Rogon ni nge Puf Boch e Magawon u Thilin e Mabgol

DER yog e Bible nib mom e mabgol. I thagthagnag Got nga laniyan’ apostal Paul nge yoloy ni piin mabgol e yad ra pirieg e “gafgow ni be pirieg e piin ni mabgol ni gubin e rran.” (1 Korinth 7:28) Machane boor ban’en ni rayog ni nge rin’ e piin mabgol ya nge yog ni nge lich e magawon ni be sum u thilrad mu ur pired ni yad ba felfelan’. Am yaliy e re nel’ i n’en ni baaray nib ga’ ni ma yog e piin mabgol nge rogon nra ayuwegey e pi kenggin e motochiyel nu Bible.

1

N’EN NI MA YOG BOCH E MABGOL:

“Gathi ri kab fel’ thilmow e en mabgol rog.”

KENGGIN E MOTOCHIYEL NU BIBLE:

“Ngam mel’eged e tin ni ir e th’abi ga’ fan.”—FILIPPI 1:10, NW.

Mabgol rom e aram e n’en ni th’abi ga’ fan ko yafos rom. Ba t’uf ni nge ga’ fan u wan’um. Ere mu fal’eg i yaliy ngam nang ko bay rogon e re magawon ney nga rogon ni ga be yarmiy e tayim rom fa danga’. Dab mu pag e pi n’en ni ga ma rin’ nge magawonnag thilmew e en mabgol rom. Riyul ni bay boch ban’en ndabiyog ni ngam rin’ew e en mabgol rom u taabang ni bod e maruwel ni gimew ma un ngay nge ku boch ban’en ndabiyog i siyeg. Machane bay boch ban’en nrayog ni ngam gonopiy urngin e tayim ni ga ma n’ag ngay ni bod boch ban’en ni ga baadag ni ga ma rin’ ara pi fager rom.

Machane bay boch e mabgol ni yad ma yoornag e maruwel nga puluwrad ara ra ted boor e tayim ni fan ko pi n’en ni yad baadag ni yad ma rin’ ya nge dab ur rin’ed e en mabgol rorad ban’en u taabang. Pi mabgol ney e gathi yad be ‘dar’ ya yad be mil ko magawon. Faanra aram rogon e mabgol rom mab t’uf ni ngam nangew e en mabgol rom ko mang e magawon u thilmew mi gimew guy rogon ngam pithigew. Kemus ni faanra um rin’ew e en mabgol rom boch ban’en u taabang e rayog ni ngari chugur e tha’ u thilmew mi gimew par ni kam “taab girdi’gow.”—Genesis 2:24.

Rogon ni ke fol boch e girdi’ ko re fonow ney: Andrew a nge Tanji, ni yow ma par u Australia e ke gaman ragag e duw ni kar mabgolgow. I yog Andrew ni gaar: “Kug nang ni faanra yigi pag rogon e maruwel ni tay be’ nge boch ban’en ni ma  rin’ ma rayog ni nge magawonnag e mabgol rok. Ere gamow e ppin rog e gamow ma tay ba ngiyal’ ni nggu sabethingow riy ma gamow weliy lanin’mow ngomow.”

Dave nge Jane ni yow ma par u Meriken e ke gaman 22 e duw ni kar mabgolgow, ma gubin e blayal’ ni yow ma tay ba ngiyal’ ni ngar weliyew e n’en ni ke buch rorow u reb e rran ngu reb nge n’en ni yow be lemnag. Ke gaar Jane: “Ireray ba ngiyal’ nrib ga’ fan u wan’mow ma dariy ba ngiyal’ ni kug pagew ban’en ni nge magawonnag.”

2

N’EN NI MA YOG BOCH E MABGOL:

“Dakuriy ban’en ni gu baadag ko biney e mabgol.”

KENGGIN E MOTOCHIYEL NU BIBLE:

“Ra be’ ma gathi goo ir e ngi i tafinaynag e tin nib fel’ ngak, ya ngki tafinaynag e tin nib fel’ ngak boch e girdi’.”—1 KORINTH 10:24.

Be’ ni kemus ni n’en ni be yog ngak u reb e mabgol e ir e be lemnag e dabi felfelan’ ni yugu aram rogon nra mabgol ni boor yay. Ra fel’ e mabgol ni faanra un lemnag rogon ni ngan pi’ ban’en ma gathi rogon ni nge yog ban’en. I weliy Jesus fan ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”—Acts 20:35.

Rogon ni ke fol boch e girdi’ ko re fonow ney: Maria nge Martin, ni yow ma par u Mexico e ke gaman 39 e duw ni kar mabgolgow. Machane boor e magawon ni kar mada’nagew. Ke yib ngan’row ba ngiyal’ nra tugthingow nib gel, me gaar Maria, “Bay ban’en ni gog ngak Martin ni gu darifannag riy. Ma aram me ri damumuw. Kug guy rogon ni nggog ngak ni gathi lem rog ni nggu non ngak ni aram rogon, ya bochan ni kug damumuw. Machane de motoyil ngog.” Me Martin e gaar, “Nap’an ni gamow be tugthin mu gu lemnag ndabkiyog ni nggu parew u taabang, ma nggu tal i gay rogon ni nge fel’ e mabgol romow.”

Martin e baadag ni ngan tayfan, me Maria e baadag ni ngan nang fan laniyan’. Ere dariy bagayow ni yibe rin’ e n’en ni baadag.

Uw rogon ni ke pithig e re wu’ i mabgol ney e magawon rorow? I gaar Martin, “Kug son ni nge m’ay e damumuw rog, ma aram ma gamow dugliy ni nggu folgow ko fare fonow nu Bible ni be yog ni ngaud ted fadad ma ud golgad ngodad. Kug nangew ndemtrug urngin yay nra sum e magawon u thilmow ma rayog ni nggu pithigew ni faan gamow ra ning e ayuw ngak Got u daken e meybil ma gamow fol ko fonow nu Bible.”—Isaiah 48:17, 18; Efesus 4:31, 32.

 3

N’EN NI MA YOG BOCH E MABGOL:

“En mabgol rog e der ma rin’ e n’en ni susun e nge rin’.”

KENGGIN E MOTOCHIYEL NU BIBLE:

“Ra bagadad ma nge weliy ngak Got e n’en ni i rin’.”—ROMA 14:12.

Dariy e maruwar riy ndabiyog ni nge par e mabgol nib fel’ ni faanra kemus ni taabe’ e be gay rogon ni nge fel’ e mabgol. Machane n’en nth’abi gel e kireb riy e faanra dariy bagayow ni be guy rogon ni nge pithig e magawon ma ra bagayow ma be yin’ e kireb nga daken bagayow.

Faanra yug um par ma ga be lemnag e n’en ni susun e nge rin’ e en mabgol rom ma dariy ba ngiyal’ ni ga ra felfelan’, nib ga’ ni faanra damur rin’ e n’en nib milfan ngom ni bochan e der rin’ e en mabgol rom. Machane faan ga ra gay rogon ni ngam mang reb i figirngiy ara leengiy nib fel’ ma ra fel’ boch e mabgol rom. (1 Peter 3:1-3) Ma bin th’abi ga’ fan riy e ga be dag ngak Got ni ga be tayfan e yaram rok u murung’agen e mabgol, ma ngongol rom e ra felfelan’nag.—1 Peter 2:19.

Rogon ni ke fol boch e girdi’ ko re fonow ney: Kim nge pumoon rok e yow ma par u Korea, ma ke gaman 38 e duw ni kar mabgolgow. I gaar Kim: “Bay yu ngiyal’ ni ma chalban e pumoon rog ngog me par ni dabki non ngog ni dagnang ko mang fan. Faanra yodorom ma gu ma thamiy ni gathi ri ku gub t’uf rok. Yu ngiyal’ e gu ma lemnag ko, ‘Mang fan ni baadag ni nggu nang fan laniyan’ me ir e der guy rogon ni nge nang fan lanin’ug?’”

Rayog ni nge par Kim ni be lemnag e n’en ni ke buch nde mat’aw nge n’en nder yog ni nge rin’ e pumoon rok. Machane ke mel’eg ban’en nib thil. I gaar, “Kug nang nib fel’ ni gag e som’on ni ngguy rogon ni nge aw e gapas ko bin ni ngaug par ni gub damumuw. Ra tomur riy ma gamow l’agruw ni ke m’ay e damumuw romow ma rayog ni nggu weliyew e magawon romow u fithik’ e gapas.”—James 3:18.

4

N’EN NI MA YOG BOCH E MABGOL:

“Ppin rog e der ma fol rog.”

KENGGIN E MOTOCHIYEL NU BIBLE:

“Kristus e ir e lolugen urngin e pumoon.”—1 KORINTH 11:3.

Faanra be lemnag reb e pumoon nder fol leengin rok ma som’on e nge lemnag ko ba mom rok ni nge fol rok Jesus Kristus ni ir lolugen fa danga’. Rayog ni nge m’ug ni be fol ni faanra folwok rok Jesus.

I yoloy apostal Paul ni gaar: “Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad.” (Efesus 5:25) Jesus e de “ga’ lungun” u puluwon pi gachalpen. (Mark 10:42-44) Ma fonownagrad nib fel’ rogon ma ma yal’uwegrad u nap’an ni kar olobochgad. Machane der ma puwan’ ngorad nge pag rogon. Ba gol ngorad ma manang e tin ndabiyog rorad. (Matthew 11:29, 30; Mark 6:30, 31; 14:37, 38) Ma gubin ngiyal’ ni ma yan nga lanin’rad.—Matthew 20:25-28.

Baaray reb e deer nib t’uf ni nge fith e en figirngiy ir riy, ‘Gu ma lemnag e piin nib pin nge liw rog ni gag lolugen leengig nrogon e yalen ma gathi rogon nib puluw ko fonow nu Bible, fa?’ Uw rogon u wan’um be’ nib pin nde m’agan’ ko n’en ni ke yog e pumoon rok me weliy ngak u fithik’ e tayfan? U Bible e kan weliy riy murung’agen Sarah ni leengin Abraham ni ma fol  rok. (1 Peter 3:1, 6) Machane ra t’uf ni nge weliy laniyan’ me weliy ni bod rogon e ngiyal’ ni baaram nde tiyan’ Abraham nga boch ban’en nra magawonnag e tabinaw.—Genesis 16:5; 21:9-12.

Ba tamilang nde guy Abraham rogon ni nge rus Sarah ni nge weliy laniyan’, maku de gel lungun u puluwon. Ku arrogon reb i figirngiy ni ma fol ko fonow nu Bible ni dabi towasariy leengin nga i fol u gubin ban’en ni ma yog. Faanra maruweliy e liw rok u fithik’ e sumunguy ma aram e ra i tay e en leengin fan.

Rogon ni ke fol boch e girdi’ ko re fonow ney: James, ni ma par u England ni ke mabgol ni meruk e duw, e gaar: “Kug nang ni dab ug dugliy boch ban’en nib ga’ fan ni dab gog ko ppin rog. Gu ma gay rogon ni gathi goo gag e nga ug lemnageg. Ya gu ma gay rogon ni nggu m’oneg e tin ba t’uf rok.”

George ni ma par u Meriken ni 59 e duw ni ke mabgol e gaar: “Gu ma gay rogon ni dab gu tay e ppin rog ni bod be’ ndariy mat’awun, machane nge par ni ir be’ nib salap ma boor ban’en ni manang.”—Proverbs 31:10.

5

N’EN NI MA YOG BOCH E MABGOL:

“Pumoon rog e der yog rok ni nge turguy e tin ni ngan rin’.”

KENGGIN E MOTOCHIYEL NU BIBLE:

“Gonop ko ppin e ma ayliy e tabinaw, machane balyang rok e ma gothey.” —PROVERBS 14:1, BT.

Faanra pumoon rom e ba mo’maw’ ni nge dugliy ban’en ara nge rin’ e maruwel rok u tabinaw ma baaray dalip ban’en nrayog ni ngam rin’. (1) Rayog ni ngaum par ma ga be yog e tin der yog ni nge rin’ ara (2) mu fek e liw rok ni ir lolugen e tabinaw ara (3) mog ngak nib fel’ e n’en ni be athamgil be rin’. Faan ga ra mel’eg e gal ni som’on ma aram e ga ra gothey e tabinaw rom. Ma ga ra mel’eg e bin dalip ma aram e ga be gelnag e mabgol rom.

Boor e pumoon nib ga’ fan e tayfan u wan’ ko t’ufeg. Ere faan ga ra guy rogon ni nge nang e pumoon rom ni ga be tayfan mab fel’ e n’en ni be rin’ ni be athamgil ni nge gagiyegnag e tabinaw rok ma ra mon’og ko maruwel rok. Riyul’ ni yu ngiyal’ e dabi taareb lanin’mew u ban’en. Ere ba t’uf ni ngam weliyew u taabang. (Proverbs 18:13) Machane thin ni ga ra yog nge lingan e reb e ra kirebnag e mabgol rom ma reb e ra ayuweg. (Proverbs 21:9; 27:15) Mu weliy lanin’um u fithik’ e tayfan ma ra yib angin ngom nib fel’, ni aram e reb i figirngiy ni ma gagiyegnag e tabinaw rok nib fel’ rogon.

Rogon ni ke fol boch e girdi’ ko re fonow ney: Michele, ni ma par u Meriken ma ke gaman 30 e duw ni ke mabgol e gaar: “Chitinag e ir be’ ni baadag ni ma par rok ni bochan e goo ir ni i chuguliymad l’agruw e ppin ni walageg ndariy be’ ni ayuweg. Ere ku bay rog e re n’em. Machane gu ma athamgil ni ngaug fol. Bod ni kug nang ni thingar dab ug dugliy ban’en ni goo gag ya nggog ko pumoon rog.”

Rachel ni ma par u Australia e ke gaman 21 e duw ni kar mabgolgow Mark, maku bay e magawon ko mabgol rok ni bochan rogon ni kan chuguliy. I gaar: “Chitinag e der ma fol ko  chitamag. Tugthin nge ngongol ni dariy e tayfan riy e aram e n’en ni gu ma guy ni gubin ngiyal’. Nap’an ni kafin gu un ko mabgol ma gu ma rin’ e n’en ni ma rin’ e chitinag. Ma faani n’uw boch nap’an mu gu nang feni ga’ fan ni ngaun fol ko fonow nu Bible u murung’agen e tayfan. Ere chiney e ke yog ni nggu parew Mark u taabang ni gamow ba felfelan’.”

6

N’EN NI MA YOG BOCH E MABGOL:

“Dabkiyog ni nggu k’adan’ug ko pi n’en ni ma rin’ e en mabgol rog ni dabug.”

KENGGIN E MOTOCHIYEL NU BIBLE:

“Nge bigimed mi i ayuweg bigimed ko meewar rok u fithik’ e runguy, mu um n’iged fan u wan’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak.”—KOLOSE 3:13.

Som’on ndawor mu mabgolgow ma goo fel’ngin e en mabgol rom e ga ma guy. Ere ku rayog ni ngam rin’ ni aram rogon e chiney, fa? Dariy e maruwar riy ni bay yu ngiyal’ ni ma rin’ e en mabgol rom boch ban’en ni dabum. Machane ngam fithem ni nge lungum, ‘Tin ngan i fel’ngin e en mabgol rog e ngaug yaliy? Tin nib fel’ fa tin nib kireb?’

I weliy Jesus reb e fanathin ni be tamilangnag fan ndab ud yaliyed thibngin e girdi’. I fith ni gaar: “Mang fan ni ga be sap nga ba tabyu’ ni bay u lan mit walagem, ma damur tiyan’um nga baley i gek’iy ni bay u lan owchem?” (Matthew 7:3) Tabyu’ e taareb rogon nga bochi yang i chabung. Machane baley i gek’iy e taareb rogon nga baley i ren ni ma kol e chig ko naun. Mang e be yip’ Jesus fan? “Som’on e ngam chuweg fare ley i gek’iy u lan owchem, nge mu’ ma aram me yog ni mu guy ban’en ngam chuweg fare tabyu’ u lan mit walagem.”—Matthew 7:5.

I yog Jesus e re fanathin ney nib chagil bbugithin ngay ni gaar: “Mu talgad i turguy e kireb nga daken e girdi’, nge dabi turguy Got e kireb nga dakenmed.” (Matthew 7:1, 2, NW) Faanra ga baadag ni nge fek Got owchen ko fare ley i gek’iy nib dubchey u lan owchem mab fel’ ni ngkum fek owchem u thibngin e en mabgol rom.—Matthew 6:14, 15.

Rogon ni ke fol boch e girdi’ ko re fonow ney: Jenny ni ma par u England ma ke gaman mereb e duw ni kar mabgolgow Simon e yog ni gaar: “Kug pirieg ni n’en nib ga’ ni gu ma chalban riy ko pumoon rog e ma son nga fini chugur nga ban’en mfini lemnag ko mang e ngan rin’. Machane som’on ni dawor gu mabgolgow ma aram e n’en ni gu baadag rok. Machane chiney e kug nang ni mus ngog ma bay thibngig, ni bod ni yug gu ma yog e n’en ni nge rin’ e pumoon rog. Gamow be guy Simon rogon ni dab ku ug yaliyew e nochi oloboch romow.”

Rogon ni nge Par e Mabgol nib Fel’

Fapi n’en ni kad weliyed e be dag nra i sum e magawon u lan e mabgol, machane gathi be yip’ fan ndabiyog i pithig. Ere uw rogon ni nge par e mabgol rom nib fel’? Susun ni nge t’uf Got romew ma ngaum folgow ko fonow ni bay u Bible.

Alex nge Itohan ni yow ma par u Nigeria ma ke pag 20 e duw ni kar mabgolgow e kar nangew e re n’ey. Ke gaar Alex: “Kug nang ni ba dake gubin e magawon ni ma sum u lan e mabgol ma rayog i pithig ni faan yira fol ko pi kenggin e motochiyel u Bible.” Ma ppin rok e gaar: “Kug nang feni ga’ fan ni ngaug meybilgow u taabang ma gamow be fol ko pi fonow u Bible ni be yog ni ngaug t’ufegew gamow mu ug gum’an’nagew gamow u puluwmow. Chiney e ke lich boch e magawon romow ko som’on ni gu mabgolgow.”

Faanra ga baadag ni ngkum nang boch e fonow nu Bible nra ayuweg e tabinaw rom, ma gog ngak e Pi Mich Rok Jehovah ngar weliyed ngom e thin ni bay ko guruy ni 14 ko fare ke babyor ni Mang e Ri Be Fil e Bible? b

[Footnotes]

[Picture on page 5]

Gu ma guy rogon ni nggu yoornag e tin ni nggu pi’ ko tin ni be yog ngog, fa?

[Picture on page 6]

Gag e som’on ni gu ma guy rogon ni nge aw e gapas u nap’an ni ke sum e magawon, fa?