“Good News for People of All Nations”

N’EN NI kan dag i er nga lang e bake babyor ni pi’ u nap’an e District Convention ko Pi Mich Rok Jehovah ko duw ni 2004/05 ni “Nguu Darod Got u Taabang.” Reb e babyor riy, e bake babyor ni 96 e page riy ni bay e thin riy ni 92 mit e thin, mus ko thin ni Afrikaans nge mada’ ko thin ni Zulu, ma kan ngongliy ni nge ayuweg i garareg fare Thin nib Fel’ ko Gil’ilungun ngak urngin e girdi’ ni rayog ni nga nog ngorad. (Matthew 24:14) Tin migid e be dag rogon e n’en ni baga’ ni ma buch u nap’an nfanay fare babyor.

• Tomren ni kan fek fare babyor ko fare convention, ma reb e tabinaw ko Pi Mich e ranod nga dalip e national park. Ma u rom e ra mada’gad e girdi’ nu India, nge Netherlands, nge Pakistan, nge yu Manila riy. Me yog fare matam ni gaar: “Yugu aram rogon ni pi girdi’ ney, e yad ma non boch ni Ngalis, machane ra felfelan’gad u nap’an ni gu daged ngorad fare thin ko thin rorad, nbochan e yad bokum biyu’ e mayel nga orel ko tabinaw rorad. Rogon e maruwel rodad u ga’ngin yang e fayleng nge ku rogon ni ba taareban’dad e ri tamilang u wan’rad.”

• U Canada, ma reb e ppin nu Nepal e fel’ u wan’ ni ngara filew reb e Mich e Bible u telephone ya gathi rib adag ni nge pining fare walag ni ppin nga tabinaw rok. Machane, nap’an ni yog fare Mich ngak fare pin murung’agen fare ke babyor ni bay e thin riy ni thin nu Nepal, me felfelan’ me pining fare walag ni ppin ni ngeb nga tabinaw rok. Ya ngari guy fare thin ni thin ko nam rok! Ma ka aram nap’an mu un tay fare fol Bible u tabinaw ko fare pin.