Wuin e Ra Yib e Armageddon?

“Mu gu sap, mu gguy e girdi’ ni ke muulung ni pire’ ni pire’ ndariy be’ nrayog ni nge theegrad! Nra bad u gubin e nam, nge ganong, nge gubin mit e girdi’, ngu gubin e thin . . . Pi cha’nem e fapi girdi’ ni kar thapgad ngaray u fithik’ fare gafgow ni ba ga’.”​—REVELATION 7:9, 14.

KE CHUGUR fare mahl ni Armageddon. Uw rogon ni kad nanged?

Chiney e bay ba ulung i girdi’ u fayleng ni yad ma pigpig ngak Jehovah ma yad ma fol ko pi motochiyel nu Bible. Bochan e ayuw rok Got ma bokum milyon e girdi’ ni kar bad u gubin e nam, nge ganong, nge gubin e thin ni be ayuwegrad ni ngar muulunggad u taabang ni yad ba ulung i walag nib taareban’rad, ma bay e t’ufeg u thilrad. Ma yad e Pi Mich Rok Jehovah.​—John 13:35.

Dab ki n’uw nap’an ma bayi kunuy Satan e pi salthaw rok ni ngar chamgad ko pi girdi’ ney. (Ezekiel 38:8-12; Revelation 16:13, 14, 16) Mang e mich riy nra buch e re n’ey? Be weliy e Bible boch ban’en nra buch nra ayuwegdad ngad nanged e ngiyal’ nra yib e Armageddon. Boor ko pi n’ey e be buch e chiney.

Boch Ban’en ni Ga Be Guy ni Be Lebug

I fith pi gachalpen Jesus ngak ko uw rogon me nang e girdi’ ni ke tabab e “ngiyal’ ni ke chugur nga tomuren e re m’ag ney.” (Matthew 24:3, NW) I fulweg Jesus e deer rorad ni aram e weliy murung’agen ba ngiyal’ nra taw ngay ma “bay reb e nam me cham ngak reb e nam, ma gin nsuwon reb e pilung e bayi mahl ko gin nsuwon reb e pilung. Ma bay i yib e uyongol nge durru’ u gubin yang.” Miki ulul ngay ni gaar: “Urngin e pi n’ey e bod e bin som’on e amith ni ma yib ngak be’ ni nge gargel.” (Matthew 24:7, 8) Ki yog apostal Paul e “tin tomren e rran,” ko re ngiyal’ i n’em, miki yog nra “mo’maw’” e par. (2 Timothy 3:1) Gathi pi yiiy ney e be tamilangnag rarogon e pi n’en ni be buch e ngiyal’ ney?

 Mang fan nra mo’maw’ e par ko ngiyal’ ney? Ke weliy apostal John fan. I yiiynag ‘ndabi n’uw nap’an’ nra gagiyegnag Satan nge pi moonyan’ rok e re fayleng ney. Be yog e Bible ni chiney e “kari damumuw” Satan. (Revelation 12:7-12) Ga be guy ni ke gel e damumuw ko girdi’ e ngiyal’ ney ma ke yoor e cham ni yibe tay u ga’ngin yang e fayleng, fa?

Ki yog Jesus nra taw ko ngiyal’ ney ni ke mo’maw’ e par ma yira mu’nag reb e maruwel ni yugu ba thil. I gaar: “Re thin rok Got ney nib fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) Ngiyal’ ney e ke pag 235 e nam nge 500 mit e thin ni be machibnag e Pi Mich Rok Jehovah fare thin nib fel’ u murung’agen Gil’ilungun Got riy. Fa gal ke babyor ni Wulyang ko Damit nge Awake!, e aram l’agruw mit e babyor ni yibe wereg u ga’ngin yang e fayleng nib puluw e thin riy ko Bible. Sogonap’an 100 mit e thin ni kun pilyeg e Bible ngay. Maruwel ni ma rin’ e Pi Mich Rok Jehovah e ban’en ni kar ognaged yad ngay ma be yog ni ngar rin’ed ni bochan e salpiy ni ayuw ni yibe pi’. Gur, re maruwel ni machib ney e ke lebguy fare yiiy rok Jesus?

Ku be weliy e Bible e pi n’en nra buch nra k’aring e mahl nga thilin Jehovah Got nge piin ni yad ma togopluw ngak. Ngad weliyed dalip e yiiy ndab ki n’uw nap’an mag guy ni ke lebug.

Boch Ban’en Ndab Ki N’uw Nap’an Mag Guy ni Ke Buch

Yiiy ni 1. Be yog e Bible nra yog e pi nam ni “ke gapas ndariy ban’en nra buch.” Bay ra lemnaged ni be yan ni ngar pithiged boch e magawon nib ga’. Machane pi n’en nra buch nga tomuren ni yira yog e re bugithin ney e dariy e gapas riy.​—1 Thessalonika 5:1-3.

Yiiy ni 2. Bin migid e ra turguy e pi am ni ngar togopuluwgad ko pi yurba’ i teliw u fayleng. Pi am ney e ke fanathinnag e Bible nga ba gamanman; ma pi yurba’ i teliw ni googsur u fayleng e kan fanathinnag ngak be’ nib pin ni ke par nga daken keru’ e re gamanman ney. (Revelation 17:3, 15-18) Re gamanman ney ni be yip’ fan ban’en, e ra rin’ e n’en nib m’agan’ Got ngay ni aram e nge thang e pi yurba’ i teliw ni googsur ni yad ma yog ni yad be liyor ngak Got.

I fanay apostal John e fanathin u nap’an ni weliy e n’en nra buch ni gaar: “Fa ragag i gagey ni kam guy nge fare gamanman e bay ra fanenikayed fare pin ni ma chuway’ ngak; bay ra feked urngin ban’en rok mi yad pag ndakuriy e mad u daken; ma bay ra longuyed e ufin u downgin mi yad li’ ko nifiy ngem’. Ya ke ta’ Got nga lan gum’ircha’rad ni ngar ngongliyed e tin ni be finey.”​—Revelation 17:16, 17.

Yiiy ni 3. Tomuren e re n’ey ma ra kunuy Satan e pi nam nga taabang ni ngar gafgownaged e pi tapigpig rok Jehovah Got.​—Revelation 7:14; Matthew 24:21.

Mang e Ra Rin’ e Re N’ey Ngom?

Sana ba mo’maw’ ni nge mich e pi n’ey u wan’um ni faanra dawori yog ni ngam fil e Bible nib fel’ rogon. Machane bay fan ni nge pagan’dad ndab ki n’uw nap’an me lebug e pi n’ey. Pi yiiy u Bible ni ke lebug e be micheg nra buch e pi n’ey. *

Mang ndab mu tay e tayim ni ngam gay ko mang fan ni ke mich u wan’ e Pi Mich Rok Jehovah ni ke chugur fare “mahl ni fan ko fare rran ni ba ga’ fan, ni Rran rok Got ni Gubin ma Rayog Rok” nge fan nde t’uf ni ngam rus ngay? Mu pagrad ngar weliyed ngom e n’en ni be yog e Bible ni thingar mu rin’ mag un ngak e piin nra ayuwegrad Jehovah Got. (Revelation 16:14) N’en ni ga ra fil e rayog ni nge thilyeg rogon ni ga ma lemnag e pi n’en ni bay nga m’on.

[Footnote]

[Blurb on page 8]

Fare maruwel ni be rin’ e Pi Mich Rok Jehovah e be lebguy e yiiy nu Bible, fa?