Bin 3

Ngaum Pining e Magar ni Gubin Ngiyal’

MANG E BE FIL E BIBLE? “Demtrug e n’en nra yib ngomed ma gubin ngiyal’ ni nguum pininged e magar.”​—1 Thessalonika 5:18.

MANG E MAGAWON RIY? Ke sug e girdi’ u toobdad nib tolangan’rad, ma darur pininged e magar ngak be’. Ere ba mom ni nge af e ngongol rorad ngodad. (2 Timothy 3:1, 2) Maku reb e, rayog ni nge k’aringdad ni ngad yoornaged e maruwel nga puluwdad. Rayog ni nge yoor e magawon rodad, ara ud pared ni tin ni gad baadag e gad be rin’, ma dakuriy e ngiyal’ ni nge fel’ u wan’dad e tin ni bay rodad, ara tin ni be rin’ boch e girdi’ ni fan ngodad.

MANG E RAYOG NI NGAM RIN’? Ngaum fal’eg i lemnag e pi n’en ni be felfelan’um ngay e chiney. Dabisiy ni boor e magawon rom, machane ngam lemnag e n’en ni rin’ David ni Pilung. Yu ngiyal’ e i par ni kari mochuch ni bochan e magawon rok. Yugu aram rogon ma i meybil ngak Got ni gaar: “Gu be lemnag murung’agen gubin e tin kam rin’, gu be puguran ngan’ug gubin e ngongol rom.” (Psalm 143:3-5, BT) Yugu aram rogon, ma gubin ngiyal’ ni ma pining e magar ko girdi’ ma ba fel’ u wan’ e tin bay rok.

Am lemnag boch ban’en ni ke rin’ boch e girdi’ ni fan ngom ma ga pining e magar riy ngorad. Jesus e dag e kanawo’ nib fel’ ni ngad folwokgad riy. Bod nnap’an ni puog Maria ba florida nib tolang puluwon nga daken lolugen nge rifrif u ay, me fith boch e girdi’ ni lungurad: “Mang fan ni kan adbey e re florida nem ni aram rogon?” * I lemnag e pi girdi’ nem nib fel’ ni ngan pi’ fare florida ni chuway’ min fek puluwon ngan pi’ ko piin gafgow. Machane yog Jesus ni gaar: “Mu digeyed e cha’nir! Mang fan ni gimed be kirebnag laniyan’?” Miki ulul ngay ni gaar: “Ke rin’ ngog urngin e tin nrayog rok.” (Mark 14:3-8; John 12:3) Ere de yaliy Jesus e n’en nde rin’ Maria, ya ke dag ni be pining e magar ko n’en ke rin’.

Boch e girdi’ e ba ga’ ni fin ra yim’ be’ u tabinaw rok, ara fager rok, ara mul e tow’ath rok u pa’ mfin i lemnag ko tomur. Rayog ndabi buch ban’en rom ni aram rogon ni faanra um lemnag e pi n’en nib fel’ ni be felfelan’um ngay e chiney! Ere mang ndab mu lemnag ara mu yoloy nga but’ e pi n’en ni ga be pining e magar riy?

Bochan ni “urngin e tow’ath nrib manigil” e yib rok Got, mab fel’ ni ngaud pininged e magar ngak u fithik’ e meybil. (James 1:17) Faan gad ra rin’ e re n’ey ni gubin e rran, ma aram e rayog ni nge ayuwegdad ngaud pininged e magar, mu ud pared nib fel’ u wan’dad e tin bay rodad.​—Filippi 4:6, 7.

[Footnote]

[Picture on page 6]

Ga ma pining e magar ko n’en ni ma rin’ boch e girdi’ ni fan ngom, fa?