Yul’yul’ Ko Pigpig Ngak Kristus Ni Pilung

“Min pi’ mat’awun ko gagiyeg ni nge tay ma ngan tay fan, ma nge par ni ir e pilung, ya girdi’ u urngin e pi nam, nge pi racha’, nge pi thin e nguur folgad rok.”​—DANIEL 7:14.

1, 2. Uw rogon ni gad manang nde gagiyeg Kristus ni polo’ ko duw 33 C.E.?

 MINI’ e pilung nrayog ni nge pi’ e yafas rok ni fan ko girdi’ rok me fas bayay ni nge gagiyeg ni pilung? Mini’ e re pilung ni rayog ni par u fayleng, me k’aring e girdi’ rok ni nge pagan’rad mar yul’yul’gad ngak, ngemu’ me gagiyegnagrad u tharmiy? Kemus ni cha’ nrayog ni nge rin’ ni aram rogon​—nge ku boch ban’en—​e Jesus Kristus. (Luke 1:32, 33) U nap’an e Pentekost ko 33 C.E., u tomren ni ke yim’ Kristus, min faseg ko yam’, ngemu’ me yan nga tharmiy, me tay Got “ni ir e nge mang Pilung ni ga’ u urngin ban’en.” (Efesus 1:20-22; Acts 2:32-36) Me tabab Kristus ko gagiyeg machane de gagiyeg ni polo’. Som’on e gagiyegnag e pi Kristiano ni kan dugliyrad, ni ngar manged Israel rok Got, “ni girdi’ rok Got.”​—Galatia 6:16; Kolose 1:13.

² Ba chugur ni nge 30 e duw nga tomren e Pentekost ko 33 C.E., me micheg Paul ni apostal ndawori gagiyeg Kristus ni polo’, ya ka be par “u ba’ ni mat’aw rok Got. Ereram e gin ni bay i son riy e chiney nge yan i mada’ ko ngiyal’ ni bayi tay Got e pi toogor rok nga tan e rifrif u ay ni nge mang tagil’ e magif ko rifrif u ay.” (Hebrews 10:12, 13) Ma aram, me chugur ni nge m’ay e bin som’on e chibog ko C.E., me John ni apostal ni ke pilibthir e ni piliyeg e changar rok me guy e En Th’abi Tolang u Palpalth’ib, ni Jehovah, ni ke tay Kristus Jesus ni nge mang Pilung ko Gil’ilungun nib beech u tharmiy. (Revelation 11:15; 12:1-5) Rogon ni kan dag ko chepin e girdi’, e rayog ni ngada sulod nga daken e pi mich ni be micheg ni tabab Kristus ni Pilung ko gagiyeg u tharmiy ko duw ni 1914. a

3. (a) Fare thin nib fel’ ni murung’agen Gil’ilungun Got e mang e n’en ni ke un ngay nib beech u nap’an 1914? (b) Mang boch e deer ni ngada fithed gadad riy?

³ Arrogon, nap’an e duw ni 1914 ma fare thin nib fel’ ni murung’agen fare Gil’ilungun e ke un ban’en ngay nib beech. Ke tabab Kristus ko gagiyeg ni Pilung ko Gil’ilungun Got u tharmiy, ni yugu aram rogon ni bay “u fithik’ e pi toogor [rok].” (Psalm 110:1, 2; Matthew 24:14; Revelation 12:7-12) Maku, pi girdi’ rok nib yul’yul’ u ga’ngin yang e fayleng e yad be tay fan e liw rok ni aram e yad be un ko maruwel ni ngan fil e Bible ngak e girdi’ nu fayleng ndawor ni rin’ biid u nap’an chepin e girdi’. (Daniel 7:13, 14; Matthew 28:18) Pi Kristiano ni kan dugliyrad, ni yad ‘pi fak fare gil’ilungun,’ e yad be pigpig ni ‘owchen Kristus’ ara ambassador. Yugu “boch e saf” ni ba ulung ni be yoor i yan e yad be ayuwegrad u fithik’ e yul’yul’, ni ka nog e tamol’og ngorad ara envoy ni fan ko Gil’ilungun Got. (Matthew 13:38; 2 Korinth 5:20; John 10:16) Yugu aram rogon, ma ba t’uf ni ngad fal’eged i lemnag ngad nanged ko riyul’ ni gad be tayfan mat’awun Kristus fa. Riyul’ ni gad be par nib yul’yul’ ngak fa? Uw rogon ni ngad daged ni gad ba yul’yul’ ngak reb e Pilung ni be gagiyeg u tharmiy? Som’on e ngad weliyed fan, ni ngad pared nib yul’yul’ ngak Kristus.

Ba Pilung ni Ma K’aring e Girdi’ Nge Yul’yul’

4. Mang e ke rin’ Jesus ni kan dugliy ni bayi mang Pilung u nap’an e machib rok u fayleng?

⁴ Def ko yul’yul’ rodad ngak Kristus e aram gad be pining e magar ko pi n’en ni ke rin’ nge pi fel’ngin. (1 Peter 1:8) Nap’an ni immoy  Jesus u fayleng ni kan dugliy ni bayi mang Pilung me dag boch e n’en ni bayi rin’ u nap’an ni ra gagiyeg u fayleng ni ga’ngin ko ngiyal’ ni ke dugliy Got. Ke duruw’iy e piin kem’ ko bilig. Ke golnag e m’ar, nge malmit, nge mugutgut, nge biling, nge maay. Ki i faseg boch e girdi’ ko yam’. (Matthew 15:30, 31; Luke 7:11-16; John 6:5-13) Maku reb riy, e yira nang rarogon e yafas rok Jesus u fayleng ma ra tamilangan’dad u fel’ngin u nap’an nra mang Pilung u fayleng boch nga ram​—ni baga’ ni t’ufeg nib gel ni dag. (Mark 1:40-45) Murung’agen e re n’ey e yog Napoléon Bonaparte ni gaar: “Alexander, Caesar, Charlemagne, nge gag e kug sunmiyed e pi am, machane daken e mang e gu tayed e maruwel romad nga daken? Daken e towasar. I tababnag Jesus Kristus gil’ilungun u daken e t’ufeg, ma ngiyal’ ney e bokum milyon e girdi’ ni ra yim’ ni fan ngak.”

5. Mang fan ni ri yi baadag daken Jesus?

⁵ Bochan ni Jesus e ba munguy mab sobut’an’, ma piin ni ke aw parowrad ko magawon nge mochuch e yad ra pirieg e toffan nbochan e machib rok ni ma gelnagey nge feni gol. (Matthew 11:28-30) Piin bitir e ba pufpuf rogorad ngak. Girdi’ nib sobut’an’ e yad baadag ni ngar manged pi gachalpen. (Matthew 4:18-22; Mark 10:13-16) Ngongol rok nge tay fan ni ma tay e ke gelnag e yul’yul’ rok boch e ppin ni bay madgun Got u wan’rad, boor i yad e ke pi’ e tayim rok, nge gelngin, nge tin bay rok nge ayuweg u nap’an e machib ni i tay.​—Luke 8:1-3.

6. Uw rogon gelngin e kireban’ ni dag Jesus u nap’an ni yim’ Lazarus?

⁶ I dag Kristus feni gel e runguy rok u nap’an ni yim’ Lazarus ni fager rok. I k’aring Maria nge Martha e kireban’ ngak nib gel u nap’an ni guy gelngin ni kari kireban’row ni yow be yor, ma aram “me yor.” Me “ri taganan’”​—ma ke kireban’ nib gel—​ni yugu aram rogon ni manang ni nge yan i faseg Lazarus ko yam’. T’ufeg nge runguy e ke k’aring ni nge fanay mat’awun ni ke pi’ Got ngak me faseg Lazarus ko yam’.​—John 11:11-15, 33-35, 38-44.

7. Mang fan ni bay rogon ni ngad yul’yul’gad ngak Jesus? (Mu guy e kahol ko page 17.)

⁷ Gad ma gin ko t’ufeg rok Jesus ko tin mmat’aw nge fanenikan rok ko tin nde yul’yul’ nge tin kireb. L’agruw yay ni tuluf e pi tafolchuway’ ni yad ba chogow u lan e tempel nde rus. (Matthew 21:12, 13; John 2:14-17) Maku reb, e nap’an ni immoy u fayleng nib girdi’, me yib ngak e magawon nrib gel, ni aram me yib ngak e magawon ni gad ma mada’nag. (Hebrews 5:7-9) Maku manang Jesus rogon e magawon ko fanenikay nge girdi’ ni ma dag e ngongol ni de mat’aw. (John 5:15-18; 11:53, 54; 18:38–19:16) Ma munmun, ma de rus ni nge mada’nag e yam’ ni bod e gamanman ni nge lebguy e n’en nib m’agan’ e Chitamangin ngay me yognag e yafas ni manemus ngak e girdi’ ni yad bay u tan pa’. (John 3:16) Pi fel’ngin Kristus ney e gathi ra k’aringem nguum pigpig ngak u fithik’ e yul’yul’? (Hebrews 13:8; Revelation 5:6-10) Machane mang e ba t’uf ni nge rin’ e en nge par u tan pa’ Kristus ni Pilung?

Nge Bung Rogon ni Ngan Par u Tan Pa’

8. Mang e ba t’uf ni nge rin’ e piin ni yad bay u tan pa’ Kristus?

⁸ Amu lemnag: Ra ngam mang girdien reb e nam ma bay boch ban’en nib t’uf ni ngam rin’. Be’ ni ra mang girdien reb e nam e ba t’uf ni nge par nib fel’ e ngongol rok ma kub fel’ fithik’ i downgin. Taareb rogon ko en nge par u tan pa’ Kristus, ba t’uf e ngongol nib fel’ ma nge par nib gel ko tirok Got.​—1 Korinth 6:9-11; Galatia 5:19-23.

9. Uw rogon ni gad ra dag ni gad ba yul’yul’ ngak Kristus?

⁹ Bay mat’awun Jesus Kristus ni nge tay chilen ngak e girdi’ ni bay u tan pa’ ni ngar yul’yul’gad ngak nge Gil’ilungun. Yad ma dag ni yad ba yul’yul’ ya yad ma fol ko pi n’en ni i fil ngorad u nap’an ni immoy u fayleng ni ke m’ay i dugliy ni bayi mang Pilung. Baaray rogon, kar m’oneged e Gil’ilungun nge tin nib m’agan’ Got ngay me tomur e chugum u wan’rad. (Matthew 6:31-34) Maku yad be guy rogon ni nge m’ug rarogon ngongolen Kristus rorad, ni yugu demtrug rogon feni yoor e magawon. (1 Peter 2:21-23) Maku, girdi’ ni yad bay u tan pa’ Kristus e yad ma lek e kanawo’ rok ni yad ma gay rogon ni ngar rin’ed e n’en nib fel’ ngak yugu boch e girdi’.​—Matthew 7:12; John 13:3-17.

10. Uw rogon ni ngan dag e yul’yul’ ngak Kristus (a) u lan e tabinaw nge (b) lan e ulung?

 ¹⁰ Pi gachalpen Jesus e ku yad ma dag e yul’yul’ rorad ngak ni yad be dag e pi n’en ni fel’ngin u lan e tabinaw. Baaray rogon, pi figirngiy e yad be dag e yul’yul’ rorad ngak e Pilung rorad u tharmiy ni yad be folwok rok Kristus nguur ayuweged pi leengirad nge pi fakrad. (Efesus 5:25, 28-30; 6:4; 1 Peter 3:7) Pi leengiy e yad ma dag e yul’yul’ ngak Kristus ko ngongol rorad nib machalbog ni aram e “lem nib sumunguy ma ba gapas.” (1 Peter 3:1-4; Efesus 5:22-24) Piin bitir e yad be yul’yul’ ngak Kristus u nap’an ni yad ra folwok rok ni ma fol. Nap’an ni kab bitir Jesus, ma i par ni be fol ko gallabthir rok, ni yugu aram rogon ndar flontgow. (Luke 2:51, 52; Efesus 6:1) Girdi’ nra par u tan pa’ Kristus e nge athamgil nge folwok rok ni aram e “nge taareb rogon e lem romed, mu um runguyed gimed; me bigimed me t’uf rok bigimed nrogon e piin ni walag ni girdien Kristus.” Yad ma athamgil ni ngar boded Kristus, nib sobut’ laniyan’rad ma ‘dab ra puluwniged e tagan ara ra puluwniged e thin nib kireb.’​—1 Peter 3:8, 9; 1 Korinth 11:1.

Piin Ma Fol ko Motochiyel Rok Kristus

11. Bin ngan e motochiyel e ra fol e piin bay u tan pa’ Kristus riy?

¹¹ Piin ni yad baadag ni ngar manged girdien reb e nam e ngar folgad ko motochiyel ko fare nam rorad nib beech, piin nra par u tan pa’ Kristus e ngar folgad “ko fare motochiyel ni pi’ Kristus” ngar puluwniged e yafas rorad ko tin ke fil Jesus nge pi motochiyel rok. (Galatia 6:2) Baga’ ni, yad be par ni yad ba yul’yul’ ko ‘fare motochiyel rok fare pilung’ ni aram e t’ufeg. (James 2:8) Mang e ba muun ko pi motochiyel ney?

12, 13. Uw rogon ni ngad pared nib yul’yul’ u tan “fare motochiyel rok Kristus”?

¹² Girdi’ ni yad bay u tan pa’ Kristus e dawor ra flontgad yad ma oloboch. (Roma 3:23) Ere, ka ba t’uf ni ngar maruweliyed “ma yad be par nrib t’uf rorad e piin yad ni ke mich Kristus u wan’rad ni bod gimed, ma ra bigimed ma ngari t’uf rok bigimed u polo’ i laniyan’.” (1 Peter 1:22) “Mu um n’iged fan u wan’med e n’en ni manga ke kirebnag bigimed u laniyan’ bigimed,” pi Kristiano ni ba yul’yul’ e yad ma fol ko fare motochiyel rok Kristus ni “nge bigimed mi i ayuweg bigimed ko meewar rok u fithik’ e runguy.” Yira fol ko re motochiyel ney ma ra ayuwegrad nge dab ku ur yaliyed e oloboch rok boch e girdi’ ma yad ra nang fan ni ngan t’ufeg boch e girdi’. Gathi ga ra pining e magar ko piin ba yul’yul’ ni be par u tan pa’ e Pilung ma ka ron’ed nga dakenrad e t’ufeg ni, “ma chugumiy urngin ban’en nga taabang”?​—Kolose 3:13, 14.

¹³ Maku, be fal’eg i weliy Jesus murung’agen fare t’ufeg rok nib gel ko t’ufeg ni ma dag e girdi’ ngorad. (John 13:34, 35) Faanra ba t’uf rodad e piin gadad ba t’uf rorad, me ere dariy ban’en “nib thil ni kada rin’ed.” Ra aram rogon ma  dawori polo’ e t’ufeg rodad ma de gaman. I ta’ Jesus ir ngodad ni nguud folwokgad ko t’ufeg rok e Chitamangin ni nge t’uf rodad e pi toogor rodad ni yad be fanenikaydad ma yad be gafgownagdad. (Matthew 5:46-48) Re t’ufeg ney e ke k’aring e girdi’ ni nge par u tan fare Gil’ilungun ni ngar yul’yul’gad ko maruwel rorad. Mang e re maruwel nem?

Yul’yul’ e Yima Skengnag

14. Mang fan ni rib ga’ fan ni ngan machib?

¹⁴ Girdi’ nra par u tan Gil’ilungun Got e chiney e bay e maruwel rorad nrib ga’ fan ya yad be “machibnag murung’agen e gagiyeg rok Got.” (Acts 28:23) Ngan rin’ ni aram rogon e baga’ fan ya bochan e Gagiyeg rok fare Messiah e ra gagiyelnag mat’awun Jehovah ko gagiyeg u palpalth’ib nth’abi tolang. (1 Korinth 15:24-28) Nap’an ni gad ra machibnag e thin nib fel’, ma piin nra motoyil ngay e rayog ni par u tan e Gagiyeg rok Got. Maku, rogon e ngongol rok e girdi’ ko re thin nem e aram e n’en nra ayuweg Kristus ni Pilung ni nge pufthinnag e girdi’ riy. (Matthew 24:14; 2 Thessalonika 1:6-10) Ere, fare kanawo’ nth’abi fel’ ni ngad daged e yul’yul’ rodad riy ngak Kristus e ngad folgad ko motochiyel rok ni ngan machibnag e girdi’ u murung’agen Gil’ilungun.​—Matthew 28:18-20.

15. Mang fan ni ngan skengnag e yul’yul’ ko pi Kristiano?

¹⁵ Riyul’, be togopluw Satan ko machib nrogon rayog rok, ma pi pilung ni girdi’ e dar nanged ni ke pi’ Got mat’awun Kristus ni nge gagiyeg. (Psalm 2:1-3, 6-8) Maku, be yog Jesus ngak pi gachalpen ni gaar: “Dariy reb e sib ni ba ga’ ngak e masta rok. Faanra kar gafgowniged gag, ma bay kur gafgowniged gimed.” (John 15:20) Ere, pi gachalpen Kristus, e kar pirieged ni yad be un ko fare cham ko tirok Got ni yibe skengnag e yul’yul’ rorad.​—2 Korinth 10:3-5; Efesus 6:10-12.

16. Uw rogon ni nge pi’ e piin ni be par u tan Gil’ilungun “Got e tirok Got ban’en” ngak Got?

¹⁶ Yugu aram rogon, ma piin nra par u tan Gil’ilungun Got e nge par nib yul’yul’ ko fare Pilung rorad ni dab ni guy ma ka yad be fol ko am. (Titus 3:1, 2) I gaar Jesus: “Faanra er rogon me ere mpied ngak e pilung nu Roma e tirok ban’en, mi gimed pi’ ngak Got e tirok Got ban’en.” (Mark 12:13-17) Piin ni yad be par u tan pa’ Kristus, e nge fol ko motochiyel ko am ni faanra de togopuluw ko motochiyel rok Got. (Roma 13:1-7) Machane, nap’an ni ke togopuluw fare prist nth’abi tolang ko motochiyel rok Got me yog ngak pi gachalpen Jesus ni ngar talgad ko machib, mi yad fulweg u fithik’ e tayfan ni lungurad “thingar gu folgad rok Got ko bin ni nggu folgad rok e girdi’.”​—Acts 1:8; 5:27-32.

17. Mang fan nrayog ni ngada mada’naged e skeng ko yul’yul’ ndab da rusgad?

¹⁷ Bin rogon, e ba t’uf e athamgil ko piin ni bay u tan pa’ Kristus ni ngar pared ni yad ba yul’yul’ ko Pilung rorad u nap’an ni yima gafgownagrad. Machane, i gaar Jesus: “Ngam felan’gad ko ngiyal’ nra yog e girdi’ e thin nib tagan ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopuluw ngomed ni bochan e gimed girdieg. Ngari felan’med, ya bay labgen ni ba ga’ ni fan ngomed ni kan tay u tharmiy.” (Matthew 5:11, 12) Tin som’on i gachalpen Jesus e kar pirieged nib riyul’ e pi thin nem. Mus ko ngiyal’ ni un li’rad nbochan ni yad be ul’ul i machibnag Gil’ilungun, ma yad be felfelan’ “ni bochan e ke tafinaynag Got ni ba’ rogorad ni ngar gafgowgad ni fan nga fithingan Jesus. Ma aram e urngin e rran nra ul’ulgad ngay nguur filed ngak e girdi’ ma yad be machibnag ngak e girdi’ fare Thin Nib Fel’ ni murung’agen Jesus, ni ir fare Messiah, ni ur machibniged u lan fare tempel ngu lan e tabinaw rok e girdi’ i yan.” (Acts 5:41, 42) Bay rogom ni nga nog nib fel’ murung’agem, ya ke yog nim par nib yul’yul’ u fithik’ e magawon, nge m’ar, nge kireban’ nbochan e ke yim’ be’ nib t’uf rom, nge togopuluw.​—Roma 5:3-5; Hebrews 13:6.

18. Mang be yip’ fan e thin rok Jesus ni yog ngak Pontius Pilate?

 ¹⁸ Nap’an ni ke Pilung Jesus ndawori mus rogon, me fal’eg i weliy ngak e Pilung nu Roma ni Pontius Pilate ni gaar: “Gin nsuwog e dariy u roy u fayleng; faan mang e gin nsuwog e bay u roy u fayleng ma ra cham e tirog e girdi’ ni nge dabiyog nni koleg ngan pieg ngak piyu Israel. Gin nsuwog e dariy u roy u fayleng!” (John 18:36) Piin ni bay u tan Gil’ilungun e tharmiy, e dabi fek talin e cham nge cham ngak e girdi’ ara un ko togopuluw ngak boch e girdi’. Ra ngan par nib yul’yul’ ngak e “Pilung ko Gapas,” ma yad ra par u ma thilin ko pi n’en ni be rin’ e fayleng.​—Isaiah 2:2-4; 9:6, 7.

Yafas ni Manemus e Tow’ath Rok e Piin ni Yul’yul’

19. Mang fan ni piin bay u tan pa’ Kristus e yad be son u fithik’ e pagan’?

¹⁹ Piin ba yul’yul’ u tan pa’ Kristus, ni fare “Pilung ko pi pilung,” e yad be son u fithik’ e pagan’. Yad be sonnag e n’en nra rin’ gelngin e pilung ni fan ko fayleng. (Revelation 19:11–20:3; Matthew 24:30) Tin ka bay ko piin kan dugliyrad ko kan ni thothup ni ‘pifak fare gil’ilungun’ e yad be sonnag e tow’ath nib ga’ ni ngar uned ngak Kristus ko pilung u tharmiy. (Matthew 13:38; Luke 12:32) “Yugu boch e saf” rok Kristus nib yul’yul’ e ri yad be sonnag e Pilung rorad ni gaar: “Gimed e piin ni ke fal’eg e Chitamag waathmed: mired! Mired ngan pi’ e gin nsuwon Got [Paradis u fayleng] ngomed, ni kan ngongliy rogon kan tay ni fan ngomed ni ka nap’an e ngiyal’ nsunumiy e fayleng riy.” (John 10:16; Matthew 25:34) Rogon ni kan weliy, e manga yigi urngin e girdi’ u tan Gil’ilungun e ngar turguyed ni nguur pared nib yul’yul’ nguur pigpiggad ngak Kristus ni Pilung.

[Footnote]

Rayog ni Ngam Weliy?

• Mang fan ni bay rogon e yul’yul’ rodad ngak Jesus?

• Uw rogon ni ke dag e piin ni bay u tan pa’ Kristus e yul’yul’ rorad ngak?

• Mang fan ni gadad baadag ni ngada yul’yul’gad nga Gil’ilungun Kristus?

[Study Questions]

[Box on page 17]

BOOR FEL’NGIN KRISTUS NIB FEL’

De laniyan’​—John 4:7-30.

Runguy​—Matthew 9:35-38; 12:18-21; Mark 6:30-34.

T’ufeg ni yima pagfay​—John 13:1; 15:12-15.

Yul’yul’​—Matthew 4:1-11; 28:20; Mark 11:15-18.

Taganan’​—Mark 7:32-35; Luke 7:11-15; Hebrews 4:15, 16.

Filmunguyan’​—Matthew 15:21-28.

[Picture on page 15]

Yira dag e t’ufeg ngak yugu boch e girdi’, ma gad be yul’yul’ ko “fare motochiyel rok Kristus”

[Pictures on page 17]

Pi fel’ngin Kristus e ke k’aringem ni ngam pigpig ngak u fithik’ e yul’yul’ fa?