Kafram e ud lemnaged ni aray rogon ni bochan fapi thin ni bay ko Hebrews 12:16. Be yog u rom ni Esau e “de pag ir ngak Got nge mang Got e i gagiyegnag” ma “bochan taab yay i abich me chuway’ nga mat’awun ni ba’ rok ni bochan e ir e bin nganni’,” me pi’ ngak Jakob. Aram fan ni ud lemnaged nnap’an ni yag ‘mat’awun e bin nganni’’ ngak Jakob ma kub muun ngay fare tow’ath ni nge mang reb e ga’ rok fare Messiah.​​—Matt. 1:2, 16; Luke 3:23, 34.

Machane, tomuren ni kan fal’eg i fil yugu boch e thin nu Bible, ma ke tamilang nde t’uf ni en nganni’ ni pumoon e ir e ra mang reb e ga’ rok fare Messiah. Ngad weliyed boch e pi thin nu Bible ney:

Reuben e ir e bin nganni’ u fak Jakob nge Leah, ma Josef e aram e bin m’on e pagel ni fak Jakob nge Rachel. Nap’an ni moleg Reuben reb fapi ppin rok e chitamangin, ma aram me mul u pa’ mat’awun ni ir e bin nganni’ min pi’ ngak Josef. (Gen. 29:31-35; 30:22-25; 35:22-26; 49:22-26; 1 Kron. 5:1, 2) Yugu aram rogon ma de yib fare Messiah ko ganong rok Reuben ara Josef, ya yib ko ganong rok Judah ni aram e bin aningeg e pagel ni fak Jakob nge Leah.​​—Gen. 49:10.

Fare thin ni bay ko Luke 3:32 e ku be weliy murung’agen lal e pumoon ni ga’ rok fare Messiah, ma bod nra bagayad ma ir e som’on nni gargeleg ko tabinaw rok. Bod ni, Boaz e chitamangin Obed, me Obed e chitamangin Jesse.​​—Ruth 4:17, 20-22; 1 Kron. 2:10-12.

David ni fak Jesse e gathi ir e bin nganni’, ya bin riyul’ riy e ir e bin wen. Machane fare Messiah e yib ko ganong rok David. (1 Sam. 16:10, 11; 17:12; Matt. 1:5, 6) Bin migid e ga’ rok fare Messiah e aram Solomon ni yugu aram rogon ni gathi ir e bin nganni’ u fak David.​​—2 Sam. 3:2-5.

 Re n’ey e gathi be yip’ fan ni en nganni’ u fakay ni pumoon e de ga’ fan. Ya aram e en ni yima pi’ boch e tow’ath ngak ndanir ma pi’ ngak yugu boch e bitir ni pumoon u lan reb e tabinaw. Ba ga’ ni en nganni’ e ir e ma mang e en lolugen reb e tabinaw u nap’an nra yim’ e chitamangin fare tabinaw, maku ir e yima pi’ ngak l’agruw e f’oth ko gayog rok.​​—Gen. 43:33; Deut. 21:17; Josh. 17:1.

Machane rayog ni ngan chuweg mat’awun e en nganni’ ngan pi’ ngak yugu reb e bitir ni pumoon ko fare tabinaw. Nap’an ni chuweg Abraham Ishmael u tafen, ma aram me fek mat’awun ni ir e bin nganni’ nge pi’ ku Isak. (Gen. 21:14-21; 22:2) Kud weliyed faram ni mat’awun Reuben ni ir e bin nganni’ e kun pi’ ngak Josef.

Ere, mang e be weliy apostal Paul ko Hebrews 12:16? Be gaar e re thin nem: “Mu ayuweged gimed nge dariy be’ u fithik’med ni nge pig nge ngongliy e ngongol ko darngal fa reb e de pag ir ngak Got nge mang Got e i gagiyegnag ni bod ni rin’ Esau, ni bochan taab yay i abich me chuway’ nga mat’awun ni ba’ rok ni bochan e ir e bin nganni’ e bitir.” 

Der weliy Paul murung’agen e pi ga’ rok fare Messiah. Ya bin riyul’ riy e, be ginang e piin Kristiano. I gaar ngorad: “Ngam pired ni gimed be yan u daken e kanawo’ nib k’iy” ya nge “dabi pi’ bigimed keru’ ko runguy rok Got ngodad.” Machane, rayog ni nge buch e re n’ey rorad ni faan yad ra un ko ngongol ndarngal. (Heb. 12:12-16) Faan yad ra rin’ e re n’ey, ma aram e ra buch rorad e n’en ni buch rok Esau ni aram e “de pag ir ngak Got nge mang Got e i gagiyegnag” ni bochan e baadag ni nge rin’ e n’en ni be ar’arnag.

Rogon e yalen e ngiyal’ nem e rayog ni bay yu ngiyal’ ni ma ognag Esau e maligach ngak Jehovah. (Gen. 8:20, 21; 12:7, 8; Job 1:4, 5) Machane bochan nib m’on u wan’ Esau e pi n’en ni be ar’arnag, ma aram fan ni pi’ mat’awun ngak walagen ni bochan ba plet i sup. Sana rayog ndabun Esau ni nge buch rok e n’en ni yog Jehovah u m’on riy nra buch rok e piin owchen Abraham. (Gen. 15:13) Maku reb e, ki dag ndariy fan u wan’ e tirok Got ban’en u nap’an ni leay l’agruw e ppin ni yow ma meybil nga boch e got ni googsur. Re n’ey e ri kirebnag laniyan’ e gallabthir rok. (Gen. 26:34, 35) Rib thil Esau ngak Jakob, ya Jakob e guy rogon ni nge leay be’ ni ma pigpig ko bin riyul’ e Got!​​—Gen. 28:6, 7; 29:10-12, 18.

Mang e be fil e pi thin nu Bible ney ngodad u murung’agen e pi ga’ rok fare Messiah? Gad be fil riy ni boch i yad e yad e tin nganni’ u fakay ma boch i yad e danga’. Ireray reb e ban’en ni tamilang u wan’ e pi Jew me m’agan’rad ngay. Uw rogon ni kad nanged e re n’ey? Bochan nrogned ni Kristus e ir reb i owchen David ni bin wen u fak Jesse.​​—Matt. 22:42.