Piin Fel’ Yangaren, Mpaged e Thin Rok Got Nga i Pow’iymed

“Nge yog ngom e gonop nge nangan’.”—PROV. 4:5, BT.

1, 2. (a) Mang e ayuweg Paul ni nge gel ko meewar rok? (b) Uw rogon ni nge yog e gonop nge tamilangan’ ngom?

 “FAANRA gu baadag ni nggu rin’ e tin nib fel’, ma ke mus ntin nib kireb e rayog ni gu rin’.” Ga manang ko mini’ e thin rok e ram? Aram e thin rok apostal Paul. Yugu aram rogon nib t’uf Jehovah rok Paul ma immoy yu ngiyal’ ni i pirieg nib mo’maw’ ni nge rin’ e tin nib fel’. Uw rogon u wan’ e re magawon rok nem? I yoloy ni gaar, “Kar gu gafgow!” (Rom. 7:21-24) Ga be nang fan rogon laniyan’ Paul? Bay yu ngiyal’ ni ga ma pirieg nib mo’maw’ ngom ni ngam rin’ e tin nib fel’, fa? Ma kankanan’um ko re n’ey ni bod Paul, fa? Faanra arrogon, ma dabi mulan’um. Faanra ke yog rok Paul ni nge gel ko meewar rok, maku rayog rom.

² Paul e yog rok ni nge gel ko pi meewar rok ni bochan e pag e “thin nib riyul’” ni ke fil nga i pow’iy. (2 Tim. 1:13, 14) Angin ni yib riy e yog ngak e gonop nge tamilangan’ nra ayuweg ni nge dugliy e tin nib fel’ ni nge rin’. Rayog ni nge ayuwegem Jehovah ni nge yog e gonop nge tamilangan’ ngom. (Prov. 4:5) Tin th’abi fel’ e fonow e yira pirieg ko Thin rok u Bible. (Mu beeg e 2 Timothy 3:16, 17.) Am lemnag angin e pi kenggin e motochiyel nu Bible ko tha’ u thilmed e gallabthir rom, nge rogon ni ngam maruwel ko salpiy, ngu nap’an nder guyem be’.

Mpag e Thin Rok Got nge Pow’iyem u Lan e Tabinaw

3, 4. (a) Mang fan nib mo’maw’ ni ngam fol ko motochiyel ko gallabthir rom? (b) Mang fan ni ma fal’eg e gallabthir e motochiyel?

³ Ga ma pirieg nib mo’maw’ ni ngam fol ko motochiyel ko gallabthir rom, fa? Mang fan ni ga ma lem ni aram rogon? Reb i fan e ga baadag ni ngam par rom. Ka ban’en ni aram rogon, ni bochan e ga be ilal i yan. Machane, n’umngin nap’an ni ka ga be par u tan pa’ e gallabthir rom, ma thingar um fol rorow.—Efe. 6:1-3.

⁴ Ga ra nang fan ni bay e motochiyel ni ke tay e gallabthir ni fan ngom, ma ra mom ni ngaum fol riy. Riyul’ ni bay yu ngiyal’ nrayog ni ngam lem ni bod rogon Brielle * ni 18 e duw rok ni weliy murung’agen e gallabthir rok ni gaar: “Kar pagew talin ni ur moyew ko biney e yangar. Dubrow ni nggog lanin’ug, ara nggu dugliy ban’en ni bod ni ma rin’ e piilal.” Sana ga ma lemnag nder pagem e gallabthir rom ni ngam rin’ e tin ni ga baadag ni ngam rin’ ni bod Brielle. Machane, fan ni ke ngongliy e gallabthir rom e motochiyel u tabinaw e bochan ni yow ma lemnagem. Maku reb e, gallabthir rom e yow manang ni yow ra weliy ngak Jehovah rogon ni ur ayuwegew gur.—1 Tim. 5:8.

5. Mang angin nra yib ngom ni faanra um fol ko gallabthir rom?

⁵ Riyul’ ni ga ra fol ko motochiyel ko gallabthir rom ma bod ni ga be thang e malfith rom u bank. Ga ra yul’yul’ ngam thang e malfith rom, ma aram e rayog ni ngki bayay me pi’ e bank e salpiy ngom. Ere ku aray rogon e gallabthir rom ni thingar um tay farow ma ga be fol rorow. (Mu beeg e Proverbs 1:8.) Ya faanra um fol, ma aram e rayog ni nga i pagem e gallabthir rom ni ngam rin’ boch ban’en ni ga baadag. (Luke 16:10) Machane faanra dab um fol ko motochiyel rorow, ma aram e rayog ni  nge dab kur pagew gur ngam rin’ boch ban’en ni ga baadag, ni bod fare bank nra dab mu yul’yul’ ngay ma rayog ni nge lichnag fa tal ndab ki pi’ e “malfith” ngom.

6. Uw rogon ni nge ayuweg e gallabthir e pi fel’ yangaren ni fakrad ngaur folgad?

⁶ Reb e kanawo’ nrayog ni nge ayuweg e gallabthir e pi fel’ yangaren ni fakrad ngaur folgad ko motochiyel rorad, e aram e ngaur daged e kanawo’ nrayog ni nge folwok pi fakrad riy. Susun ni ngaur folgad ko pi motochiyel rok Jehovah u reb e kanawo’ nra m’ug riy ni motochiyel rok Got e ba puluw. Re n’ey e ra ayuweg e pi fel’ yangaren ni fakrad ngar nanged nib ga’ fan ni ngaur folgad ko motochiyel ko gallabthir rorad. (1 John 5:3) Maku reb e, boor yay ni ma yog e Bible ni i pag Jehovah e pi tapigpig rok ni ngar weliyed lanin’rad u boch ban’en. (Gen. 18:22-32; 1 Ki. 22:19-22) Ere gathi bay yu ngiyal’ nib t’uf ni nge pag e gallabthir pi fakrad ngar weliyed lanin’rad u boch ban’en?

7, 8. (a) Mang magawon e ma mada’nag boch e fel’ yangaren? (b) Mang e ra ayuwegem ni nge fel’ rogom ko fonow ni yima tay ngom?

⁷ Yu ngiyal’ e ra fonownag e gallabthir e piin fel’ yangaren ni yibe llowan’nagrad, mar lemnaged ni yigoo thibngirad e yibe yaliy. Dabisiy ni bay yu ngiyal’ ni ga ma lem ni bod Craig nreb e pagal nib fel’ yangaren. I gaar, “Nina’ rog e bod reb e polis, ya yugu ma yaliy e n’en ni gub meewar riy.”

⁸ Ba ga’ ni yima yal’uweg be’ ko thin. Be yog e Bible ni yira fonownag be’ ni yibe yal’uweg, ma ba ga’ ni ma kireban’. (Heb. 12:11) Machane mang e ra ayuwegem ni nge fel’ rogom ko fonow ni yima tay ngom? N’en nib ga’ fan ni ngam lemnag e, ma fonownigem e gallabthir rom ya gab t’uf rorow. (Prov. 3:12) Yow baadag ni ngam siyeg boch ban’en nib kireb ni yima mecham ngay mag gay rogon ni ngam mecham ko tin nib fel’. Ku manang e gallabthir rom ni faanra dab ra yal’uwegew gur, ma bod ni yow be dag ngom nda mu t’uf rorow! (Mu beeg e Proverbs 13:24.) Maku thingar mu nang nrayog ni ngam fil ban’en ko oloboch ni ga ma tay. Ere nap’an ni kan yal’uwegem mag sap nga fel’ngin. “Ya fel’ ni ma yib [ko gonop] e boor ko fel’ ni ma yib ko silber; ba ga’ fan ngom ko gol.”—Prov. 3:13, 14.

9. Mang e ba fel’ ni nge rin’ e piin bitir ko bin ni nguur lemnaged e oloboch ko gallabthir rorad?

⁹ Ku ma oloboch e gallabthir. (Jas. 3:2) Nap’an ni yow be fonownigem ma rayog ni nga rognew ban’en ndar lemnagew. (Prov. 12:18) Mang e rayog ni nge k’aring e gallabthir rom ngar ngongolgow ni aray rogon? Rayog ni yow be mochuch fa yow be lemnag ni kam oloboch ni bochan e der fel’ rogon ni yow be llowan’nagem. Mang ndab mu dag ni ga be pining e magar ngorow ko bin ni ngam sap nga thibngin e fonow ni yow be tay ngom? Faan ga ra pagem ngan yal’uwegem, ma ra yib angin ngom u nap’an ni kam ilal.

10. Uw rogon me yog nim fol ko motochiyel ko gallabthir rom nge rogon ni yow be yal’uwegem?

¹⁰ Ga baadag ni nge mom ngom ni nge m’agan’um ko motochiyel nge fonow ko gallabthir rom me yib angin ngom, fa? Faanra arrogon, mab t’uf ni ngam gay rogon ni ngaum non nib fel’ rogon. Uw rogon ni ngam rin’ e re n’ey? Bin som’on e ngam motoyil. Be gaar e Bible: “Gubin e girdi’ ma thingar ra gurgad ko motoyil, machane dab ra gurgad ngar welthingad, ma dab ra gurgad ngar damumuwgad.” (Jas. 1:19) Mu gay rogon ngam t’ar lanin’um ngam motoyil ko gallabthir rom ko bin ni ngam gur ngam yoror rom. Mu lemnag e n’en ni ke yog e gallabthir rom, ma gathi rogon ni kar nonow ngom. Ngemu’ ma gog ni kam oloboch ndab kum rin’ bayay. Faan ga ra rin’ ni aray rogon ma ga be micheg ngorow ni kam rung’ag e n’en ni ka rognew. Ma uw rogon ni faanra ga baadag ni ngam weliy fan ni ka mog ara kam rin’ ban’en? Ba ga’ nib fel’ ni ngam ‘th’ab gulungam’ ngam rin’ e n’en ni ke yog e gallabthir rom ni ngam rin’. (Prov. 10:19) Faanra guy e gallabthir rom ni ga be motoyil ngorow, ma aram e ku yow ra motoyil ngom. Ga ra fol ko pi n’ey ma aram e mich riy ni ga be pag e Thin Rok Got be pow’iyem.

 Nge Pow’iyem e Thin Rok Got u Rogon ni Ngam Maruwel ko Salpiy

11, 12. (a) Mang e be pi’ e Bible e athamgil riy nga lanin’dad ni ngad rin’ed ko salpiy, ma mang fan? (b) Uw rogon nra ayuwegem e gallabthir rom ni ngam maruwel ko salpiy?

¹¹ Be gaar e Bible: “Salpiy e ma ayuwegey.” Machane ku be yog e Bible ni gonop e kab ga’ fan ko salpiy. (Ekl. 7:12, NW) Be yog e Bible ni ngad ted fan e salpiy, machane dabi gel i t’ufeg rodad. Mang fan ni thingar dabi t’uf e salpiy u wan’dad? Mu lemnag e re fanathin ni baaray: Be’ nib salap ko lum e manang rogon e maruwel ko yar nib m’uth. Machane faanra de nang be’ rogon ni nge maruwel ngay fa der kol ayuw ma ra maad’ad ngay. Ere ku arrogon e salpiy ni faan yira maruwel ngay nib fel’ rogon ma ra ayuwegey. Machane “piin ni yad ba adag ni nge yoor e salpiy rorad” e yad ma pag fan e fager rorad, nge tabinaw rorad, nge tha’ u thilrad Got. Ere wenegan ni ke yib e “ke m’ingan’rad ke yib e kireban’ ni pire’ ngorad.”—Mu beeg e 1 Timothy 6:9, 10.

¹² Uw rogon ni ngam nang rogon e maruwel ko salpiy? Mang ndab mu fith e gallabthir rom nga rognew ngom rogon ni ngam maruwel ko salpiy rom? I yoloy Solomon ni gaar, “Pi thin ney ni ba’ e gonop u fithik’ e rayog ni nge pi’ e llowan’ ngak e piin ni yad ba gonop ngar puthuyed ko tin ni yad manang, ma rayog ni ngi i pow’iy e piin ni kar skulgad.” (Prov. 1:5) Reb e rugod ni Anna fithingan e yog ko gallabthir rok ni ngan ayuweg u rogon ni nge maruwel ko salpiy. I gaar, “Chitamag e ke fil rogon ngog ni nggu maruwel ko salpiy, ma ki weliy ngog feni ga’ fan ni ngaug gonopiy rogon ni gu be chuway’ ko salpiy rog.” Chitiningin Anna e ki fil boch ban’en ngak nra ayuweg. Ki gaar, “Ke yog ngog fel’ngin ni ngaun yaliy puluwon e chugum u m’on ni ngan chuw’iy.” Ere uw rogon ni ke yib angin ngak Anna? I yog ni gaar, “Chiney e rayog ni nggu maruwel ko salpiy rog nib fel’ rogon. Gu ma kol ayuw u rogon ni gu ma chuway’, ya nge dab gu tay e malfith u boch ban’en nde ga’ fan.”

13. Uw rogon ni ngam guy rogon ni ngam maruwel ko salpiy?

¹³ Faanra yugu mu guy ban’en ma ga chuw’iy ara um chuway’ ni bochan e nge guy e pi fager rom, ma dabi n’uw nap’an ma ga par nga tabon e malfith. Mang e rayog ni nge ayuwegem nge dab mu aw ko biney e wup? Thingar mu fil rogon ni ngaum t’ar lanin’um. Ireray e n’en ni rin’ Ellena ni ka fini pag 20 e duw rok. I gaar, “U m’on ni nggu warod e pi fager rog nga bang, ma kug mu’ i dugliy urngin e salpiy ni nggu chuway’ ngay. . . . Ma kug guy nib fel’ ni yigoo pi fager rog ni yad ma kol ayuw ko salpiy, ma yad ma yaliy puluwon e chugum, e ngaug un ngorad ko chuway’.”

14. Mang fan ni ngam kol ayuw nga “chogowen e fel’ rogon”?

¹⁴ Ngan yognag e salpiy nge ngan maruwel ngay e ba ga’ fan ngodad. Machane, i yog Jesus ni bin riyul’ e felfelan’ e ma yib ngak e piin ni “kar pirieged u lanin’rad . . . ndabisiy ni nge yog Got ngorad.” (Matt. 5:3) I yog nrayog ni nge magawonnag “chogowen e fel’ rogon” be’ ko tirok Got ban’en. (Mark 4:19) Ere rib ga’ fan ni ngam pag e Thin Rok Got nga i pow’iyem nge yog nim maruwel ko salpiy nib fel’ rogon!   

Nge Pow’iyem e Thin Rok Got ko Ngiyal’ Nder Guyem Be’

15. Mingiyal’ e ra yib e skeng ngom nrib mo’maw’?

¹⁵ Ga be lemnag, ma mingiyal’ e ra yib e skeng ngom nrib mo’maw’? Ngiyal’ ni gimed boch e girdi’ fa ngiyal’ nder guyem be’? Nap’an  ni ga bay u skul ara tabon e maruwel, ma ga be kol ayuw ya ga manang nra yib e skeng ngom. Machane ngiyal’ nder guyem be’ nib pagan’um e rib mom ni ngam rin’ ban’en nib kireb.

16. Mang fan ni ngaum fol rok Jehovah ni mus ko ngiyal’ nder guyem be’?

¹⁶ Mang fan ni ngaum fol rok Jehovah ni mus ko ngiyal’ nder guyem be’? Baaray ban’en ndab mu pagtalin: Rayog ni ngam kirebnag laniyan’ Jehovah, maku rayog ni ngam felfelan’nag. (Gen. 6:5, 6; Prov. 27:11) N’en ni ga ma rin’ e bay rogon ngak ni bochan e ri ma ‘lemnagem.’ (1 Pet. 5:7) Baadag ni ngam motoyil ngak, ya nge yog ni nge ‘fil ngom e tin nib fel’ me pow’iyem.’ (Isa. 48:17, 18) Nap’an nde fol boch e girdi’ nu Israel ko fonow rok Jehovah kakrom, mi ri kireban’. (Ps. 78:40, 41) Machane, Daniel ni profet e rib t’uf rok Jehovah, ya yog reb e engel ngak nrib “t’uf rok Got.” (Dan. 10:11) Mang fan? Ya gubin ngiyal’ ni i par nib yul’yul’ ngak Got ni ki mada’ ko ngiyal’ nder guy be’.—Mu beeg e Daniel 6:10.

17. Mang boch e deer ni ngam fithem riy u nap’an ni ga be mel’eg boch ban’en ni ngam chuweg e chalban rom ngay?

¹⁷ Ra ngam par ni gab yul’yul’ ngak Got ko ngiyal’ nder guyem be’, ma thingar mu ‘fil rogon ni ngam nang e tin nib fel’ ko tin nib kireb,’ ma ga maruwel ngay. (Heb. 5:14) Bod ni nap’an ni ga be mel’eg e tang ni ngam rung’ag, ara kachido ni ngam yaliy, ara pi n’en ni ngam guy ko Internet, ma baaray e n’en nra ayuwegem ngam nang e n’en nib fel’ nge n’en nib kireb ni ngam siyeg. Ngam fithem ni nge lungum: ‘Ra ayuwegeg e re n’ey ni nggu runguy be’ ni ke gafgow, fa nggu felfelan’ ko “gafgow ni ke aw ngak” be’?’ (Prov. 17:5, BT) ‘Ra ayuwegeg nge “t’uf rog e tin nib fel’,” fa ra mo’maw’nag ngog ni nggu “fanenikay e tin nib kireb”?’ (Amos 5:15) N’en ni ga ma rin’ u nap’an nder guyem be’ e be dag e n’en nib ga’ fan u wan’um.—Luke 6:45.

18. Mang e susun ni ngam rin’ ni faanra kam rin’ ban’en nib kireb nib mith, ma mang fan?

¹⁸ Mang e susun ni ngam rin’ ni faanra kam rin’ ban’en nib kireb nib mith? Dab mu pagtalin ni “dabi fel’ rogon e yafos rom ni faanra ga be guy rogon ni ngam mithag e pi denen rom. Mu puwofaynag ma ga pithig paam riy; me wurngan’ Got ngom.” (Prov. 28:13, BT) Ri gab balyang ni faanra um par nga yugu um rin’ ban’en nib kireb “nib togopuluw nga rogon ni ma maruwel gelngin Got nib thothup”! (Efe. 4:30) Thingar mu wenignag e denen rom, ya aram e n’en nib milfan ngom ni ngam rin’ ni fan ngak Got, nge gallabthir rom, nge gur. Ma piin ni yad e “piilal” ko ulung e rayog ni ngar ayuweged gur. I yog James nreb i gachalpen Jesus ni gaar: “Ngar yibiliyed ngak Got [faen ni ke denen] mi yad liyef e gapgep nga daken u fithingan Somol. Re meybil ney ni yira tay u fithik’ e michan’ ngak Got e ra golnag fare m’ar; i Somol e ra chuweg e m’ar rok, ma pi denen ni ke ngongliy e ra n’ag Got fan.” (Jas. 5:14, 15) Re n’ey e rayog ni ngan tamra’ ngay. Machane, faan ga ra athamgil ngam ning e ayuw, ma rayog ni  nge ayuwegem ngam pithigem ko pi n’en nra kirebnagem me par e nangan’ rom nib beech.—Ps. 32:1-5.

Mu Felfelan’nag Jehovah

19, 20. Mang e baadag Jehovah ni fan ngom, ma mang e thingar mu rin’?

¹⁹ Jehovah ni fare Got nib felfelan’ e baadag ni ngkum felfelan’. (1 Tim. 1:11) Ri ma lemnagem. Yugu aram rogon ndariy be’ ni be tiyan’ ko athamgil ni ga be tay ni ngam rin’ e tin nib fel’, ma ir e manang. Dariy ban’en nib mith u p’eowchen Jehovah. Ma yaliyem ni gathi bochan e nge guy e kireb rom, ya nge ayuwegem ngam rin’ e tin nib fel’. I Got e “ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircha’rad.”—2 Kron. 16:9, BT.

²⁰ Ere ngam pag e thin rok Got nga i pow’iyem, mag fol ko fonow rok. Ya faan ga ra rin’ ni aram rogon, ma aram e ra yog e gonop nge tamilang ngom nra ayuwegem ko magawon nib mo’maw’ ni ga ma mada’nag. Ga ra rin’ ni aray rogon ma gathi kemus ni goo gallabthir rom nge Jehovah e ga ra felfelan’nag, ya ka ga ra par ni gab felfelan’.

[Footnote]

Uw Rogon ni Ga Ra Fulweg?

• Uw rogon ni nge fol e piin fel’ yangaren me yib angin ngorad e motochiyel ko gallabthir nge rogon ni yibe yal’uwegrad?

• Mang nib ga’ fan ni ngan maruwel ko salpiy nib fel’ rogon?

• Uw rogon ni ngam par ni gab yul’yul’ ngak Jehovah ni mus ko ngiyal’ nder guyem be’?

[Study Questions]

[Picture on page 13]

Ga ra par ni gab yul’yul’ ngak Got ko ngiyal’ nder guyem be’, fa?