemba lya Ahebeli 13:6. Lilembali likusati, “Ambuje ni ŵakungamuchisya ŵangu, ngasindenda woga. Ana mundu mpaka andendele une chichi?” Artur akusala kuti, “Yili yisyene kuti achakulungwa ŵa boma mpaka atusumule ufulu wetu, mpaka atulekasye kuwonegana ni abale ni alongo, soni atamose kutulekasya une ni ŵamkwangu kuti tukawoneganaga. Nambo nganaŵa atusumwile yindu yakusosekwa mnope, mpela unasi wetu ni Yehofa, lipopelo soni chembecheyo chetu cha msogolo. Tukusaka tukaliŵalilaga yeleyi.”