Mu Fil Ban’en Ko Thin Rok Got

Mang Fan ni Bay e Ulung rok Got?

Re article ney e bay boch e deer riy ni sana kaam fith kafram. Be weliy e re article ney e fulweg riy ni kan fek u Bible. Pi Mich Rok Jehovah e yad baadag ni ngar weliyed e fulweg riy ngom.

1. Mang fan ni ke yarmiy Got fare ulung nu Israel?

Ke yarmiy Got e piin ni owchen Abraham ni ngar manged ba nam me pi’ e motochiyel ngorad ni ngar folgad riy. Me dugliy fithingan e re nam nem ni Israel, me tay ni ir e ra ayuweg e bin riyul’ e liyor nge Thin rok nib thothup. (Psalm 147:19, 20) Ere girdi’ u urngin e nam e ke fel’ rogorad riy.​—Mu beeg e Genesis 22:18.

Ke mel’eg Got piyu Israel ni ngar manged e pi mich rok. Nap’an ni kar folgad ma ki yib angin e motochiyel rok Got ngorad. (Deuteronomy 4:6) Gad ra fil murung’agen piyu Israel kakrom ma rayog ni ngad nanged boch murung’agen e bin riyul’ e Got.​—Mu beeg e Isaiah 43:10, 12.

2. Mang fan ni kan yarmiy e ulung ko tin riyul’ e Kristiano?

Munmun ma daki fel’ piyu Israel u wan’ Got, me tay fare ulung ni Kristiano nga lon. (Matthew 21:43; 23:37, 38) Kakrom ma piyu Israel e yad e pi mich rok Got. Ma ngiyal’ ney e tin riyul’ e Kristiano e kar manged pi mich rok Jehovah.​—Mu beeg e Acts 15:14, 17.

Ke yarmiy Jesus pi gachalpen ni ngar machibnaged murung’agen Jehovah ma ngar pingeged e girdi’ u urngin e nam ngar manged pi gachalpen Jesus. (Matthew 10:7, 11; 24:14; 28:19, 20) Ke chugur ni nge m’ay e re maruwel ney. Ireray e som’on ni ke ulunguy Jehovah bokum milyon e girdi’ u urngin e nam ni ngar uned ko bin riyul’ e liyor. (Revelation 7:9, 10) Tin riyul’ e Kristiano e kun yarmiyrad ni ngar maruwelgad u taabang ya nge yog ni ngar ayuweged yad. Taareb rogon e yaram ko muulung ni yad ma tay u ga’ngin yang u fayleng ya yad be fanay e Bible.​—Mu beeg e Hebrews 10:24, 25.

 3. Uw rogon ni ke tabab fare ulung ko Pi Mich Rok Jehovah e ngiyal’ ney?

Fare ulung ko Pi Mich Rok Jehovah e ngiyal’ ney e tabab u ba ngiyal’ u thilin e pi duw ni 1870 nge mada’ ko 1879. Immoy ba ulung i girdi’ ni yad ma fil e Bible nra tamilangnaged e tin riyul’ u Bible ni ke n’uw nap’an ni ke par nib mith. Yad manang ni ke yarmiy Jesus e ulung ni Kristiano kakrom nge yog ni ngar machibgad. Ere aram fan nra tababgad i machibnag murung’agen Gil’ilungun Got ko girdi’, ma re maruwel nem e yira rin’ u ga’ngin yang u fayleng. Nap’an fare duw ni 1931 ma kar mel’eged fare ngachal ni Pi’ Mich Rok Jehovah ni ir e ngaun pining ngorad.​—Mu beeg e Acts 1:8; 2:1, 4; 5:42.

4. Uw rogon ni kan yarmiy e ulung ko Pi Mich Rok Jehovah e ngiyal’ ney?

U lan e bin som’on e chibog ma ulung ni Kristiano u boor e nam e ke fel’ rogorad ko ayuw ni ma pi’ fare ulung ni ma pow’iyey, ya yad ma tay fan Jesus ni ir e en lolugrad. (Acts 16:4, 5) Maku arrogon e ngiyal’ ney ni Pi Mich Rok Jehovah e yad ma tay fan Jesus ni ir e En Ta Yog e Thin rorad. (Matthew 23:9, 10) Maku ma ayuwegrad fare Ulung ni Ma Pow’iyey, ya yad ma fanay e thin nu Bible ni ngar pied e athamgil nga lanin’rad ma yad ma pow’iyrad. Ke pag 100,000 e ulung ni yad ma ayuweg. Ra reb e ulung, ma bay e piin piilal riy ni yad ma ayuweg e girdi’ rok Got u fithik’ e t’ufeg.​—Mu beeg e 1 Peter 5:2, 3. 

Ulung ko Pi Mich Rok Jehovah e kan yarmiy ni ngar machibnaged fare thin nib fel’, ma ngar pingeged e girdi’ ni ngar manged pi gachalpen Jesus. Bochan ni yad baadag ni ngar ayuweged e girdi’ u gubin yang, ma aram fan ni yad ma piliyeg e pi babyor rorad ni kan fek u Bible ni ke pag 500 mit e thin, mar wereged ko girdi’. Yad ma machib u mit e tabinaw i yan ni bod e n’en ni i rin’ pi gachalpen Jesus kakrom. (Acts 20:20) Yad ma fil e Bible ngak e girdi’ ni yad baadag e tin riyul’. Bochan ni girdi’ rok Jehovah e yad ma tiyan’ u rogon ni ngar felfelan’naged Got ma yad ma ayuweg e girdi’, ma aram fan ni yad ba felfelan’.​—Mu beeg e Psalm 33:12; Acts 20:35.

Mu guy fare guruy ni 19 ko fare babyor ni ke ngongliy e Pi Mich Rok Jehovah ni Mang e Ri Be Fil e Bible?