Manangem Jehovah, Fa?

“I Somol e manang e piin ni yad girdien.”​—2 TIM. 2:19.

1, 2. (a) Mang e ri ma lemnag Jesus? (b) Mang boch e deer ni ngad lemnaged?

 REB e rran me fith reb e Farise Jesus ni gaar: “Tamachib, bin ngan e motochiyel e ir e th’abi ga’ u fithik’ e Motochiyel?” Me fulweg Jesus ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.” (Matt. 22:35-37) Rib t’uf Jehovah rok Jesus ma ma m’ug ko ngongol rok nrib ga’ fan u wan’ e n’en ni ma lemnag Jehovah ngak. Aram fan nu m’on ni nge yim’ me weliy murung’agen e yul’yul’ ni i tay ngak Got ni gaar: “Kug fol ko tin ni ning e Chitamag chilen ngog gu be par ni ku gub t’uf rok.”​—John 15:10.

² Boor e girdi’ e ngiyal’ ney ni yad ma yog nib t’uf Got rorad, maku er rogodad. Machane, bay boch e deer nib ga’ fan nib t’uf ni ngad lemnaged. Pi deer nem e: Uw rogog u wan’ Jehovah? Rayog ni nggog ni manangeg Jehovah, fa? Gub fel’ u wan’, fa? Ma lemnag Jehovah ni gag reb i girdien, fa? (2 Tim. 2:19) Rib fel’ ni ngad lemnaged nrayog ni nge fel’ e tha’ u thildad e en Th’abi Tolang u ga’ngin e palpalth’ib!

3. (a) Mang fan nib mo’maw’ ni nge mich u wan’ boch e girdi’ nrayog ni ngar manged girdien Jehovah? (b) Mang e ra ayuwegrad ngar thilyeged lanin’rad?

³ Machane, bay boch e girdi’ nib t’uf Jehovah rorad nib mo’maw’ ni ngar lemnaged nrayog ni nge fel’ thilrad Jehovah. Ma boch e girdi’ e yad ma lemnag ndariy farad, ma aram fan ni yad ma lemnag ndabiyog ni ngar manged girdien Jehovah. Machane, gad ba felfelan’ ya kad nanged ni gathi aram rogon ni ma lemnagdad. (1 Sam. 16:7) Am lemnag: Mang fan ni ga be beeg e re ke babyor ney? Mang fan ni ga be athamgil ni ngam pigpig ngak Jehovah u polo’ i gum’irchaem, ngu polo’ i lanin’um, ngu polo’ i lem rom, ngu polo’ i gelngim? Faanra kam ognagem ngak Jehovah kam un ko taufe, ma mang fan ni kam rin’? Be yog e Bible ni Jehovah ni ir e en ni ma yaliy gum’irchaen e girdi’ e ma chugurnag e girdi’ ngak. (Mu beeg e Haggai 2:7; John 6:44.) Ere rayog ni nga mog ni ga be pigpig ngak Jehovah ni bochan e ke chugurnagem ngak. Ma dariy e ngiyal’ nra digey e piin ni kar chugurgad ngak ni faanra ur pared ni yad ba yul’yul’. Rib ga’ farad u wan’, ma ri yad ba t’uf rok.​—Ps. 94:14.

4. Mang fan ni ngaud lemnaged feni ga’ fan e tha’ u thildad Jehovah?

⁴ Chiney ni ke chugurnagdad Jehovah ngak e ba t’uf ni ngaud pared ni gad ba t’uf rok. (Mu beeg e Jude 20, 21.) Dab da paged talin ni be yog e Bible nrayog ni ngad man’gad nga orel rok Got. (Heb. 2:1; 3:12, 13) Bod nu m’on ni yog apostal Paul fapi thin ni bay ko 2 Timothy 2:19, me weliy murung’agen Hymenaeus nge Filetus. Ba tamilang ni immoy ba ngiyal’ ni i pigpig e gali cha’ney ngak Jehovah, me munmun mi yow digey e tin riyul’. (2 Tim. 2:16-18) Maku aram rogon ni rin’ boch e girdi’ u lan e ulung nu Galatia. (Gal. 4:9) Ere, rib ga’ fan ni ngaud lemnaged feni ga’ fan e tha’ u thildad Jehovah.

5. (a) Mang boch e fel’ngin nib ga’ fan u wan’ Got? (b) Mang e gad ra weliy murung’agen?

⁵ Bay boch e fel’ngin nib ga’ fan u wan’ Jehovah. (Ps. 15:1-5; 1 Pet. 3:4) L’agruw ko pi n’em e aram e michan’ nge sobut’an’. Gad ra weliy murung’agen l’agruw e pumoon ni yow ba t’uf rok Jehovah ni bochan e ma m’ug e gal fel’ngin ney ko ngongol rorow. Ku gad ra weliy murung’agen reb e pumoon nib tolangan’  nde par nib fel’ u wan’ Got. Boor ban’en nrayog ni ngad filed rorad.

Chitamangin e Piin ni Ke Mich Got u Wan’rad

6. (a) Mang e rin’ Abraham ni bochan e ba mich u wan’ e pi n’en ni ke micheg Jehovah? (b) Uw rogon ni manang Jehovah Abraham?

⁶ Abraham e ba mich Jehovah u wan’. Ma yima yog ni ir e “chitamangin urngin e piin ni ke mich Got u wun’rad.” (Gen. 15:6; Rom. 4:11) Bochan nib mich Got u wan’, ma aram fan ni m’agan’ ngay ni nge digey e tabinaw rok, nge pi fager rok, nge maruwel rok, nge gubin ban’en ni bay rok nge yan i par nga reb e binaw nib palog. (Gen. 12:1-4; Heb. 11:8-10) Boor e duw nga tomuren ni ke digey e binaw rok ma ka be par nib gel e michan’ rok. I m’ug nriyul’ e re n’ey u nap’an ni rin’ e n’en ni yog Jehovah ngak ni aram e nge pi’ Isak ni fak ni maligach. (Heb. 11:17-19) I mich u wan’ Abraham e pi n’en ni micheg Jehovah, ma aram fan ni i par nib ga’ fan u wan’ Got. Ri manang Jehovah Abraham nib fel’ rogon. (Mu beeg e Genesis 18:19.) Re n’ey e be yip’ fan ni gathi kemus ni manang Jehovah ni bay Abraham, ya ku ma t’ufeg ni bod reb e fager rok.​—Jas. 2:22, 23.

7. (a) Mang e manang Abraham u murung’agen e pi n’en ni ke micheg Jehovah? (b) Uw rogon ni m’ug e michan’ rok?

⁷ Nap’an ni kab fas Abraham, ma de tafanay fare binaw nni micheg ni yira pi’ ngak. Maku de guy e piin owchen ni kar boded “urngin e yan’ ni bay u dap’e l’ay.” (Gen. 22:17, 18) Yugu aram rogon nde lebug e pi n’ey u nap’an ni kab fas Abraham, machane de war e michan’ rok ngak Jehovah. Manang ni gubin ban’en ni ma micheg Got e ma riyul’. Ma i dag nib mich e pi n’em u wan’ u rogon e par ni i tay. (Mu beeg e Hebrews 11:13.) Taareb rogodad Abraham u wan’ Jehovah, fa?

Mu Sonnag Jehovah ni nge Rin’ Ban’en Ya Nge M’ug nib Mich u Wan’um

8. Mang boch ban’en ni boor e girdi’ ni yad baadag ni ngar rin’ed ara nge yog ngorad?

⁸ Sana bay boch ban’en ni gad baadag ni ngad rin’ed ara nge yog ngodad, ni bod ni ngad uned ko mabgol, nge ngad fakayed e bitir, ma i par nib fel’ fithik’ i dowdad. Dariy ban’en nib kireb ko pi n’ey. Machane, boor i gadad e sana dabiyog ni nge rin’ ara nge yog ngak e n’en ni baadag. Faanra bay ban’en nri gad baadag ndabiyog ni nge yog ngodad e chiney, ma mang e gad ra rin’? N’en ni gad ra rin’ e be dag feni gel e michan’ rodad.

9, 10. (a) Mang e ke rin’ boch e girdi’ ya nge yog ngorad e n’en ni yad baadag? (b) Uw rogon u wan’um e pi n’en ni ke micheg Jehovah nra riyul’?

⁹ De fel’ ni ngad togopuluwgad nga rogon ni be pow’iydad Got ni bochan e nge yog ngodad e tin ni gad baadag. Re n’ey e rayog ni  nge kirebnag e tha’ u thildad Jehovah. Bod ni bay boch e tapigpig rok Got ni kar mel’eged boch e tafalay nib togopuluw ko pi kenggin e motochiyel nu Bible. Ma boch e kar uned nga boch e maruwel ni ke lichnag e tayim rorad ni fan ko tabinaw rorad ara muulung. Ma boch e ke un ngak reb e ppin ara reb e pumoon nder pigpig ngak Jehovah? Faanra rin’ reb e Kristiano ban’en ni aray rogon, ma riyul’ ni be guy rogon ni nge nang Jehovah, fa? Am lemnag e n’en nra buch ni faan gomanga de k’adan’ Abraham nge sonnag e pi n’en ni ke micheg Jehovah. Ra uw rogon u wan’ Jehovah? Ma uw rogon ni faan gomanga rin’ Abraham e n’en ni baadag, ma de sonnag Jehovah ni nge rin’ ban’en, me guy rogon ni nge mang ir e gilbuguwan? (Mu taareb rogonnag ko Genesis 11:4.) Gur, ku ra i lemnag Jehovah ni yow ba fager?

¹⁰ Mang e pi n’en nri ga baadag ni ngam rin’ ara nge yog ngom? Ba gel e michan’ rom nrayog ni ngam sonnag Jehovah ni nge pi’ ngom, fa? Ke micheg nra pi’ urngin ban’en ni nge “yog” ngak gubin mit e yafas. (Ps. 145:16) Bay boch ban’en ni ke micheg Jehovah ni sana dabi riyul’ ko ngiyal’ ni ga be lemnag. Machane faanra ud pared u reb e kanawo’ ni be dag ni bay e michan’ rodad ni bod e michan’ rok Abraham, ma dabi pag Jehovah tildad, ya ra tow’athnagdad.​—Heb. 11:6.

Be’ nib Sobut’an’ nge Be’ nib Tolangan’

11. Mang e i rin’ Korah u lan boor e duw?

¹¹ Ngad weliyed murung’agen l’agruw i pumoon nib thil e ngongol rorow, ni aram Moses nge Korah. N’en ni buch rorow e ra ayuwegdad ngad nanged ni ma lemnagdad Jehovah ni be yan u rogon ni gad ma tayfan e pi n’en ni ma dugliy nge rogon ni ma rin’ ban’en. Korah e yib ko ganong rok Levi ko fare ke girdi’ rok Kohath. Sana i guy rogon ni ayuweg Jehovah piyu Israel u nap’an ni ur moyed ko fa gi Day ni Red Sea. Ki guy rogon ni pufthinnag Jehovah piyu Israel ndar folgad u daken e Burey ni Sinai, miki ayuwegrad i fek fare kiwaren e m’ag. (Ex. 32:26-29; Num. 3:30, 31) Ba tamilang ni boor e duw ni i par nib yul’yul’ ngak Jehovah, ma aram fan ni i tay piyu Israel fan.

12. Uw rogon ni kirebnag e tolangan’ e tha’ u thilin Korah nge Got nrogon ni bay ko sasing ko page 30?

¹² Nap’an ni be yan piyu Israel i yan ko fare  Nam ni Kan Micheg me lemnag Korah nib kireb rogon ni be pow’iyrad Jehovah. Baadag ni nge thilyeg boch ban’en. Ma aram miki chag 250 e pumoon ngak ngar togopuluwgad. Kar lemnaged ni yad ba fel’ u wan’ Jehovah. Ma aram me lungurad ngak Moses: “Kaygi pag rogon e n’en ni kam rin’ew! Gubin e girdi’ nu Israel nib mil farad ngak Somol, ma bay Somol rodad ni gadad gubin.” (Num. 16:1-3, BT) Ireray e lem nge ngongol u fithik’ e tolangan’! I pag rogon e pagan’ nra ted nga rogon ni ur rin’ed ban’en. Ma aram me gaar Moses ngorad: “Bayi dag Somol ngodad ko mini’ e en nib mil fan ngak.” (Mu beeg e Numbers 16:5, BT.) Faani bin migid e rran me yim’ Korah nge fa piin nra manged ngak.​—Num. 16:31-35.

13, 14. Mang boch e kanawo’ ni dag Moses riy ni ir be’ nib sobut’an’?

¹³ Moses e ri yow ba thil Korah. “Ir e th’abi sobut’an’ u fithik’ e girdi’ nu fayleng.” (Num. 12:3) I m’ug nrib sobut’an’ ya i rin’ urngin ban’en ni i tay Jehovah chilen ngak. (Ex. 7:6; 40:16) Dariy bang u Bible ni be yog ni i togopuluw Moses nga rogon ni i rin’ Jehovah ban’en ara i damumuw ni bochan e thingari fol rok Jehovah. Bod ni boor nochi ban’en ni yog Jehovah ni ngan rin’ ni fan ko fare tabernacle. Pi n’ey e ba muun ngay raen e tret nge urngin e nochi opol ni nge fanay piyu Israel ni ngar ngongliyed fa gi mad ko tent ngay. (Ex. 26:1-6) Faanra ba mo’maw’ e n’en ni ke yog be’ ni ma yog e thin ko ulung rok Got ni ngam rin’, ma sana bay yu ngiyal’ nra mulan’um. Machane, Jehovah e ir e en ni ma yaliy e ulung nib flont. Ma pi’ e maruwel ngak e pi tapigpig rok, mab pagan’ ngay ni yad ra rin’ nib fel’ rogon. Faanra boor ban’en ni ke yog ni ngan rin’, ma bay fan ni ke yog. De damumuw Moses ngak Jehovah fe lemnag nder tay Jehovah fan ni bochan e gubin ban’en ma be yog rogon ngak ni nge rin’. Ya yog ngak fapi chon e maruwel ni ngar rin’ed urngin ban’en nrogon ni ke yog Jehovah. (Ex. 39:32) Ireray e lem nge ngongol u fithik’ e sobut’an’. Manang Moses ni maruwel ni yibe rin’ e maruwel rok Jehovah, ma kemus ni be fanayrad Jehovah ni ngar rin’ed e re maruwel nem.

¹⁴ Ki m’ug nib sobut’an’ Moses u nap’an ni mada’nag boch ban’en ni meewarnag laniyan’. Immoy bayay ndaki yog ni k’adan’ u puluwon fapi girdi’ ni ur gun’gun’gad ma aram ma daki yog ni nge pining e sorok ngak Jehovah. Bochan e re n’em ma aram me yog Jehovah ngak ndab ki pow’iy e girdi’ rok nga lan fare Nam ni Kan Micheg. (Num. 20:2-12) Boor e duw ni i gafgow Moses nge Aron u puluwon piyu Israel. Ma chiney e dabki yog ngak Moses e n’en ni ke n’uw nap’an ni i sonnag ni bochan taareb e oloboch ni ke rin’. Ere mang e ke rin’ Moses? Kari kireban’, machane ke par nib sobut’an’ ma ke fol ko n’en ni ke dugliy Jehovah. Manang ni Jehovah e ir reb e Got nib ‘mat’aw urngin e tin ni ma rin’.’ (Deut. 3:25-27; 32:4) Ngiyal’ ney e nap’an ni gad ra lemnag Moses ma gad manang ni ir be’ ni manang Jehovah.​—Mu beeg e Exodus 33:12, 13.

 Ra Ngan Fol Rok Jehovah Mab T’uf ni Ngan Sobut’an’

15. Mang e rayog ni ngad filed ko n’en ni rin’ Korah ni ir be’ nib tolangan’?

¹⁵ Kemus ni faan gad ra fol ko pi n’en ni yibe thilyeg u lan e ulung rok Jehovah, ma gad tayfan e piin ni yad ma yog e thin u lan e ulung, ma aram e rayog ni ngad fel’gad u wan’ Jehovah. Mang e gad ma rin’ u nap’an nra dugliy e pi pumoon ney boch ban’en ni ngan rin’, ara ra thilyeged rogon ni yibe rin’ boch ban’en u lan e ulung? Daki par Korah nge piin ni ur folgad rok nib fel’ thilrad Jehovah ni bochan e i pagan’rad ngorad nge pi n’en ni ur rin’ed. Ba tolangan’rad ma daki michan’rad. I lemnag Korah ni Moses e ir reb e pilibthir ni yugu be dugliy boch ban’en ni lem rok. Machane, ke pagtalin ni Jehovah e ir e be pow’iyrad. Ere n’en ni buch e daki yul’yul’ ngak e piin ni be maruwel Got u dakenrad. Susun ni nge sonnag Korah Jehovah ni nge rin’ ban’en, ya rayog ni nge ayuweg nge nang fan e pi n’en ni yibe rin’ nge tin ni yibe thilyeg. Bochan nib kireb e ngongol rok Korah, ma aram fan ni ki mada’ ko ngiyal’ ney ma danir lemnag e pi duw ni i pigpig ngak Jehovah nib yul’yul’, ya ba ga’ ni yima lemnag e kireb ni rin’ ni bochan e tolangan’.

16. Uw rogon nra ayuwegdad e n’en ni rin’ Moses u fithik’ e sobut’an’?

¹⁶ N’en ni buch rok Korah e ba fonow ngak e piin piilal nge ku boch e girdi’ u lan e ulung e ngiyal’ ney. Ra ngad sonnaged Jehovah ni nge rin’ ban’en nge ngad folgad rok e piin ni yad be yog e thin u lan e ulung, ma thingar da sobut’niged lanin’dad. Ma m’ug ni gad ba sobut’an’ ni bod Moses, fa? Gad manang fan ni be maruwel Jehovah u daken e piin ni yad ma yog e thin u lan e ulung ma gad ma fol rorad, fa? Gad ma t’ar lanin’dad ni faanra dan rin’ ban’en nrogon ni gad be lemnag, fa? Faan gad ra rin’ e pi n’ey, ma aram e gad ra fel’ u wan’ Jehovah. Ma faanra gad ba sobut’an’ ma gad ma fol, ma aram e ra ga’ fadad u wan’.

Jehovah e Manang e Piin ni Yad Girdien

17, 18. Mang e ra ayuwegdad ni ngaud pared ni gad ba fel’ u wan’ Jehovah?

¹⁷ Ba fel’ ni ngad lemnaged e pi n’en nib fel’ ni i rin’ e piin ni yad ba t’uf rok Jehovah mab fel’ e tha’ u thilrad. Abraham nge Moses e dar flontgow ma immoy e magawon rorow ni bod gadad. Machane, i tay Jehovah ni yow girdien. Ba thil ko n’en ni buch rok Korah. N’en ni rin’ e be dag nrayog ni ngad paloggad rok Jehovah ma dab kud pared ni gad ba fel’ u wan’. Ere nge bagadad me fith ir ni nge gaar: ‘Uw rogog u wan’ Jehovah? Mang e gu ra fil ko pi n’ey ni be weliy e Bible murung’agen?

¹⁸ Pi tapigpig rok Jehovah ni yad ba yul’yul’ e ma tayrad ni yad girdien. Re n’ey e rra fal’eg lanin’dad. Ere mu athamgil nga i m’ug e michan’ nge sobut’an’ ko ngongol rom, ya gal fel’ngin ney e ra ga’nag fam u wan’ e Got rodad. Reb e tow’ath nrib manigil e nge nangdad Jehovah. Ma piin ni yad ba fel’ u wan’ e yad be par ni yad ba felfelan’ e chiney ma boor e tow’ath nra yog ngorad boch nga m’on.​—Ps. 37:18.

Ka Ga Manang?

• Mang e be yip’ fan ni nge nangdad Jehovah?

• Uw rogon ni ngan folwok ko michan’ rok Abraham?

• Mang e gad ra fil ko n’en ni buch rok Korah nge Moses?

[Study Questions]

[Picture on page 29]

Ba mich u wan’dad nra riyul’ e pi n’en ni ke micheg Jehovah ni bod Abraham, fa?

[Picture on page 30]

Korah e ba tolangan’ ma dabun ni nge fol ko yaram

[Picture on page 31]

Ma lemnagem Jehovah ni gur be’ ni gab sobut’an’ ma ga ma fol, fa?