Re ‘Mit i Girdi’ ni Susun e Ngam Boded’

“Faanra urngin ban’en ma bay ni kirebnag ni ara’ rogon, me ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got.”​—2 PET. 3:11.

1. Mang fan nib m’ag e gin l’agruw e babyor ni yoloy Peter nga rarogon e pi Kristiano kakrom?

 I YOLOY apostal Peter e gin l’agruw e babyor rok ni kan thagthagnag ko ngiyal’ ni un togopuluw ko pi Kristiano kakrom. Machane ur pared ni yad ba pasig ma yad be mon’og i yan. Aram fan ni fanay Satan yugu reb e kanawo’ ni i fanay kafram ni nge warnag e michan’ rorad. Rogon ni yog Peter, e guy Satan rogon ni nge fanay e pi tamachib ni googsur ni “ke mus ni ppin nib darngal e yad ba adag ni ngar changargad ngorad” ma “lanin’rad e ke ilal nga fithik’ e chogow.” (2 Pet. 2:1-3, 14; Jude 4) Ere gin l’agruw e babyor ni yoloy Peter e be fonownag e pi Kristiano ni ngaur yul’yul’gad.

2. Mang e be weliy e bin l’agruw e Peter ko guruy ni 3, ma mang e thingar da fithed gadad riy?

² Ke yoloy Peter ni gaar: “Gu be finey ma mmat’aw ni nguug puguran e pi n’ey ngomed u n’umngin i nap’an ni ku gub fos. Ya gu manang ndabki n’uw nap’an mu gu tay i iram e re dowef rog ney nra yim’, ni bod rogon feni tamilang ni yog e Somol rodad i Jesus Kristus ngog. Ere bay gguy rogon nguum pired ndab mpaged talin e pi n’ey ni gubin ngiyal’ u tomren ni ku gum’.” (2 Pet. 1:13-15) Arrogon, manang Peter ni ke chugur ni nge yim’, machane baadag ni nge par e thin rok u laniyan’ e girdi’. Ma rriyul’ ni aram rogon, ya thin ni ke yoloy e kan tay nga Bible ni rayog ni ngad beeged e ngiyal’ ney. Guruy ni 3 ko fa gin l’agruw e babyor rok Peter e ba ga’ fan ngodad, ya be weliy murung’agen e “tin tomur e rran” ko re m’ag ney nge fare lan e lang nge fayleng ni be yip’ fan ban’en nra kireb. (2 Pet. 3:3, 7, 10) Mang fonow e ke pi’ Peter ngodad? Ma uw rogon ni gad ra fel’ u wan’ Jehovah ni faanra da folgad ko re fonow ney?

3, 4. (a) Mang e i tay Peter ir ngak e girdi’ ni ngar rin’ed, ma mang e ke ginangey riy? (b) Mang dalip ban’en ni gad ra weliy?

 ³ Tomuren ni weliy Peter rogon ni yira thang e girdi’ ni kireb ko re fayleng rok Satan ney, me ulul ngay ni gaar: “Pangimed e nge par nib thothup ma kam pied gimed nga pa’ Got.” (2 Pet. 3:11, 12) Ba tamilang ni der fith e deer u roy, ya be tay ir ngak e girdi’ ni ngar rin’ed ban’en. Manang Peter ni kemus ni girdi’ nib fel’ e ngongol rorad e yad ra magey ni yad ba fos u nap’an nra “chuweg Somol e girdi’ rok u pa’ e toogor rorad.” (Isa. 61:2) Ki ulul Peter ngay ni gaar: “Machane gimed e pi tafager rog e goo kam nanged e re bugithin ney. Ere mu gonopiyed gimed, nge dabiyog ni waliymed nga bayang e oloboch ni be tay e piin ndariy fan e motochiyel u wun’rad ngam thaygad ko gin ni kam pired riy ndabi buch ban’en romed riy.”​—2 Pet. 3:17.

⁴ Peter bagayad e piin ni ke ‘nang’ e pi n’ey. Ere aram fan ni manang ni thingari kol ayuw e pi Kristiano ko tin tomuren e rran ya nge yog nra pared ni yad ba yul’yul’ ngak Got. Boch nga tomuren me weliy apostal John fan e re n’ey. Kan piliyeg e changar rok ke guy Satan ni ka nin’ nga wuru’ e tharmiy ma “kari damumuw” ngak “urngin e piin ni yad be fol ko pi motochiyel rok Got ma yad ba yul’yul’ ko fare thin nib riyul’ ni yib i yog Jesus ngan nang.” (Rev. 12:9, 12, 17) Piin ni kan dugliyrad nge “yugu boch e saf” nib yul’yul’ e yad ra gel ngak Satan. (John 10:16) Ma uw rogodad? Gad ra par ni gad ba yul’yul’, fa? Rayog ni ngad pared ni gad ba yul’yul’ ni faan gad ra athamgil (1) ngad maruweliyed pi fel’ngin Got nge yog ngodad, (2) ma ud pared ndariy thibngidad u mit Got, ma (3) ud sapgad nga fel’ngin e pi skeng ni ma yib ngodad. Ere chiney e ngad weliyed e pi n’ey.

Ngaum Maruweliy Pi Fel’ngin Got

5, 6. (a) Ba miti mang fel’ngin e thingar da maruweliyed? (b) Mang fan ni thingar da ‘athamgilgad’?

⁵ Bang ko bin som’on e guruy ko gin l’agruw e babyor ni yoloy Peter e yog ni gaar: “Ereray fan ni ngam athamgiliyed ngam puthuyed pangimed nib fel’ nga rogon ni ke michan’med ngak Kristus; mi gimed puthuy e gonop nga pangimed nib fel’; mi gimed puthuy ko gonop romed e t’ar laniyan’; mi gimed puthuy e k’adan’ ko t’ar laniyan’ romed; mi gimed puthuy ko k’adan’ romed e yan nga laniyan’ Got; ma yan nga laniyan’ Got ni gimed be tay e ngam puthuyed ngay rogon nib t’uf bigimed rok bigimed nrogon e piin ni kar walaggad u daken Kristus; ma rogon nib t’uf bigimed [rok bigimed] nrogon e piin ni kar walaggad u daken Kristus e ngam puthuyed e t’ufeg ngay. Ereray e pi n’en ni nge yog ngomed, ya rayog ngomed ni pire’ ma gimed ra pasig me yib fan murung’agen e Somol rodad i Jesus Kristus ni kam nanged.”​—2 Pet. 1:5-8.

⁶ Riyul’ nib t’uf ni ngad “athamgiliyed” nge yog ni ngad rin’ed boch ban’en nra ayuwegdad ngad daged pi fel’ngin Got. Thingar da athamgilgad ngad uned ko muulung ni gubin ngiyal’, ma ngaud beeged e Bible ni gubin e rran, mu ud folgad ko ngiyal’ ni kad ted ni ngaud filed e Bible rodad riy ni goo gadad. Kub t’uf ni ngad athamgilgad ngad ted reb e blayal’ ni ngad Fol Bible Gad ni Tabinaw. Faan gad ra fol ko re yaram ney ma ra mom ngodad maku ra yib angin.

7, 8. (a) Mang e ke yog boch e girdi’ u murung’agen e Fol Bible ni Tabinaw ni yad ma tay? (b) Mang angin ni ke yib ngom?

⁷ Reb e walag ni ppin e ke weliy murung’agen e fol Bible ni yad ma tay u tabinaw ni gaar: “Re yaram ney e ke ayuwegmad ni nggu filed boor ban’en.” Miki gaar be’: “Ri gu baadag fare muulung ko fol babyor ni un tay kafram. Machane chiney ni gamad ma Fol Bible ni Tabinaw, e kafin gu nang ni manang Jehovah e tin nib t’uf rodad nge ngal’an nib t’uf.” Reb i figirngiy e gaar: “Kari ayuwegmow leengig e Fol Bible ni Tabinaw. Rib fel’ ni ke yog reb e tayim ni nggu parew nga taabang nggu weliyew murung’agen e tin nib t’uf romow. Kug guyew ni ke m’ug wom’engin gelngin Got nib thothup ko ngongol romow.” Ki yog reb e matam ni gaar: “Pi fakmow e yad ma fal’eg i gay murung’agen boch ban’en u Bible ma boor ban’en  ni kar filed riy ma kar felfelan’gad. Re yaram ney e ke ayuwegmad ni ngari riyul’ u wan’mad nri manang Jehovah e tin nib t’uf romad ma ma fulweg taban e meybil romad.” Aray rogon u wan’um e re yaram ney, fa?

⁸ Dab mu paged boch ban’en nde ga’ fan nge taleg e fol Bible ni gimed ma tay u tabinaw. Ba wu’ e mabgol e lungurow, “Gubin e Aningeg Fen e Maruwel ko fa aningeg i wik ni ke yan e bay boch ban’en ni buch u tabinaw romad ni ke chugur ni nge taleg e Fol Bible ni Tabinaw ni gamad ma tay. Machane da gu paged e pi n’em ni nge talegmad.” Riyul’ ni yu ngiyal’ e ba t’uf ni ngam thilyeged e rran nge tayim ko re muulung ney. Machane dab mu paged ni nge yan reb e wik ni dab mu ted e Fol Bible ni Tabinaw.

9. (a) Uw rogon ni ke ayuweg Jehovah Jeremiah? (b) Mang e gad ra fil ko n’en ni rin’?

⁹ Jeremiah ni profet e ke dag reb e kanawo’ nib fel’ ni ngad folgad riy. Ba t’uf rok e ayuw ni ke pi’ Jehovah ngak ma kari felfelan’ ngay. Re n’em e ke ayuweg Jeremiah ni nge machibnag e piin ni dubrad e machib. I yog ni gaar: “I gak’ e thin rom ni bod ba nifiy u fithik’ i lanin’ug ngu fithik’ e yil rog ni dabiyog ni nge chuw.” (Jer. 20:8, 9) Thin rok Got e ki ayuweg ni nge k’adan’ u fithik’ e pi magawon ni i mada’nag u m’on ni ngan gothey yu Jerusalem. Ngiyal’ ney e ke m’ay i yoloy e Thin Rok Got nga Bible ni rayog ni ngaud beeged. Ere faanra ud filed e Gad ra fil e thin rok Got u fithik’ e yul’yul’ ni bod Jeremiah e ra ayuwegdad ngaud machibgad u fithik’ e felfelan’, ma ngaud k’adedan’dad ko pi skeng nra yib ngodad, maku rayog ni nge par nib fel’ e ngongol rodad nge lanin’dad.​—Jas. 5:10.

“Ngam Pired ni Gimed Mmachalbog ma Dariy Thibngimed”

10, 11. (a) Mang fan ni thingar da athamgilyed ni ngad pared ni ‘gad mmachalbog ma dariy thibngidad’? (b) Mang e ba t’uf ni ngad rin’ed?

¹⁰ Gad manang ni gad be par ko tin tomuren e rran. Ere, susun ni dab da gingad ngay ni girdi’ e ke ga’ fan u wan’rad e pi n’en ni dabun Jehovah ni bod e chogowen e chugum, ngongol ni darngal, nge cham. Baaray e n’en ni sana be lemnag Satan: ‘Faanra dabiyog ni nggu k’aring e marus ngak e pi tapigpig rok Got, ma dabisiy nrayog ni nggu wawliyrad ko ngongol ni kireb.’ (Rev. 2:13, 14) Arfan ni thingar da folgad ko fonow rok Peter ni gaar: “Nguum athamgilyed ngam pired ni gimed mmachalbog ma dariy thibngimed u p’eowchen Got ma ngam pired nib aw e gapas u thilmed Got.”​—2 Pet. 3:14.

¹¹ Fare bugithin ni “nguum athamgilyed” e taareb rogon ko fonow ni yog Peter ko som’on. Ere ba tamilang ni Jehovah ni ir e ke thagthagnag e re fonow nem nga laniyan’ Peter e manang nib t’uf ni ngad athamgilgad ya nge yog ni ngad pared ni ‘gad mmachalbog ma dariy thibngidad,’ ma dabi af e ngongol nib kireb ko re fayleng rok Satan ney ngodad. Re n’ey e kub muun ngay ni ngad kol ayuwgad ni nge dabda ar’arnaged e tin nib kireb. (Mu beeg e Proverbs 4:23; James 1:14, 15.) Maku dabda paged e piin ni kar gingad ko ngongol rodad ma ‘yad be yog e thin nib kireb’ ngodad ni ngar warnaged e michan’ rodad.​—1 Pet. 4:4.

12. Mang e be micheg fare thin u Luke 11:13 ngodad?

¹² Bochan ni dawor da flontgad ma arfan nib mo’maw’ ni ngad rin’ed e tin nib mat’aw. (Rom. 7:21-25) Rayog ni ngad rin’ed e tin nib  mat’aw ni faan gad ra ning e ayuw ngak Jehovah, ya gad manang nra pi’ gelngin nib thothup ngak e piin ni yad ra ning ngak. (Luke 11:13) Re gelngin nem e ra ayuwegdad ni ngad rin’ed e ngongol nib fel’ mab fel’ u wan’ Got, ma gad gel ko pi n’en ni yima wawliydad ngay e chiney ni gad be chugur i yan ko fare rran rok Jehovah.

Mu Pag e Skeng nge Gelnagem

13. Nap’an nra yib e skeng ngodad, ma mang e ra ayuwegdad ni ngad k’adedan’dad?

¹³ Chiney ni gad be par ko re m’ag nib kireb ney e ba mutrug nra yib boor mit e skeng ngodad. Machane dabi mulan’dad, ya ireray e ngiyal’ ni rayog ni nge m’ug nriyul’ nib t’uf Got rodad maku rayog ni nge gel e michan’ rodad ngak nge Thin rok. Ke yoloy James ni gaar: “Pi walageg ni girdien Kristus! Mu lemniged gimed nib fel’ waathmed ko ngiyal’ nra yib urngin mit e skeng riy ngomed, ya gimed manang ni faanra gelnagmed e michan’ romed ko pi skeng nem ni aram rogon, ma wenegan nra yib ngomed e aram e ke yog romed ni nguum k’adedan’med.” (Jas. 1:2-4) Dab da paged talin ni “Somol e manang rogon ni nge ayuweg e piin ni yad ma fol rok ko gafgow ni ma yib ngorad.”​—2 Pet. 2:9.

14. Uw rogon ni ke pi’ e n’en ni rin’ Josef e athamgil nga lanin’um?

¹⁴ Am lemnag e n’en ni buch rok Josef ni fak Jakob. Fapi pagel ni walagen e ra pied ni chuway’ nge mang sib u Egypt. (Gen. 37:23-28; 42:21) Gur, ke war e michan’ rok Josef ni bochan e n’en ni ke buch rok? Ke damumuw ngak Got ni bochan e re n’em, fa? Be yog e Bible ni danga’. Maku, gathi aram e bin tomur e skeng ni ki yib ngak. Ya kun kalbusnag ni bochan e kan t’ar e thin nga daken ni ke kol be’ u yargel. Yugu aram rogon ma ke par nib gel e michan’ rok ngak Got. (Gen. 39:9-21) Ke pag e pi skeng nem ni nge gelnag e michan’ rok, ma angin ni ke yib riy ngak e kan tow’athnag.

15. Mang e rayog ni ngad filed ko n’en ni rin’ Naomi?

¹⁵ Riyul’ ni rayog ni nge kireban’dad fe mulan’dad ko pi skeng ni ma yib ngodad. Sana ireray e n’en ni rin’ Josef nge yugu boch e tapigpig rok Got nib yul’yul’. Mu lemnag Naomi ni be’ ni ke yim’ figirngin nge l’agruw i pumoon ni fak. I yog ni gaar: “Dab mu piningeg ni Naomi ya ngam piningeg ni Mara [ni be yip’ fan faanem nib kireban’] yi Got ni Gubin ma Rayog Rok e ba gel e gafgow ni ke pi’ ngog.” (Ruth 1:20, 21) Rayog ni ngam nang fan ni ke non Naomi ni aram rogon. Thin ni ke yog e gathi be yip’ fan ni ke war e michan’ rok ya i par nib yul’yul’ ni bod Josef. Ma bochan e re n’em ma ke tow’athnag Jehovah. (Ruth 4:13-17, 22) Ere nap’an nra paradis e fayleng ma ra chuweg Jehovah urngin e magawon ni ke sum ni bochan  Satan. ‘Bayi sunumiy reb e fayleng nib beech nge reb e lan e lang nib beech. Ma tin kakrom e ri bay ni pag talin.’​—Isa. 65:17.

16. Uw rogon e meybil u wan’dad, ma mang fan?

¹⁶ Demtrug e miti skeng nra yib ngodad ma Got rodad ni ma t’ufegey e ra ayuwegdad. (Mu beeg e Roma 8:35-39.) Yugu aram rogon ni dabi tal Satan i magawonnagdad, machane dabi gel ngodad ni faanra ud pared ni gadad ‘be filmunguyan’dad ma gadad be tiyan’dad, nge yog ni nga ud meybilgad.’ (1 Pet. 4:7) I yog Jesus ni gaar: “Um pired ni kam fal’eged rogomed ma gimed be meybil ni gubin ngiyal’ nge yib gelngimed nge yog ni mmarod u fithik’ urngin e pi n’ey ni bayi m’ug ndabi buch ban’en romed mi gimed yan mu sak’iygad nga p’eowchen e en ni Fak e Girdi’.” (Luke 21:36) Ke yog Jesus u roy ni ngan “meybil ni gubin ngiyal’.” Ere re n’ey e be tamilangnag ni ireray e ngiyal’ ni ngad athamgilgad nge par nib fel’ e tha’ u thildad Jesus nge Chitamangin. Ke mus ni goo piin ni yad be rin’ e re n’ey e rayog ni ngar mageygad u nap’an fare rran rok Jehovah.

Nguum Par ni Gab Pasig ko Pigpig ngak Jehovah

17. Faanra girdi’ ni ma par ko pi binaw ni ga ma machib riy e dubrad e machib, ma uw rogon ni nge ayuwegem e n’en ni ke rin’ e pi profet kakrom?

¹⁷ Gad ra un ko maruwel ni bay rogon ko liyor rodad ma ra pi’ e athamgil nga lanin’dad. Re n’ey e be puguran ngodad e thin ni yog Peter ni gaar: “Pangimed e nge par nib thothup ma kam pied gimed nga pa’ Got.” (2 Pet. 3:11) N’en nib ga’ fan ko pi maruwel ney e aram e ngan machibnag fare thin nib fel’. (Matt. 24:14) Riyul’ ni bay boch e binaw nib mo’maw’ e machib riy, ni sana bochan e togopuluw ara girdi’ e goo tirorad e yad be lemnag. Ku aram rogon e magawon ni i mada’nag e pi tapigpig rok Jehovah kakrom. Machane ‘dar talgad’ i machibnag e thin rok Got. (Mu beeg e 2 Kronicles 36:15, 16; Jer. 7:24-26) Mang e ke ayuwegrad ya nge yog nra k’adedan’rad? Kar lemnaged e maruwel rorad ni bod rogon ni ma lemnag Jehovah, ma gathi rogon ni ma lemnag e girdi’ nu fayleng. Maku reb e ba ga’ fan u wan’rad ni ngar machibnaged murung’agen fithingan Got.​—Jer. 15:16.

18. Uw rogon ni yira n’uf fithingan Got boch nga m’on ni bochan e machib ni gad ma tay?

¹⁸ Ku yibe fanaydad ni ngad machibnaged fithingan Jehovah nge tin nib m’agan’ ngay. Mu lemnag e re n’ey: Pi toogor rok Got e dabiyog ni nga rogned ni dan weliy murung’agen Got ngorad nge tin nib m’agan’ ngay ni bochan e machib ni gad ma tay. Ra taw ko ngiyal’ nem ma yad ra nang ni Jehovah e be cham ngorad ni bod e n’en ni buch rok Farao. (Ex. 8:1, 20; 14:25) Maku, ra tay Jehovah fan e pi tapigpig rok nib yad ba yul’yul’ ya ra tamilang u wan’ e girdi’ ni yad e piin owchen.​—Mu beeg e Ezekiel 2:5; 33:33.

19. Mang e rayog ni ngad rin’ed e chiney ni dawori taw fare Rran rok Jehovah?

¹⁹ Ke yol Peter ngak pi walagen ni gaar: “Mu lemniged e gum’an’ rok e Somol rodad, ni aram e tayim ni be pi’ ngomed ni ngam guyed rogon ngkam thapgad ngak.” (2 Pet. 3:15) Ere chiney ni ka be gum’an’nag Jehovah ir u puluwdad e ngad guyed rogon ni ngad rin’ed ban’en. Uw rogon? Aram e ngad maruweliyed nge yog ni ngad “pared ndariy thibngidad u mit Got” ni aram e nge dab i magafan’dad ko pi skeng ni ma yib ngodad nge pag rogon, ma ud tedan’dad ko machib ni gad be tay. Faan gad ra rin’ ni aray rogon ma boor e tow’ath nra yog ngodad u nap’an e ‘bin nib beech e lan e lang nge bin nib beech e fayleng.’​—2 Pet. 3:13.

Ka Ga Manang?

• Uw rogon ni ngad maruweliyed pi fel’ngin Got ni nge yog ngodad?

• Uw rogon ni ngad “pared ndariy thibngidad u mit Got”?

• Mang e gad ra fil ko n’en ni rin’ Josef nge Naomi?

• Mang fan nri gad ba tow’ath ni rayog ni ngad uned i machibnag fare thin nib fel’?

[Study Questions]

[Picture on page 17]

Piin figirngiy, uw rogon ni nge yog fel’ngin Got ngomed nge chon e tabinaw romed?

[Picture on page 18]

Mang e gad ra fil ko n’en ni rin’ Josef u nap’an ni keb e skeng ngak?