N’en nra Gagiyel u Nap’an e Rran rok Jehovah

“Rran rok Somol e bayi taw ni bod rogon ba moro’ro’, . . . ma fayleng nge urngin e tin ni ba’ riy e bay chuw.”​—2 PET. 3:10.

1, 2. (a) Uw rogon nra mus e re m’ag nib kireb ney? (b) Mang boch e deer ni gad ra weliy?

 KE BAN Satan ke yog ni girdi’ e rayog ni ngar gagiyegniged e re fayleng ney ma de t’uf ni nge ayuwegrad Jehovah. (Ps. 2:2, 3) Ere gur, rayog ni nge par e re fayleng ney ni manemus ni faanra gubin ban’en u murung’agen e googsur? Ri dabiyog. Machane, de t’uf ni ngad sonnaged e fayleng rok Satan ni nge mogoth rok. Ya ra taw nga nap’an ni ke dugliy Got ni nge gothey e re fayleng ney ma ra rin’ u rogon nib m’agan’ ngay. N’en nra rin’ ko re fayleng nib kireb ney e be dag ni ir reb e Got nib mat’aw ma ma t’ufegey.​—Ps. 92:7; Prov. 2:21, 22.

² I yoloy apostal Peter ni gaar: “Rran rok Somol e bayi taw ni bod rogon ba moro’ro’. Chirofen nem e bay yan nga bayang lan e lang ni be falgar lingan, ma urngin e tin ni bay u lan e lang ban’en ni bayi yik’ nge kireb, ma fayleng nge urngin e tin ni ba’ riy e bay chuw.” (2 Pet. 3:10) Mang e be yip’ fan e “lan e lang” nge “fayleng” ni kan weliy murung’agen u roy? Ma mang e “tin ni bay” riy nra yik’ nge kireb? Ma mang e yip’ Peter fan u nap’an ni yog ni “fayleng nge urngin ban’en ni ba’ riy e bay chuw”? Faan gad ra nang e fulweg ko pi deer ney ma ra ayuwegdad ni ngad fal’eged rogodad ni fan ko pi n’en ni bayi buch ndab ki n’uw nap’an.

Fare Lan e Lang nge Fayleng nra Chuw

3. (a) Mang fare “lan e lang” ni kan weliy murung’agen ko 2 Peter 3:10? (b) Uw rogon nra yan nga bayang?

³ Fare bugithin ni “lan e lang” nib fanathin u Bible e ba ga’ ni yima fanay ni nge yip’ fan e gagiyeg. (Isa. 14:13, 14; Rev. 21:1, 2) Fare “lan e lang” nra yan nga bayang e be yip’ fan e gagiyeg ko girdi’ ni ir e ke suwey e re m’ag ney. Ma fare n’en nra yan nga bayang “ni be falgar lingan,” e sana be yip’ fan feni machreg ni yira thang e pi am ney.

4. Mang e be yip’ fan e “fayleng,” ma uw rogon ni yira gothey?

⁴ Fare bugithin ni “fayleng” e be yip’ fan e girdi’ ni yad ba dar rok Got. Aram rogon e girdi’ u nap’an Noah, ma aram fan ni yog Got ni yira thangrad u nap’an fare Ran ni Tharey e Fayleng. “Lan e lang nge re fayleng ney ni ba’ e chiney e ka re bugithin nem rok Got e ir e ke tay ndabi kireb nge yan i mada’ ko ngiyal’ ni nge yib e nifiy i kirebnag. Ke tay Got ndabi kireb ni fan ko chirofen ni bay ni pufthinnag e girdi’ nib kireb nge mu’ min kirebnagrad.” (2 Pet. 3:7) Nap’an Noah ma kan gothey e girdi’ nib kireb ni taab yay, machane fare “gafgow ni ba ga’” ni bayi yib e ra buch ni buchuuw ma buchuuw. (Rev. 7:14) Som’on e ra pow’iy Got e pi pilung ko re fayleng ney ni ngar gotheyed fare “Babylon nib Gilbuguwan” ya nge m’ug ni be togopuluw ngak fare pin ni ma pi’ ir ni chuway’ ni be yip’ fan e pi yurba’ i teliw ni googsur. (Rev. 17:5, 16; 18:8) Ma n’en nra buch ko tomur ni aram e Armageddon, e ra gothey Got gubin ban’en ni ke magey ko re fayleng rok Satan ney.​—Rev. 16:14, 16; 19:19-21.

“Urngin e Tin ni Bay . . . ni Bayi Yik’ nge Kireb”

5. Mang e ba muun nga ‘urngin e tin ni bay’ ban’en?

⁵ Ere mang “urngin e tin ni bay” ni “bayi yik’ nge kireb”? “Urngin e tin ni bay” ni weliy Peter murung’agen e be yip’ fan e ngongol, nge lem, nge kanawo’, nge pi n’en ni be nameg e girdi’  nu fayleng. Maku fare bugithin ni “urngin e tin ni bay” e ba muun ngay e “lem nu roy u fayleng,” ni ir e be “gagiyegnag e piin ndarir folgad rok Got.” (1 Kor. 2:12; mu beeg e Efesus 2:1-3.) Re “lem” nem e ke garer u lan e re fayleng rok Satan ney. Ma k’aring e girdi’ ni ngar lemgad, mar nonad, mar ngongolgad u boch e kanawo’ ni be m’ug e lem rok Satan riy ni ir e “pilung rok e pi kan nu lan e lang.”

6. Uw rogon ni ma m’ug e lem ko fayleng?

⁶ Piin ni ke af e lem nu fayleng ngorad e yad be pag Satan ni nge gagiyegnag lanin’rad ya nge m’ug riy e lem nge ngongol rok. Wenegan ni ke yib riy, e yad ma rin’ e tin ni yad baadag, ma yad ma darifannag e tin nib m’agan’ Got ngay. Gubin ban’en ni yad ma rin’ u fithik’ e tolangan’ nge lem ni fel’ ngak, ma yad ma togopuluw ko piin ni yad ma yog e thin, maku yad ma rin’ e “tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad.”​—Mu beeg e 1 John 2:15-17.

7. Mang fan ni ngad ‘kol ayuwgad’ ko n’en ni gad ma suguy nga lanin’dad?

⁷ Ere rib ga’ fan ni ngad ‘kol ayuwgad’ ko n’en ni gad ma suguy nga lanin’dad ni aram e ngad gonopiyed e piin ni gad ma chag ngorad, nge babyor ni gad ma beeg, nge n’en ni gad ma chuweg e chalban rodad ngay, nge Web sites ni gad ma yan ngay ko Internet! (Prov. 4:23) Ke yoloy Paul ni gaar: “Mu guyed rogomed ya ri kolmed be’ ngam manged kalbus rok ni be’ ni be maruwel ko gonop rok e girdi’ nge sabanban ndariy rogon nga bayang, ni yib ko machib ni sum rok e girdi’ ni yibe fil ngak reb e mfen nge reb, ma ki yib ko pi kan ni yad be gagiyeg u lan e gin’en ni ba’ urngin ban’en nu lan e lang riy nib muun e fayleng ngay, ma gathi Kristus e yib rok.” (Kol. 2:8) Re thin ney ni kan tay chilen e rib ga’ fan ni ngan fol riy ya be chugur i yib fare rran rok Jehovah. Gelngin e ‘damumuw’ rok Jehovah e ir e ra kirebnag “urngin e tin ni bay” ko fayleng rok Satan, ya ngan nang ndabiyog ni ngar gelgad ko damumuw rok. Re n’ey e be puguran ngodad fare thin ni bay ko Malaki 4:1 ni gaar: “Fare Rran e be yib ni bay taw ngay ma urngin e girdi’ nib uf nge girdi’ nib kireb e bay ra yik’gad ni bod e pan nib melik’. Chirofen nem e bay ra yik’gad, ni bod ba ke gek’iy nra un lik’ngin ngay nge urngin yang riy.”

“Fayleng nge Urngin e Tin ni Bay Riy e Bay Chuw”

8. Uw rogon nra “chuw” e fayleng nge tin ni bay riy?

⁸ Mang e be yip’ Peter fan u nap’an ni yog ni “fayleng nge urngin e tin ni ba’ riy e bay chuw”? N’en ni be yip’ Peter fan e nap’an fare gafgow nib ga’ ma ra gagiyelnag Jehovah e tin nib kireb ni be rin’ Satan nib togopuluw Ngak nge Gil’ilungun. Ke weliy e Isaiah 26:21 (BT) murung’agen e re ngiyal’ i n’em u daken e yiiy ni gaar: “I Somol e be yib u tharmiy ko gin ma par riy ni nge gechignag e girdi’ nu fayleng ko pi denen rorad. Pi mthang pogofan ni un rin’ nib mith u roy u fayleng e ra m’ug, ma but’ e dabki mithag e piin nthang e pogofan rorad.”

9. (a) Mang e pi n’en ni ngad siyeged, ma mang fan? (b) Mang e ngad maruweliyed ni nge yog ngodad, ma mang fan?

⁹ Nap’an fare rran rok Jehovah ma piin ni kar paged yad ko re fayleng ney be gagiyegnagrad e ra yan i gagiyel e bin riyul’ i rarogorad, mar chelgad ngorad ngaur lied yad. Bin riyul’ riy e pi kachido ni yaan e cham ni ma yaliy e girdi’ e ngiyal’ ney e dabisiy ni aram e n’en nra gagiyegnag lanin’rad e ngiyal’ nem me “bagayad me chel nge cham ko en nu charen.” (Zek. 14:13, BT) Ere, rib ga’ fan ni ngad siyeged e kachido, babyor, video games, nge ku boch ban’en nrayog ni nge k’aringdad ni ngad rin’ed boch ban’en nib togopuluw ngak Got ni bod e tolangan’ nge cham! (2 Sam. 22:28; Prov. 6:16-19) Ma ngad maruweliyed ni nge yog ngodad wom’engin gelngin Got nib thothup, ya aray e pi fel’ngin ndabi m’ay u nap’an nra yib fare rran rok Jehovah.​—Gal. 5:22, 23.

“Bin nib Beech e Lan e Lang nge Bin nib Beech e Fayleng”

10, 11. Mang e “bin nib beech e lan e lang” nge “bin nib beech e fayleng”?

¹⁰ Mu beeg e 2 Peter 3:13. Fa “bin nib beech e  lan e lang” e aram Gil’ilungun Got ni ke tabab ko gagiyeg ko duw ni 1914 u nap’an ni ke m’ay e “ngiyal’” ni kan dugliy ni fan ko pi nam. (Luke 21:24) Re am ney e Jesus Kristus nge fare 144,000 e yad ra mang pilung riy, ma yooren e chi ulung ney e ka ranod nga tharmiy. Fare babyor ni Revelation e be yog ni pi cha’ ney ni kan mel’egrad e aram e piin ni be yip’ fan “fare Binaw nib Thothup, ni aram fa bin nib beech e Jerusalem ni be yib u tharmiy nga but’ ni ke yib rok Got, ni ke fal’eg rogon ni bod be’ ni ppin ni nge mabgol ni ke yin’ e mad rok nib fel’ ni nge yan ngar mada’gow e pumoon rok.” (Rev. 21:1, 2, 22-24) Fare Jerusalem nib beech ni be yip’ fan fare 144,000 nge pumoon rok ni be yip’ fan Jesus e yad girdien fare am nra gagiyeg u lan e bin nib beech e m’ag, ni bod nu Jerusalem e immoy e am nu Israel riy kakrom. Re mach ney e bod nra ‘yib u tharmiy nga but’’ ya ra gagiyegnag e fayleng.

¹¹ Fa “bin nib beech e fayleng” e be yip’ fan e piin ni yad ra par u fayleng u tan Gil’ilungun Got. Re flaab ko tirok Got nem ni bay ko pi tapigpig rok Got e ngiyal’ ney e rra yan i par nga rogon u lan e bin nib beech e “fayleng” rok Got ni bayi yib. (Heb. 2:5) Uw rogon ma rayog ni ngad manged bang ko re m’ag nib beech nem?

Mu Fal’eg Rogom ni Fan ko fare Rran rok Jehovah

12. Mang fan nra gin e girdi’ u nap’an nra yib fare rran rok Jehovah?

¹² Paul nge Peter e ka rognew nra yib fare rran rok Jehovah ni bod “be’ nib moro’ro’” nib mo’maw’ ni ngan nang. (Mu beeg e 1 Thessalonika 5:1, 2.) Mus ko tin riyul’ e Kristiano ni yad be sonnag e re rran nem e yad ra gin nga feni machreg nra taw. (Matt. 24:44) Machane, kab gel e gin nra tay e girdi’ nu fayleng. Ke yoloy Paul ni gaar: “Ngiyal’ nem e ra gaar e girdi’ e ke gapas ndariy ban’en nra buch, ma yad ra da’da’ ni ke taw e riya’ ngorad! Ma dabiyog ni ngar milgad riy ya bod e amith ni ma yib ngak be’ ni ppin ni be n’en ni nge gargel.”​—1 Thess. 5:3.

13. Mang e ngad rin’ed ma dab ni bannagdad u nap’an nra yog e girdi’ ni “ke gapas ndariy ban’en nra buch!”?

¹³ Nap’an nra yog e girdi’ ni “ke gapas ndariy ban’en nra buch!” ma aray e thin ni ke thagthagnag e pi kan nib kireb; machane, dabiyog ni nge bannag e pi tapigpig rok Jehovah. I yoloy Paul ni gaar: “Dakumur pired u fithik’ e lumor, ere dabiyog ni ngam da’da’gad ko re Rran nem ni bod ba moro’ro’ ni mda’da’gad ngak. Ya gimed gubin ni kam manged girdien e tamilang ni gimed girdien e rran.” (1 Thess. 5:4, 5) Ere ngad athamgilgad ngad pared ni gad ba dar ko fayleng rok Satan ni be par u fithik’ e lumor ko tirok Got ban’en. I yoloy Peter ni gaar: “Machane, gimed e pi tafager rog e goo kam nanged e re bugithin ney. Ere mu gonopiyed gimed, nge dabiyog ni waliymed nga bayang e oloboch ni be tay e piin ndariy fan e motochiyel u wun’rad ngam thaygad ko gin ni kam pired riy ndabi buch ban’en romed riy.”​—2 Pet. 3:17.

14, 15. (a) Uw rogon ni be tay Jehovah fadad? (b) Mang thin ni kan thagthagnag e thingar da fal’eged i lemnag?

¹⁴ Mu tay fanam i yan riy ni gathi kemus ni ke yog Jehovah ni ‘ngad gonopiyed gadad’ ngemu’ ma kemus. Ya, ki ayuwegdad ni ngad “nanged” e pi n’en nra buch nga m’on.

¹⁵ Boch e girdi’ e dariy fan u wan’rad e  puguran ni kan pi’ ngorad ni ngar pared ni yad ba od ko tirok Got ban’en. Sana boch i yad e ma gaar, ‘Ke n’uw nap’an ni yima yog e re n’ir.’ Machane, piin ni yad ma non ni aram rogon e thingar ra nanged ni faan yad ra non ni aram rogon ma gathi goo fare tapigpig nib yul’yul’ ma ba gonop e darur pagedan’rad ngak, ya ku der pagan’rad ngak Jehovah nge Jesus. Ke gaar Jehovah: “Ngam sonnag.” (Hab. 2:3) Miki yog Jesus ni gaar: “Mu fal’eged rogomed ngam pired, ya da mu nanged e chirofen ni bay yib e Somol romed riy.” (Matt. 24:42) Ki yoloy Peter ni gaar: “Ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Got!” (2 Pet. 3:11, 12) Fare tapigpig nib yul’yul’ ma ba gonop nge fare ulung ni ma pow’iyey e dab ra darifannaged e pi thin nib riyul’ ney!

16. Mang lem e ngad siyeged, ma mang fan?

¹⁶ Fare “tapigpig nib kireb” e ir e be yog ni be sagaal fare Masta. (Matt. 24:48) Re tapigpig nib kireb nem e ba muun ngak e piin ni kan weliy murung’agrad ko 2 Peter 3:3, 4. I yog Peter ni nap’an e “tin tomur e rran e bay yib i m’ug boch e girdi’ ni tin ni yad be yim’ ni bochan e ir e be gagiyegnag pangirad,” ma bay ur moningniged e piin ni yad be sonnag fare rran rok Jehovah u fithik’ e yul’yul’. Pi tamoning ney e darur tedan’rad nga Gil’ilungun Got ya kemus ni goo yad nge tin ni yad be yim’ ni bochan e ir e yad be lemnag. Ere, thingar dab da uned ko lem nge ngongol ni aray rogon! Ya n’en ni ngad rin’ed e ngad ‘lemnaged e gum’an’ rok e Somol rodad, ni aram e tayim ni be pi’ ngodad ni ngad guyed rogon ni ngad thapgad ngak,’ ma ngad tedan’dad ko machib nge ngan yognag boch pi gachalpen Jesus ma dabi magafan’dad ko pi n’en ni Jehovah Got e ir e ba milfan ngak.​—2 Pet. 3:15; mu beeg e Acts 1:6, 7.

Nge Pagan’um Ngak Fare Got ni Ma Thapegey

17. Mang e ke rin’ e piin Kristiano kakrom u tomuren ni ke yog Jesus ni ngar chuwgad u Jerusalem, ma mang fan?

¹⁷ Tomuren ni ke yib e pi salthaw nu Roma ngar chamgad nga Judea ko duw ni 66 C.E., ma pi Kristiano ni yad ba yul’yul’ e kar folgad ko thin ni yog Jesus ni ngar chuwgad ko fare mach nu Jerusalem nib papey. (Luke 21:20-23) Mang fan ni kar chuwgad nib papey? Dariy e maruwar riy ni kar tedan’rad ko thin ni yog Jesus. Ba mudugil ni yad manang nde mom e n’en ni ngar rin’ed, ya ke yog Kristus u m’on riy. Machane, ku yad manang ndabi pag Jehovah e piin ni yad ba yul’yul’ ngak.​—Ps. 55:22.

18. Uw rogon ni ke ayuwegem fare thin rok Jesus ni bay ko Luke 21:25-28 u rogon ni ga be lemnag fare gafgow nib ga’ ni bay yib?

¹⁸ Ku arrogodad nthingari pagan’dad ngak  Jehovah ya kemus ni yigoo ir e rayog ni nge ayuwegdad u nap’an nra yib fare gafgow nib ga’. Tomuren ni ke tabab fare gafgow nib ga’ ngu m’on nra gechignag Jehovah e piin ni yad ba kireb, ma ra “aw e girdi’ nga but’ ko marus ko ngiyal’ ni baaram ni yad be sonnag e n’en ni be yib i yib nga daken e fayleng ni polo’.” Machane, pi tapigpig rok Jehovah ni yad ba yul’yul’ e dab ra rusgad ya yad manang ni ke chugur ni ngan chuwegrad u fithik’ e gafgow.​—Mu beeg e Luke 21:25-28.

19. Mang e gad ra fil ko bin migid e thin?

¹⁹ Ere, rib gel e felfelan’ nra yib ngak e piin ni yad be par ni yad ba dar ko re fayleng ney nge “urngin e tin ni bay” riy boch nga m’on. Machane, bin migid e thin e be weliy ni faanra gad baadag ni nge yog e yafas ni manemus ngodad ma gathi kemus ni ngad siyeged e tin nib kireb, ya kub t’uf ni ngad maruweliyed e pi fel’ngin nib fel’ u wan’ Jehovah ma gad rin’ e tin nib m’agan’ ngay.​—2 Pet. 3:11.

Rayog ni Ngam Weliy?

• Mang e be yip’ fan . . .

e bin chiney e ‘lan e lang nge fayleng’?

“urngin e tin ni bay”?

e ‘bin nib beech e lan e lang nge bin nib beech e fayleng’?

• Mang fan nri be pagan’dad ngak Got?

[Study Questions]

[Picture on page 13]

Uw rogon ni ngam “kol ayuw” ko pi n’en ni ga ma suguy nga lanin’um ma ga par ni gab dar ko fayleng?

[Picture on page 14]

Uw rogon ni nge m’ug ni gad be ‘lemnag e gum’an’ rok e Somol rodad, ni aram e tayim ni be pi’ ngodad ni ngad guyed rogon ni ngad thapgad ngak’?