Elo. Baibulo mpaka jitukamuchisye naga tukulijimba magambo pa yindu yatutesile. (Salimo 32:1-5) Naga tutesile chakulemwa ni kulitendela chanasa yisyesyene, Mlungu chachitukululuchila soni chachitukamuchisya kuti tukalijimbaga magambo. (Salimo 86:5) Baibulo jikusasala kuti ndaŵi sine kulijimba magambo, mpaka kuŵe kwakamuchisya. Mpaka kututendekasye kuti tulinganye yatulemwisyeyo soni kulingalinga kuti tukasatendasoni kusogolo. (Salimo 51:17; Misyungu 14:9) Baibulo jikusatusalila kuti ngatukusosekwa kulijimbaga magambo mwakupundanyaga nikuliwonaga kuti nganitukola sogolo jambone kapena kuliwonaga kuti tuli ŵangasosekwa pameso pa Mlungu. Naga tukusaliwona mwamti myiyi, mpaka yitutendekasye kuti ‘tujase mtima.’—2 Akolinto 2:7, Contemporary English Version.

•  Ana ni yindu yapi yampaka yitendekasye kuti tulijimbeje magambo?

•  Ana mpaka ndende yamtuli kuti ngalijimbaga magambo?

•  Malemba gakusala ya kulijimba magambo soni yakusatenda Mlungu pakululuchila

 Pana magongo gejinji gampaka gamtendekasye mundu kulijimba magambo. Ndaŵi sine mpaka tulijimbeje magambo ligongo lyakuti tutesile yindu yakumtumbilikasya mjetu jwatukusamnonyela kapena tulepele kutenda yindu yatwasosekwakaga kuyitenda. Nambo ndaŵi sine mpaka tulijimbeje magambo pa yindu yakuti ngatukusosekwa kulijimba magambo. Mwachisyasyo, ndaŵi sine mpaka tuliŵichileje achimsyewe mfundo kapena malamusi gakusawusya kugakuya. Myoyo patulepele kukuya mfundosyo, mpaka tugambeje kulijimba magambo. Ni ligongo lyakwe Baibulo jikusatulimbikasya kuti tukusosekwa kuliwonaga mwakuŵajilwa.​—Jwakulalichila 7:16.

 Myoyo mmalo mwakutamila kulijimba magambo, akusosekwa kutenda yampaka akombole kuti alinganye yalemwisyeyo. Ana mpaka atende yeleyi mwamtuli?

•   Ajitichisyeje yalemwisye. Akusosekwa kumŵenda Yehofa a Mlungu kuti ŵakululuchile kupitila mwipopelo. (Salimo 38:18; Luka 11:4) Yehofa chachipikana kuŵenda kwawo naga akulitendela chanasa yisyesyene soni galawuka mtima ni kutenda yakomboleka kuti akasawilisyasoni yakulemwechekayo. (2 Mbili 33:13; Salimo 34:18) Yehofa akusalola ya mumtima mwa mundu yele mundu nganaŵa ayiweni. Mlungu akusatuwona patukulingalinga kuti tuleche kutenda yakusakala. Pakuŵa jwalakwe ali “jwakulupichika ni jwakulungama, tachitukululuchila ulemwa wetuwo.”—1 Yohane 1:9; Misyungu 28:13.

   Kusala yisyene naga amlemwechesye mundu jwine, akusasosekwa kwitichisya soni kumpepesya. Nambo kutenda yeleyi mpaka kuŵe kwakusawusya. Pakusasosekwa kulimba mtima soni kulinandiya. Nambope atamose yili myoyo, kupepesya kusyesyene kukusakamuchisya m’matala gaŵili. Chandanda, kukusakamuchisya kuti mundu aŵe jwagopoka mpela kuti atusile katundu jwawusito, soni chaŵili, akusaŵagasoni pa mtendele ni mundujo.—Mateyu 3:8; 5:23, 24.

•   Aganichisyeje ya malemba gane gagakusasala mwakusatendela Mlungu pakulosya chanasa. Mwachisyasyo aganichisye yayili pa 1 Yohane 3:19, 20 [Malangano ga Sambano 1992 Edition]. Pa lilembali, Baibulo jikusasala kuti, mtima wetu mpaka ‘utusisye.’ Yeleyi mpaka yitendekasye kuti tuliwoneje mwakulemwecheka soni tulipikaneje kuti Mlungu ngaŵa mkutunonyela. Nambope lilembali lisasilesoni kuti Mlungu ali “jwakulungwa kujipunda mitima jetu.” Mwamtuli? Jwalakwe akusamanyilila chilichose chakwamba m’weji soni akusamanyilila mwatukupikanila soni yakulepela yetu. Akusamanyililasoni kuti tuli ŵangali umlama. Yayikugopolela kuti ndaŵi syejinji tukusalemwesyaga. b (Salimo 51:5) Myoyo jwalakwe akusiŵakululuchila ŵandu ŵajitichisye yakulemwa yawo.—Salimo 32:5.

•  Akagambaga ganichisya yakulemwa yaŵatesile kalakala. M’Baibulo mwana yisyasyo ya achalume soni achakongwe ŵele ŵatesile yindu yakusakala nambo kaneko ŵachenjile umi wawo. Jumo mwa ŵanduŵa ali Saulo jwa ku Taliso jwele kaneko jwaliji ndumetume Paulo. Jwalakwe jwaliji Mfalisi, soni jwalagasyaga ŵakumkuya ŵa Yesu. (Masengo 8:3; 9:1, 2, 11) Nambo ali amanyilile kuti akusisyana ni Mlungu soni Mesiya kapena Klistu, jwalakwe jwajitichisye yakulemwa yakwe ni kuchenga yaŵatendaga kuti aŵe Mklistu chambone. Atamose kuti Paulo jwamanyililaga yindu yakusakala yaŵatendaga munyuma, nambope nganakunda kuti agambeje kuyiganichisya yeleyo. Jwalakwe jwamanyililaga kuti Mlungu ali jwachanasa. Yeleyi yamtendekasisye kuti alalichileje mwakulipeleka soni atende yiliyose yakakombwele kuti akajasa upile wa chembecheyo chakwe cha umi wangamala.—Afilipi 3:13, 14.

 Yelemiya 31:34, “Tinjakululuchila ulemwa wawo, mwakuti ngisinawukumbuchila soni.”

 Ngopolelo jakwe: Mlungu patukululuchile, jwalakwe jwangatukumbusyasoni yakulemwa yetuyo. Chanasa chakwe chili chisyesyene.