Ana Maliya Magadala Ŵaliji Ŵani?
Kwanga kwakutyochela m’Baibulo
Maliya Magadala jwaliji jwakumkuya jwakulupichika jwa Yesu Klistu. Lina lyakuti Magadala lyatyochele ku msinda ŵa Magadala (Komboleka wakolanjidwagasoni kuti Magadan). Msindawu waliji chiŵandika Nyasa ja Galileya. Komboleka kuti Maliya pakwete patemi kweleku.
Maliya Magadala jwaliji jumo mwa achakongwe ŵele ŵajendaga ni Yesu yalumo ni ŵakulijiganya ŵakwe m’maulendo gawo gakulalichila. Jwalakwe jwakamuchisyaga jemanjaji mwakwapa yakusosechela ya paumi. (Luka 8:1-3) Maliya jwamweni ni meso gakwe Yesu ali m’kuwulajidwa soni jwaliji jumo mwa ŵandu ŵaŵam’weni Yesu ali ajimwiche ku ŵawe.—Maliko 15:40; Yohane 20:11-18.
Ana Maliya Magadala jwaliji liwule?
Baibulo jangasalaga kuti Maliya Magadala jwaliji liwule. Yajikusasala pakwamba jwalakwe yili yakuti Yesu jwakopwesye misimu jakusakala jakwana 7 mwa jwalakwe.—Luka 8:2.
Sano yakuti jwalakwe jwaliji liwule yatyochele papi? Pali pamasile yaka yejinji chiwile Maliya Magadala, ŵandu ŵasalaga Maliya Magadala jwaliji jwamkongwe ajula jwanganamkolanga lina jula. (jwele komboleka kuti jwaliji liwule) Jwamkongweju ni juŵajojesye sajo sya Yesu ni misosi soni nikusipututaga pakamulichisya masengo umbo syakwe. (Luka 7:36-38) Myoyo pangali palipose m’Baibulo papakusasala yakuti jwalakwe jwaliji liwule.
Ana Maliya Magadala jwaliji “jumo mwa ŵandumetume”?
Iyayi. Ŵa dini ja Katolika akusasala kuti “Maliya Magadala” jwaliji “jumo mwa ŵandumetume.” Jemanjaji akusasala yeleyi ligongo lyakuti ni juŵaliji jwandanda kukusala yakwimuka kwa Yesu kwa ŵandumetume ŵakwe. (Yohane 20:18) Atamose kuti yeleyi yili myoyo, nambo ngayikumtendekasya jwalakwe kuŵa jwandumetume. Soni Baibulo jangasalaga kuti jwalakwe jwaliji jwandumetume.—Luka 6:12-16.
Baibulo jamasile kulembedwa chakumbesi kwa yaka 100 yandanda ya mundaŵi jetu jino. Kaneko pali pamasile yaka yejinji achimlongola ŵa dini mwajika jawo ŵatandite kumwona Maliya Magadala kuwa jwapenani mnope. Yindu yayalembedwe mu yaka 100 yandanda mpaka mu yaka ya m’ma 300 yanganiyiŵa mbali ja utenga wa m’Baibulo, yikusasala kuti ŵakulijiganya ŵa Yesu ŵamtendelaga jelasi Maliya Magadala. Nambo ngani syelesi ngaŵa sisyesyene soni nganisiŵa sya m’Malemba.
Ana Maliya Magadala ŵaliji ŵamkwakwe Yesu?
Iyayi. Kusala yisyene Baibulo jikusasala kuti Yesu nganalombela. a
a Alole ngani ja Chichewa jakuti, “Kodi Yesu Anakwatira? Kodi Anali ndi Abale Ake?”
You May Also Like
YAJIKUSAJIGANYA BAIBULO
Atande Kulijiganya Baibulo
Atande kulijiganya Baibulo mwakambilana soni mwalulele ni mundu jwine.