Dab Mu Togopuluw nga Rogon ni Ma Maruwel Gelngin Jehovah nib Thothup

“Dab mu denengad nib togopuluw nga rogon ni ma maruwel gelngin Got nib thothup, ya ereram e pow rok Got ni ke tay ngomed.”​—EFE. 4:30, NW.

1. Mang e ke rin’ Jehovah ni fan ngak bokum milyon e girdi’, ma mang e ba milfan ngorad ni ngar rin’ed?

 BAY ban’en ni ke rin’ Jehovah ni fan ngak bokum milyon e girdi’ ni yad be par u lan e re fayleng nib kireb ney. Ke bing e kanawo’ ngorad ni ngar chuchugurgad ngak u daken Fak ni kari maagirag rok ni aram Jesus Kristus. (John 6:44) Faanra kam ognag e yafas rom ngak Got, ma ga be rin’ e tin nib m’agan’ ngay, ma aram e gur bagayad e pi girdi’ ney ni kan taufenagem nga fithingan gelngin Got nib thothup. Ere ba milfan ngom ni ngam ngongol nib puluw nga rogon ni be pow’iyem.​—Matt. 28:19.

2. Mang boch e deer ni gad ra weliy?

² Gad e piin ni gad be ‘yung ban’en ni fan nga gelngin Got nib thothup’ e ka don’ed e bin nib beech e pangin nga dakendad. (Gal. 6:8; Efe. 4:17-24) Machane, ke ginangdad apostal Paul ndab da rin’ed ban’en nib togopuluw nga rogon ni ma maruwel gelngin Got nib thothup. (Mu beeg e Efesus 4:25-32.) Chiney e ngad fal’eged i yaliy fare thin nu Bible ni ka fin da beeged. Mang e be yip’ Paul fan u nap’an ni yog ndab da rin’ed ban’en nib togopuluw nga rogon ni ma maruwel gelngin Got nib thothup? Uw rogon nrayog ni nge rin’ reb e tapigpig rok Jehovah ban’en ni aram rogon? Ma uw rogon ni nge dab da rin’ed ban’en nib togopuluw  nga rogon ni ma maruwel gelngin Got nib thothup?

N’en ni Be Yip’ Paul Fan?

3. Uw rogon ni ga ra weliy fan fare thin ni bay ko Efesus 4:30?

³ Som’on e ngam tay fanam i yan ko n’en ni yog Paul u Efesus 4:30, NW. I yoloy ni gaar: “Dab mu denengad nib togopuluw nga rogon ni ma maruwel gelngin Got nib thothup, ya ereram e pow rok Got ni ke tay ngomed u daken fare biyul nra pithigmed ko denen.” Dabun Paul ni nge rin’ e piin taareb e michan’ rorad ban’en nra magawonnag e tha’ u thilrad Got, ya ke tay gelngin Jehovah nib thothup e ‘pow ngorad u daken fare biyul nra pithigrad ko denen.’ Ere, gelngin Got nib thothup e aram e pow ara “mich riy ni gubin ban’en ni ke tay” Got ni fan ngak e pi tapigpig rok ni ke dugliyrad ni yad ba yul’yul’ e ra pi’ ngorad. (2 Kor. 1:22) Fare pow e aram e mich riy nib mil farad ngak Got, ma athap rorad e ngar gagiyeggad u tharmiy. Urngin e pi girdi’ nem ni yira tay e pow ngorad e yad 144,000 u gubin.​—Rev. 7:2-4.

4. Mang nib ga’ fan ndab da rin’ed ban’en nib togopuluw nga rogon ni ma maruwel gelngin Got nib thothup?

⁴ Faan gad ra rin’ ban’en nib togopuluw nga rogon ni ma maruwel gelngin Got nib thothup, ma aram e ra munmun ma dab ki maruwel gelngin Got nib thothup u dakendad. Riyul’ nra buch e re n’ey ni bochan e n’en ni yog David u tomuren ni kar denengow Beth-sheba. I kalngan’ me wenig ngak Jehovah ni gaar: “Dab mu n’igeg nggu chuw u p’eowchem; dab mu chuweg rog [“gelngim nib thothup,” NW].” (Ps. 51:11) Kemus ni yigoo piin ni kan dugliyrad ni yad ra par ni yad ba “yul’yul’” nge mada’ ko yam’ e yira pi’ e “teeliyaw” ngorad ni aram e yafas ni manemus u tharmiy. (Rev. 2:10; 1 Kor. 15:53) Piin Kristiano ni yad be athapeg e yafas ni manemus u fayleng e kub t’uf gelngin Got nib thothup rorad ni faanra nge yog nra pared ni yad ba yul’yul’ ngak Got me yog fare tow’ath ngorad ni aram e yafas ni manemus nra yog u daken fare biyul ni pi’ Kristus. (John 3:36; Rom. 5:8; 6:23) Ere aram fan nthingar da kol ayuwgad ndab da rin’ed ban’en nib togopuluw nga rogon ni ma maruwel gelngin Got nib thothup.

Uw Rogon Nra Togopuluw Reb e Kristiano nga Rogon ni Ma Maruwel Gelngin Got nib Thothup?

5, 6. Uw rogon nra togopuluw reb e Kristiano nga rogon ni ma maruwel gelngin Got nib thothup?

⁵ Gad e Kristiano e rayog ni nge dab da rin’ed ban’en nib togopuluw nga rogon ni ma maruwel gelngin Got nib thothup. Rayog ni ngad rin’ed e re n’ey ni faanra ud ‘paged gelngin Got nib thothup nge mang ir e i gagiyegnag pangidad,’ ma aram e rayog ni ngad gelgad ko pi n’en ni yima ar’arnag me m’ug pi fel’ngin Got rodad. (Gal. 5:16, 25, 26) Machane, rayog ni nge thil ngad rin’ed ban’en nib togopuluw nga rogon ni ma maruwel gelngin Got nib thothup mad paged gadad ngad man’gad nga orel ko tirok Got ndab da nanged, me munmun ma gad un ko ngongol nib kireb.

⁶ Faanra gubin ngiyal’ ndarud ngongolgad nib puluw nga rogon ni be pow’iydad gelngin Got nib thothup, ma aram e gad be togopuluw ngay nge Jehovah ni Ir e ma yib e re gelngin nem rok. Faan gad ra fal’eg i yaliy e thin ko Efesus 4:25-32, ma be dag rogon nthingar da ngongolgad nge rogon ni ndab da rin’ed ban’en nib togopuluw nga rogon ni ma maruwel gelngin Got nib thothup.

Rogon Ndab Da Rin’ed Ban’en nib Togopuluw nga Rogon ni Ma Maruwel Gelngin Got nib Thothup

7, 8. Mu weliy fan nthingar u dogned e tin riyul’.

⁷ Thingar u dogned e tin riyul’. I yoloy Paul u Efesus 4:25 ni gaar: “Dab ku un lifith l’uguney! Ra be’ ma thingari yog e tin nib riyul’ ngak walagen, ya gadad gubin ni goo gadad yu yang u downgin Kristus.” Bochan ni gad gubin ni “goo gadad yu yang u downgin Kristus,” ma susun ndab da bannaged e piin taareb e michan’ rodad, ya piin ni yad ma rin’ e ngongol ni aram rogon e dabiyog ni nge fel’ e tha’ u thilrad Got.​—Mu beeg e Proverbs 3:32.

⁸ Thin nge ngongol nib sasalap e rayog ni nge kirebnag e taareban’ u lan e ulung. Ere, ngad boded Daniel ni profet nrayog ni nge pagan’uy ngak ma dariy thibngin. (Dan. 6:4) Kub fel’ ni ngad lemnaged e fonow ni pi’ Paul ngak e pi Kristiano ni yad be athapeg e yan nga tharmiy. I yog ngorad ni piin ni yad bang ko “dowef rok Kristus” e ra bagayad ma ba milfan ngak bagayad mab t’uf ni ngar pared nib taareban’rad e tin riyul’ i gachalpen Jesus ni kan  dugliyrad. (Efe. 4:11, 12) Faanra gad be athapeg e yafas ni manemus u Paradis u fayleng, ma thingar u dogned e tin riyul’ ya nge yog ni ngaud pared pi walagdad u ga’ngin yang e fayleng nib taareban’dad.

9. Mang fan nib fel’ ni ngad folgad ko fare fonow ni bay ko Efesus 4:26, 27?

⁹ Thingar da togopuluwgad ngak Moonyan’, ma gad guy rogon ni nge dabi kirebnag e michan’ rodad. (Jas. 4:7) Gelngin Got nib thothup e ma ayuwegdad ni ngad gelgad ngak Satan. Rayog ni ngad gelgad ngak Satan ni faanra dab ud damumuwgad nib pag rogon. I yoloy Paul ni gaar: “Faanra mu damumuwgad, ma dab mpaged e damumuw romed nge fekmed nga fithik’ e denen; ma dab mpired ni gimed ba damumuw nge polo’ reb e rran. Dab mu binged e kanawo’ ngak moonyan’.” (Efe. 4:26, 27) Faanra kad damumuwgad nga ban’en, ma gad ra gur ngad meybilgad u lanin’dad nib papey ma rayog ni nge “paslag” lanin’dad ya nge dab da rin’ed ban’en nib togopuluw nga rogon ni ma maruwel gelngin Got nib thothup. (Prov. 17:27, BT) Ere dab ud pared ni gad ba damumuw, ya rayog ni ngad binged e kanawo’ ngak Satan ni nge waliydad ko kireb. (Ps. 37:8, 9) Reb e kanawo’ ni ngad togopuluwgad ngak Satan e ngad gurgad ngad pithiged e magawon ni ke sum u thildad nrogon nib puluw ko fonow rok Jesus.​—Matt. 5:23, 24; 18:15-17.

10, 11. Mang fan nib kireb ni ngad moro’ro’gad ara da rin’ed ban’en u fithik’ e sasalap?

¹⁰ Dab da paged ban’en nge waliydad ngad moro’ro’gad ara ngad bangad. I weliy Paul murung’agen e moro’ro’ ni gaar: “Cha’ ni be moro’ro’ e nge tal ko moro’ro’ nge tabab ko maruwel nge thognag e salpiy ni fan ko par rok, nge yog ni ayuweg e piin ni gafgow.” (Efe. 4:28) Faanra moro’ro’ reb e Kristiano ma aram e be ‘m’aynag fan’ fithingan Got ni bochan e be kirebnag. (Prov. 30:7-9) Ku ra gab gafgow ma gathi be yip’ fan nrayog ni ngam moro’ro’. Piin nib t’uf Got rorad nge piin nib migid ngorad e yad manang nib kireb ni ngan moro’ro’.​—Mark 12:28-31.

¹¹ Gathi kemus ni ke yog Paul e n’en ndab da rin’ed, ya ki yog e n’en nthingar da rin’ed. Faanra gad be yan u kanawoen gelngin Got nib thothup, ma aram e gad ra maruwel nib gel ni ngad ayuweged e tabinaw rodad nge “piin ni gafgow.” (1 Tim. 5:8) I tay Jesus nge pi apostal e salpiy nga bang ni fan ko piin gafgow, machane me chel Judas Iskariot nge iring boch riy. (John 12:4-6) Ere de pag gelngin Got nib thothup ni nge pow’iy. Machane, gadad e piin ni be pow’iydad gelngin Got nib thothup e thingar da “yul’yul’gad u urngin ban’en.” (Heb. 13:18, NW) Faan gad ra rin’ ni aram rogon, ma aram e darud rin’ed ban’en nib togopuluw nga rogon ni ma maruwel gelngin Got nib thothup.

Ku Boch e Kanawo’ Ndab Da Togopuluwgad nga Rogon ni Ma Maruwel Gelngin Got nib Thothup

12, 13. (a) Ba miti mang thin e be yog e Efesus 4:29 ni thingar dab u dogned? (b) Susun ni uw rogon ni ngaud nonad?

¹² Thingar da gonopiyed rogon ni gad ma non. I yog Paul ni gaar: “Dab umogned e thin nib kireb ku be’. Ke mus ni thin nra ayuweg be’ e nguu mogned, ni fa mit nem e thin ni ma fonownag e girdi’ me yib fan ngorad, fan e  tin ni nga mogned e nge rin’ e tin nib fel’ ban’en ngak e piin ni kar motoyilgad ngomed.” (Efe. 4:29) Ere gathi kemus ni ke yog Paul e n’en nsusun e dab da rin’ed; ya ki yog e n’en ni susun e ngad rin’ed. Gelngin Got nib thothup e ir e ra pow’iydad ni nga dogned e thin nra ayuweg be’ ni ‘fa mit nem e thin ni ma fonownag e girdi’ me yib angin ngorad.’ Maku reb e dab i yib e “thin nib kireb” u l’ugundad nga but’. Fare bugithin ni Greek ni kan piliyeg ni “kireb” e be yip’ fan wom’engin e gek’iy, fa nig, ara ufin ni ke kireb. Dubdad ni ngad ked e ggan ni ke kireb, ere thingar kud fanenikayed e thin ni dabun Jehovah.

¹³ Thingar ud nonad u fithik’ e sumunguy nge gol, ma nga u dogned e ‘thin nib fel’ ma ba’ fan.’ (Kol. 3:8-10; 4:6) Rogon ni gad ma non e thingari m’ug riy ni gad ba thil. Ere ngad pied e athamgil nga laniyan’ boch e girdi’ ni aram e nga u dogned e ‘thin nra ayuwegrad.’ Ma manga yugu da lemgad ni bod rogon e en ni yoloy e Psalm ni gaar: “Mang e gu par nib fel’ u wun’um e thin ni be yib u l’ugunag nge pi n’en ni gu be lemnag. A Somol, ni gur e gu be naf nga tan paam mi gur e Tabiyul rog!”​—Ps. 19:14.

14. Mang boch e ngongol ni be yog e Efesus 4:30, 31 ni thingar da siyeged?

¹⁴ Thingar da siyeged e damumuw nib pag rogon, nge thin nib kireb, nge gubin mit e kireb. Tomuren ni yog Paul ndab ni rin’ ban’en nib togopuluw nga rogon ni ma maruwel gelngin Got nib thothup, me yog ni gaar: “Mu n’iged fan u wun’med urngin ban’en nib kireb ni ke aw nga lanin’med, nge tin ni kam dabuyed rok be’, ma dab ku um damumuwgad. Dab ku um tolulgad ngak be’ u fithik’ e damumuw ara umogned e thin nib kireb ngak be’! Dab ku um fanenikayed be’!” (Efe. 4:30, 31) Dawor da flontgad ere ba t’uf ni ngad gayed rogon ni ngad gagiyegniged e lem nge ngongol rodad. Faanra ud “damumuwgad” ma aram e gad be rin’ ban’en nib togopuluw nga rogon ni ma maruwel gelngin Got nib thothup. Ku taareb rogon ni faanra aw nga lanin’dad e n’en nib kireb ni ke rin’ be’ ngodad ma dabda n’aged fan. Maku reb, e faanra dabda folgad ko fonow nu Bible, ma rayog ni ngad tababgad i rin’ boch ban’en nra k’aringdad ni ngad denengad nib togopuluw nga gelngin Got nib thothup me yib wenegan nib kireb ngodad.

15. Faanra ke rin’ be’ ban’en ni dubdad, ma mang e ngad rin’ed?

¹⁵ Ba t’uf ni ngad golgad ngodad, mu ud munguygad ngodad, mu ud n’aged fan e kireb. I yoloy Paul ni gaar: “Um golgad ngomed, me bigimed me munguy ngak bigimed, mu um n’iged fan u wan’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.” (Efe. 4:32) Mus ni faanra kad dabuyed e n’en ni ke rin’ be’ ngodad, ma ngad n’aged fan ni bod Got ni ma n’ag fan. (Luke 11:4) Bod ni faanra ke yog reb e walag ban’en nib kireb u murung’agdad, ma gad non ngak ni bochan e gad baadag ni nge puf e magawon u thildad. Ma aram mi ri wenig, me yog ni ngad n’aged fan rok. Ere kad n’aged fan, machane ku bay ban’en ni thingar da rin’ed. Be gaar e Levitikus 19:18: “Dabi guy be’ rogon ni nge fulweg taban e kireb ngak be’, ara i par ni be fanenikay faanem, ya nge par nib t’uf yugu boch e girdi’ rok ni bod ir nib t’uf ir rok. I gag e Somol.”

Ba T’uf ni Ngaud Tedan’dad

16. Mu weliy ban’en nrayog ni nge buch ni be dag boch ban’en nib t’uf ni ngad thilyeged ya nge dab da rin’ed ban’en nib togopuluw nga gelngin Jehovah nib thothup.

¹⁶ Mus nga nap’an ni goo gadad u bang maku rayog ni ngad rin’ed ban’en ni dabun Got. Bod nreb e walag e ma motoyil nga boch e musik nde fel’ ni  nge motoyil e piin Kristiano ngay. Me munmun me magawon e nangan’ rok ni bochan e der fol ko fonow nu Bible ngu lan e pi babyor ni ma fal’eg fare “tapigpig nib yul’yul’ ma ba gonop.” (Matt. 24:45) Ere ke yibilay e magawon rok ngak Got me lemnag fare thin ni yog Paul ni bay ko Efesus 4:30. Ma aram me dugliy u wan’ ndab ki rin’ ban’en nib togopuluw nga rogon ni ma maruwel gelngin Got nib thothup, ma dabki motoyil nga boch e musik nde fel’. Rra tow’athnag Jehovah e re walag nem ni bochan e n’en ni ke rin’. Ere ngad kol ayuwgad ndab da rin’ed ban’en nib togopuluw nga rogon ni ma maruwel gelngin Got nib thothup.

17. Mang e rayog ni nge buch ni faanra dab ud tedan’dad ngaud meybilgad?

¹⁷ Faanra dab da tedan’dad ngaud meybilgad, ma rayog ni ngad rin’ed reb e ngongol nib kireb nib togopuluw nga rogon ni ma maruwel gelngin Got. Faan gad ra rin’ ban’en nib togopuluw nga rogon ni ma maruwel gelngin Got nib thothup ma ra kireban’ Jehovah ni bochan ma pi’ gelngin nib thothup ni nge ayuwegdad ni ngad daged boch e fel’ngin nib puluw nga rogon ni ma lem nge rogon ni ma dugliy ban’en. Ere aram ban’en ni dubdad ni ngad rin’ed. (Efe. 4:30) Pi tayugang’ ko teliw rok piyu Jew kakrom e u rogned ni Satan e ir e pi’ gelngin e pi maang’ang ni i fal’eg Jesus. (Mu beeg e Mark 3:22-30.) Pi toogor rok Kristus nem e u ‘rogned e thin nib kireb nib togopuluw nga gelngin Got nib thothup,’ ere aram fan ndabi n’ag Got fan e kireb rorad. Manga yugu dab da rin’ed e n’en ni i rin’ e pi girdi’ nem!

18. Uw rogon ma gad nang ndawor da rin’ed reb e denen ndabiyog ni ngan n’ag fan?

¹⁸ Bochan ni dubdad ni ngad rin’ed reb e denen ndabiyog ni ngan n’ag fan, mab t’uf ni ngad lemnaged e n’en ni yog Paul u murung’agen rogon ndab ni togopuluw nga rogon ni ma maruwel gelngin Got nib thothup. Machane uw rogon ni faanra kad rin’ed reb e denen nib ubchiya’? Faanra kad kalgadngan’dad, ma ke ayuwegdad e piin piilal, ma aram e be m’ug ni ke n’ag Got fan e denen rodad ma dawor da denengad nib togopuluw nga gelngin Got nib thothup, ma rayog ni nge ayuwegdad Got nge dab kud rin’ed ban’en nib togopuluw nga rogon ni ma maruwel gelngin nib thothup.

19, 20. (a) Mang boch ban’en ni ngad siyeged? (b) Mang e ngad rin’ed?

¹⁹ Ma fanay Got gelngin nib thothup ni nge yibnag e t’ufeg, nge felfelan’, nge taareban’ ko girdi’ rok. (Ps. 133:1-3) Ere thingar dab ud gun’gun’gad, maku dab u dogned boch e thin nra darifannag e piin ni kan tayrad ni ngar ayuweged e ulung. (Acts 20:28; Jude 8) Ya thingar da gayed rogon ni nge par e ulung nib taareban’ e girdi’ riy mu ud ted fadad. Maku reb, e dab ud yurba’gad u lan e ulung. I yoloy Paul ni gaar: “Gu be wenig ngomed, pi walageg, ni Jesus Kristus ni ir e Somol rodad e ke pi’ mat’awug ni be lungug: nge taareban’med ni gimed gubin ko tin ni gimed be weliy, ma aram e dabiyog ni ngam yoor raba’gad; mi gimed par ni gimed ba taareb ma taab pa’ lanin’med ma taa ban’en e gimed be nameg.”​—1 Kor. 1:10.

²⁰ Rayog rok Jehovah maku baadag ni nge ayuwegdad ni nge dab da rin’ed ban’en nib togopuluw nga rogon ni ma maruwel gelngin nib thothup. Ngad ululgad ngaud yibilayed gelngin nib thothup, ma gad guy rogon ndab da rin’ed ban’en ni nge togopuluw ngay. Manga yugu da yunged ‘ban’en ni fan nga gelngin Got nib thothup,’ ma gad pag ni nge gagiyegnagdad e chiney i yan nga m’on.

Uw Rogon ni Ga Ra Fulweg?

• Mang e be yip’ fan ni ngan rin’ ban’en nib togopuluw nga rogon ni ma maruwel gelngin Got nib thothup?

• Uw rogon nrayog ni nge rin’ reb e tapigpig rok Jehovah ban’en nib togopuluw nga rogon ni ma maruwel gelngin nib thothup?

• Mang boch e kanawo’ ni nge dab da togopuluwgad nga rogon ni ma maruwel gelngin Got nib thothup?

[Study Questions]

[Picture on page 30]

Ngan gur ngan pithig e magawon ni ke sum u thiliy

[Picture on page 31]

Ba miti mang wom’engin e taareb rogon ko thin ni ga ma yog?