1, 2. (a) Uw rogon u wan’ boor e walag e re n’ey ni nge pag be’ gelngin Got nib thothup ni nge pow’iy? (b) Mang boch e deer nib ga’ fan ni gad ra weliy ko re article ney?

 I YOG reb e walag nib pin u Canada ni gaar, “Bochan ni gu ma pag gelngin Got nib thothup ni nge pow’iyeg, ma aram e n’en ni ke gelnag e felfelan’ rog ma ke yag ni nggu pithig e pi magawon ni gu ma mada’nag u reb e rran ngu reb.” Ki yog reb e walag ni pumoon ni ma par u Brazil ni gaar, “Ke gaman 23 e duw ni kug mabgolgow e ppin rog, ma rib gel e felfelan’ ni kug tew ni bochan e gamow ma athamgil ni nggu pagew gelngin Got nib thothup ni nge pow’iymow.” Ma reb e walag ni ma par u Manile’ e yog ni gaar, “Bochan ni gu ma pag gelngin Got nib thothup ni nge pow’iyeg, ma aram e n’en ni ke ayuwegeg ni ngaug par nib gapas lanin’ug, me fel’ e ngongol rog ngak e pi walag nib thilthil e gin ni kar bad riy.”

² Pi thin ney ni ke yog e pi walag ney e be tamilangnag angin nra yib ngodad ni faanra ud paged gelngin Got nib thothup ni nge pow’iydad. Bochan e re n’ey, ma sana ra bagadad ma ra fith ir ni nge gaar, ‘Uw rogon ni nggu mon’og u rogon ni gu ma pag gelngin Got nib thothup ni nge pow’iyeg me yag ni yib angin ngog ni bod rogon e pi walag ney ni kan weliy murung’agrad?’ U  m’on ni ngad weliyed e fulweg ko re deer ney, mab t’uf ni nge tamilang u wan’dad e n’en ni be yog e Bible u murung’agen e piin ni ma pow’iyrad gelngin Got nib thothup ma yad ma lem ni bod Jehovah. Re article ney e gad ra weliy riy e fulweg u dalip e deer nib ga’ fan. (1) Mang e be yip’ fan ni ngam pag gelngin Got nib thothup ni nge pow’iyem? (2) Mini’ e piin ni kan weliy murung’agrad nrayog ni nge ayuwegdad e n’en ni ur rin’ed ni ngad mon’oggad u rogon ni gad ma pag gelngin Got nib thothup ni nge pow’iydad? (3) Faan gad ra athamgil ni nge yag “laniyan’ Kristus” ngodad, ma uw rogon nra ayuwegdad ni ngaud paged gelngin Got nib thothup ni nge pow’iydad?

3. Uw rogon ni be yog e Bible e n’en nib thil u thilin be’ ni ma pag e pi n’en ni be ar’arnag ni nge pow’iy nge be’ ni ma pag gelngin Got nib thothup ni nge pow’iy?

³ Ke ayuwegdad apostal Paul ni ngad nanged e n’en nib thil u thilin “be’ ni ma pag gelngin Got nib thothup ni nge pow’iy” nge “be’ ni ma pag e pi n’en ni be ar’arnag ni nge pow’iy.” (Mu beeg e 1 Korinth 2:14-16. a) Mang e ba thil u thilin l’agruw ni’ ni aray rogon? “Be’ ni ma pag e pi n’en ni be ar’arnag ni nge pow’iy” e “dabiyog ni nge yag ngak e pi n’en ni ma yibnag gelngin Got nib thothup, ya thin ko balyang u wan’ ma ri der nang fan.” Machane, “be’ ni ma pag gelngin Got nib thothup ni nge pow’iy” e “ma fal’eg i yaliy gubin ban’en” ma bay “laniyan’ Kristus” rok. Ke pi’ Paul e athamgil nga lanin’dad ni ngad boded e piin ni yad ma pag gelngin Got nib thothup ni nge pow’iyrad. Ku mang boch e kanawo’ nib thil e piin ni yad ma pag e pi n’en ni yad be ar’arnag ni nge pow’iyrad ko piin ni yad ma pag gelngin Got nib thothup ni nge pow’iyrad?

4, 5. Uw rarogon be’ ni ma pag e pi n’en ni be ar’arnag ni nge pow’iy?

⁴ Am lemnag rogon ni ma lem be’ ni ma pag e pi n’en ni be ar’arnag ni nge pow’iy. Re fayleng ney e ke sugnag fare lem ni ma k’aring e girdi’ ni ngar rin’ed e pi n’en ni yad be ar’arnag. I yog Paul nre lem ney e aram fare lem ni be “gagiyegnag e piin ndarir folgad rok Got.” (Efe. 2:2) Re lem ney e ma k’aring yooren e girdi’ ni ngar rin’ed e pi n’en ni be rin’ e girdi’ u toobrad. Yad ma par ni pi’ n’en ni be ar’arnag e dowef rorad e aram e pi n’en nib m’on u wan’rad. Bochan e re n’ey, ma aram fan ni yooren i yad e yad ma rin’ e pi n’en ni yad be lemnag nib fel’ ni ngar rin’ed, ma darur guyed rogon ni ngar folgad ko pi motochiyel rok Got. Be’ ni ma pag e pi n’en ni ma ar’arnag ni nge pow’iy e ba ga’ ni yugu ma lemnag rogon ni nge yag e liw nib tolang ngak, me yoor e chugum rok, ara nge ayuweg mat’awun.

⁵ Ku mang reb e ban’en u rarogon be’ ni ma pag e pi n’en ni be ar’arnag ni nge pow’iy? Girdi’ ni aray rogon e yad ma rin’ e “tin nib kireb ni yima ar’arnag.” (Gal. 5:19-21) Gin som’on e babyor ni yoloy Paul nge yan ko ulung nu Korinth e be weliy boor ban’en u rarogon e piin ni yad ma pag e pi n’en ni yad be ar’arnag ni nge pow’iyrad. Pi n’ey e ba muun ngay ni ngan: yurba’ u but’, ara ngan guy rogon ni ngan yurba’nag e girdi’, ara ngan k’aring boch e girdi’ ni ngar togopuluwgad, ara ngan fek be’ nga tagil’ e puf oloboch, ara dab un tayfan e piin ni yad be yog e thin, ara kan par ni abich nge garbod e aram e n’en nib ga’ fan u wan’uy. Be’ ni ma pag e pi n’en ni be ar’arnag ni nge pow’iy e nap’an ni yira waliy ko kireb, mab mom ni nge war me un ko kireb ni kan waliy ngay. (Prov. 7:21, 22) I yog Jude ni piin ni yigoo pi n’en ni yad be ar’arnag e ir e be pow’iyrad e ra munmun ma dabki “gagiyegnagrad” gelngin Got nib thothup.​—Jude 18, 19.

6. Uw rogon be’ ni ma pag gelngin Got nib thothup ni nge pow’iy?

⁶ Ere, mang e be yip’ fan ni nge pag be’ “gelngin Got nib thothup ni nge pow’iy”? Be’ ni ma pag gelngin Got nib thothup ni nge pow’iy e ri ma lemnag e tha’ u thilrow Got, nib thil ngak be’ ni ma pag e pi n’en ni be ar’arnag ni nge pow’iy. Girdi’ ni aray rogon e yad ma athamgil ni ‘nguur pired ni yad be folwok rok Got.’ (Efe. 5:1) Re n’ey e be yip’ fan ni yad ma athamgil ni ngar nanged rogon laniyan’ Jehovah u boch ban’en mar lemnaged boch ban’en ni bod rogon ni ma lemnag. Girdi’ ni aray rogon e rib riyul’ Got u wan’rad. Yad ba thil ngak e piin ni yad ma pag e pi n’en ni yad be  ar’arnag ni nge pow’iyrad, ya yad ma guy rogon ni nge puluw e ngongol rorad ko pi motochiyel rok Jehovah. (Ps. 119:33; 143:10) Yad ma athamgil ni nge m’ug “wom’engin gelngin Got nib thothup” rorad ko bin ni ngar rin’ed e tin nib kireb ni yad be ar’arnag. (Gal. 5:22, 23, NW) Ra ngari tamilang u wan’dad rarogon be’ ni ma pag gelngin Got nib thothup ni nge pow’iy, ma aram e ngad lemnaged e re n’ey: Be’ nrib salap ko siyobay e yima yog ni ir be’ nib laniyan’ i siyobay. Ere, ku arrogon be’ nrib ga’ fan u wan’ e liyor ni be tay ngak Got ni yira yog ni ir be’ ni ma pag gelngin Got nib thothup ni nge pow’iy.

7. Mang e be yog e Bible u murung’agen e piin ni yad ma pag gelngin Got nib thothup ni nge pow’iyrad?

⁷ Be yog e Bible nib fel’ e piin ni yad ma pag gelngin Got nib thothup ni nge pow’iyrad. Be gaar e Matthew 5:3: “Nge felan’ e piin ni kar pirieged u lanin’rad ni kar gafgowgad ndabi siy ni nge yog Got ngorad, ya gagiyeg nu tharmiy e ke thap ngorad!” Ma Roma 8:6 e be weliy fel’ngin nra yib ngak be’ ni faanra i pag gelngin Got nib thothup ni nge pow’iy ni be gaar: “Ra par lanin’med ni tin ni ba adag e dowef romed e ir e be gagiyegnag, ma wenegan nra yib e yam’; ma ra par lanin’med ni tin ni ba adag e Kan ni Thothup [“gelngin Got nib thothup,” NW] e ir e be gagiyegnag, ma ra yib wenegan ni yafos nge gapas.” Faan gad ra m’oneg u wan’dad e tirok Got ban’en, ma aram e rayog ni nge par ni bay e gapas u thildad Got e chiney, mu kud pared nib gapas lanin’dad, me yag e athap ngodad ko yafos ni manemus boch nga m’on.

8. Mang fan nib t’uf ni ngad athamgilgad ni ngad boded e piin ni yad ma pag gelngin Got nib thothup ni nge pow’iyrad ma gad guy rogon ndabi war e michan’ rodad?

⁸ Machane, gad be par u ba ngiyal’ ni boor ban’en riy nrayog ni nge magawonnagdad. Bochan ni ke liyegdad e piin ni yad ma pag e pi n’en ni yad be ar’arnag ni nge pow’iyrad, ma aram fan nib t’uf ni ngad athamgilgad ni ngad boded e piin ni yad ma pag gelngin Got nib thothup ni nge pow’iyrad, ma gad guy rogon ndabi war e michan’ rodad. Faanra dab da suguyed lanin’dad ko tirok Jehovah ban’en, ma aram e ra suguy e re fayleng ney lanin’dad ko pi n’en nib kireb ni yima ar’arnag. Ere, mang e ra ayuwegdad ni ngad siyeged ndabi buch e re n’ey? Ma uw rogon ni ngad mon’oggad ko tirok Got ban’en?

9. (a) Mang e ra ayuwegdad ni ngad mon’oggad u rogon ni gad ma pag gelngin Got nib thothup ni nge pow’iydad? (b) Mini’ e piin nrib chugur e tha’ u thilrad Jehovah ni gad ra weliy murung’agrad?

⁹ Rayog ni nge ilal e lem rok reb e bitir ni faanra i yaliy e n’en ni ma rin’ e gallabthir rok, me folwok ko pi n’en nib fel’ ni yow ma rin’. Ku arrogodad ni faanra ud filed murung’agen boch e girdi’ nrib chugur e tha’ u thilrad Jehovah ma gad folwok rorad, ma aram e ku rayog ni ngad nanged rogon ni ngad paged gelngin Got nib thothup ni nge pow’iydad. Machane, faan ku gad ra fil murung’agen e piin ni yad ma pag e pi n’en ni yad be ar’arnag ni nge pow’iyrad, ma aram e gad ra nang e n’en nsusun e dab da rin’ed. (1 Kor. 3:1-4) Gal miti girdi’ ney e goo bay murung’agen u lan e Bible. Machane bin riyul’ riy e, gad be nameg ni ngad mon’oggad u rogon ni gad ma pag gelngin Got nib thothup ni nge pow’iydad. Ere aram fan ni ngad weliyed murung’agen in e girdi’ nrayog ni ngad folwokgad rorad. Chiney e ngad weliyed murung’agen Jakob, nge Maria, nge Jesus.

10. Uw rogon ni dag Jakob ni ir be’ ni ma pag gelngin Got nib thothup ni nge pow’iy?

¹⁰ Som’on e ngad weliyed murung’agen Jakob. Boor e magawon ni i mada’nag Jakob ni bod rogon yooren i gadad e ngiyal’ ney. I guy Esau ni walagen rogon ni nge li’ nge yim’. Ku thingari gum’an’ u puluwon e chitamangin fagali ppin ni leengin ni yigi guy rogon ni nge bannag. Yugu aram rogon, ma i par nib gel e michan’ rok ko pi n’en ni ke micheg Jehovah ngak Abraham. Manang nra un e tabinaw rok i lebguy bang ko re n’ey ni kan micheg ni ban’en nrib manigil. Ere aram fan ni i ayuwegrad nib fel’ rogon. (Gen. 28:10-15) De pag e lem rok e girdi’ u tooben ni yad ma pag e pi n’en ni yad ma ar’arnag ni nge pow’iyrad ni nge k’aring ni nge pagtalin e pi n’en ni ke micheg Jehovah. Bod nnap’an ni be rusnag ir rok Esau ni walagen, ma aram me meybil ngak Got ni gaar: “Wenig ngom, mu ayuwegneg . . . Mu tafinaynag fapi thin ni mog ngog ni lungum, ‘Bay gu yal’uweg urngin ban’en u puluwom ma bay gu pi’ ngom owchem ni pire’ ndabiyog i theegrad. Bay ra pire’gad ni bod feni pire’ e yan’ u dap’e l’ay.’” (Gen. 32:6-12) Ere, ba tamilang nib mich u wan’ e n’en ni ke micheg Jehovah ngak nge pi ga’ rok, ma baadag ni  nge puluw e ngongol rok ko n’en nib m’agan’ Got ngay.

11. Mang e be dag ni Maria e ir be’ ni i pag gelngin Got nib thothup ni nge pow’iy?

¹¹ Kum lemnag e n’en ni buch rok Maria. Mang fan ni mel’eg Jehovah Maria ni ir e nge mang chitiningin Jesus? Dariy e maruwar riy ni bochan e ir be’ ni ma pag gelngin Got nib thothup ni nge pow’iy. Uw rogon ni kad nanged e re n’ey? I dag ni ir be’ nrib gel e michan’ rok u nap’an ni yog boch e thin ni be pining e sorok ngak Got u nap’an ni yan i guy Zekariah nge Elizabeth ni l’agruw e girdi’ rok. (Mu beeg e Luke 1:46-55.) Thin ni yog Maria e be dag nrib ga’ fan e Thin rok Got u wan’, ma rib tamilangan’ ko thin ni bay u lan e Pi Babyor ko Bible nni Yoloy Nsom’on ni Thin ni Hebrew. (Gen. 30:13; 1 Sam. 2:1-10; Mal. 3:12) Kum tay fanam i yan riy ni yugu aram rogon ni kar mabgolgow Josef, machane mar parew ni yow ba fal nge mada’ ko ngiyal’ nni gargeleg Jesus. Mang e be dag e re n’ey? Be dag ni yow l’agruw ni kab ga’ fan u wan’row e n’en nib m’agan’ Jehovah ngay ko pi n’en ni yow be ar’arnag. (Matt. 1:25) Maku reb e, i fal’eg Maria i yaliy rogon e pi n’en ni i buch rok Jesus u nap’an ni be ilal, miki tiyan’ ko thin ni i yog ni bay e gonop riy, me tay “urngin e pi n’em nga laniyan’.” (Luke 2:51) Ba tamilang ni baadag ni nge nang murung’agen e n’en nib m’agan’ Got ngay ni bay rogon ko fare Messiah. Ere gur, rayog ni ngad folwokgad rok Maria mu ud guyed rogon ni ngad m’oneged e tin nib m’agan’ Got ngay, fa?

12. (a) Uw rogon ni i m’ug rarogon e Chitamangin Jesus rok? (b) Uw rogon nrayog ni ngad folwokgad rok Jesus? (Mu guy e sasing ni bay u tabolngin e re article ney.)

¹² Machane, u fithik’ urngin e girdi’ ni ka ur moyed u fayleng, ma mini’ e ke dag e bin th’abi fel’ e kanawo’ u rogon ni nge pag be’ gelngin Got nib thothup ni nge pow’iy? Aram Jesus. N’umngin nap’an e yafos rok u fayleng nge machib ni i tay, me dag ni baadag ni nge folwok rok Jehovah ni Chitamangin. I lem ma be ngongol ni bod rogon Jehovah, ma i guy rogon ni nge puluw e ngongol rok ko n’en nib m’agan’ Got ngay nge pi motochiyel rok. (John 8:29; 14:9; 15:10) Mu tay fanam i yan u rogon ni weliy Isaiah ni profet murung’agen rogon e runguy ni ma dag Jehovah, mag taareb rogonnag e re n’ey ko n’en ni yoloy Mark nga lan e Gospel rok u murung’agen e lem rok Jesus. (Mu beeg e Isaiah 63:9 b; Mark 6:34.) Ere gur, gad ma folwok rok Jesus ni aram e gad ma guy rogon ni ngaud daged e runguy ngak e piin ni ke t’uf e ayuw rorad, fa? Maku reb e, ki fanay Jesus e tayim rok ni nge machib ma be fil fare thin nib fel’ ko girdi’. (Luke 4:43) Mit ney e lem nge ngongol ni i dag Jesus e aram e pow rok be’ ni ma pag gelngin Got nib thothup ni nge pow’iy.

13, 14. (a) Mang e rayog ni ngad filed rok boch e walag e ngiyal’ ney ni yad ma pag gelngin Got nib thothup ni nge pow’iyrad? (b) Mu weliy reb e ban’en ni ke buch.

¹³ Ngiyal’ ney e ku boor e walag ni yad ma pag gelngin Got nib thothup ni nge pow’iyrad ni yad ma guy rogon ni ngaur folwokgad rok Kristus. Sana rayog ni kam guy rogon farad pasig ko machib, nge rogon ni yad ma gol ko girdi’, nge runguy ni yad ma dag, ara ku boch i fel’ngirad nib manigil. Pi cha’ney e ku taareb rogorad ngodad ndawor ra flontgad maku bay boch ban’en ni yad ba meewar riy, machane yad ma athamgil nib gel ni ngar guyed rogon ni nge yag e pi fel’ngin Got ney ngorad nib manigil. Rachel nreb e walag nib pin ni ma par u Brazil e yog ni gaar: “Rug baadag ni gu ma folwok u rogon e munmad ni ma tay e girdi’ nu fayleng. Ere, aram fan ni gathi rib yalen rogon e munmad ni gu ma tay. Machane bochan ni kug fil e tin riyul’, ma aram e n’en ni ke k’aringeg ni nggu athamgil ni nggu mang be’ ni ma pag gelngin Got nib thothup ni nge pow’iy. De mom ni nggu thilyeg boch ban’en u rarogog, machane n’en ni kug rin’ e ke ayuwegeg ni nggu felfelan’ me yib fan e yafos rog.”

¹⁴ Reylene ni ma par u Manile’ e ba thil e magawon ni i mada’nag. I nameg e skul nib tolang nge maruwel nib fel’ puluwon ni bochan e be guy rogon ni nge fel’ e par rok. I yog ni gaar: “Bochan e re n’ey, ma aram mu ug par ni gathi ri kab ga’ fan u wan’ug e pi n’en ni gu be nameg ni fan ko tirok Got ban’en. Ma aram mug tabab ni nggu nang ni bay ban’en ndariy rog, ni ban’en ni kab ga’ fan ko maruwel ni gu be un ngay. Bochan e re n’ey, ma aram mug sul bayay nggu tiyan’ug ko pigpig ni gu be tay ngak Jehovah.” Ka nap’an e re ngiyal’ i n’em, ma aram me tabab Reylene ni nga i pagan’ ko  fare thin ni ke micheg Jehovah ko Matthew 6:33, 34, me dag e kanawo’ nib fel’ nrayog ni ngan folwok riy. I yog ni gaar: “Rib mich u wan’ug nra ayuwegeg Jehovah ko tin nib t’uf rog!” Sana bay boch e walag u lan e ulung rom ni ireray e n’en ni kar rin’ed. Ere, dariy e maruwar riy ni be k’aringdad e re n’ey ni ngad adaged ni ngad folwokgad rok e pi walag ney ni yad ba yul’yul’ ni yad be folwok rok Kristus.​—1 Kor. 11:1; 2 Thess. 3:7.

15, 16. (a) Faanra ngad boded Kristus, ma mang e ba t’uf ni ngad rin’ed? (b) Uw rogon ni ngad nanged rogon ni i lem “Kristus”?

¹⁵ Uw rogon ni ngad folwokgad rok Kristus? Be yog e Bible ko 1 Korinth 2:16 ni nge yag “laniyan’ Kristus” ngodad. Ku be yog e Filippi 2:5 ni nge yag ngodad “fare lem nge fare pangin ni immoy rok Kristus Jesus.” Ere, faanra ngad boded Kristus, mab t’uf ni ngad nanged rogon e lem nge ngongol rok. Ngemu’ ma gad lek luwan ay. Jesus e i par ni tha’ u thilrow Got e aram e n’en nib m’on u wan’. Ere faan gad ra bod Jesus, ma aram e rayog ni ngad boded Jehovah. Ere, aram fan nrib t’uf ni ngad filed rogon ni ngaud lemgad ni bod rogon Jesus.

¹⁶ Uw rogon ni ngad rin’ed e re n’ey? I guy pi gachalpen Jesus e pi maang’ang ni i ngongliy, mu ur rung’aged e pi welthin ni i pi’, mu ur guyed rogon e ngongol ni i dag ngak urngin mit e girdi’, nge rogon ni i fol ko pi kenggin e motochiyel rok Got. Aram fan ni lungurad: “Gamad e mich u urngin e tin ni rin’ u lan e nam rok piyu Israel ngu lan yu Jerusalem.” (Acts 10:39) Gadad e dabiyog ni ngad guyed Jesus. Machane, ke pi’ Jehovah fapi Gospel ni nge ayuwegdad ni ngar da nanged rarogon Jesus. Ere, faanra ud beeged fapi babyor ko Bible ni Matthew, nge Mark, nge Luke, nge John, ma aram e rayog ni ngad nanged rogon ni i lem Jesus. Re n’ey e rayog ni nge ayuwegdad ni ‘nguud leked luwan ay,’ ma gad fek e “binem e lem” ni immoy rok nge pi’ gelngidad ngad gelgad.​—1 Pet. 2:21; 4:1.

17. Faanra ud lemgad ni bod Kristus, ma uw rogon nra ayuwegdad?

¹⁷ Faan gad ra fil rogon ni ngaud lemgad ni bod Kristus, ma uw rogon nra ayuwegdad? Ggan nib fel’ e ma gelnag fithik’ i dowdad, ere faan gad ra guy rogon ni nge yag laniyan’ Kristus ngodad ma aram e rayog ni ngad mon’oggad ko tirok Got ban’en. Faan gad ra rin’ ni aray rogon, ma aram e ra munmun ma demtrug e re miti magawon ni gad ra mada’nag, ma gad manang e n’en nra rin’ Kristus ngay. Re n’ey e ra ayuwegdad ni ngad dugliyed boch ban’en nib m’agan’ Got ngay ndabi magawonnag e nangan’ rodad. Uw rogon u wan’um? Gathi pi n’ey ni kad weliyed e be tamilangnag fan nib fel’ ni ngad “folwokgad rok e Somol rodad i Jesus Kristus”?​—Rom. 13:14, NW.

18. Mang e kam fil ko n’en ni kad weliyed u murung’agen be’ ni ma pag gelngin Got nib thothup ni nge pow’iy?

¹⁸ Re article ney e kad weliyed riy rarogon be’ ni ma pag gelngin Got nib thothup ni nge pow’iy. Kud filed nrayog ni ngad filed boch ban’en rok e piin ni ur paged gelngin Got nib thothup ni nge pow’iyrad. Maku reb e, kud filed ni faanra yag “laniyan’ Kristus” ngodad, ma aram e ra ayuwegdad ni ngad mon’oggad u rogon ni gad ma pag gelngin Got nib thothup ni nge pow’iydad. Machane, ka bay boch ban’en ni ka rayog ni ngad filed u murung’agen e re n’ey. Reb riy e, uw rogon ni ngad nanged ko gad ba gel ko tirok Got ban’en fa danga’? Mang e rayog ni ngad rin’ed me yag nda mon’oggad i yan ko tirok Got ban’en? Ma mang e ra rin’ e re n’ey ko pi n’en ni gad ma rin’ u reb e rran ngu reb? Gad ra weliy e fulweg ko pi deer ney ko bin migid e article.