Manang Jakob ni kemus ni yigoo Jehovah e ir e en ni ngan liyor ngak ni yugu aram rogon ni ngiyal’ nem e dawor ni fal’eg ba motochiyel ni be yog ndab ni tayfan e liyos. (Ex 20:3-5) Ere, tomuren ni yog Jehovah ngak Jakob ni nge sul nga Bethel, ma aram me yog Jakob ngak chon e tabinaw rok ni ngar n’aged fapi liyos ni bay rorad. Ere n’ag Jakob fapi liyos nib muun ngay e talbuch u tel fapi girdi’ nsana un fanay ni bonod. (Ge 35:1-4) Dariy e maruwar riy ni ke felfelan’ Jehovah ni bochan e re n’em ni rin’ Jakob.

Uw rogon nrayog ni ngad daged e ngiyal’ ney ni yigoo Jehovah e ir e gad be liyor ngak? Reb e ban’en nth’abi ga’ fan e ngad paloggad u boch ban’en ni bay rogon ko pi got ni googsur nge pig. Re n’ey e ba muun ngay ni ngad chuweged e pi n’en ni bay rodad ni bay rogon ko pig, ma gad fal’eg i yaliy e tin ni gad ma chuweg e chalban rodad ngay. Rayog ni ngam fithem ni nge lungum: ‘Gu baadag ni gu ma beeg e babyor ara gu ma yaliy e kachido ni bay yaan e vampire riy, ara zombies, ara yaan e kan, fa? Pi n’ey e be dag ni pig, ara ngan bucheg waathan be’, ara ngan pig ngak be’ e kemus ni bogi ban’en ni yima rin’ ni ngan felfelan’ ngay ma dabi yib wenegan, fa?’ Thingar da paloggad ko pi n’en ni ma fanenikay Jehovah.​—Ps 97:10.

NGAN YALIY FARE VIDEO DRAMATIZATION NI KENGGIN E “OPPOSE THE DEVIL,” NGEMU’ MIN PI’ E FULWEG KO PI DEER NI BAARAY:

• Mang reb e magawon ni sum e lan e yafos rok Palesa ni be’ ni ma un ko fol Bible?

• Faanra bay e magawon rom ko ngongolen e pig ara be’ ni ga manang ara ga be fil e Bible ngak e bay e magawon rok ko re n’ey, ma mang fan nib fel’ ni ngam ning e ayuw ngak e piin piilal?

• Mang boch ban’en thingar da n’aged ni faanra gad baadag ni nge ayuwegdad Jehovah?

• Mang e dugliy Palesa ni nge rin’ nib papey?

• Mang boch e kanawo’ nrayog ni ngam siyeg boch ban’en ni bay rogon nga ngongolen e moonyan’ ko gin ni ga be par riy?