Pa Ogasiti 2022, papelechedwe chimanyisyo chakuti ŵandu mpaka atandilesoni kulalichila nyumba ni nyumba m’madela gele yaliji yakomboleka kutenda myoyo ku Ukraine. Abale ni alongoŵa ŵagatandite masengoga mwakusachilila. Jemanjaji ayiweni kuti ŵandu akupikanila utenga wa m’Baibulo. Mundu jwine juŵakundile kuti alijiganyeje Baibulo jwatite: “Panyuma pakusimana ni yindu yakutesya woga soni kulaga ligongo lya ngondo, ngangukayichila kuti Mlungupe ni jwampaka amasye yakusawusya ya ŵandu.” Yakutendekwa yakuyichisyayi yili yindu yasimene nayo abale ni alongo mu utumiki.

M’bale Ruslan jwa Mumpingo wa Lanivtsi jwatendaga woga kuti atandilesoni kulalichila nyumba ni nyumba. Jwalakweju ni ŵamkwakwe ŵapopesile kwa Yehofa kuti ŵakamuchisye kuŵa ŵakulimba mtima soni kuti ŵapate ŵachidwi kuti akole chembecheyo chambone. Liŵasalitu lyasimonjile kuti paŵagambile kulalichila kwa maawala gaŵili gandanda, ŵandu ŵakwana 8 ŵajitichisye kuti alijiganyeje Baibulo.

Nombe najo mlongo Olha jwa Mumpingo wa Kremenets paŵaliji muutumiki, mundu jwine ni achimjakwe ŵawutuchile jemanjaji niŵawusisye naga ŵalalichilaga Maloŵe ga Mlungu. Kaneko jwalakwe jwatite: “Ngusasimana ni yakusawusya ligongo lyakwemba sona soni kumwa ukana. Ngumanyilila kuti pamkaŵapa Mlungu chachinjimba magambo. Myoyo ngusaka kuti pandaŵijo, chimbe ndili ndesile kutenda yeleyi.” Abale ŵa mudelaji ŵatesile dongosolo jakuti munduju alijiganyeje Baibulo.

Paŵalalichilaga musi wine yalumo ni kagulu kakwe ka utumiki, m’bale Vasyl jwa Mumpingo wa Lviv-Riasne-Skhidnyi jwakopochele panyumba ja jwamkongwe jwine juŵamlalichile yaka yipiteyo. Jwalakwe jwakumbuchile kuti jwamkongweju jwakanaga ŵa Mboni sya Yehofa ali atumbile. M’baleju jwapoposisye petanga soni jwaŵendile kuti alijiganyeje Baibulo ni jwamkongweju. Jwalakwe jwasimonjile mnope, kummwona jwamkongwe jula ali akopweche mnyumba ni kwasalilaga kuti akusaka kugapikanichisya Malemba Geswela. Jwamkongweju jwakundile kulijiganya Baibulo, mwamti m’baleju jwatesile yakuti mundu jwine amjiganyeje Baibulo.

Serhii jwa Mumpingo wa Illintsi, jwabatisidwe m’chaka cha 2021. Jwalakwe nganalalichilejepo nyumba ni nyumba. Nambo ali apikene yakutandilasoni kulalichilaku jwatendaga woga. Myoyo jwatandite kosechela. Serhii jwatite: “Kwandaŵi syejinji mbele ndili mkulolela mafidiyo ga yisyasyo ya kalalichile. Kaneko, nayiweni kuti nasosekwaga kuŵa jwakulimba mtima kuti lalichileje.” Jwalakwe akusala mwakusangalala kuti woga waŵakwete pandanda wamasile mwamti apano akusangalala ligongo lyakuti akwete upile wakwalalichila ŵane ngani syambone.

Yakulandanayi ni yayamtendechele mlongo Nikol jwa Mumpingo wa Rozdil jwaŵaŵele jwakulalichila jwangabatisidwa m’mwesi wa Ogasiti 2022. Jwalakwe jwatite: “Nalagasikaga mnope nganisyo soni natendaga woga kuti ndande kulalichila pameso ni pameso. Nambo panyuma pakuti natandite kulalichila pameso ni pameso, nayiweni kuti yaliji yakusangalasya kukambilana ni ŵandu yakwamba Yehofa.”

Pakwikanaga pa Nofemba 11, 2022, twaliji tuli tupochele yiŵalanjilo yakuyichisyayi kutyochela ku Ukraine. Lipotili lili lyakudalilika soni lityochele kwa abale ŵa ku Ukraine. Nambope yiŵalanjiloyi komboleka kuŵa yakwela. Tukuŵecheta yeleyi ligongo lyakuti yikuŵaga yakusawusya kuŵechetana ni abale ŵa m’madela gosope ga m’chilambochi.

• Abale ni alongo 46 awile

• Abale ni alongo 97 ŵawulele

• Abale ni alongo 12,569 atilile mmadela gane ga m’chilambochi

• Nyumba syakwana 590 sigumulidwe

• Nyumba syakwana 645 sijonasiche mnope

• Nyumba syakwana 1,722 sijonasiche panandi

• Nyumba sya Uchimwene syakwana 6 sigumulidwe

• Nyumba sya Uchimwene syakwana 19 sijonasiche mnope

• Nyumba sya Uchimwene syakwana 63 sijonasiche panandi

• Makomiti 27 gakamuchisya pasitendekwe ngosi gakukamuchisya ŵandu ku Ukraine

• Abale ŵakwana 53,948 apatile chikamuchisyochi kutyochela ku makomitiga, mwamti abaleŵa apatile malo gambone gakutama

• Ŵakulalichila ŵakwana 25,983 atilile m’yilambo yine, mwamti ŵakulupilila achimjawo akwakamuchisya