“Mu gguy tagil’ be’ u rom u tharmiy ni bay be’ ni ke par ngay. Ma be gal ramaen owchen ni bod e malang nib tolang puluwon ni jasper nge karnelian; ma bay ba ragim ni ke liyeg tagil’ faanem ni bod reen ba malang ni emerald.”​—Revelation 4:2, 3.

“Ma ramaen ni be gal e gubin mit e reen ni bay u fithik’ e ragim ni ba’ riy. Aram rogon ramaen Somol ni be galgal ni m’ug ngog.”​—Ezekiel 1:27, 28.

Pi n’ey ni guy apostal John nge Ezekiel ni profet u nap’an nni pilyeg e changar rorow e be dag rogon feni fel’ ramaen Jehovah ni be galgal ni ir e En Th’abi Tolang. Kan taarebrogonnag nga boch e malang nrib fel’ yaan, nge ragim, nge tagil’ ba pilung nrib fel’ yaan. Ere, pi n’ey e be fil ngodad ni gin ni ma par Jehovah riy e rib fel’ yaan ma bay e felfelan’ nge gapas riy.

Pi thin ney ni be weliy murung’agen Jehovah e ba puluw ko thin ni yoloy fare psalmist ni gaar: “I Somol e ba sorok, ere thingar ni pining e sorok ngak; thingari ga’ madgun u wun’uy ngak urngin e pi kan. Fapi kan rok urngin yugu boch e nam e ke mus ni bogi liyos ni yibe meybil ngay, machane Somol e ir e sunumeg lan e lang ni ga’ngin. Flaab nge feni sorok e ke par nga fithik’, feni sorok nge flaab rok e bay u tempel rok.”​—Psalm 96:4-6.

Yugu aram rogon ni Jehovah e ir e En Th’abi Tolang, machane be piningdad ni ngad chugurgad ngak u daken e meybil maku be micheg nra motoyil ngodad. (Psalm 65:2) Gad ba t’uf rok Got ma ri ma lemnag rarogodad, ere aram fan ni yoloy apostal John ni gaar: “Got e t’ufeg.”​—1 John 4:16.

“[Stephen ni ir reb i gachalpen Jesus] nib sug ko fare Kan ni Thothup [“gelngin Got nib thothup,” NW], e sap nga lang me guy e flaab rok Got, nge Jesus nib sak’iy u ba’ ni mat’aw rok Got. Me gaar, ‘Mu sapgad! Kug guy e tharmiy ni ke mab ma kug guy faanem ni Fak e Girdi’ nib sak’iy u ba’ ni mat’aw rok Got!’”​—Acts 7:55, 56.

De n’uw nap’an u m’on nni pilyeg e changar rok Stephen nge guy e re n’ey, ma aram me yog e pi tayugang’ rok e pi Jew ni ngan li’ Jesus ngem’. Ku aram e piin ni i yog Stephen e pi thin ney ngorad. N’en ni guy Stephen u nap’an nni pilyeg e changar rok e be micheg ni kan faseg Jesus ko yam’ ma kan pi’ reb e liw nib tolang ngak. I yoloy apostal Paul murung’agen ni gaar: “[Ke] faseg [Jehovah] Kristus ko yam’, me fek nge tay nga ba’ ni mat’aw rok u lan e tharmiy. I Kristus e be gagiyeg u rom ni ir e ba’ nga daken urngin e piin ni be gagiyeg u tharmiy, nge piin ni yad be tay murung’agen ban’en, nge piin ni ba ga’ lungurad, nge pi pilung; i ir e ba tolang ngak urngin e pi liw ni bay gelngirad ko biney e tamilang nge bin ni bay yib.”​—Efesus 1:20, 21.

Thin nu Bible e gathi kemus ni be weliy murung’agen e liw rok Jesus nib tolang, ya ku be dag nri ma lemnag rarogon e girdi’ ni bod Jehovah. Nap’an ni immoy u fayleng ni be machib, ma i golnag e piin ni ke  yib e m’ar ngorad, miki faseg e yam’. Ma yam’ ni tay nib maligach e aram e n’en ni be dag nrib t’uf Got nge girdi’ rok. (Efesus 2:4, 5) Bochan ni ke par Jesus nga ba’ ni mat’aw rok Got, ma aram e dabki n’uw nap’an ma ra maruwel nga gelngin ni nge tow’athnag urngin e piin ni yad be fol.

“[I gag Daniel ni profet e] ku gu be changar, min tay e pi chiya ni nge yan i par e piin ni pilung ngay. Faanem ni kab kakrom i yib ni immoy e yan i par nga daken reb. . . . Ma pire’ ni pire’ i biyu’ e yad bay u rom ni ngar pigpiggad ngak, ma raay e million e kar bad ra sak’iygad nga p’eowchen.”​—Daniel 7:9, 10.

Nap’an nni pilyeg e changar rok Daniel ma gathi kemus ni taareb e engel ni guy, ya boor ni boor. Riyul’ ni yira ngat ko re n’ey! Pi engel e yad boch e kan ni yad ba llowan’ mab gel gelngirad. Boch i yad e serafim ma boch i yad e kerubim. Kub pag 250 yay ni ke weliy e Bible murung’agen e engel.

Pi engel e gathi yad e girdi’ ni ur pared u fayleng kakrom. Ya ba n’uw nap’an u m’on ni nge sunmiy Got e girdi’, ma aram me sunmiyrad. Ere, nap’an nni sunmiy e fayleng ma ur moyed ni yad be tolul u fithik’ e felfelan’.​—Job 38:4-7.

Reb e kanawo’ ni be pigpig e pi engel ni yad ba yul’yul’ ngak Got riy e ngiyal’ ney, e aram e yad be un ko fare maruwel nrib ga’ fan ni yibe rin’ u roy u fayleng ni aram e yibe machibnag fare thin nib fel’ ni murung’agen Gil’ilungun Got. (Matthew 24:14) Kan tamilangnag ngak apostal John rogon ni yad be un ko re maruwel ney u nap’an nni pilyeg e changar rok. I yoloy ni gaar: “Mu gguy yugu reb e engel ni be changeg nib tolang u fithik’ e nifeng, ni ba’ rok e thin ndabi math biid, ni Thin Nib Fel’ ni nge weliy ngak e girdi’ nu fayleng, ni urngin e pi nam, nge ganong nge thin nge gubin mit e girdi’.” (Revelation 14:6) Yugu aram rogon ndakir non e pi engel ngak e girdi’ ni bod rogon kakrom, machane ka yad be pow’iy e pi tamachib ko fare thin nib fel’ ni ngar pirieged e piin ni yad baadag ni ngar nanged e tin riyul’.

“Ma aram mi ni mahl u tharmiy! Me cham Mikael [Jesus Kristus] nge tirok e engel ngak fare dragon, me cham fare dragon nge tirok e engel ngorad; machane me meewar fare dragon, ma da ni pag fare dragon nge tirok e engel ni ngar pired u tharmiy. Mi nin’ fare dragon nri ba ga’ nga wuru’ e tharmiy! I ir fare porchoyog ni ke kakrom, ni kan tunguy fithingan ni Moonyan’, ara Satan, ni ir  faanem ni bannag e girdi’ nu fayleng ni polo’. Mi nin’ u lang nga daken e fayleng, nib muun urngin e pi engel rok ngak.”​—Revelation 12:7-9.

Immoy ba ngiyal’ ni dariy e gapas u tharmiy. Immoy reb e engel kakrom nri baadag ni nge liyor e girdi’ ngak, ma aram me chel nge togopuluw ngak Jehovah, ma aram fan ni ke mang Satan nre bugithin ney e be yip’ fan e “Tatogopuluw.” Munmun ma aram me un yugu boch e engel ngak mi yad mang e pi moonyan’. Ri yad ba kireb, ya kar togopuluwgad ngak Got ma kar bannaged yooren e girdi’ kar togopuluwgad ko motochiyel rok Jehovah.

Satan nge pi moonyan’ rok e ri yad ba kireb ma yad ma gafgownag e girdi’. Yad e toogor ko girdi’, maku yad e yad be k’aring yooren e gafgow u fayleng. Bod ni, li’ Satan e pi gamanman nge pi tapigpig rok Job. Me migid me n’igin ni nge yib e “yoko’” nge puth e naun ni immoy fa 10 i bitir rok Job u langgin ngar m’ad. Tomuren me gagiyegnag e “malad nge yib i for u downgin Job ni ga’ngin.”​—Job 1:7-19; 2:7.

Machane dabki n’uw nap’an ma yira chuweg Satan. Ka nap’an nnin’ u tharmiy ngaray nga fayleng ma manang “ndaki n’uw nap’an ni nge par.” (Revelation 12:12) Ba mudugil ni yira thang Satan, ma ireray e thin nib fel’!

“Ma aram mu gguy tagil’iy nge piin ni kar pired nga daken ni ka ni pi’ mat’awrad ni ngar pufthingad . . . . Ra fosgad mu ur pired rok Kristus ni kar manged pilung ma yad be gagiyeg ni reb e biyu’ e duw . . . . Ya yay ni migid e yam’ nra yib e dariy ban’en nra ki yog ni nge rin’ ngorad; ya bay ra manged pi prist rok Got nge Kristus, ma bay ra uned ngak ko gagiyeg u lan bbiyu’ e duw.”​—Revelation 20:4, 6.

Kan faseg Jesus ko yam’ u roy u fayleng me yan nga tharmiy, ere ku arrogon boch e girdi’ ni yira fasegrad ko yam’ mi yad yan nga tharmiy. I yog Jesus ngak e pi apostal rok ni yad ba yul’yul’ ni gaar: “Nggu wan gu ngongliy tagil’med . . . ma bay gu sul nggu fekmed, ni aram e bay um pired ko gin ni gu ba’ riy.”​—John 14:2, 3.

Piin ni yad ra yan nga tharmiy e bay e n’en ni ngar rin’ed u rom. Yad ra un ngak Jesus ngar gagiyegnaged reb e Am ni ir e ra gagiyegnag e girdi’ nu fayleng boch nga m’on me tow’athnagrad. Ireray e re Am ni yog Jesus ngak pi gachalpen ni ngar yibilayed ni gaar: “Chitamangimad ni ga bay u tharmiy: Ngan tay fan fithingam nib thothup, ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.”​—Matthew 6:9, 10.

“Mu gu rung’ag ba lam ni ba ga’ ni be non u tagil’ Got ni be gaar, ‘Chiney e keb i par tafen Got nga fithik’ e girdi’! . . . Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.’”​—Revelation 21:3, 4.

Re n’ey nni pilyeg e changar rok reb e profet nge guy e be dag yaan e ngiyal’ nra yib Gil’ilungun Got ni Jesus nge piin ni kan fasegrad ko yam’ ka ranod nga tharmiy e yad ra gagiyegnag, ma aram me chuweg e gagiyeg rok Satan me paradisnag e re fayleng ney. Ra taw ko ngiyal’ nem ma ke chuw urngin ban’en ni ma k’aring e amith nge kireban’ ko girdi’. Mus ko yam’ nra chuw.

Ere, mang e ra buch rok bokum milyon e girdi’ ni kar m’ad machane da ranod nga tharmiy? Ra boch nga m’on ma yira fasegrad mar pared u Paradis u fayleng ndariy n’umngin nap’an.​—Luke 23:43.